Skulim Gut Ol Man na Givim Bel long Mekim
“Yupela i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.”—MATYU 28:19, 20.
1. Tok bilong Provep 22:29 i kirapim yumi long mekim wanem? Olsem wanem dispela tok i kirapim yumi long mekim olsem?
BAIBEL, em tok bilong Jehova, i kirapim ol man long mekim gut wok bilong ol na wok strong long mekim. Baibel i tok: “Sapos man i mekim gutpela wok, orait bai em i kamap wokman bilong king. Dispela kain man i no inap kamap wokman bilong man i no gat nem.” (Provep 22:29) I no samting nogut sapos yumi kamap wokman bilong “man i no gat nem,” tasol man i gat save long mekim wok na em i mekim gut wok bilong em, gutpela wok bilong em i no ken i stap hait. Ating wanpela king bai harim tok long gutpela wok bilong em na king i laik bai dispela man i kamap wokman bilong em!
2. (a) Bilong mekim gut wanpela wok, man i mas mekim wanem? (b) Bilong wanem i bikpela samting long wokman Kristen i mas mekim gut wok bilong em long skulim ol man?
2 Maski man i mekim wanem kain wok, tasol em i mas i gat save long mekim na em i mas lain long mekim gut. Man i laik kamap kamda, ating em i lukim ol buk i stori long dispela wok na em i lukim wok bilong ol man i gat save pinis long wok kamda. Tasol em i no ken kisim save tasol. Em i mas mekim wok long dispela save em i bin kisim na bai em inap mekim gut dispela wok. Man i laik kamap dokta bilong katim man em i mas skul na kisim save, tasol em i mas mekim wok long dispela save insait long rum bilong katim man bambai em i ken mekim gut dispela wok. I bikpela samting long man i mas mekim gut kain wok olsem, sapos nogat, ating bai sampela man i kisim bagarap na i dai. Na i bikpela samting moa long man i holim wok bilong God em i mas mekim gut dispela wok. Bilong wanem em bikpela sating moa? Long wanem sapos em i mekim gut dispela wok na skulim gut ol man, dispela inap kirapim ol long putim gut yau long ol tok na bihainim na bai ol inap kisim laip i stap oltaim. Tasol sapos em i no autim gut tok, ating bai ol i no putim yau na bai ol i lus olgeta.—Diuteronomi 30:19, 20; Jon 17:3.
3. Yumi mas mekim wanem na bai yumi inap kamapim ol disaipel?
3 Insait long wok Jisas i givim long ol disaipel bilong em i gat wok bilong skulim man. Jisas i tok: “Yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim: Mi stap wantaim yupela olgeta de, inap long dispela taim i pinis.” (Matyu 28:19, 20) Yumi mas mekim gut dispela wok bambai yumi inap lainim ol man long olgeta tok Jisas i bin givim long yumi.
4. (a) Yumi mas skulim gut ol man na yumi mas i gat wanem kain tingting na yumi mekim? (b) Apolos i stap wantaim Akwila na Prisila na dispela i helpim em olsem wanem?
4 Yumi mas skulim gut ol man na givim bel long mekim dispela wok. Yes, ol Kristen i mas “wok strong long mekim olgeta gutpela [wok],” olsem wok bilong autim tok long ol samting bilong spirit insait long kongrigesen na long ol narapela man tu. (Taitas 2:14) Akwila na Prisila i gutpela tisa, olsem na tupela i “kisim [Apolos] na i soim Rot bilong God stret moa long em.” Dispela samting i helpim tru Apolos na taim em i kamap long Grik “em i strong moa long bekim na daunim tru tok kranki bilong ol Juda long ai bilong ol manmeri. Long buk bilong God em i soim ol klia tumas, Jisas em i Krais.” (Aposel 18:24-28) Tru tumas, Apolos i skulim gut ol man na em i givim bel long mekim.
‘Was Gut long Wok Bilong Yu long Skulim Ol Man’
5. Olsem 1 Timoti 4:16 i tok, bilong wanem yumi mas skulim gut ol man na givim bel long mekim?
5 Aposel Pol i tokim wanwok bilong em Timoti: “Was gut long pasin yu yet yu mekim, na long wok bilong skulim ol man.Oltaim yu mas wok strong long dispela. Sapos yu mekim olsem, bai wok bilong yu em i mekim gut yu yet, na bai em i mekim gut ol man i harim maus bilong yu tu.” (1 Timoti 4:16) Em i mas skulim gut ol man na givim bel long mekim, long wanem dispela samting inap helpim tisa wantaim sumatin long kisim laip.
6. Olsem wanem yu ken lain long mekim gut wok long Baibel? I gat wanem ol askim i stret yu mas tingim?
6 Ol kamda na ol dokta bilong katim man ol i mas was gut long pasin ol yet i mekim. Ol i mas lain long mekim gut wok long ol tul bilong ol. Na olsem tasol wokman bilong God i mas mekim gut wok long nambawan “tul” bilong em. Dispela “tul” em “bainat bilong Holi Spirit, em i tok bilong God.” (Efesas 6:17) Orait, olsem wanem yu ken lain long mekim gut wok long Baibel? Yu mas stadi na lainim tok bilong en na mekim wok long en long olgeta taim. Olsem wanem? Yu bin kaunim olgeta tok bilong Baibel na tingim gut long bel ol dispela gutpela tok? Yu save kaunim long olgeta de? Yu save autim tok long olgeta taim na mekim wok long Baibel? Yu kisim olgeta gutpela kaikai bilong spirit Jehova i givim long yu long rot bilong dispela lain ol i olsem ‘gutpela wokboi’?—Matyu 24:45-47.
7. I gat wanem sampela gutpela tok bilong helpim yumi long makim taim bilong stadi? Baibel i tok wanem na yumi save yumi mas stadi?
7 Yu mas makim taim bilong stadi na lainim tok bilong Baibel na tok bilong ol buk na nius bilong ol Kristen tru. Long dispela rot bai gutpela save i pulap long tingting bilong yu, em inap helpim yu yet na helpim yu long bekim askim bilong ol man i laik tru long kisim save. (1 Pita 3:15; Kolosi 4:6) Ol narapela narapela famili na man wan wan ol i gat narapela narapela taim bilong stadi na bilong tingim gut ol tok ol i lainim. Sampela i save stadi long apinun. Sampela i save stadi taim ol i kirap long moningtaim, long wanem ol i tok long dispela taim tingting bilong ol i klia. Na sampela i save stadi long belo, ol i tok em gutpela taim bilong ol. Maski wanem wanem taim yu stadi, tasol yu mas stadi long olgeta taim. Em bikpela samting. Josua na ol king bilong Isrel i mas kaunim tok bilong God long olgeta de.—Josua 1:7, 8; Diuteronomi 17:18-20.
Wok long Kamap Gutpela Tisa Moa
8. Sapos yu skelim long tingting ol tok yu lainim, olsem wanem dispela inap helpim yu long kamap gutpela tisa moa?
8 Yu mas wok strong bambai yu inap mekim gut wok tisa na skulim gut ol man. Wanpela samting bilong helpim yu long kalap gutpela tisa moa em olsem: Taim yu kaunim tok bilong Baibel o wanpela buk Kristen, yu mas skelim ol dispela tok wantaim save yu kisim pinis. Dispela bai helpim yu long kisim gut ol dispela tok na stretim gut long tingting na bai yu inap skulim gut ol narapela man long en. Bai yu kamap gutpela tisa moa. Ating yu save skelim ol tok long tingting. Olsem: Ating bipo yu save ol Kristen i mas aninit long ol gavman, tasol yu no save ol i no aninit olgeta long tok bilong ol. Tasol nau yu kisim save olsem tok bilong man i namba tu na ol Kristen i mas bihainim tok bilong God pastaim. (Rom 13:1-8; Mak 12:17; Aposel 5:29) Yu kisim dispela save, long wanem, long tingting bilong yu yu skelim ol nupela tok yu lainim wantaim save yu kisim pinis.
9. Kolim wanpela stori bilong Baibel na olsem wanem yu ken lukim olsem piksa long tingting bilong yu.
9 Narapela samting bilong helpim yu long kamap gutpela tisa moa, em olsem: Taim yu kaunim stori bilong wanpela samting bilong Baibel, yu mas lukim olsem piksa long tingting bilong yu. Gutpela sapos nau yu kaunim tok bilong Ol Hetman 7:19-22 na yu mekim olsem. Gidion wantaim 300 man ol i hait hait long tudak na ol i go sanap banisim kem bilong ol Midian. Yu lukim? Nau yu harim Gidion wantaim 100 man bilong em ol i winim biugel bilong ol, na yu lukim ol i brukim ol sospen graun ol i holim. Ol arapela 200 man bilong Isrel ol tu i mekim olsem. Olgeta i holim hap mambu i lait na yu harim olgeta i singaut strong wantaim na i tok: “Bainat bilong Bikpela na bilong Gideon!” Ol Midian i pret na ol i ranawe na Gidion wantaim 300 man bilong em ol i ronim ol na nau yu lukim Jehova i longlongim tingting bilong ol Midian na ol i katim ol poroman bilong ol long bainat. Yu kaunim dispela stori bilong Baibel na yu lukim olsem piksa long tingting bilong yu, olsem na bai yu no lusim tingting long en, na bai yu inap kamapim bilong lainim ol narapela man. Dispela stori i lainim yumi olsem: Jehova inap kisim bek lain bilong em maski i no gat strongpela ami bilong helpim ol.—Sam 94:14.
10. Yu ken mekim wok long tok piksa bilong Ol Hetman 9:8-15 bilong lainim ol man long wanem samting?
10 Ol gutpela tok piksa—ol tok piksa i stap long Baibel tu ol inap helpim yu long kamap gutpela tisa moa na skulim gut ol man. Tingim tok piksa i stap long Ol Hetman 9:8-15. Jotam, em pikinini bilong Gidion, em i stori long wanpela taim ol diwai i laik makim wanpela diwai namel long ol i kamap king. Diwai oliv na diwai fik na diwai wain i no laik kisim wok king, tasol liklik diwai i gat nil i laik tru long kisim dispela wok. Ol dispela gutpela diwai i makim ol man long lain Isrel ol inap mekim gutpela wok, tasol ol i no laik kamap king na bosim ol brata bilong ol. Na liklik diwai i gat nil, em bilong kamap paiawut tasol, dispela diwai i makim wok king bilong kilman Abimelek, em i laik antap long ol narapela man na bosim ol na bagarap nogut i painim em olsem Jotam i tok profet pinis. (Hetman 9:50-57) Ating yu ken mekim wok long dispela tok piksa bilong skulim ol man long gutpela pasin yumi mas bihainim, olsem yumi mas mekim pasin i stret na pasin daun; yumi no ken bikhet na hambak.—Sam 18:26, 27; 1 Pita 5:5.
11. (a) Tok piksa bilong Jisas long Matyu 13:45, 46 i lainim yumi gut long wanem samting? (b) Yumi tingim dispela tok piksa na yumi save, oltaim Kristen i mas mekim wanem kain tok piksa?
11 Planti man i save, Bikpela Tisa, Krais Jisas, em i save mekim ol gutpela gutpela tok piksa. Tingim wanpela tok piksa em i mekim, olsem: “Kingdom bilong heven em i olsem wanpela man bilong bisnis em i wok long painim naispela naispela bis. Em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.” (Matyu 13:45, 46) Long rot bilong dispela tok piksa Jisas i lainim yumi olsem: Kingdom em i gutpela samting tru na man i pilim tru dispela samting bai redi long lusim olgeta samting bilong em bambai em i ken kisim dispela Kingdom. I no hatwok long save long dispela tok piksa, na ol tisa Kristen i mas mekim ol kain tok piksa olsem bilong helpim ol long skulim gut ol man.
Ol Miting Inap Helpim Yumi long Kamap Gutpela Tisa Moa
12. Sapos yu go long ol Pablik-Tok, olsem wanem dispela inap helpim yu long kamap gutpela tisa moa?
12 Ol miting Kristen i helpim tru ol wokboi bilong Jehova na ol i lain long skulim gut ol man na givim bel long mekim. Jisas i mekim pablik-tok long maunten na yumi save ol pablik-tok inap lainim gut ol man long ol samting bilong spirit. (Matyu 5:1-7:29) Olsem na ol Witnes Bilong Jehova i gat ol Miting Bilong Pablik-Tok. Yu save go harim ol pablik-tok? Yu save putim gut yau long ol tok? Taim man bilong mekim tok i kaunim wanpela tok bilong Baibel, yu save opim Baibel na lusim dispela tok? Yu save raitim sampela tok bambai yu ken tingim? Sapos yu mekim ol dispela samting, dispela bai helpim yu long kamap gutpela tisa moa, na ol gutpela tok bilong Baibel yu harim bai helpim wok bilong yu long kamapim ol disaipel.
13, 14. (a) Wanem taim ol wokboi bilong Jehova i bin kirap tingim tru wok bilong kamapim ol disaipel? (b) I gat wanem ol askim long Stadi Wastaua na long Buk-Stadi em yumi mas tingim?
13 Long kibung bilong Sida Poin, Ohaio, long 1922, ol wokboi bilong Jehova i kirap tingim tru wok bilong kamapim ol disaipel. Long dispela kibung, long namba wan taim, ol i harim tok olsem ol i mas ‘Autim tok bilong King na bilong Kingdom.’ Na long dispela yia ol i kirapim ol grup-stadi bilong lainim tok bilong Wastaua (tok Inglis). Dispela nius i kirapim tru ol man long tingim wok bilong lainim ol man long Baibel na autim tok bilong Kingdom. Nem bilong en i kamapim gut dispela samting, olsem: Wastaua i kamapim Tok Bilong Kingdom Bilong Jehova. Olsem wanem? Yu laik tru long kaunim ol tok bilong Baibel wantaim Wastaua? Yu save bekim tok long Stadi Wastaua long olgeta wik?
14 Buk-Stadi tu em gutpela samting bilong helpim yu long kamap gutpela tisa moa. Olsem wanem? Taim yu bekim tok long Buk-Stadi o long Stadi Wastaua yu save bekim long toktok bilong yu yet, o yu kaunim tasol sampela tok bilong buk o bilong Wastaua? Ol tok yu bekim i kamapim tingting tru i stap long bel bilong yu?
15. Wanem wok bilong Miting Bilong Wok Autim Tok? I gat wanem samting bilong makim program bilong dispela miting?
15 Paslain long 1922 ol wokboi bilong Jehova i save bung long namel bilong wik na mekim miting bilong Beten, Singsing na Tokaut. Long dispela miting ol i save mekim singsing, na tokaut long ol samting i bin painim ol, na beten wantaim. Tasol taim ol i kirap tingim tru wok bilong go long haus bilong ol manmeri na autim tok bilong Kingdom, nau dispela miting i kamap Miting Bilong Wok Autim Tok, em dispela miting i save lainim ol long wok bilong autim tok. I gat wanpela liklik nius ol i mekim wok long en, long dispela taim bipo ol i kolim Bulletin. Ol tok bilong dispela nius i lainim ol long pasin bilong autim tok na long sampela tok ol i ken mekim taim ol i autim tok. Long nau liklik nius ol i kolim Wok Kingdom Bilong Yumi i mekim wankain wok bilong helpim yumi, na i gat program i stap long en bilong Ol Miting Bilong Helpim Yumi long Kamapim Ol Disaipel. Yu save insait long ol dispela miting? Yu bihainim ol tok yu harim long ol dispela miting bambai yu ken skulim gut ol man na givim bel long mekim?
16. Wanem wok bilong Skul Bilong Wok Autim Tok olsem ol i tok taim ol i kirapim dispela skul?
16 Bilong helpim yumi long mekim gut wok tisa, long yia 1943 ol i kirapim ol Skul Bilong Wok Autim Tok long olgeta kongrigesen bilong ol Witnes Bilong Jehova. Namba wan buk bilong dispela skul i tokaut klia long wok bilong dispela skul, buk i tok: ‘Dispela skul i no bilong pinisim hap taim bilong yu long autim tok; nogat; ol i putim dispela skul bilong helpim yu bambai yu ken mekim gut dispela wok. Nau mipela i ken tok klia, olsem: Wok bilong dispela Skul em bilong redim olgeta “man i lukautim gut tok bilong God,” olsem ol man i bin harim Tok Bilong God na bilip long en na ol i bin mekim ol wok i kamapim dispela bilip bilong ol, bambai ol inap “skulim ol sampela man tu” long dispela tok—ol i ken i go long haus bilong ol manmeri na mekim ol go-bek na Baibel-Stadi, olsem mekim olgeta wok bilong autim tok bilong Kingdom. Em wok bilong dispela skul—bilong helpim olgeta wokman bilong God long kamap gutpela wokman moa na long dispela rot bai ol inap litimapim moa yet nem bilong Bikpela; bambai ol inap autim as bilong ol gutpela samting ol i bilip long en na wetim i stap; na ol i ken “i stap gutpela tisa, na wok isi long ol man, na skulim ol long pasin daun.” (2 Timoti 2:24, 25) Yumi no ken lusim tingting long dispela namba wan wok bilong dispela skul.’ (Buk Course in Theocratic Ministry, pes 4) Dispela wok i stap yet olsem nambawan wok bilong Skul Bilong Wok Autim Tok. Olsem wanem? Yu wok long bihainim ol gutpela tok i stap long buk bilong skul, em bilong lainim yu long pasin bilong skulim gut ol man, na kaunim gut ol tok, na autim gut tok? Yu insait long dispela skul? Yu putim nem bilong yu pinis bilong mekim tok long skul? Yu amamas taim ol i makim yu long mekim tok long skul na yu save mekim? Jehova yet i kamapim dispela skul long rot bilong oganaisesen bilong em na dispela samting Jehova i givim long yumi em inap helpim yu long mekim gut wok bilong God na givim bel long mekim.
17. Jehova i givim wanem ol gutpela samting bilong spirit long ol man i mekim wok bilong lainim ol narapela man long tok i tru bilong Em?
17 Jehova i givim planti samting bilong spirit long ol man i kisim dispela gutpela wok bilong lainim ol narapela man long tok i tru bilong Em. Em i givim ol buk na nius bilong Baibel long ol, na ol miting long olgeta wik, na ol bikpela kibung. Ol dispela gutpela samting i helpim ol Witnes bilong em ol i dediket pinis na ol i kamap gutpela tisa na ol i wok strong long lainim ol arapela man. Ol i skulim gut ol man na givim bel long mekim.
18. Ol elda long nau i ken mekim wanem bilong helpim wok bilong autim tok olsem Jisas na Pol i bin mekim?
18 Tasol olsem wanem sapos yumi holim wok elda o yumi gat save pinis long wok bilong autim tok? Sapos yumi sori long ol narapela man, dispela bai kirapim yumi long helpim ol narapela man na ol man i save gut bambai ol tu i ken kamap gutpela tisa na wok strong long skulim ol narapela man. I stret yumi mekim olsem, long wanem taim Jisas i laik salim ol 70 disaipel i go long autim tok, pastaim em i lainim ol long pasin bilong mekim dispela wok. (Luk 10:1-24) Pol i lainim ol elda bilong Efesas “long bung na long olgeta haus”—taim em i go long haus bilong ol manmeri bilong autim tok, ol dispela elda i go wantaim em na em i lainim ol long wok bilong autim tok long ol man i no bilip. (Aposel 20:20, 21) Olsem tasol ol elda na painia na ol narapela Witnes long nau ol i amamas long lainim ol brata Kristen bilong ol long autim tok. Olsem wanem? Yu laik bai wanpela man i lainim yu long dispela wok? Orait, tokim ol long helpim yu na bihainim gut ol tok ol i givim long yu taim ol i lainim yu. O ating yu wanpela elda? Orait, stretim tok long lainim ol narapela long autim tok na yu yet yu mas i go pas na wok strong long autim tok.
Lain Yet long Mekim Gut Wok
19. Bilong wanem yumi mas beten askim God long helpim yumi long autim tok?
19 Ol dokta bilong katim man na ol kamda na ol man i mekim ol narapela wok tu, sapos ol i wok i go long kisim save na long mekim wok long ol save ol i kisim, ol inap mekim gutpela moa yet wok bilong ol. Na i wankain tu long ol wokman bilong God. Olsem na i bikpela samting long olgeta Witnes Bilong Jehova i dediket pinis ol i mas lain yet bambai ol inap mekim gutpela moa yet wok bilong ol long skulim ol narapela man long dispela gutpela tok! Na dispela wok em wok bilong Jehova, olsem na ol i mas beten strong long em na askim em long helpim ol bambai ol i ken kamap gutpela tisa moa na skulim gut ol man. Sapos yumi askim God long helpim yumi na soim rot long yumi na yumi wok strong long autim tok, bai yumi kisim blesing. Olsem aposel Jon i tok: “Na sapos yumi beten long wanpela samting, orait em i save givim long yumi. Long wanem yumi save bihainim lo bilong em, na yumi save mekim em i laikim.”—1 Jon 3:22.
20. Yumi Witnes Bilong Jehova na yumi mas tingting strong long mekim wanem nau long taim bilong pinis?
20 Pasin nogut nau i stap long graun em i laik pinis, olsem na yumi mas wok strong moa yet long autim tok. Yumi mas ‘was gut long pasin bilong yumi yet na long wok bilong skulim ol man’ bambai yumi inap helpim yumi yet na ol man i bihainim tok bilong Kingdom long kisim laip. Tru tumas yumi mas wok strong long skulim ol man—yumi mas skulim gut ol man na givim bel long mekim.
Bai Yu Tok Wanem?
◻ Yumi mas autim tok na mekim wanem samting moa bilong kamapim ol disaipel?
◻ Bilong wanem i bikpela samting yu mas ‘was gut long wok bilong yu long skulim ol man’?
◻ Wanem sampela samting inap helpim yumi long kamap gutpela tisa moa?
◻ Olsem wanem ol miting Kristen inap helpim yumi long skulim gut ol narapela man long tok bilong God na givim bel long mekim?
◻ Ol elda na ol narapela Witnes i gat save pinis ol i ken mekim wanem bilong helpim wok bilong autim tok?
[Piksa long pes 19]
Taim yu kaunim stori bilong wanpela samting long Baibel, sapos yu lukim olsem piksa long tingting bilong yu, orait dispela bai helpim yu long kamap gutpela tisa moa
[Piksa long pes 21]
Wasman bilong Skul Bilong Wok Autim Tok i helpim ol sumatin long mekim gut wok bilong autim tok bilong Kingdom