Mi Stap Tenpela Yia Long Ol Kalabus Bilong Ami Long Spen
Em stori bilong Fernando Marin
TENPELA yia long kalabus long taim Franko i bosim Spen—tasol mi kisim gutpela samting insait long dispela tenpela yia. Ating yu kirap nogut long dispela tok bilong mi; tasol em i stret. Mi no kisim ol gutpela samting bilong skin. Nogat. Mipela ol kalabusman i stap nogut tru long ol dispela kalabus bilong ami. Mi karim bikpela hevi, tasol mi lukim God i lukautim mi. Mi tingim dispela samting na mi tok mi kisim gutpela samting taim mi stap kalabus. Mi inap tingim ol samting i bin kamap olsem em i bin kamap long asde tasol.
Papamama bilong mi i Katolik na mi go bikpela insait long lotu Katolik. Mi skul long ol skul bilong Misin Katolik long Baselona. Mi pret nogut tru long pen bilong bikpaia na klinpaia. Tasol taim mi gat 16 krismas mi kirap lainim ol tok bilong Baibel wantaim ol Witnes Bilong Jehova na mi no pret moa long ol dispela samting—mi rausim long tingting ol dispela tok giaman misin i bin lainim mi long en. Mi kisim save olsem: Baibel i tok, taim yumi dai yumi dai tru, yumi no gat tewel. Olsem na i no gat ples bilong givim pen long tewel bilong ol man o bilong klinim sin bilong ol.—Esikiel 18:4, 20; Eklisiastis 9:5, 6, 10.
Long yia 1961, taim mi gat 18 krismas, mi kisim baptais long wanpela kibung long Paris, Frans, bilong makim dediket bilong mi, mi dediket long God. Dispela kibung em namba wan bikpela kibung mi bin i go long en. Mipela liklik lain bilong Spen mipela i stretim rot bambai mipela inap go long dispela kibung long Frans maski mipela i stap rabis na gavman bilong Spen i tambuim wok bilong ol Witnes long dispela taim. Taim Franko i bosim Spen (1939-1975) ol Witnes Bilong Jehova i mas wok hait na autim gutpela tok bilong Kingdom.
Mi amamas tru mi save long Jehova na long ol tok i tru bilong em long rot bilong Krais, olsem na mi givim bel olgeta long Em. Mi laik tru long mekim wok bilong em long olgeta de, olsem kamap wanpela painia. Long Februeri 1962 mi kirap mekim dispela wok mi laik tumas long mekim. Na mi mekim inap long nau—mi mekim taim mi stap kalabus tu. Tasol ating yu laik save bilong wanem mi kalabus.
Namba Wan Bikpela Traim Bilong Mi
Long Februeri 1964, taim mi gat 21 krismas, ol i singautim mi i go insait long ami. Mi redi long karim ol hevi bai painim mi. Mi gat tingting wankain olsem ol narapela yangpela brata long kongrigesen—mi laik mekim wok painia na mi laik sanap strong long dispela traim.—Jon 17:16; 18:36.
Mi lusim haus i go long ofis bilong ami, na mi pret liklik, tasol mi tingting strong long karim ol hevi na sanap strong. Mi kamap pinis long ofis na mi tokim ol mi no laik insait long ami, long wanem maus bilong bel bilong mi i gat tok long dispela samting. Long dispela taim bipo ol man bilong Spen i no save liklik long dispela kain tingting na ol i no ken orait long en. Ol i givim tiket long mi na salim mi i go long ples ami long Tenerif, long ol Ailan Kaneri. Em longwe tru long ples bilong mi—winim wan tausen mail (1,600 kilomita).
Long Tenerif taim mi tokim ol ofisa bilong ami mi no laik insait long ami, ol i ting mi longlong. Ol i ting longlong man tasol bai sakim ol Fasis na i no laik insait long ami bilong ol. Olsem na ol i putim mi long wanpela haus sik bilong ol longlong man! Tasol gutpela tru, wanpela dokta i save long ol Witnes em i glasim mi na mi abrusim bagarap inap painim mi long dispela haus sik. Kwiktaim ol i kisim mi na putim mi long wanpela kalabus bilong ami. Bai mi stap kalabus inap hamas mun o yia? Mi no save. Long dispela taim bipo ol i no makim taim bilong kalabus bilong ol man, em bel bilong ol i gat tok long go insait long ami na mekim pait.
Mi stap planti yia long kalabus na mi pilim pinis hevi bilong man i stap wanpis, na hevi bilong i stap kalabus wantaim ol man i no gat sem moa. Planti taim ol i tok long kilim mi i dai, na planti taim ol i laik pulim mi bambai mi lusim stretpela pasin na mi insait long ol wok ami samting bilong dispela graun. Tasol isi isi mi kisim save olsem: Maski mi stap long wanpela liklik rum insait long haus kalabus, mi inap pas tru wantaim God bilong mi. Mi lain long bilip tru long Jehova.—Sam 23.
Ol i Kalabusim Mi i Stap Wanpela Tasol
Long Tenerif ol i salim mi i go long wanpela kalabus nogut ol man i pret long en—em kalabus bilong ami bilong San Fransisko del Risko long ailan Las Pamas de Gran Kaneria. Ol man i pret long dispela kalabus, long wanem bos bilong haus kalabus em i man nogut—em i sotpela strongpela man na em i save amamas long mekim nogut long ol kalabusman. Em yet i save paitim ol nogut. Ol i kolim nem bilong em olsem Pisamondongo (Man Bilong Krungutim Bel).
Ol i putim mi i stap wanpela tasol long wanpela rum bilong kalabus, na ol i kisim olgeta samting bilong mi i go—Baibel bilong mi tu. Wanpela taim tasol, long apinun, ol i larim mi i go ausait—bilong rausim pekpek na pispis long baket bilong mi na bilong kisim kaikai bilong mi bilong apinun. Mi stap wanpela olsem inap planti mun, Tasol mi no i stap wanpis tru. (Sam 145:18) Mi wok long i go klostu long Jehova olsem misineri Harold King i mekim taim ol i kalabusim em i stap wanpela tasol long wanpela haus kalabus long ples Saina.
Wanpela Sande, taim ol i givim kaikai long mi ol i givim liklik hap muli tu. Mi bingim bambai wara bilong en i pundaun long rais, tasol liklik hap wara bilong en i pundaun long plua na i wokim mak long plua. Nau mi kisim wanpela tingting long mekim wok long wara bilong muli bilong raitim wanpela tok long plua. Wanpela taim long olgeta wik taim ol i givim kaikai long mi ol i givim wanpela liklik hap muli tu wantaim. Olsem na isi isi mi raitim tok long plua olsem: “El nombre de mi Dios es Jehovà.” (“Nem bilong God bilong mi em Jehova.”) Oltaim mi lukim dispela tok mi save, mi no i stap wanpis; Jehova i stap wantaim mi. Na dispela liklik tok mi raitim long plua i kirapim tingting bilong mi na mi tingim sampela strongpela tok i tru long ol man i stap olsem wanem long ai bilong God. Bihain mi mekim wok long gris bilong kandel na mi polisim plua na i lait tru olsem wanpela glas bilong lukim pes.
Mi Laik Kaunim Baibel Maski Mi Bai Karim Hevi
Sampela brata ol i stap kalabus long El Aiun, long Sahara, ol i harim tok olsem ol i kalabusim mi i stap wanpela tasol na mi no gat Baibel o sampela buk o nius bilong Baibel. Ol i givim sampela lip bilong wanpela Wastaua na wanpela Gutnius long wanpela wankalabus bilong ol, em ami i laik salim em i kam long dispela haus kalabus mi stap long en. Tasol olsem wanem bai em i givim dispela samting long mi, long wanem ol i kalabusim mi i stap wanpela tasol?
Long dispela apinun, taim mi go rausim ol samting bilong baket long toilet wanpela man i tromoi liklik pasel i kam pundaun klostu long lek bilong mi. Kwiktaim mi kisim, olsem man i dai long hangre em i lukim wanpela hap bret na em i holim kwik. Mi go bek long rum bilong mi na long nait olgeta mi kaunim kaunim ol tok i stap long ol dispela lip bilong Wastaua. Inap wanpela yia pinis mi no bin lukim sampela buk o nius i stori long Jehova! Tulait i bruk. Mi olsem man i hangre tru na mi bin kisim gutpela kaikai, olsem ol dispela tok bilong Wastaua na ol gutpela tok bilong Jisas i stap long dispela Gutnius!
Long apinun taim mi kisim kaikai bilong mi i kam bek long rum, mi lukim bos bilong haus kalabus, em don Gregorio, em i wetim mi i stap. Pes bilong em i drai tru na mi lukim em i belhat. Em i holim ol dispela lip bilong Wastaua long han bilong em. Sori tru! Ol i painim pinis dispela gutpela samting bilong mi! Em i tok bilas nogut tru long nem bilong Jehova na em i tok long kilim mi i dai, na em i singautim mi i kam long em. Kwiktaim mi beten strong long Jehova—mi beten askim em long helpim mi bambai mi inap karim dispela hevi olsem wanpela Kristen tru na sanap strong.
Bos bilong haus kalabus i opim dua bilong rum bilong mi na kwiktaim mi ran i go insait na mi sanap long kona bilong rum, mi laik haitim pes samting bilong mi bambai em i paitim tasol baksait bilong mi. Em i belhat na singaut strong—ai bilong em i ret—na em i ran i kam bilong paitim mi. Tasol mi bin polisim plua, olsem na lek bilong em i wel na em i pundaun long pes bilong em. Em i belhat nogut tru na em i laik kirap sanap. Taim em i mekim olsem, nau em i lukim dispela rait long plua, “El nombre de mi Dios es Jehovà” Em i gat ol kain kain bilip giaman na taim em i lukim nem bilong God em i kirap nogut na em i tok isi, olsem: “Jehova!” Na bihain em i kirap singaut strong olsem “Jehova! Jehova!”—mekim mekim olsem na em i wokabaut long bel na lusim dispela rum! Em i no paitim mi na bihain em i no kam moa long mi.
Dispela samting i kamap i strongim bilip bilong mi na mi save Jehova i lukautim mi. Mi stap wanpela tasol, tasol God i no lusim mi. Ol i mekim nogut long mi, tasol mi no bagarap tru.—2 Korin 4:7-10.
Wanpela Kongrigesen—long Haus Kalabus
Bihain ol i salim mi i go long haus kalabus Santa Katalina, long Kadis. I gat samting olsem wan handet brata i stap long dispela haus kalabus. Mipela i kamap olsem wanpela kongrigesen. Em bikpela kongrigesen, winim planti narapela kongrigesen long hap bilong Spen! Mipela i save mekim ol miting, na mipela yet i save stadi, na mipela i save kamapim ol tok bilong ol kibung sekit na kibung distrik tu insait long haus kalabus.
I no hatwok long mipela i litimapim nem bilong mipela, tasol mipela i no mekim olsem—mipela i save ol brata sista i no kalabus ol tu i karim hevi na sanap strong. Sampela hevi na traim i painim ol i no painim mipela ol Witnes i stap kalabus. Tasol mipela i no pilim olsem mipela i stap longwe long Jehova na long oganaisesen bilong em. Mipela i tingim gut ol lo bilong em. Mipela i stap kalabus i go i go na sampela taim mipela i bel hevi, long wanem mipela i pilim olsem yangpela bilong mipela i laik pinis long haus kalabus. Tasol mipela i tingim Jehova na ol lo bilong em na mipela i no larim dispela bel hevi i daunim mipela.—Sam 71.
Mipela i pas pas insait long kalabus na i hatwok long bihainim gutpela pasin Kristen na wok gut wantaim, tasol mipela i wok strong long mekim. Ol i kalabusim mipela i stap wantaim; ol i no kalabusim mipela wantaim ol narapela kalabusman bilong ami. Tasol sampela taim hevi i kamap long dispela, long wanem narapela i no inap lusim narapela liklik; mipela i pas pas wantaim. Wanpela long lain bilong mipela em i mekim bikpela rong. Mipela laik mekim ol samting bambai kongrigesen bilong mipela i ken i stap klin na mipela i rausim dispela man. Tasol em i stap yet wantaim mipela—mipela i no inap rausim em long kalabus, na mipela i no laik tokim ol bos bilong haus kalabus long putim em wantaim ol narapela kalabusman, long wanem bai ol i save em i bin mekim rong na dispela bai bagarapim nem bilong Jehova na nem bilong mipela olgeta. Mipela i tingting planti long dispela samting—mipela i no save long rot bilong stretim dispela hevi. Tasol long rot mipela i no bin ting long em mipela i kisim save long ol samting mipela i mas mekim.
Insait long Kabot
Long dispela taim mipela i amamas long wanem Grant Suiter wanpela brata long Lain Bilong Bosim Ol Witnes em i kam lukim mipela. Ol i orait long em i lukim wanpela kalabusman tasol long rum bilong i kam lukim ol kalabusman. Tasol mipela olgeta i laik lukim em na harim tok bilong em. Olsem wanem bai mipela inap mekim? Long woksop mipela i painim pinis wanpela dua i go long rum slip bilong mipela. Ol i bin pasim pepa long banis na karamapim dispela dua. Mipela tingting long wokim wanpela kabot i no gat baksait bilong en na sanapim long ai bilong dispela dua na bai dua i hait olgeta. Olsem na sapos yu go insait long kabot na opim dispela dua long banis yu kam insait long kabot na opim dispela dua long banis yu kam insait long rum slip i gat ol bet long en, em narapela i stap antap long narapela, tripela tripela!
Taim Brata Suiter i stap wantaim mi long rum bilong lukim ol kalabusman na mitupela tasol i stap, mi tokim em long kam lukim woksop bilong mipela na lukim sampela samting mipela i bin wokim. Em i kirap nogut taim mi tokim em long go insait long kabot na nau em kam insait long wanpela rum slip i gat wan handet brata i stap long en na ol i wetim em! Mipela save, sapos ol bos bilong haus kalabus i save, bai mipela i kisim strafe, tasol mipela i hangre tru long harim tok na bung wantaim brata i stap ausait. Nau wanpela brata bilong Lain Bilong Bosim Ol Witnes i stap namel long mipela. Mipela i amamas tru!
Long dispela taim mipela i tokim em long hevi bilong mipela long dispela rauspela man. Em i tokaut klia olsem: Yumi no ken bihainim lo bilong ol man na kalapim lo bilong Jehova. Em i tok, “oganaisesen bilong Jehova i no i stap kalabus!” Em i tok, gutpela sapos mipela i tokim bos bilong kalabus long putim dispela man wantaim ol narapela kalabusman.
Bos bilong haus kalabus i save tok bilas long mipela , tasol mi go lukim em na mi tokim em: “Man i mekim rong mipela no save larim em i stap namel long mipela. Mipela mas mekim ol samting bambai oganaisesen bilong mipela i stap klin.” Em i mekim wanem? Em i pilim dispela tok i tru, em mi ting olsem em i no inap pilim liklik, na em i tok dispela pasin mipela i mekim em i stret. Na em i laik mekim gut bel bilong mi! Mi kirap nogut! Em i tok ol bai putim dispela man wantaim ol narapela kalabusman na em i no ken i kam bek long hap bilong mipela inap long taim komiti bilong mipela i orait long em. Dispela bos bilong haus kalabus i litimapim nem bilong mipela long wanem mipela i strong long bihainim stretpela pasin na ol stretpela lo.
Mipela i Lusim Kalabus
Traim i painim mipela long kalabus em olsem: Mipela i stap kalabus inap planti yia na mipela i no save wanem taim bai kalabus bilong mipela i pinis o mipela bai i stap kalabus oltaim. Bilong wanem mipela i no save? Long wanem taim kalabus bilong mipela i pinis, ol i save putim mipela long kot gen na makim bikpela hap taim moa bilong kalabus na mipela i kalabus gen. Mekim mekim olsem. Wanpela brata i kisim 26 yia kalabus, long wanem em i no laik insait long ami na mekim wok ami inap 18 mun! Wanem samting i helpim mipela inap karim dispela hevi inap planti planti yia na sanap strong? Beten i helpim mipela.
Long 1972 mipela i harim tok olsem gavman bilong Spen i orait long sampela man i lusim kalabus, em ol man i bin kalabus longtaim, long wanem bel bilong ol i gat tok long go insait long ami. Paslain liklik long ol i larim mipela i lusim kalabus, 70 bilong mipela ol 100 brata i stap kalabus ol i raitim aplikesen bilong kamap painia! Ating dispela samting i helpim yu long save, maski mipela i stap kalabus, tasol mipela i pilim tru bikpela wok ol Kristen i mas mekim, em wok bilong autim tok. Taim mipela i lusim kalabus na i stap fri, mipela i no tingting long kisim ol amamas bilong skin na ol gutpela samting bilong skin, em mipela i bin lus long en long kalabus. Nogat. Mipela laik tok tenkyu long Jehova, long wanem em i bin lukautim mipela long kalabus long ol dispela planti planti yia. Na i no olsem bel bilong mipela i kirap nating. Nogat Planti bilong ol dispela brata ol i mekim yet wok bilong painia! Inap 12-pela samting ol i mekim wok sekit o wok districk o ol i wok long Betel, olsem mi wantaim meri bilong mi Konsita (Conchita).
Olsem wanem? Dispela 10-pela yia bilong mi long Kalabus i lus nating tasol? Nogat. Pasin bilong sanap strong i no save lus nating tasol. Planti handet handet brata long Spen ol i bin sanap strong na i stap gut long God na ol i kalabus, na long dispela rot ol bikpela man bilong gavman na bilong Misin Katolik i bin harim nem bilong Jehova. Long 1970 gavman i pinisim tambu long wok bilong ol Witnes Bilong Jehova na orait long ol.
Long ol haus kalabus long Spen mipela i karim hevi na mipela i lain long sanap strong na i no ken les kwik. Tasol em i gutpela taim tu bilong stadi na lainim gut ol tok bilong Baibel na bilong i go klostu long Jehova. Long ol dispela yia mipela i stap kalabus, mipela i no lusim nating taim. Mipela wok long kamap strong long spirit. Tru, inap planti yia ‘ol man i mekim nogut long mipela, tasol God i no lusim mipela; ol i paitim mipela i pundaun, tasol mipela i no bagarap tru.’—2 Korin 4:9.
[Rait long pes 23 ]
Maski mi stap wanpela tasol, tasol mi save mi no stap wanpis tru
[Piksa long pes 25]
Grant Suiter, nau em i dai pinis, em wanpela bilong Lain Bilong Bosim Ol Witnes, em i kam long kalabus bilong ami long Kadis (long Piksa em i sanap long namel na man bilong tanim tok, Bernard Backhouse, em i stap long han kais, na Fernando Marin i stap long han sut)