“Bai Yu Bekim Olsem Wanem?”

¹ Olsem wanem? Yu laikim tok bilong God tasol yu hatwok long tingim ol stori bilong Baibel o yu hatwok long save long sampela tok bilong Baibel i stap long wanem hap? Yu laik bai ol pikinini bilong yu i save long ol bikpela tok bilong Baibel? Dispela hap “Bai Yu Bekim Olsem Wanem?” i stap long pes 31 bilong olgeta Awake! na Kirap! inap helpim ol yangpela na ol man i bikpela pinis tu long kisim save gut long Baibel.​—⁠Ap. 17:⁠11.

² Olsem wanem yu ken mekim gutpela wok long dispela hap? Awake! bilong Janueri 2006 i kamapim dispela tok: “Lusim liklik haptaim long lukim pes 31 . . . Ol pikinini bai amamas long sampela hap bilong en; ol narapela tok i stap bai traim save bilong ol man i save gut long Baibel. Dispela hap ‘Long Wanem Taim?’ bai helpim yu long wokim wanpela taim-lain olsem sat i makim ol man long Baibel i stap long wanem taim na wanem taim ol bikpela samting i bin kamap. Bai yu painim bekim bilong ol tok long dispela hap ‘Insait Long Dispela Magasin’ long magasin yet, tasol bekim bilong ol narapela askim bai i stap long narapela pes bilong dispela magasin. I gutpela yu mekim wok painimaut paslain long yu ritim ol bekim bilong ol dispela askim na bihain yu ken toktok wantaim ol narapela long ol samting yu bin lainim. Yu inap mekim wok long dispela hap ‘Bai Yu Bekim Olsem Wanem?’ long famili stadi tu.”

³ Planti famili i mekim wok long en bilong mekim famili stadi bilong ol. Wanpela mama i tok: “Mi na man bilong mi i ting i gutpela long mekim wok long dispela hap ‘Children’s Picture Search’ long famili stadi bilong mipela na bai pikinini meri bilong mipela i gat 3-pela krismas bai amamas long insait long stadi. Mipela i save amamas long lukim em i kisim Awake! bilong em yet na opim olgeta wan wan pes bilong painim ol piksa.” Wanpela papa long Brasil i tok: “Mi na pikinini man bilong mi i gat 7-pela krismas i laikim tru dispela hap bilong Awake! Dispela hap i helpim Moises long putim gut yau, painim ol skripsa long Baibel, na laikim ol piksa, na kliagut long ol det.” Ashley i gat 8-pela krismas i tok: “Tenkyu long putim dispela hap ‘Bai Yu Bekim Olsem Wanem?’ long baksait bilong Kirap! Dispela hap i helpim mi long kisim save long planti samting long Baibel.”

⁴ I gutpela yu mekim wok long dispela hap “Bai Yu Bekim Olsem Wanem?” long famili stadi bilong yupela. Yu inap mekim wok long Indeks o Watchtower Library long CD-ROM bilong painim bekim bilong sampela askim i hatwok. Taim yu mekim olsem, bai yu skulim ol pikinini bilong yu long mekim wok painimaut. Sapos yu gat ol pikinini i bikpela liklik, orait sampela de paslain long famili stadi, i gutpela yu makim ol long mekim wok painimaut long dispela hap “Mi Husat?” o “Long Wanem Taim?” Orait long taim bilong stadi ol i ken stori long ol samting ol i painim. Taim papamama i mekim wok long dispela pes bilong nius, ol inap putim ol tok bilong Baibel long bel bilong ol pikinini bilong ol, na helpim ol long save long “tok bilong God” taim ol i liklik yet.​—⁠2 Ti. 3:15; Lo 6:⁠7.

[Askim Bilong Stadi]

1. Planti i gat wanem hatwok?

2. Olsem wanem yumi ken mekim wok long ol wan wan hap bilong “Bai Yu Bekim Olsem Wanem?”

3. Olsem wanem dispela hap “Bai Yu Bekim Olsem Wanem?” i helpim sampela famili? Yu save laikim tru wanem hap bilong en?

4. Olsem wanem ol famili i ken mekim wok long dispela hap “Bai Yu Bekim Olsem Wanem?” taim ol i mekim famili stadi bilong ol?