“Mi Laik Kamap Wanpela Kristen i No Kalapim Lo Bilong God Liklik”
Wanpela yangpela man long Simbabwe i kaunim wanpela buk bilong Sosaiti Wastaua (nem bilong en: “Let Your Kingdom Come”) na dispela i kirapim em long raitim pas na tok olsem:
“Inap sampela yia pinis mi lukim olsem hia long Simbabwe yupela ol Witnes Bilong Jehova tasol i wok strong long bihainim pasin bilong Krais yet. Mi wanpela Seven-De, tasol mi pilim olsem Misin bilong mi hia long Simbabwe i no bihainim moa rot bilong spirit holi. Mipela i insait long ol wok politik samting bilong dispela graun. Olsem yupela, mipela tu i bilip olsem mama i no bin karim Jisas long Desemba 25, tasol ol pasto bilong mipela i tok, mipela i ken mekim Krismas, tasol mipela mas tingim Jisas i bin i dai bilong tekewe sin bilong mipela. . . .
“Mi save tok mi Kristen, tasol pasin mi bihainim i no stret wantaim pasin bilong Krais na mi les long dispela samting. Mi laik kamap wanpela Kristen i no kalapim lo bilong God liklik. . . . Lain bilong yupela tasol i soim mi olsem God i gat sori long yumi na tok bilong em i gat strong. I no ol tok o buk tasol bilong yupela i kamapim long ples klia dispela samting; nogat; pasin bilong yupela i kamapim. Yupela i bihainim gutnius bilong Krais na yupela i autim dispela gutnius long ol man. Planti planti man ol i autim dispela gutnius, tasol ol i no bihainim.”