Insait Bilong Ol Tok i Kam Long Olgeta Hap
Ol i Tromoi Bikpela Mani Long Marit
Namba bilong ol man na meri i marit i wok long i go bikpela long hap bilong Amerika—inap olsem 16 pesen winim namba i marit 10-pela yia i go pinis—na pe bilong ol samting bilong marit tu i go antap. Mani ol i tromoi long marit na kaikai bilong marit i go antap tru winim K6,000, na sampela i go antap moa winim K50,000 samting. Long yia i go pinis ol i tromoi bikpela mani tru (olsem K20,000,000,000) long wokim ol samting bilong marit—bipo ol i no bin tromoi bikpela mani olsem. Ol i tromoi dispela bikpela mani long wanem ol samting? Wanpela nius Fortune i tok ol i tromoi mani long kain kain samting, ‘long ol ring, ol plaua na bilas na musik, ol bikpela bikpela ka na ol holide bihain long marit.’
Taim bilong marit em i taim bilong amamas. Tasol Krais Jisas i kolim sampela samting bilong makim olsem yumi stap long ‘dispela taim bilong pinis’ na wanpela em ol samting bilong marit. (Matyu 24:3, 34) Em i tok: “Pasin ol i bin mekim long taim bilong Noa, pasin olsem tasol bai ol i mekim long taim Pikinini Bilong Man i kam bek. Taim bikpela tait i no kamap yet, ol i kaikai, na ol i dring, na ol i marit, i go inap long taim Noa i go insait long sip. Ol i no ting, na ol i stap olsem tasol, na bikpela tait i kamap nau na i tekewe dispela manmeri olgeta. Bai i olsem tasol taim Pikinini Bilong Man i kam bek.” (Matyu 24:37-39) Jisas i no tok ol manmeri i stap nau “long las taim” i mekim rong sapos ol i marit. (2 Timoti 3:1) Tasol em i tok planti bai ol tingim tumas ol samting bilong marit, na dispela bai pulim bikpela hap taim na mani bilong ol na bai ol i no tingting long dispela taim i sot pinis.
Ol Bikman Bilong Gavman i Tok Save na Tingting Bilong God Inap Helpim Ol
Maski ol bikman bilong gavman i gat tingting long kamapim gutaim long graun, tasol oltaim ol i pret na tingting strong long ol samting bilong pait. Long wanpela nius (Times), bikman bilong Rasia, em Mikhail S. Gorbachev i bel hevi na i tok: ‘Olsem wanem? Ating God antap i no laik givim sampela save na tingting bilong em long yumi long painim rot bilong stretim ol samting ․․․ namel long tupela bikpela kantri long graun.’ Long Ogas 15, Presiden bilong Saut Afrika, em P. W. Botha i mekim wanpela tok na long pinis bilong en, em i tok: ‘Yumi mekim olgeta samting em ol man inap mekim ․․․ mi beten askim God I Gat Olgeta Strong em inap givim yumi gutpela save na tingting na strong bilong Em long painim rot bilong inapim laik bilong Em.’
Ol bikman bilong gavman i tok ol i mas kisim save na gutpela tingting i kam long God bilong helpim ol long kamapim gutaim. Tasol Baibel i tok gutaim bai kamap long olgeta hap bilong graun long rot bilong Kingdom bilong God tasol. (Danyel 2:44; skelim Aisaia 9:6, 7) Ol manmeri i bihainim dispela Kingdom bilong heven ol tasol inap painim bel isi na gutpela sindaun oltaim.
Lotu Bilong Ajentina i Gat Asua
‘Lotu bilong Ajentina i gat asua long blut,’ wanpela nius i tok olsem. (Em nius National Catholic Reporter bilong Epril 12, 1985.) Taim ami i bosim Ajentina, ol i stilim na kilim i dai planti manmeri tru olsem 10,000 i go inap long 30,000 samting em gavman i no bin harim kot bilong ol. Sampela man i tok sapos Lotu Katolik i bin pasim gavman taim ol i mekim dispela pasin nogut, planti tausen man i no gat asua i no ken i dai. Tasol nius i tok, ‘misin long Ajentina i pasim maus na i no mekim wanpela samting insait long dispela 7-pela yia,’ na dispela pasin nogut i pinis taim gavman i senis na nupela gavman i kamap long yia 1983.
Bilong wanem misin i no mekim wanpela samting? Wanpela samting em olsem ol i pret, nogat gavman i kirap na mekim nogat long ol. Tasol nius i kamapim narapela as tu na em i tok: ‘Ol pris pasto i litimapim nem bilong ami na ol i tok em i as bilong olgeta strong.’ Misin i kisim planti gutpela samting. Nius i tok: ‘Samting i kamap long Ajentina i klostu wankain tru long pasin Misin Katolik i mekim long taim bilong Nasi long Jeman, na ating long ai bilong Misin bikpela strong i moa win long wok bilong autim tok i tru bilong Gutnius.’
Dispela i kamapim long ples klia sapos ol misin i laik pren wantaim gavman, ol i mekim pasin nogut. Long Baibel, buk Revelesen i tok pasin bilong Misin na gavman i pas wantaim, em i no gutpela samting, na em i tok olgeta misin giaman i olsem wanpela pamukmeri na “ol king bilong graun ol i bin mekim planti pasin pamuk wantaim dispela meri.” (Revelesen 17:2) Olsem na Jisas i tok ol disaipel bilong em ol “i no man bilong dispela graun.”—Jon 15:19.