Bilong Helpim Pikinini Long Kisim Gutpela Save Bilong God

OL MAN bilong kain kain lain na ples, em ol i gat save, ol i tok Jisas em i gutpela tisa tru na em i man bilong lainim ol man long ol gutpela lo ol i mas bihainim. Olsem wanem? Sampela samting em i lain long en taim em i liklik yet, dispela i helpim em long kamap kain man olsem? Ol samting mama bilong em na waspapa bilong em i bin mekim na ol samting ol i lainim Jisas long en, dispela inap givim wanem gutpela save long ol papamama long nau?

Baibel i no stori planti long Jisas taim em i stap pikinini yet. Tupela ves tasol i stori long em i go inap long taim em i gat 12-pela krismas. “Ol [Josep tupela Maria] i mekim pinis olgeta samting olsem lo bilong Bikpela i tok, orait ol i go bek long Galili long taun bilong ol, Nasaret. Na pikinini em i kamap bikpela na i kamap strong. Em i gat planti gutpela save, na marimari bilong God i stap long em.” (Luk 2:39, 40) Em liklik tok tasol, tasol dispela tok inap givim gutpela save na tingting long ol papamama.

Pikinini Jisas “i kamap bikpela na i kamap strong.” Olsem na yumi save, papamama bilong em i lukautim em gut long skin. Na tu “em i gat planti gutpela save.”a Em wok bilong husat long givim dispela planti gutpela save long em?

Lo bilong Moses i tok, dispela em i wok bilong papamama bilong em. Lo i tokim ol papamama long lain Isrel, olsem: “Dispela tok nau mi givim long yu em i mas i stap long bel bilong yu; na yu mas skulim skulim pikinini man bilong yu long en, na toktok wantaim em long en taim yu sindaun long haus, na taim yu wokabaut long rot, na taim yu laik slip, na taim yu kirap.” (Diuteronomi 6:6, 7, NW ) Josep tupela Maria i bihainim dispela lo God i bin givim long ol Isrel, olsem na Jisas i kisim “planti gutpela save” na “marimari bilong God i stap long em.”

Tasol pikinini Jisas em i gutpela olgeta, olsem na ating sampela i ting olsem ol samting papamama bilong em i mekim long em, dispela i no inap givim save long papamama bilong ol narapela pikinini. Tru, pikinini Jisas em i gutpela olgeta, tasol Josep tupela Maria i no gutpela olgeta. Tupela i gat bikpela wok, long wanem ol i gat ol narapela pikinini tu, tasol tupela i lukautim gut Jisas long samting bilong skin na spirit. (Matyu 13:55, 56) Na maski Jisas em i gutpela olgeta, tasol em i stap pikinini na em i mas kamap bikpela na papamama i mas helpim em. Tupela i mekim gut wok bilong ol.

Taim Jisas i Gat 12-pela Krismas

“Papamama bilong Jisas tupela i save go long Jerusalem olgeta yia bilong lukim bikpela de holi ol i kolim Pasova.” (Luk 2:41) Lo bilong God i tok, olgeta man long lain Isrel ol i mas i go long Jerusalem bilong lukim ol bikpela de holi. (Diuteronomi 16:16) “Papamama bilong Jisas,” em Josep tupela Maria, na ating ol narapela long famili tu, ol i “save” mekim olsem. Ol i save wokabaut longwe, winim 100 kilomita, bilong lukim bikpela de holi em i taim bilong amamas. (Diuteronomi 16:6, 11) Ol i “save” go—em pasin bilong ol. Na ol i no i go tasol na i kam bek kwik. Nogat. Ol i bihainim pasin bilong dispela de holi na ol i stap long Jerusalem inap long taim olgeta de bilong Pasova i pinis.—Luk 2:42, 43.

Dispela samting inap lainim gut ol papamama long nau. Ol dispela bikpela de holi long Jerusalem ol i taim bilong bung wantaim na mekim lotu, na ol i taim bilong amamas tu. (Levitikas 23:4, 36) Ol samting i kamap long dispela de holi i strongim Josep na Maria na yangpela Jisas long spirit. Ol papamama long nau tu i mas painim sampela kain taim olsem bilong ol pikinini bilong ol i ken amamas na kisim strong long spirit tu. Ol papamama long lain Witnes Bilong Jehova ol i save kisim ol pikinini bilong ol i go long ol bikpela kibung bilong ol Witnes long olgeta yia. Long dispela rot ol pikinini i kisim amamas bilong i go long narapela ples na ol i bung wantaim ol wanlotu bilong ol inap sampela de. Wanpela papa em i gat 10-pela pikinini na em i bin helpim ol long kamap gutpela Kristen, em i tok bikpela samting bilong helpim em i olsem: Kirap long taim em i kisim baptais na kamap Kristen, inap 45 yia pinis em i no bin lusim wanpela hap program bilong wanpela kibung. Em i save go long olgeta kibung na harim olgeta tok bilong en. Na em i bin kirapim olgeta pikinini bilong em tu long mekim olsem.

Liklik Popaia

Taim Jisas i liklik yet na em i go wantaim papamama long Jerusalem bilong lukim ol bikpela de holi, ating em i save stap klostu long papamama oltaim. Tasol taim em i kamap bikpela liklik, ating ol i larim em i lusim ol long sampela taim na ol i no strong long em i mas i stap klostu long ol oltaim. Long ai bilong ol Juda, manki i gat 12-pela krismas em i olsem i laik kamap man tru nau. Ating ol dispela samting i mekim na taim Josep tupela Maria i lusim Jerusalem na i laik go bek long ples, ol i no save Jisas i stap yet long Jerusalem. Baibel i stori olsem: “Ol i go bek. Tasol yangpela boi Jisas em i stap yet long Jerusalem. Na papamama bilong en i no save long em i stap yet. Tupela i ting em i wokabaut wantaim ol arapela manmeri. Olsem na tupela i wokabaut wanpela de olgeta, na tupela i wok long painim em namel long ol wanlain na ol pren.”—Luk 2:43, 44.

Ating kain samting olsem i save kamap insait long olgeta famili. Tasol dispela i narapela kain liklik, long wanem Jisas em i gutpela olgeta. Oltaim em i save bihainim tok bilong Josep tupela Maria, olsem na yumi save i no olsem papamama i bin pasim tok wantaim em na tokim em long samting em i mas mekim na em i bikhet na sakim tok. Nogat. (Luk 2:52) Ating as bilong dispela liklik hevi i kamap em i olsem ol i no bin toktok gut wantaim na narapela i no save long tingting bilong narapela. Olsem na papamama i ting Jisas i wokabaut wantaim ol wanlain na ol pren bilong ol. (Luk 2:44) Taim ol i laik lusim Jerusalem, ating ol i gat planti wok, long wanem ol i mas bungim ol samting bilong ol na redi long wokabaut, na ating ol i tingim pastaim ol pikinini bilong ol i liklik yet; na ol i ting namba wan pikinini, em Jisas, em yet i redi na em i go wantaim ol wanlain bilong ol.

Tasol Jisas i ting papamama i save em i stap we. Olsem na bihain, taim em i bekim tok long tupela, em i tok: “Bilong wanem yutupela i wok long painim mi? Ating yutupela i no save, mi mas i stap long haus bilong Papa bilong mi?” Em i no bikhet long tupela na em i mekim dispela tok. Nogat. Em i kirap nogut, long wanem papamama i no save em i stap we. Ating planti taim kain samting olsem i save kamap namel long ol papamama na ol pikinini i bikpela liklik, olsem narapela i no save gut long tingting bilong narapela.—Luk 2:49.

Wanpela san olgeta Josep tupela Maria i wokabaut i go na taim san i go daun na ol i painim Jisas nogat, nau tupela i tingting planti. Tupela i wok long painim em long Jerusalem inap tupela de na yumi save, tupela i tingting planti long dispela pikinini bilong ol, em i stap gut o nogat. Tasol tupela i bin lainim gut Jisas na dispela samting i helpim em—em i no i go poroman wantaim ol man nogut. Em i no mekim pasin nogut na semim papamama bilong em. Nogat tru. Taim tupela i painim em pinis, tupela i lukim em “i stap insait long tempel. Em i sindaun i stap namel long ol tisa. Em i wok long harim tok bilong ol, na long askim ol tu. Ol man i harim tok bilong en, ol i kirap nogut long save bilong en na long tok em i bekim long ol.”—Luk 2:46, 47.

Em i mekim gutpela wok na em i autim gutpela save em i bin kisim long ol lo bilong Baibel. Dispela tu i kamapim long ples klia olsem Josep tupela Maria i bin lainim gut em i kam inap long dispela taim. Taim tupela i painim pinis Jisas, Maria i mekim pasin olgeta mama i save mekim, em pikinini bilong ol i lus na ol i bel hevi na tingting planti. Maria i tok: “Pikinini, bilong wanem yu mekim olsem long mitupela? Bel bilong mi tupela papa bilong yu i hevi tumas na mitupela i wok long painim yu.” (Luk 2:48) I no Josep i kirap mekim tok. Nogat. Maria i kirap autim bel hevi bilong em—em pasin bilong ol mama. Planti yangpela manmeri i kaunim dispela tok, ating bai ol i tok: ‘Em i stret. Mama bilong mi tu i save mekim olsem!’

Save Yumi Kisim

Dispela samting i bin kamap i givim wanem gutpela save long yumi? Olsem: Planti taim ol yangpela i no tokim papamama long tingting bilong ol; ol i ting papamama i save long tingting bilong ol. Planti taim ol i save tok, ‘Mi ting yu save.’ Sapos wanpela liklik hevi i bin kamap na pikinini bilong yu i tok olsem, orait yu ken save, planti taim kain samting olsem i save kamap.

Taim ol pikinini i go bikpela liklik, ol i no save stap klostu long papamama oltaim olsem long taim ol i liklik yet. Ol papamama i mas save kain senis olsem bai kamap na ol i mas redi long en. Maski papamama i lainim gut pikinini, tasol sampela taim bai narapela i no save gut long tingting bilong narapela na bai papamama i tingting planti. Tasol sapos ol i bihainim gutpela pasin olsem bilong Josep tupela Maria, taim hevi i kamap, gutpela save ol i bin givim long ol pikinini bilong ol bai helpim ol pikinini long bihainim gutpela pasin.

Dispela samting yumi stori long en em i bin kamap taim Jisas i gat 12-pela krismas. Bihain, em i wok long kamap bikpela na papamama bilong em i wok yet long helpim em. Baibel i tok, Jisas “i go bek wantaim tupela” long ples na “oltaim em i bihainim tok bilong tupela.” Na wanem samting i kamap? “Jisas i kamap bikpela, na save bilong en i kamap gutpela tru. Na God na ol man tu ol i laikim em tumas.” Olsem na dispela liklik hevi i pinis na gutpela samting i kamap. (Luk 2:51, 52) Ol papamama i bihainim pasin bilong Josep tupela Maria na ol i helpim ol pikinini bilong ol long kisim gutpela save bilong God, na famili i pas gut wantaim, na ol i save kisim ol pikinini i go bung wantaim ol man i laikim God, dispela inap mekim na bai gutpela samting olsem i kamap long pikinini bilong ol tu. Bai pikinini bilong ol i stap amamas na wok long kamap gutpela Kristen.

[Futnot]