I Stap na Wok Bilong Jisas

Mama i Karim Man Bilong Redim Rot

TAIM bilong Ilisabet i karim pikinini em i klostu. Inap tripela mun Maria i bin i stap wantaim Ilisabet. Tasol nau Maria i mas lusim Ilisabet na i go bek long ples bilong em long Nasaret. Inap 6-pela mun moa na bai em tu i karim pikinini.

Maria i lusim Ilisabet na taim i kamap bilong Ilisabet i karim pikinini. Em i karim gut pikinini na mama wantaim pikinini i orait! Ol wanples na ol wanlain bilong Ilisabet ol i amamas wantaim em long dispela pikinini.

Lo bilong God i tok, long de namba 8 ol i mas katim skin bilong pikinini man. Olsem na long de namba 8 ol pren na ol wanlain i kam long haus. Ol i laik givim nem Sekaraia long pikinini, olsem nem bilong papa. Tasol Ilisabet i tok, ‘Nogat! Yumi mas kolim nem bilong em Jon.’ Ensel Gebriel i bin tok olsem. Yu tingim?

Tasol ol pren bilong em i tok: ‘I no gat wanpela kandere bilong yu i gat dispela nem.’ Na ol i mekim mekim long han na ol i askim papa, em i laik givim wanem nem long pikinini. Sekaraia i tok long kisim wanpela slet na em i raitim tok, olsem: “Nem bilong em Jon.”

Na nau tasol maus bilong Sekaraia i op na em inap toktok gen. Em wanpela mirakel! Maus bilong Sekaraia i pas long wanem, taim ensel Gebriel i tokim em, em wantaim Ilisabet bai kamapim pikinini, em i no bilipim dispela tok. Orait, taim maus bilong em i op na em i kirap long toktok, ol wanples bilong em ol i kirap nogut tru na ol i tingting planti long bel bilong ol, na ol i tok, ‘Dispela pikinini bai kamap wanem kain man?’

Na spirit holi i pulap long Sekaraia, na em i mekim tok profet long pikinini bilong em, olsem: ‘Bihain bai ol i kolim em profet bilong God Antap Tru, na bai em i go pas long Jehova bilong redim rot bilong em. Bai em i lainim ol manmeri na bai ol i save God i laik tekewe sin bilong ol bambai em i ken kisim bek ol.’

Maria i kamap pinis long Nasaret na em i no marit yet. Orait, taim ol man i lukim em i gat bel, wanem samting bai kamap? Luk 1:56-80; Levitikas 12:2, 3

◆ Mama i karim Jon na hamas mun bihain mama i karim Jisas?

◆ Long de namba 8 bihain long taim mama i karim Jon, wanem samting i kamap?

◆ Jon bai mekim wanem wok, olsem Sekaraia i tok profet long en?