I Stap na Wok Bilong Jisas
Jon i Redim Rot
TAIM Jisas i gat 12-pela krismas em i givim askim long ol tisa long tempel na nau 17 yia i lus pinis. Nau em yia 29 C.E. na olgeta man i wok long stori long Jon, em kasen-brata bilong Jisas. Jon i wok long autim tok long ol ples klostu long Wara Jodan.
Pasin na toktok bilong Jon i narapela kain. Em i save putim klos ol i bin wokim long gras bilong kamel, na em i pasim let long bel bilong em. Na em i save kaikai grasop wantaim hani bilong bus. Em i autim wanem kain tok? Em i tok: “Yupela tanim bel. Kingdom bilong heven em i kam klostu pinis.”
Ol man i harim tok bilong Jon ol i kirap nogut. Planti ol i save ol i mas tanim bel, olsem senisim tingting bilong ol na lusim ol pasin i no stret, em bipo ol i bihainim. Olsem na planti man bilong Jerusalem na olgeta Judia na olgeta man bilong ol ples klostu long Jodan ol i kam long Jon, na em i baptaisim ol. Em i putim ol i go daun insait tru long wara na bringim ol i kam antap gen. Bilong wanem em i mekim olsem?
Jon i baptaisim ol bilong makim olsem ol i tanim bel pinis. Ol i bin brukim kontrak bilong Lo God i wokim wantaim ol na ol i pilim rong bilong ol. Olsem na taim sampela man bilong lotu, olsem ol Farisi na Sadyusi, ol i kam long Wara Jodan bilong kisim baptais, Jon i tokim ol: “Yupela pikinini bilong snek nogut, ․․․ Sapos yupela i tanim bel, orait pasin bilong yupela i mas makim yupela i tanim bel pinis.”
Planti man i harim tok bilong Jon, olsem na ol Farisi i salim sampela pris wantaim sampela Livai i go lukim Jon. Ol i askim em: “Yu husat? Mipela i mas bekim wanpela tok long ol man i bin salim mipela i kam. Yu tok wanem long yu yet?”
Jon i tok: “Mi maus bilong wanpela man i singaut long ples nating, i spik, ‘Stretim rot bilong Bikpela!’ Em i olsem profet Aisaia i tok.” Jon i redim rot; em i kirapim ol manmeri long tanim bel na bai ol i redi na taim Krais, em man bilong kamap King, em i kam, bai ol i bilip long em. Jon i stori long dispela Man na em i tok: “Man i kam bihain long mi, strong bilong em i winim strong bilong mi. Mi no gutpela man inap long karim su bilong em.”
Jon i tok, “Kingdom bilong heven em i kam klostu.” Dispela tok bilong Jon i bilong tokaut long ol man olsem dispela King Jehova i bin makim, em Krais Jisas, em i laik kirap mekim wok bilong helpim ol. Jon 1:6-8, 15-28; Matyu 3:1-12; Luk 3:1-18; Aposel 19:4.
◆ Jon em i wanem kain man?
◆ Bilong wanem Jon i givim baptais long ol man?
◆ Bilong wanem Jon inap tok olsem Kingdom i kam klostu?
[Piksa i karamapim pes olgeta long pes 8]