Go Long “Bilip Tru Long Jehova” Kibung Distrik Bilong 1988
I GAT gutpela nem bilong ol kibung distrik bilong yumi bilong 1988, em olsem: “Bilip Tru long Jehova”! Yumi bilip tru long Jehova na yumi stap narapela kain long ol narapela manmeri. Ol narapela manmeri i save bilip tru long mani kago samting bilong ol, o long bikpela save bilong ol, o long strong bilong ol, o long ol bikpela man bilong gavman o bilong lotu. Tasol ol dispela man na ol dispela samting i no inap helpim ol.—Sam 146:3, 4.
Yumi mas bilip tru long Jehova. Dispela em i bikpela samting. Planti taim Baibel i tok olsem. Ol man bilong raitim ol sam, planti taim ol i tok ol i save bilip tru long Jehova. Ol i tok olsem: “Mi bilip long yu.” “Bikpela, mi save bilip long yu.” Tok bilong ol i kirapim yumi long tingim ol tok bilong wanpela singsing bilong Kingdom, i tok: “Jehova em i ples hait, /Yumi ken hait long em. . . . Jehova em i banis /Bilong haitim stretpela man.”—Sam 31:6, 14.
Planti taim Baibel i tok, yumi mas bilip long God: “Yu mas bilip tru long God, na mekim gutpela pasin.” “Yu mas bilip strong long Bikpela. Yu no ken ting save bilong yu yet inap helpim yu.” (Sam 37:3; Provep 3:5) Na Baibel i stori long ol gutpela wokboi bilong Jehova, olsem King Hesekaia, na Ebet-melek, na tripela yangpela Hibru, na Danyel, em ol i bin kisim gutpela pe, long wanem ol i bilip tru long em long taim bilong bikpela hevi.—2 King 18:5; Jeremaia 39:18; Danyel 3:28; 6:23.
Yumi mas mekim wanem na bai yumi kamapim long ples klia olsem yumi bilip tru long Jehova? Wanpela samting yumi mas mekim, em olsem: Yumi mas kisim save long Em na bilip tru long Tok bilong Em. Krais Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” Tru tumas, sapos yumi bilip tru long Jehova na givim bel olgeta long em, bai yumi tingim ol wok bilong Kingdom pastaim na bai yumi wokabaut stret.—Matyu 6:33.
Bilong wanem yumi mas bilip strong long Jehova? Long wanem i gat kain kain hevi na traim i save painim yumi. Sampela brata ol i mas bilip strong long wanem ol man i mekim nogut tru long ol, na sampela ol i mas bilip strong long wanem i gat planti samting i laik pulim ol long mekim pasin i no stret. Sampela i mas bilip strong bambai ol inap karim hevi na sanap strong. Ol kibung distrik i laik kamap long 1988 i wanpela samting Jehova i putim bilong strongim yumi nau long las taim.
Long 1988 bai yumi kibung inap tripela de olgeta, em Fraide na Sarere na Sande. Ol i stretim program na bai yumi harim planti tok inap wankain olsem long yia i go pinis. Olgeta tok bilong kibung i bilong strongim yumi na helpim yumi bambai yumi bilip tru long Jehova, na long oganaisesen bilong em long graun.
Olsem na olgeta wan wan witnes Kristen bilong Jehova i mas tingting strong long i go long wanpela bilong ol dispela kibung bilong 1988. Kisim ol pikinini bilong yu tu i go long kibung. Kamap kwik long ples kibung na bai yu stap long taim bilong namba wan singsing na beten long Fraide long moningtaim, na yu harim olgeta tok bilong kibung i go inap long laspela singsing na beten long Sande, long apinun. Kisim Baibel i kam na buk singsing na notbuk na pensil. Givim bel long kibung; givim bel long singsing na long harim gut ol beten tu. Putim gut yau long olgeta tok bilong kibung. Na yumi mas bilas gut na was gut long pasin bilong yumi bambai ol man i no gat tok long yumi.
Wanpela lo bilong Baibel i tok, ‘Planim planti na bai yu kisim planti.’ Dispela lo i stret long kibung bilong yumi tu. Sapos yumi putim gut yau long ol tok bilong “Bilip Tru long Jehova” Kibung Distrik bai yumi yet yumi kisim planti blesing, na bai yumi inap helpim tru ol narapela man.—2 Korin 9:6.
[Box on page 31]
Ol Ples Em Kibung Bai Kamap long En
Tok Inglis, Tok Pisin, Tok Motu
Pot Mosbi
Janueri 1-3,
1988
Tok Pisin
Arawa Janueri 9,10, 1988
Wirwir Janueri 9,10, 1988
Klinwara Janueri 16,17, 1988
Kavieng Janueri 16,17, 1988
Lae Janueri 22-24, 1988
Rabaul Janueri 23,24, 1988
Wewak Janueri 30,31, 1988
Madang Janueri 29-31, 1988
Tok Motu
Govigovi Janueri 16,17, 1988
Popondetta Janueri 16,17, 1988
Daru Janueri 23,24, 1988
Kerema Janueri 23,24, 1988
Boboa Janueri 30,31, 1988
Kikori Janueri 30,31, 1988