Ol Samting Yu Inap Mekim Bilong Tenkyu Long Jisas

WOK yumi mekim i winim tok yumi mekim. Olsem na yumi no ken tok tasol; yumi mas mekim wok tu. Yumi no ken tok tenkyu tasol; yumi mas mekim sampela wok bilong kamapim bel bilong yumi olsem yumi pilim tru gutpela pasin narapela man i mekim bilong helpim yumi. Sapos yu pilim tru ol samting Jisas i bin mekim bilong helpim yu, bai yu bilip tru long em, em i Man bilong baim bek yu. Long dispela rot tasol ofa bilong Jisas inap helpim yu. Yu tingim tok bilong Jon 3:16? Dispela ves i tok yumi mas bilip long Jisas. Tasol yu no ken bilip tasol long Jisas i bin i dai bilong helpim yu. Nogat. Yu mas mekim wok bilong kamapim bilip bilong yu.

Yumi mas bihainim tok Pita i bin mekim long sampela Juda bihain liklik long Pentikos long yia 33 C.E. Em i tok: “Yupela i mas senisim tingting nogut bilong yupela, na tanim bel, na bai God i rausim sin bilong yupela.” (Aposel 3:19) Dispela skripsa i makim tupela samting yumi mas mekim. Namba wan samting, em olsem: Yumi mas givim baksait tru long ol tingting na laik nogut bilong yumi. Na namba tu samting, em olsem: Yumi mas beten askim God long lusim sin bilong yumi long rot bilong ofa bilong Jisas.​—⁠1 Jon 2:​1, 2.

Bihainim Pasin Bilong Jisas

Kolin (Colin) em i baptais inap 24 yia pinis. Ol i givim askim long em olsem: Bilong wanem yu tenkyu long Jisas long ol samting em i bin mekim? Kolin i tok: “Mi pilim tru ofa bilong em, tasol pasin bilong em i helpim tru mi. Em i stap olsem gutpela piksa bilong mi ken bihainim pasin bilong em.”

Sapos yumi pilim tru ol samting Jisas i bin mekim, bai yumi laik long bihainim gutpela pasin bilong em, a? Olsem em i gat pasin daun na em i save stap aninit long God na em i gat bikpela pasin sori tru​—⁠em i no tingim skin bilong em yet, em i redi long i dai tu bilong helpim yumi. Sapos yu tok, Mi laik bihainim pasin bilong Jisas, orait olsem wanem long tingting bilong yu? Yu save bihainim tru pasin bilong Jisas? Olsem: Sapos ol i givim wanpela wok long yu, olsem bilong wasim plua long Haus Kingdom samting, bai yu bihainim pasin daun na mekim dispela wok i no gat nem na planti man i no laik mekim? Yu laik tenkyu long Jisas na Papa bilong em long heven, olsem na yu redi long mekim ol kain wok olsem bilong helpim trupela lotu? Jisas i daunim em yet na mekim wok bilong helpim ol narapela man.​—⁠Jon 13:​2-17; Filipai 2:​7, 8.

Nau yumi ken tingim narapela samting. Planti taim yumi save mekim sampela samting i skirapim bel bilong narapela man na kros i kamap na narapela i bel nogut long narapela. Orait, sapos yu stap wantaim planti manmeri long wanpela rum na namel long ol wanpela man i stap em i bin rongim yu na bagarapim tru bel bilong yu, bai yu mekim wanem? Bai yu pilim tru gutpela pasin Jisas na Jehova i mekim long yumi ol sinman i save rongim ol, na long pasin isi bai yu go stretim tok wantaim dispela man i bin rongim yu na mekim i dai kros?​—⁠Rom 5:​6-10; 1 Jon 4:​9-11.

Jisas i lusim gutpela laip bilong em long heven na em i kamap man long graun na em i givim laip bilong em olsem ofa bilong baim bek ol manmeri. Tasol em i mekim narapela bikpela samting bilong helpim ol manmeri​—⁠em i skulim ol man na ol tok em i skulim ol long en i helpim ol tru. Jisas em i nambawan gutpela tisa, winim olgeta narapela man. Em i lainim ol man long nem bilong God na long ol pasin bilong God na long ol samting God i laik mekim bilong helpim ol.​—⁠Jon 7:​45, 46.

Ol tok Jisas i mekim taim em i stap long maunten i soim yumi, em i gutpela tisa tru. Em i kolim wanpela lo ol man i tok em i nambawan gutpela lo, em i tok: “Olgeta pasin yupela laikim ol manmeri i mekim long yupela, dispela pasin tasol yupela i mas mekim long ol.” (Matyu 7:12) Na em i kolim tupela lo bilong Lo bilong Moses i winim olgeta lo na i namba wan, em i tok: ‘ “Yu mas laikim tru [Jehova], God bilong yu, long bel bilong yu olgeta, na long [laip] bilong yu olgeta, na long tingting bilong yu olgeta, na long strong bilong yu olgeta.’ Na ․․․ ‘Yu mas laikim ol arapela man olsem yu laikim yu yet.’ ” (Mak 12:​29-31) Na yumi no ken lusim tingting long ol tok profet Jisas i mekim. Nau yumi lukim truim bilong ol dispela tok profet na yumi save yumi stap long ‘las taim.’​—⁠Matyu, sapta 24 na 25.

Jisas i no autim tok tasol; nogat. Em i bihainim gutpela pasin na makim rot yumi mas bihainim. Taim Jisas i laik kirap mekim wok bilong em, em i givim skin bilong em long God bilong mekim laik bilong God na em i kisim baptais long wara. God i salim em i kam long graun bilong autim tok i tru. Paslain liklik long taim Jisas i dai, em inap tokim Papa bilong em, olsem: “Mi bin soim strong bilong yu long ol manmeri long dispela graun. Mi pinisim pinis dispela wok yu bin givim mi long mekim,” na “Mi telimautim pinis nem bilong yu long ol man yu bin givim mi long dispela graun.”​—⁠Jon 17:​4, 6.

Jisas i laik bai ol narapela manmeri i bihainim pasin bilong em. Yumi inap save long dispela samting, long wanem, long Matyu 4:19 na 19:21 Jisas i tok: “Kam bihainim mi.” Na aposel Pita i tok: “Krais i bin karim pen bilong helpim yupela. Olsem na em i soim yupela dispela pasin bilong em, bai yupela i ken bihainim.” Na aposel Pol i tok: “Yupela i mas makim mi na wokabaut, olsem mi tu mi save makim Krais na wokabaut.”​—⁠1 Pita 2:21; 1 Korin 11:⁠1.

Sapos yu pilim tru ol samting Jisas i bin mekim bilong helpim yu, olsem em i Gutpela Tisa na Gutpela Piksa, na yu laik tenkyu long em, orait, yu mas wok yet long kisim save long ol tok em i bin lainim ol man long en. Sapos yu laik mekim olsem, long olgeta taim yu mas stadi na wok long kisim save long Tok bilong God, em Baibel. Gutpela sapos yu lainim ol tok bilong Nupela Testamen, long wanem ol tok Jisas i bin autim i stap long dispela hap bilong Baibel. I mas i gat sampela samting bilong helpim yu bambai yu inap kisim save na pilim tru ol tok yu kaunim, olsem na gutpela sapos yu mekim wok long sampela buk bilong Baibel ol i bin wokim bilong helpim man long kisim save long Baibel.a Na long olgeta de yu mas wok strong long bihainim ol tok yu kisim save long en. Tru tumas, yu mas mekim wok. Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ bai ol i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”​—⁠Matyu 7:21; 4:17; Luk 4:​17-21.

Tingim Lotu Bilong Jehova Pastaim

Long nau, inap 1,056,000,000 manmeri i tok ol i Kristen. Tasol planti ol i no pilim ol samting Jisas i bin mekim bilong helpim ol. Ol i no tenkyu long em. Planti ol i ting sapos ol i go long lotu tupela taim long yia, olsem long Krismas na Ista samting, ol i mekim gutpela wok. Na sampela i save tok, ‘Mi laikim God, long wanem mi bilipim ol tok bilong Tenpela Lo.’ Tasol hamas manmeri i save bihainim tok bilong ol Tenpela Lo? Jehova i givim dispela gutpela lo long lain Isrel long bipo na namba wan lo i go inap namba 4 lo i makim ol samting ol i mas mekim bilong lotuim God Jehova. Dispela i makim olsem lotu bilong Jehova i bikpela samting na ol i mas tingim pastaim.​—⁠Eksodas 20:​1-11.

Jisas i bihainim ol tok bilong stiaim tingting i as bilong ol tok bilong dispela Tenpela Lo, tasol long ol man i tok ol i Kristen hamas ol i bihainim dispela pasin bilong Jisas? Hamas man i lotuim God wanpela tasol olsem namba 2 lo bilong dispela Tenpela Lo i makim? Yu ting ol i bihainim pasin bilong Jisas na litimapim nem bilong God, olsem namba 3 lo bilong dispela Tenpela Lo i makim? Ol Kristen tru i save bihainim gutpela pasin, na ol i save tingim lotu bilong Jehova pastaim.​—⁠Matyu 6:⁠33.

Planti Kristen olsem ol i save, pasin bilong bung wantaim em hap wok bilong ol long lotuim God. Pasin bilong i go long olgeta miting Kristen em wanpela gutpela rot bilong tok tenkyu. Ating yu no bin tingim dispela, a? Aposel Pol i tingim na long sapta 10 bilong pas em i raitim long ol Hibru em i stori long pasin bilong bung wantaim. Em i tok, sapos yumi les long go long ol miting bai yumi no amamas moa na bai yumi no mekim moa ol gutpela wok bilong bilip. Na sampela, ating pastaim ol i bilip tru long ol samting God i mekim long rot bilong Krais bilong kisim bek ol, tasol nau bilip bilong ol i no strong moa. Sapos ol i no was gut, ating bai ol i lusim bilip na long laik bilong ol yet bai ol i mekim rong o bai ol i givim baksait long God. Long dispela rot ol i mekim olsem ofa bilong Krais, dispela presen God i givim long yumi, em i “samting nating.” Ol i no tenkyu long Jehova na Jisas.​—⁠Hibru 10:​23-31.

Ol dispela man i no lusim tasol ol miting; ol i givim baksait long ofa bilong Krais, olsem na Pol i mekim toksave long ol na yumi mas tingim dispela tok bilong Pol, em i tok: “Yumi save, sapos wanpela man i kalapim lo bilong Moses, na tupela o tripela man i lukim na ol i autim tok long rong em i mekim, orait ol i no ken sori long dispela man. Nogat. Em i mas i dai. Orait yupela i ting wanem long man i givim baksait long Pikinini Bilong God? Dispela man bai i kisim bikpela hevi moa yet. Blut bilong kontrak bilong Krais i bin mekim dispela man i kamap holi. Tasol dispela man i mekim olsem blut bilong kontrak em i samting nating. Na em i mekim pasin nogut tru long Spirit bilong marimari.”​—⁠Hibru 10:​28, 29.

Long rot bilong Moses God i givim Lo olsem presen long lain Isrel. Olsem na Pol i kirapim ol man i kaunim pas bilong em long tingim ol samting i save painim ol man i givim baksait long dispela Lo na ol i no tanim bel​—⁠Lo i tok ol i mas i dai. Ol man i givim baksait long gutpela presen Jehova i givim long yumi long rot bilong Krais Jisas, em Man I Winim Moses, ol dispela man i mas kisim bikpela hevi moa yet. Pikinini bilong God em i Helpim bilong ol na sapos ol i givim baksait long ofa bilong em ol i mas kisim bikpela strafe​—⁠“namba tu dai” bai painim ol na ol i no inap kirap bek.​—⁠Revelesen 21:8; Diuteronomi 13:​6-10; 17:​2-7.

Sapos long laik bilong em yet man i mekim rong o em i givim baksait long God, Pol i tok dispela man i no tenkyu liklik long Jehova na Jisas. Dispela man i mekim tripela bikpela rong. Namba wan em olsem: Em i “givim baksait long [krungutim] Pikinini Bilong God.” Em i “krungutim” Jisas​—⁠ating nau em i tingim Jisas i olsem birua bilong em. Long wanem ol man i winim pait long bipo ol i save “krungutim” ol birua bilong ol. O ating em i tingim Jisas i olsem “samting nating,” long wanem ol man i save krungutim ol samting ol i ting em i samting nating tasol. (Lukim Matyu 7:⁠6.) Namba tu rong em olsem: “Blut bilong kontrak bilong Krais i bin mekim dispela man i kamap holi. Tasol dispela man i mekim olsem blut bilong kontrak em i samting nating.” Em i givim baksait long dispela samting (blut bilong Krais) i bin mekim em i kamap klin. Dispela blut i as bilong nupela kontrak, em i ting dispela blut i samting nating na i no winim blut bilong ol sinman; em i no ting dispela blut i holi. Na namba tri rong em i mekim em olsem: “Em i mekim pasin nogut tru long Spirit bilong marimari.” Em i givim baksait long strong bilong spirit holi bilong God. Em i no laik bai spirit holi bilong Jehova i bosim em moa; em i ting spirit i no inap helpim em.​—⁠Efesas 4:⁠30.

Sapos yumi pilim tru ol samting God na Krais i bin mekim bilong kisim bek yumi, bai yumi no givim baksait long ol dispela samting i holi. Bai yumi tingim gut ol miting Kristen na yumi no ken lusim, olsem ol man i givim baksait long tok i tru ol i mekim. Yumi no inap lukim God Jehova na Krais Jisas, tasol ol i stap long ol dispela miting, olsem na ol Kristen i tenkyu tru long tupela ol i no save lusim ol dispela miting. Ol i wok strong long i go long ol miting long olgeta taim.​—⁠Lukim Malakai 3:16; Matyu 18:⁠20.

Olsem na yu mas tenkyu long Jisas long ol samting em i bin mekim bilong helpim yu. Yu mas bilip tru long ofa bilong em. Bihainim pasin bilong Jisas na mekim gut long ol narapela man. Long olgeta wokabaut bilong yu, tingim lotu bilong Jehova pastaim. Sapos yu mekim olsem, orait bai yu inap tok: “Yumi tenkyu long God long dispela presen,” olsem marimari bilong em yumi kisim long rot bilong Jisas.​—⁠2 Korin 9:⁠15.

[Futnot]

[Piksa long pes 6]

Ol Samting yu ken mekim bilong tenkyu long Jisas