Askim

◼ Jisas i mekim wanem bilong “redim ples” bilong lain bilong em long heven?

Bihain long Kaikai Bilong Bikpela, Jisas i tokim ol aposel, em i mas lusim ol. I olsem: Taim em i dai em i mas i go long heven. Pita i tok, em i laik bihainim em. Jisas i tok: “Bel bilong yupela i no ken kirap nogut. Yupela i bilip long God. Yupela i mas bilip long mi tu. Long haus bilong Papa bilong mi i gat planti rum. Sapos i no olsem, orait bipo mi inap tokim yupela. Mi go bilong redim ples bilong yupela. Na sapos mi go redim ples bilong yupela, bai mi kam bek na mi kisim yupela i go i stap wantaim mi. Olsem na ples mi stap long en, bai yupela tu i stap long en wantaim mi.”−Jon 14:​1-3.

Wanem ol “rum” Jisas i mas redim? Sampela i tanim dispela tok na i olsem: Taim ol aposel i wok long i go long heven, ol i mas malolo namel long wanpela ples malolo, o ol i mas painim sampela rum long heven. Tasol W. E. Vine i stori long dispela tok “rum” long tok Grik na em i tok: ‘Em i no makim ol wan wan rum long heven, na em i no makim ples malolo namel long graun na heven.’ Jisas i tok promis long redim ples bilong ol long heven, na em wantaim Papa bai stap long dispela hap.−Efesas 1:20; 1 Pita 1:4; 3:​21, 22.

Jisas bai redim ol dispela ples olsem wanem? Jisas i dai, na dispela dai bilong em i olsem ofa em i mekim, na em i go long heven na em i givim long God dispela strong o pe bilong blut bilong em em i bin lusim. Dispela ofa inap helpim pastaim lain bilong i go long heven. Aposel Pol i tok: “Krais i no bin i go insait long haus holi ol man i wokim long han na em i piksa tasol bilong haus tru bilong God. Nogat. Em i go insait long heven stret. Na nau em i kamap ples klia long ai bilong God, na em i wok long helpim yumi.” (Hibru 9:​12, 24-28; Rom 6:5; 8:17) Olsem na taim Jisas i tokim ol aposel long em i laik i “go bilong redim ples bilong” ol, em i save em i mas “kamap ples klia long ai bilong God, na em i wok long helpim” ol. Em i mas mekim dispela pastaim na nau rot i op bambai ol narapela man bilong graun i ken bihainim em na i go long heven.−Filipai 3:​20, 21.

I gat sampela samting moa Jisas i mas mekim bilong redim ples bilong ol, o nogat? Bihain em i kamap king na pait wantaim Seten na rausim long heven Seten wantaim ol spirit nogut. (Revelesen 12:​7-9) Mekim pinis dispela, na nau em i kirapim bek long matmat ol aposel na ol narapela lain bilong i go long heven. (1 Tesalonaika 4:​14-17) Taim Jisas i rausim Seten long heven, dispela em hap wok bilong em long redim ples long heven, o nogat, em yumi no save.

Jisas i bin mekim sampela wok moa bilong redim ples, o nogat, em yumi no save. Tasol yumi save, taim Jisas i givim ofa long God, em strong o pe bilong gutpela blut bilong em, dispela i olsem em i redim ples bilong lain bilong em i ken i go long heven. (1 Pita 1:19) Dispela blut i olsem as bilong nupela kontrak God Jehova i bin wokim wantaim ol dispela Kristen God i bin makim ol long spirit bilong em.

[Rait long pes 31]

“Em i baim bek yupela long blut bilong Krais. Dispela blut em i dia tumas. Krais em i olsem wanpela pikinini sipsip i klin olgeta, na i no gat mak nogut bilong en.”—1 Pita 1:⁠19.