Maski Mi Aipas na Yaupas, Mi Mas Litimapim Nem Bilong Jehova!
OL MAN i stap gut long wok bilong Jehova, maski ol i gat bikpela sik samting, ol i save Jehova bai helpim ol. “Bai em i no larim wanpela samting i bagarapim ol stretpela man.”—Sam 55:22.
Dispela tok i mekim gut bel bilong Bill na Janice. Tupela i gat 28 o 29 krismas samting. Tupela i marit inap tripela yia pinis. Ol i save bung wantaim kongrigesen bilong ol Witnes Bilong Jehova long Wosington, D.C., long Amerika. Bill i mekim wok painia, em i save autim tok bilong Kingdom long olgeta de na em i mekim planti Baibel-stadi. Em i save stadi wantaim 4-pela man i yaupas.
Taim mama i karim Janice, em i yaupas, na bihain, em i kamap aipas tu. Long “Kingdom i Kamap Bikpela” Kibung Distrik long yia i go pinis, Janice i sindaun long ples ol i makim bilong ol yaupas. I gat wanpela brata i sanap long dispela hap, em i save wokim han bilong em na dispela rot ol yaupas inap “harim” tok. Tasol Janice em i aipas, olsem na em i no inap lukim dispela brata i wokim han bilong helpim ol yaupas. Olsem na ol i bin makim wanpela brata bilong sindaun klostu long em, na em i wokim han bilong helpim Janice long “harim” tok. Janice i putim han bilong em long han bilong dispela brata, na long dispela rot em inap “harim” tok i kamap long kibung.
Bill em i sindaun wantaim Janice long wanpela de, na em i helpim Janice long “harim” ol tok, tasol long taim bilong mekim singsing, brata bilong lukautim singsing na helpim ol yaupas em i no kam sanap long pletfom, olsem na Bill i go sanap long pletfom, na wokim han bambai ol yaupas inap singsing. Janice i holim han bilong Bill na em tu inap singsing—em i singsing wantaim ol narapela brata sista—ol brata sista i lukim dispela samting na aiwara i kamap long ai bilong ol.
Bill na Janice i bin wokabaut long tok i tru inap tupela yia. (3 Jon 4) Na maski Janice em i aipas na yaupas, tasol em i helpim sampela man moa long kisim save long tok i tru. Jehova i blesim wok bilong em, na em i mekim 3-pela Baibel-stadi wantaim ol yaupas. Em i mas mekim wok long han bilong toktok wantaim ol, na ol dispela yaupas i lukim na kisim save. Olsem na sapos wanpela man i laik tru long litimapim nem bilong Jehova na helpim narapela man long spirit, orait rot bai op long em i mekim olsem.
[Piksa long pes 25]
Bill na Janice i “harim” tok bilong Baibel