Em i Man i Go Pas Long Mesaia
SKIN bilong man i braunpela liklik na em i pasim braitpela let long bel, ol i wokim long skin bilong bulmakau. Em i pasim klos ol i wokim long gras bilong kamel, olsem na ol man i save em i wanpela profet. Planti man i go long em long wara Jordan. Long dispela hap dispela narapela kain man i tokaut strong olsem em i redi long baptaisim ol sinman i tanim bel pinis.
Ol man i kirap nogut! Dispela man em i husat? Bilong wanem em i mekim dispela wok?
Jisas i tok long dispela man: “Bilong wanem yupela i go? Bilong lukim wanpela profet, a? Em tasol. Na mi tokim yupela, dispela profet hia em i winim olgeta arapela profet. . . . Mi tok tru long yupela, Jon Bilong Baptais em i winim olgeta man i bin kamap long graun.” (Matyu 11:9-11) Bilong wanem Jon em i narapela kain man tru? Long wanem, em i man i go pas long Mesaia.
Ol i Tok Profet Long Wok Bilong Em
Winim 700 yia paslain long mama i karim Jon, Jehova i tok Jon bai singaut long ples i no gat man: “Stretim rot bilong Bikpela long ples i no gat man. Redim bikpela rot bilong God bilong yumi.” (Aisaia 40:3; Matyu 3:3) Na winim 400 yia paslain long mama i karim Jon, God i Gat Olgeta Strong i tokaut: “Dispela De bilong mi em i bikpela De na bai mi mekim olgeta manmeri i pret nogut tru. Tasol pastaim bai mi salim profet Elaija i kam long yupela na bihain dispela De bai i kamap.” (Malakai 4:5) Mama i karim Jon Bilong Baptais 6-pela mun paslain long mama i karim Jisas, tasol dispela i no bin kamap nating. Wankain olsem Aisak, em pikinini God i bin promis long givim long Abraham na Sara, Jon tu i kamap long rot bilong mirakel, long wanem, papamama bilong em, Sekaraia na Elisabet, ol i lapun pinis na ol i no inap kamapim pikinini.—Luk 1:18.
Paslain long mama i kisim bel long Jon, ensel Gebriel i bin tokaut long wok God i laik Jon bai mekim, na wokabaut bilong em. Long wankain pasin na strong bilong Elaija, Jon bai stretim tingting bilong ol bikhetman long ol i mas lusim rot bilong i dai na Jon bai redim ol bambai ol i ken bilip long Krais olsem Mesaia. Kirap long taim mama i karim em, Jon i wanpela Promisman, em i dediket tru long God, na em i no inap dring wain o strongpela dring samting. Na long ples nating em i “kaikai ol grasopa wantaim hani bilong bus.” (Mak 1:6; Namba 6:2, 3; Luk 1:13-17) Wankain olsem Samuel, taim Jon i liklik yet God i makim em bilong mekim wok bilong God Antap Tru.—1 Samuel 1:11, 24-28.
God i makim tu nem bilong Jon. Long tok Hibru, insait bilong dispela nem “Jon” em olsem “Jehova i Belgut; Jehova i Marimari.”
Taim ol i katim skin bilong dispela pikinini long namba 8 de, papa bilong em, Sekaraia, i autim tok profet bilong God na i tok: “Na yu, pikinini, bihain bai ol i kolim yu profet bilong God Antap Tru. Bai yu go pas long Bikpela, bilong redim rot bilong en. Bai yu lainim ol manmeri bilong en na bai ol i save, long bikpela marimari bilong en, God i laik tekewe sin bilong ol na kisim bek ol. Bai em i salim tulait bilong heven i kam long yumi.” (Luk 1:76-78) Autim tok long ol man bai i nambawan bikpela wok long laip bilong Jon; olgeta narapela wok i nambatu tasol. Olsem na inap long taim Jon i gat 30 krismas, Baibel i mekim wanpela liklik tok tasol long i stap bilong em olsem: “Bihain dispela pikinini i kamap bikpela, na spirit bilong en i kamap strong. Em i go i stap long ples i no gat man, inap long taim em i kamap ples klia long ai bilong ol Israel.”—Luk 1:80.
Maus Bilong Wanpela Man Long Ples i No Gat Man
Long namba 15 yia bilong Sisar Taiberius i stap king na Pontius Pailat i stap namba wan gavman bilong distrik Judia, Jon Bilong Baptais i kamap long ples i no gat man na em i autim wanpela narapela kain tok. Em i tok: “Yupela tanim bel. Kingdom bilong heven em i kam klostu pinis.” (Matyu 3:2; Mak 1:4; Luk 3:1, 2) Dispela tok i kirapim tingting bilong olgeta man long dispela hap. Jon i autim strong tok na dispela i sutim tru bel bilong ol man i wetim tru ol gutpela samting i kamap bihain. Tok Jon i autim i traim tu bel bilong ol man, ol i gat pasin daun o nogat, long wanem, tok em i autim i kirapim ol long tanim tru bel. Em i autim tok tru na em i givim bel tru long tok em i autim, olsem na planti man i gat stretpela bel i bilip olsem em i man God i salim em i kam.
Wantu planti man i bin save long Jon. I no hatwok long save em i wanpela profet bilong Jehova, long wanem, klos em i pasim i narakain na em i bin givim bel tru long God. (Mak 1:6) Sampela pris na Livai i kam long Jerusalem, long wanem, ol i laik save wanem samting i kirapim tingting bilong ol man. Ol i mas tanim bel? Bilong wanem ol i mas tanim bel, na ol i mas tanim bel long wanem samting? Dispela man em i husat? Ol i laik save long em. Jon i tok: “ ‘Mi no dispela man God i makim bilong kisim bek ol manmeri bilong en.’ Na ol i askim em, ‘Olsem wanem? Ating yu Elaija, a?’ Na em i tok, ‘Nogat.’ Ol i tok, ‘Ating yu dispela profet mipela i wetim?’ Na em i bekim tok, ‘Nogat.’ Olsem na ol i askim em gen, ‘Yu husat tru? Mipela i mas bekim wanpela tok long ol man i bin salim mipela i kam. Yu tok wanem long yu yet?’ Orait na Jon i tok olsem, ‘Mi dispela “maus bilong wanpela man i stap long ples i no gat man na i singaut olsem, ‘Stretim rot bilong Bikpela.’ ” Em i olsem bipo profet Aisaia i bin tok.’ Ol Farisi i bin salim ol dispela man i kam. Na ol i askim Jon olsem, ‘Sapos yu no dispela man God i makim bilong kisim bek ol manmeri bilong en, na yu no Elaija, na yu no dispela profet, orait watpo yu save givim baptais long ol manmeri?’ ”—Jon 1:20-25.
Ol man i laik go insait long Kingdom i mas tanim bel na kisim baptais. Olsem na Jon i bekim tok: ‘Mi save baptaisim ol sinman i tanim bel long wara. Tasol bihain bai wanpela man i kam, na strong bilong en i winim strong bilong mi. Mi no gutpela man inap long mi lusim string i pasim su bilong en. Em bai i baptaisim yupela long Holi Spirit na long paia. Em bai i kam olsem man i holim savol long han bilong en, bilong rausim olgeta pipia i stap long wit bilong en. Na em bai i bungim wit long haus wit bilong en. Tasol pipia em bai i kukim long paia i no save dai.’ (Luk 3:15-17; Aposel 1:5) Tru tumas, ol man i bihainim Mesaia bai kisim spirit holi, tasol ol birua bai bagarap olgeta.
Wanpela Tok Lukaut Long “Olgeta Manmeri”
Tok bilong Jon i sutim tru bel bilong planti Juda i gat gutpela bel na ol i autim sin bilong ol, em ol sin ol i mekim long kontrak bilong Lo. Na taim ol i larim Jon i baptaisim ol long wara Jordan, ol i kamapim long ai bilong ol man olsem ol i tanim bel pinis. (Matyu 3:5, 6) Olsem na bel bilong ol i redi long bilip long Mesaia. Ol i laik save tru long ol stretpela lo bilong God, olsem na Jon i amamas long skulim ol olsem disaipel bilong em, na em i skulim ol tu long beten.—Luk 11:1.
Long man i go pas long Mesaia aposel Jon i tok: “Em i kam bilong autim tok. Em i autim tok bilong dispela lait, bai olgeta manmeri i ken harim tok bilong em, na ol i ken bilip.” (Jon 1:7) Olsem na olgeta kain kain man i kam harim tok bilong Jon Bilong Baptais taim em “i bin autim tok long ol Israel i mas tanim bel na kisim baptais.” (Aposel 13:24) Em i givim tok lukaut long ol man bilong kisim takis, nogut ol i giaman na pulim bikpela mani tumas long ol man, na ol soldia i no ken mekim nogut long ol narapela man olsem sutim tok giaman long ol. Em i bin tokim ol Farisi na Sadyusi, em ol man bilong lotu na man bilong tupela maus: “Yupela pikinini bilong snek nogut, God i belhat long yupela na em bai i mekim save long yupela. Husat i tokim yupela na yupela i laik ranawe na abrusim dispela taim nogut i laik kamap long yupela? Sapos yupela i tanim bel tru, orait pasin bilong yupela i mas soim olsem yupela i tanim bel pinis. Yupela i no ken tingting olsem long bel bilong yupela, ‘Abraham em i tumbuna papa bilong mipela.’ Mi tokim yupela, God inap mekim ol dispela ston hia i kamap ol lain tumbuna pikinini bilong Abraham.”—Matyu 3:7-9; Luk 3:7-14.
Olsem wanpela lain olgeta, ol hetman bilong lotu long taim bilong Jon i no bilip long em na ol i giaman na tok spirit nogut i stap long em. Ol i sakim stretpela rot i go long laip oltaim. Tasol sampela man bilong kisim takis na sampela pamukmeri i bilip long tok bilong Jon na ol i tanim bel na kisim baptais. Na bihain ol i bilip long Krais Jisas, olsem em Mesaia.—Matyu 21:25-32; Luk 7:31-33.
Tokaut Long Mesaia
Inap 6-pela mun—kirap long Epril i go inap long Septemba samting bilong yia 29—gutpela witnes bilong God, Jon, i bin stiaim tingting bilong ol Juda long Mesaia bai kam. Klostu nau King Krais Jisas bai kamap. Na taim em i kam, em i kam long wara Jordan bilong askim Jon long baptaisim em. Pastaim Jon i laik pasim em, tasol bihain em i mekim. Tingim bikpela amamas bilong Jon taim em i lukim spirit holi i kam daun long Jisas na em i harim maus bilong Jehova i tokaut olsem em i orait long Pikinini bilong Em.—Matyu 3:13-17; Mak 1:9-11.
Jon em i namba wan man i kisim save olsem Jisas em i Mesaia, na em i bringim ol disaipel bilong em yet i go long dispela Man God i Makim. Jon i tok: “Lukim. Em i Pikinini Sipsip Bilong God. Em i kam bilong tekewe sin bilong olgeta manmeri bilong graun.” Na em i tok tu: “Em dispela man tasol bipo mi bin tok long en olsem, ‘Man i kam bihain long mi, em i namba wan bilong mi. Long wanem, em i stap bipo, taim mi no kamap yet.’ Mi yet mi no bin save long em i husat tru. Tasol mi kam baptaisim ol man long wara bai ol manmeri bilong Israel i ken save long dispela man.”—Jon 1:29-37.
Jon i mekim wok long wankain taim Krais Jisas i mekim, olsem 6-pela mun samting. Narapela i save long wok narapela i mekim. Jon i save em yet i olsem poroman bilong dispela Man i marit, na em i amamas long lukim olsem nem bilong Krais i kamap bikpela, na nem bilong em i go daun.—Jon 3:22-30.
Jisas i tokaut klia olsem Jon em i man i go pas long em, na Elaija i piksa bilong em. (Matyu 11:12-15; 17:12) Wanpela taim Jisas i bin tok: “Tok bilong lo wantaim tok bilong ol profet em i stap inap long taim bilong Jon. Tasol stat long taim bilong Jon, gutnius bilong kingdom bilong God em i kamap long olgeta ples. Na olgeta man ol i strong tumas long i go insait long dispela kingdom.”—Luk 16:16.
Stap Gut Inap Long Em i Dai
Ol i holim Jon na kalabusim em, long wanem, em i autim strong tok i tru. Em i no surik long mekim wok bilong em long kamapim klia sin bilong King Herot. King i brukim lo bilong God na kisim Herodias i stap olsem meri bilong em, tasol Herodias em i meri bilong brata bilong em. Jon i tokaut long rong bilong Herot, long wanem, em i laik Herot i ken tanim bel na God bai marimari long em.
Jon em i gutpela piksa tru bilong man i bilip na man i gat pasin sori! Em i stap gut long Jehova na em i kamapim ples klia olsem em i laikim tru ol man, maski ol i kalabusim em. Jon i stap pinis wanpela yia long kalabus, na bihain ol i katim nek bilong em. Satan i kirapim dispela meri nogut Herodias long mekim olsem, long wanem, em i “bel nogut tru” long Jon. (Mak 6:16-19; Matyu 14:3-12) Tasol dispela man i go pas long Mesaia, em i bin stap gut long Jehova, olsem na liklik taim em bai kirap bek na stap laip long stretpela nupela taim God bai kamapim.—Jon 5:28, 29; 2 Pita 3:13.