Karim Hevi Dispela Inap Helpim Man?

PLANTI man, taim bikpela pen na hevi i painim ol, dispela i save mekim ol i kros na bel nogut. Sampela man i karim wankain hevi, o ol i karim bikpela hevi moa, tasol dispela i helpim ol long sori moa yet long ol narapela man. Sampela man, taim hevi i painim ol na i stap longtaim, ol i tok i no gat God; tasol sampela ol i karim bikpela hevi na ol i no lusim bilip liklik—ol i bilip tru long God I Gat Olgeta Strong. Bilong wanem i olsem?

Planti man i save bel nogut na lusim bilip, long wanem ol i tingting tumas olsem ol yet i namba wan tru, na ol i no ting olsem ol i sinman na ol i stap namel long ol man i sakim lo bilong God. Ol samting nogut i kamap na i asua bilong ol man, ol i tok em asua bilong God. Olsem na taim ol i karim hevi, dispela i no helpim ol liklik. Na taim hevi i pinis, ating ol i kirap bihainim pasin i nogut, winim pasin bilong ol long bipo.

Bilong helpim yumi bambai yumi no ken mekim olsem, yumi mas larim ol hevi i lainim yumi na helpim yumi. Olsem na yumi mas i gat stretpela tingting long ol hevi ol man i karim. Hap bilong Baibel ol i kolim Krai Bilong Jeremaia em inap helpim yumi long kisim stretpela tingting olsem.

Holimpas Bilip

Ol rait bilong dispela hap bilong Baibel i olsem 5-pela song bilong krai na sori long bikpela bagarap i bin painim Jerusalem long han bilong ol Babilon. Long namba tri song, spirit bilong God i kirapim profet Jeremaia long kamapim tingting bilong bel bilong em, em i pilim tru dispela bikpela hevi i bin painim lain Isrel. Jeremaia i stori long wanpela man na i olsem em i mekim tok piksa na makim lain Isrel olgeta. (Krai Bilong Jeremaia 3:1) Jeremaia i karim hevi wantaim dispela lain, tasol em i no bel nogut long dispela samting. Em i wetim taim bilong God i orait gen long lain bilong em. Em i save i stret God i mas givim strafe long ol.

Jeremaia i bilip tru olsem bihain bai Jehova i kisim bek ol, na dispela i helpim Jeremaia long sanap strong. Em i tok: “Mi save bai yu [Jehova yet] tingim mi, na bai yu lindaun na i kam klostu tru long mi. Oltaim bai mi tingim dispela samting long bel bilong mi. Na bai mi wet i stap.” (Krai Bilong Jeremaia 3:20, 21, NW ) Jeremaia i no gat tupela tingting; em i bilip tru olsem bihain bai Jehova i orait gen long lain bilong em, em ol i tanim bel. Tru, ol birua i daunim ol olgeta, tasol Jehova i stap antap long heven na bai em i lindaun na litimapim ol. Dispela tingting i strongim Jeremaia na mekim isi bel bilong em. Em i bilip na wet i stap. Em i wetim Jehova i kirap helpim lain bilong Em, em ol i tanim bel.

Olsem na taim hevi i painim yumi, yumi mas holimpas bilip. Yumi mas tingting olsem: I gat taim bilong ol hevi i kirap na i gat taim bilong ol i pinis tu. God Antap Tru em i no ken larim ol gutpela wokboi bilong em i karim hevi oltaim wantaim ol man i no givim bel long em. Olsem na yumi no ken les; yumi mas wet i stap, long wanem, tru tumas bai Jehova i helpim yumi.

Taim hevi i painim man em i ken ting olsem: ‘Mi stap laip yet, olsem na mi no ken lusim bilip; mi mas bilip na wet i stap.’ Long taim bilong Jeremaia, taun Jerusalem na hap bilong Juda i bagarap na planti Isrel ol i dai pinis. Tasol i gat sampela ol i abrusim bagarap na ol i stap laip. Long dispela as ol inap bilip olsem God i no ken lusim lain bilong em; bai em i mekim yet pasin marimari. Baibel i tok: “Marimari bilong Jehova tasol na yumi no pinis, long wanem ol pasin marimari bilong em i no ken pinis. Long olgeta moningtaim ol i save kamap nupela. Yu save bihainim pasin tru tasol. Mi tok olsem: ‘Jehova tasol em i bilong mi na mi no gat narapela samting, olsem na bai mi wet long em.’”—Krai Bilong Jeremaia 3:22, 24, NW.

Sapos God i no bin sori long ol Isrel na marimari long ol, bai i no gat wanpela Isrel i abrusim bagarap; bai olgeta i dai pinis. Tasol God Jehova i bin mekim pasin marimari. Na marimari bilong em i no ken pinis—long olgeta moningtaim i save kamap nupela long lain bilong em. Jehova i save bihainim pasin tru tasol, olsem na em i mas bihainim tok promis bilong em na marimari bilong em i no ken pinis. Marimari bilong em bai stap oltaim na wok strong. God Antap Tru em i strong bilong lain bilong em na ol i no gat narapela samting, olsem na i stret ol i ken bilip na wetim hevi bilong ol i pinis. God i larim dispela hevi i painim ol, long wanem ol i lusim Em, tasol bihain bai em i helpim ol.

Rot Bilong Wet i Stap na No Ken Les

Ol i mas bihainim wanem kain pasin taim ol i wet i stap? Baibel i tok: “Jehova i save mekim gut long man i bilip long em, long man i wok long painim em. Sapos man i wetim Jehova i kisim bek em, na pasim maus i stap, em i gutpela. I gutpela samting long man i karim hevi taim em i yangpela yet. Gutpela sapos em i sindaun em wanpela tasol na em i pasim maus i stap, long wanem, [God] i putim dispela samting long em. Gutpela sapos em i putim maus bilong em long das bilong graun. Ating em i ken wetim gutpela samting i kamap. Em i mas tanim wasket bilong em i go long man i paitim em. Ol man i toknogutim em, tasol em i mas karim dispela hevi.”—Krai Bilong Jeremaia 3:25-30, NW.

Taim hevi i painim man, em i mas i go klostu long God na wetim God i helpim em. Em i no ken les; em i mas wet i stap. Na em i mas pasim maus; em i no ken bel nogut na toktok planti. Em i mas mekim olsem i go inap long taim God I Gat Olgeta Strong i helpim em o kisim bek em. Sapos man i lain long karim hevi olsem taim em i yangpela yet, dispela inap helpim tru em. Olsem wanem em inap helpim em? Long wanem em i lain long karim hevi na bai em inap karim ol hevi i painim em long bihain na em i no ken lusim bilip. Em i save, em i winim pinis bikpela hevi long bipo, olsem na i gat gutpela as long em i ken ting olsem em inap winim ol hevi i painim em long bihain.

Taim man i karim hevi, em i no ken raun raun na toktok planti. Nogat. Em i mas sindaun em wanpela tasol na pasim maus, olsem man i save mekim taim em i hevi long man i dai pinis. Em i mas slip long graun na putim maus bilong em long das, olsem em i mas mekim pasin daun na karim tasol dispela hevi God i larim em i karim. Na em i mas wet long God i kisim bek em. Em i no ken kirap bekim nogut long ol man i mekim nogut long em o tok nogut long em. Em i mas karim tasol dispela hevi na wet i stap. Krais Jisas i bihainim pasin olsem. Baibel i tok: “Ol i tok bilas long em, tasol em i no bekim tok bilas. Em i karim pen, tasol em i no tok kros long ol. Nogat. Em i givim em yet long han bilong God, em dispela Jas i save skelim stret olgeta samting.”—1 Pita 2:23.

Narapela bikpela samting yumi mas tingim taim yumi karim hevi, em olsem: God i no orait long ol samting nogut ol man i mekim long yumi. Tasol em i larim ol i mekim sampela samting na i gat gutpela as bilong dispela samting. Dispela hap bilong Baibel, em Krai Bilong Jeremaia, em i kamapim gut dispela samting, i tok: “Jehova i no ken givim baksait long ol inap long taim bihain bihain. Em i mekim bel i pilim hevi, tasol bai em i mekim pasin marimari tu, long wanem pasin sori bilong em i bikpela tru. I no laik bilong bel bilong em na em i givim hevi long ol man na mekim bel bilong ol i pilim hevi. Pasin bilong daunim olgeta kalabusman bilong graun, na pasim man long kisim samting God i tok i stret em i ken kisim, na paulim kot bilong man, ol kain pasin olsem em Jehova i no save orait liklik long en.”—Krai Bilong Jeremaia 3:31-36, NW.

Ol Isrel i no i stap gut long God Jehova, olsem na em i larim ol i karim bikpela hevi long han bilong ol Babilon. Em i larim ol Babilon i kisim ol i go kalabus longwe long ples bilong ol na i olsem em i givim baksait long ol. Tasol i gat gutpela as na em i mekim olsem—em i laik helpim ol long pilim rong bilong ol na bai liklik hap lain i bin abrusim bagarap na ol pikinini bilong ol bai ol i tanim bel. Jehova i laik mekim pasin marimari long dispela liklik hap lain. God I Gat Olgeta Strong em i no amamas long givim strafe long ol Isrel. I no laik bilong bel bilong em na em i givim pen na hevi long ol long han bilong ol birua bilong ol. Jehova i no orait long ol pasin nogut tru ol dispela birua i mekim long lain bilong em. Em i no orait long ol man i daunim ol kalabusman ol i bin kisim taim ol i winim pait; em i no orait long ol man i pasim man long kisim samting God i tok i stret em i ken kisim; na em i no orait long ol man i giaman na ol i no mekim stretpela kot.

Olsem na taim yumi karim hevi long han bilong ol man, yumi no ken bel nogut long God na tok God i gat asua long ol rong ol man i mekim. God Antap Tru em i no orait long pasin nogut na pasin pait ol i mekim. Bihain bai God i skelim ol long kot na bekim pe nogut long ol long pasin nogut ol i bin mekim.

Tasol sampela taim em rong bilong man yet na hevi i painim em. Ol Isrel i givim baksait long Jehova; ol i lusim em na ol i no laik bai em i lukautim ol. Olsem na i stret Em i larim ol birua i daunim ol. Ol i no ken bel nogut na toktok planti long hevi i painim ol. Em asua bilong ol yet. Wanpela askim i kamapim gut dispela samting, dispela askim i olsem: “Man i stap laip na em i bin mekim sin, ating i stret em i gat tok long hevi i painim em?” (Krai Bilong Jeremaia 3:39, NW ) I no stret ol Isrel i gat tok long hevi i painim ol; ol i mas tanim bel i go long Jehova na krai long em bambai em i ken marimari long ol. Baibel i tok: “Yumi mas wok long skelim pasin bilong yumi; yes, yumi mas skelim gut, na yumi mas tanim bel i go bek olgeta long Jehova. Yumi mas litimapim bel wantaim han bilong yumi i go long God i stap long heven, na yumi mas tok: ‘Mipela yet i bin mekim rong na mipela bin mekim pasin bikhet.’”—Krai Bilong Jeremaia 3:40-42, NW.

Tru tumas ol i no ken bel nogut na toktok planti. Em i taim bilong ol i mas skelim pasin bilong ol na tingim gut ol samting i bin kamap long pasin ol i bin mekim. Ol i no ken bihainim moa laik bilong ol yet na kisim hevi; ol i mas tanim bel i go bek long Jehova na bihainim ol lo bilong em. Ol i no ken litimapim han na mekim beten tasol; nogat; ol i mas mekim ol wok inap long pasin bilong tanim bel. Ol i mas hevi long rong ol i bin mekim na tanim bel tru.

Olsem na taim hevi i painim yumi, yumi mas skelim pasin bilong yumi. Ating yumi bin mekim sampela samting i kalapim lo bilong God na long dispela as hevi i painim yumi? Sapos olsem, orait yumi no ken kros long God na tok em i gat asua, a? Yumi mas lusim pasin nogut yumi bin mekim na tanim bel i go long God. Long dispela rot bai yumi kamapim long ples klia olsem pen na hevi yumi bin kisim, dispela i givim save long yumi na helpim yumi. Tasol sapos yumi no bin mekim pasin nogut na hevi i painim yumi, yumi no ken lusim tingting olsem God i no orait long ol samting ol man nogut i mekim long yumi. Na long pasin daun yumi mas karim dispela hevi; yumi no ken bel nogut na toktok planti; yumi mas i stap isi na wetim Jehova i helpim yumi. Taim hevi i painim yumi, sapos yumi bihainim tok bilong Baibel, em Tok Bilong God, bai dispela hevi i helpim yumi. Bai yumi lain long bihainim pasin isi na no ken les kwik, na bai yumi lain long karim hevi na sanap strong, na bai yumi lain long givim bel olgeta long Jehova na bilip tru long em na wetim em i helpim yumi. Bai yumi no bihainim pasin nogut bilong ol man i save daunim ol narapela man; oltaim bai yumi mekim gutpela pasin long ol narapela man na sori long ol.

[Piksa long pes 23]

Jeremaia yet i bin karim hevi, olsem na em i save gut na em i raitim Krai Bilong Jeremaia