I Gat Wanpela Man i Bin Lukim God o Nogat?

EBRAHAM, em wanpela tumbuna bilong ol Isrel, em i stap 1,900 yia paslain long taim mama i karim Krais Jisas. God i laikim tru Ebraham, olsem na God i kolim em olsem “pren bilong mi.” (Jems 2:23) Orait, sapos tru i gat wanpela man em inap long lukim God, ating Ebraham i mas lukim em. Wanpela taim tripela man i kam lukim Ebraham bilong givim tok bilong God long em, na Ebraham kolim wanpela olsem Jehova. Olsem wanem? Ating Ebraham i bin lukim God?

Dispela stori i stap long Baibel long Jenesis 18:​1-3 (NW ), na i tok: “Bihain Jehova i kamap long Ebraham long ol bikpela diwai long Mamri. San i hat tumas na Ebraham i sindaun i stap long dua bilong haus sel bilong em. Em i lukluk na i lukim tripela man i sanap i stap longwe liklik long em. Em i lukim ol na kwiktaim em i lusim haus sel na i ran i go kamap long ol. Em i lindaun na pes bilong em i go daun tru long graun, na em i tok: ‘Jehova, plis, sapos yu amamas long mi, orait yu no ken abrusim wokboi bilong yu.’ ”

Bihain Ebraham wantaim dispela tripela man ol i sanap antap long maunten na lukluk long ples Sodom, na tupela man i kirap na wokabaut i go long Sodom. Nau ves 22 i tok: “Tasol Yawe em i stap wantaim Ebraham.” Taim yumi kaunim dispela stori, bai yumi ting God yet i stap wantaim Ebraham; olsem em i tanim i kamap man na em i stap wantaim Ebraham. Sampela man i ting olsem, em ol i bilip olsem God na Krais Jisas i wanpela tasol.

Wanpela man i gat save long ol tok bilong Baibel (em Melancthon W. Jacobus) em i stori long tok bilong Jenesis 18:3 na em i tok: “Em namba wan taim God i kamap wanpela man na em i stap namel long ol man, bambai ol i ken save em i stap tru na em i laikim ol man, na dispela samting em i mekim i bilong strongim [Ebraham] bambai em i ken save God i laik toktok wantaim em na em i stap pren bilong em.” Ol man i gat dispela kain tingting ol i ting Ebraham i bin lukim tru Jehova long ai bilong em; na ol i ting ol man i bin lukim Krais Jisas em ol i bin lukim God tu. Tasol yu ting dispela tingting i stret wantaim tok bilong Baibel?

Jisas i Tok Wanem?

Taim Krais Jisas i stap long graun, em i no tok em i God na em i kamap man. Nogat. Em i tok, “Mi Pikinini Bilong God.” (Jon 10:36) Jisas em i nambawan gutpela Mausman bilong God Jehova, olsem na Jisas i tok: “Mi no inap mekim wanpela samting long tingting bilong mi yet. Mi save bihainim tok mi kisim long Papa na mi kotim man. Na kot bilong mi em i stret. Long wanem mi no wok long bihainim laik bilong mi yet. Mi wok long bihainim laik bilong dispela em i bin salim mi na mi kam.” (Jon 5:30) Ol i nilim Jisas long pos bilong kilim em i dai na em i beten long Bikpela Man Antap em i bin wokim olgeta samting na em i kolim em: “God bilong mi, God bilong mi.” (Matyu 27:46) Jisas i dai na em i kirap bek na bihain em i tokim Maria bilong Makdala: “Mi go antap na mi go long Papa bilong mi na Papa bilong yupela. Na mi go long God bilong mi na God bilong yupela.” (Jon 20:​1, 17) Krais Jisas em i no God i kamap man. Nogat. Olsem na ol man i bin lukim Jisas, i no gat wanpela inap tok em i bin lukim God.

Jisas i save laikim tru aposel Jon, na spirit holi i kirapim Jon long raitim tok olsem: “I no gat wanpela man i bin lukim God liklik.” (Jon 1:18) Olsem na yumi save, taim ol aposel i lukim Jisas, ol i no lukim God. Orait, Ebraham i bin lukim husat? Wanpela samting i bin painim Moses em inap helpim yumi long save long dispela samting.

Moses i Lukim God Olsem Wanem?

Wanpela taim Moses i tok em i laik lukim God. Long Eksodas 33:​18-20, Baibel i tok: “Moses i tokim Bikpela olsem, ‘Mi laik yu soim mi bikpela lait bilong pes bilong yu.’ Na Bikpela i bekim tok long Moses olsem, ‘Mi bai soim yu gutpela pasin bilong mi. Na bai mi autim nem bilong mi long yu olsem, Mi [Jehova]. Harim, sapos mi laik marimari na sori long wanpela man, bai mi mekim tasol. Tasol yu no inap lukim pes bilong mi, long wanem sapos wanpela man i lukim pes bilong mi bai em i dai.”

God i larim Moses i lukim bikpela lait bilong pes bilong Em tasol. Long Eksodas 33:​21-23, Jehova i tok: “Lukim, i gat wanpela bikpela ston i stap klostu long mi. Na yu ken sanap antap long dispela ston. Taim bikpela lait bilong pes bilong mi i kam klostu long yu, mi bai putim yu insait long wanpela hul bilong ston na karamapim yu long han bilong mi inap mi go pinis. Na bihain bai mi tekewe han bilong mi na yu ken lukim baksait bilong mi tasol. Yu no inap lukim pes bilong mi.”

God i no tanim i kamap man na Moses i lukim em. Nogat. Na dispela i stret wantaim ol tok Jehova i bin givim long Moses na tok bilong aposel Jon. Moses i lukim tasol liklik hap lait bilong God taim God i go pinis. Na taim em i lukim, God i mas karamapim em o lukautim em. Olsem na yumi save, Moses i no lukim tru God.

Eksodas 33:11 i tok, God i save toktok wantaim Moses “olsem man i save toktok wantaim pren bilong en,” tasol i no olsem Moses i lukim tru God long ai bilong em na God i toktok wantaim em. Nogat. Dispela tok i makim pasin bilong God long toktok wantaim Moses, olsem narapela i toktok wantaim narapela. Yumi inap toktok wantaim wanpela pren bilong yumi long telefon na narapela i toktok wantaim narapela, tasol yumi no lukim pes bilong dispela pren bilong yumi.

Taim Moses i toktok wantaim God na God i givim ol tok long em, em i no kisim ol dispela tok long rot bilong sampela driman o piksa em i lukim. Nogat. Bipo God i bin givim tok long sampela profet long dispela rot, tasol em i no mekim olsem long Moses. Olsem na Nambas 12:​6-8 (NW ) i tok: “Plis yu harim dispela tok bilong mi. Sapos i gat wanpela profet bilong yupela em i bilong Jehova, orait bai mi kamap long em long piksa bambai em i ken save long mi. Long rot bilong driman bai mi toktok wantaim em. Tasol mi no bin mekim olsem long wokboi bilong mi, Moses! . . . Long maus bilong mi yet mi toktok wantaim em, olsem na mi tokaut klia long em na mi no mekim ol tok bokis; na em i save lukim samting olsem Jehova.” Olsem wanem Moses i lukim “samting olsem Jehova”?

Moses i bin lukim “samting olsem Jehova” taim em wantaim Eron na sampela man moa ol i stap long Maunten Sainai. Long Eksodas 24:​10, Baibel i tok: “Na ol i lukim God bilong Isrel. Aninit long lek bilong en wanpela bikpela blupela samting olsem plua i stap na i lait tumas olsem skai.” Tasol God i bin tokim Moses: “Yu no inap lukim pes bilong mi, long wanem sapos wanpela man i lukim pes bilong mi bai em i dai.” Orait, olsem wanem Moses na ol dispela narapela man i bin “lukim God bilong Isrel”? Eksodas 24:11 long Baibel New World Translation i helpim yumi bai yumi ken save long dispela samting, long wanem dispela ves i tok: “[God] i no bagarapim ol dispela bikpela man bilong lain Isrel, tasol ol i lukim piksa bilong God tru. Na bihain ol i kaikai long dispela ples.” Olsem na Moses na ol dispela narapela man ol i lukim God olsem long piksa tasol.

Long Rot Bilong Ol Ensel

I no gat wok long Bikpela Man Bilong Antap, em Man bilong wokim olgeta samting, em i lusim ples antap na i kam daun bilong givim tok long sampela man. Baibel i stori long tripela taim ol man i bin harim nek bilong God yet taim Pikinini bilong em i stap long graun. Tasol long ol narapela taim God i givim tok long ol man long rot bilong ol ensel. (Matyu 3:17; 17:5; Jon 12:28) Taim God i givim Lo long lain Isrel long Maunten Sainai tu, em i givim long ol long rot bilong ol ensel, tasol Baibel i stori long dispela samting olsem God yet i bin toktok wantaim Moses. Aposel Pol i stori long dispela samting na em i tok: “Orait, bilong wanem lo i stap? Em i olsem: God i laik bai as bilong sin em i kamap ples klia, olsem na em i skruim lo i kam bihain. Na lo em i bilong i stap inap long dispela pikinini bai i kamap, bipo God i givim promis long em. Dispela lo em i kamap long maus bilong ol ensel na long han bilong wanpela namelman.”−Galesia 3:⁠19.

Tok bilong Aposel 7:38 tu i makim olsem Moses i bin toktok wantaim wanpela ensel i olsem maus bilong God. Dispela ves i tok: “Bihain ol i bung long graun i no gat man, na dispela Moses tasol i stap wantaim ol. Em i stap long maunten Sainai wantaim dispela ensel i givim toktok long em. Na Moses i stap wantaim ol tumbuna bilong yumi tu. Em i kisim tok bilong God, dispela tok i gat laip, na em i givim dispela long yumi.” Dispela ensel em i olsem maus bilong God Jehova, em Man bilong wokim olgeta samting, olsem na taim dispela ensel i toktok wantaim Moses em i mekim olsem God yet i toktok wantaim em.

Wanpela ensel i givim tok bilong God long Moses taim Moses i lukim liklik diwai i paia. Dispela ensel tu em maus bilong God. Eksodas 3:2 i tok, em i wanpela ensel bilong Jehova. Dispela ves i tok: “Ensel bilong Bikpela i kamap long em olsem paia i kirap namel long ol han bilong wanpela liklik diwai.” Na ves 4 i tok: “[Jehova] i stap namel long dispela diwai na i lukim Moses i wokabaut i kam klostu, orait na em i singaut long em.” Long ves 6, dispela ensel, olsem maus bilong God, em i tok olsem: “Mi God bilong ol tumbuna bilong yu. Mi God bilong Ebraham na Aisak na Jekop.” Olsem na taim Moses i toktok wantaim dispela ensel em God i bin salim i kam, Moses i toktok wantaim em olsem em i toktok long God yet.−Eksodas 4:⁠10.

Ol Hetman sapta 6 tu i stori long God i salim wanpela ensel i go givim sampela tok long wanpela man, na dispela man i toktok wantaim dispela ensel olsem em i toktok long God yet. Ves 11 i tok: “Bihain ensel bilong [Jehova] i kam na i sindaun aninit long diwai kwila klostu long ples Ofra, ples bilong Joas man bilong lain bilong Abiesa. Pikinini bilong em, Gidion, em i hait long ol Midian insait long wanpela tang ston bilong krungutim pikinini bilong wain. Na em i wok long rausim skin bilong wit.” Bihain, dispela “ensel bilong Bikpela” i mekim ol tok olsem God Jehova yet i mekim dispela tok. Long ves 14 na 15, Baibel i tok: “Na [Jehova] i tokim [Gidion], ‘Yu go wantaim olgeta strong bilong yu na yu kisim bek ol Isrel long han bilong ol Midian. Mi yet mi salim yu.’ Na Gidion i bekim tok olsem, ‘Tasol, Bikpela, bai mi kisim bek ol Isrel olsem wanem?’ ” Dispela ensel i tanim i kamap man na Gidion i lukim em na toktok wantaim em, na Baibel i stori long dispela ensel olsem em i God yet. Long ves 22, Gidion i tok: “God Bikpela! Mi lukim pinis pes bilong ensel bilong yu.” Ensel i kolim stret ol tok God i bin givim long em. Olsem na Gidion i toktok wantaim God long rot bilong dispela ensel em i maus bilong God.

Na tingim Manoa wantaim meri bilong em, em papamama bilong Samson. God i salim wanpela ensel i go givim tok long tupela tu. Baibel i kolim dispela ensel olsem “ensel bilong Bikpela” na “ensel bilong God.” (Ol Hetman 13:​2-18) Na long ves 22 Manoa i tokim meri bilong em: “Bai yumitupela i dai, long wanem yumi lukim pinis ensel bilong Bikpela.” Manoa i no lukim tru God, tasol em i pret olsem, long wanem em i bin lukim dispela ensel em i tanim i kamap man na em i maus bilong God.

“I No Gat Wanpela Man i Bin Lukim God”

Nau Yumi inap save bilong wanem Ebraham i bin toktok wantaim ensel olsem em i toktok long God Jehova yet. Ensel i olsem maus bilong God na i kolim stret ol tok God i tokim em long givim long Ebraham, olsem na taim dispela ensel i kamap long Ebraham, i stret Baibel i tok: “Yawe i kamap long Ebraham.”−Jenesis 18:⁠1.

Taim yumi toktok wantaim wanpela man long rot bilong telefon o redio, dispela man i kisim stret ol tok. Na olsem tasol taim God i givim tok long man long rot bilong wanpela ensel, dispela man inap kisim stret ol tok. Ensel i olsem maus bilong God na em inap kolim stret ol tok. Olsem na yumi inap save bilong wanem Ebraham na Moses na Manoa na sampela man moa i toktok wantaim ol dispela ensel olsem ol i toktok wantaim God. Ol dispela ensel i tanim i kamap man, olsem na ol man inap lukim ol, na ol inap lukim bikpela lait bilong God i kam long ol long rot bilong ensel, tasol ol i no inap lukim God. Olsem na tok bilong aposel Jon i stret, em i tok: “I no gat wanpela man i bin lukim God liklik.” (Jon 1:18) Ol dispela man i no bin lukim God yet; ol i lukim tasol ol ensel ol i kisim tok bilong God i kam long ol.