“Bel Isi Bilong God” Kibung Distrik Bilong 1987

I STRET yumi putim nem “Bel Isi Bilong God” long ol kibung distrik bilong yumi bilong 1987. Jehova em i “no save paulim nabaut ol samting. Nogat. Em i save mekim yumi stap wanbel.” Em i narapela kain tru long “god giaman bilong dispela graun,” em Seten. Seten i save paulim nabaut ol samting na kirapim kros na pait.—1 Korin 14:33; 2 Korin 4:4.

Planti taim Baibel i tok Jehova “em i as bilong bel isi.” (1 Tesalonaika 5:23; Filipai 4:9; Hibru 13:20) Planti taim Baibel i tok yumi mas i stap bel isi, na stap wanbel wantaim ol narapela man. Na planti taim Baibel i tok promis olsem: Bai gutaim i kamap long graun na bai olgeta man i stap bel isi. Tru tumas God Jehova “em i as bilong bel isi” na em i mekim lain bilong em i stap bel isi.—Rom 15:33; 16:20.

Olsem na i stret olgeta wokboi bilong Jehova ol i mas bihainim pasin bilong em. Aposel Pita i tok yumi mas “wok long kamap wanbel wantaim ol arapela man, na bihainim dispela pasin.” (1 Pita 3:10, 11) Yumi mas wok long “mekim dai ol kros.”—Matyu 5:9.

Em hatwok long i stap wanbel wantaim ol narapela man na kirapim ol tu long lusim kros na pait na i stap bel isi. Yumi olgeta yumi sinman na sampela taim pasin bilong narapela i skrapim bel bilong narapela na kros i kamap. Yumi save, sampela taim bai kros i kamap, tasol kwiktaim yumi mas wok long mekim i dai bambai yumi olgeta i ken i stap wanbel wantaim. Na i gat planti samting bilong dispela graun Seten i bosim em i putim hevi long yumi o i laik pulim yumi na i hatwok long yumi kisim dispela “bel isi God i save givim yumi, em i winim olgeta save bilong man.”(Filipai 4:7) Seten wantaim ol spirit nogut i wok strong long bagarapim dispela bel isi bilong yumi bambai yumi no ken i stap wanbel wantaim. I olsem yumi gat pait na yumi mas wok strong long sakim ol.—Efesas 6:12.

God i givim lo long lain bilong em long bipo, na em i tok sampela taim ol i mas wokim kibung bambai ol i ken bung wantaim bilong kisim strong long spirit na bilong kirapim ol long wok strong moa long bihainim ol lo bilong Jehova. Na i wankain tu long nau. Jehova i givim planti samting long yumi bilong helpim yumi long kamap olsem man bilong mekim i dai kros na wanpela gutpela samting bilong helpim yumi em ol kibung distrik yumi save wokim wanpela taim long olgeta yia. Taim yumi bung long ol dispela kibung yumi lainim ol tok bilong God long Baibel. Inap 4-pela de, long rot bilong ol tok na soim na pilai samting, Papa bilong yumi long heven i lainim yumi. Ol singsing bilong yumi tu i kirapim yumi long i stap bel isi na i stap wanbel wantaim.

Long dispela yia, taim yumi go long ol “Bel Isi Bilong God” Kibung Distrik na bung wantaim ol brata, bai yumi pilim gutpela pasin bilong ol bilong i stap isi wantaim, olsem ol brata brata tru. Na taim yumi lukim ol brata i wok gut wantaim long ol dipatmen bilong kibung, dispela tu bai strongim yumi long bihainim pasin bel isi bilong God.

Olsem na yumi mas laik tru long kisim ol gutpela kaikai bilong spirit bilong strongim yumi na yumi kam long dispela kibung. Yumi mas kam long olgeta de na harim olgeta tok, kirap long namba wan tok long Fonde i go inap long laspela singsing na beten long Sande, na bai dispela kibung i helpim gut yumi.

Na yumi mas bihainim gutpela tingting long olgeta taim. Olsem wanem yumi ken mekim? Yumi kam bilong kisim gutpela kaikai bilong spirit, a? Na yumi lusim bikpela hap taim na mani bilong i kam, a? Orait, nogut dispela bikpela hap taim na mani i lus nating. Yumi mas bihainim gutpela tingting na mekim ol pasin em inap helpim yumi long kisim ol gutpela kaikai bilong spirit long kibung. Olsem na yumi mas wok long i kam long taim stret na lukautim gut skin bilong yumi. Yumi no ken kaikai planti tumas o dring planti o sindaun stori stori i go inap biknait na yumi no slip kwik. Nogat. Yumi mas kaikai samting inap long skel bilong yumi tasol, na yumi mas slip kwik long nait bambai skin bilong yumi i no ken les na yumi inap kisim gut ol kaikai bilong spirit long kibung. Taim ol brata i mekim tok long pletfom, gutpela sapos yumi sindaun harim na yumi no ken raun na toktok wantaim ol pren bilong yumi, em yumi no bin lukim ol longtaim. Sapos yumi laik toktok wantaim ol yumi ken mekim taim program i no kirap yet o taim program i pinis. Yumi olgeta i mas tingting strong long kisim olgeta gutpela kaikai bilong spirit bambai kibung i ken strongim yumi long ol samting bilong spirit.

God i givim lo long lain bilong em long bipo na em i tok, sampela taim ol i mas wokim kibung bambai ol i ken bung wantaim na kisim strong long spirit. Na long nau tu, ol kibung distrik yumi save wokim long olgeta yia ol i gutpela samting tru Jehova i givim long yumi bilong helpim yumi long mekim i dai ol kros na i stap wanbel wantaim ol narapela man.