Yu Save Askim Husat Long Givim Gutpela Tingting Long Yu?
OLSEM wanem? Wanpela taim wanpela man i bin givim sampela mani giaman long yu? Ating nogat, tasol sapos wanpela man i toksave long yu olsem sampela man i wok long mekim olsem, bai yu kros long dispela man? Nogat, a? Bai yu tenkyu long em, long wanem nau yu inap was gut, na bai yu no kisim sampela mani giaman olsem senis bilong gutpela mani yu bin hatwok long kisim.
Sampela taim ol man i save givim tok long yumi bilong helpim yumi long bihainim gutpela tingting o ol i givim toksave long yumi, a? Tru, sampela toksave i helpim yumi gut na sampela i helpim yumi liklik tasol. Tasol maski yumi no save olsem wanem wanpela tok o toksave inap helpim yumi, yu ting i stret yumi kros long man i givim long yumi?
Sampela taim yumi olgeta yumi sot long save, na narapela man i mas helpim yumi na givim gutpela tingting long yumi. I no gat wanpela man i save long olgeta samting. Wok bilong mani na gavman i wok long bagarap na yumi olgeta i sot long gutpela samting yumi ken wetim i kamap. Long nau planti marit ol i brukim marit, na planti yangpela meri singel i kamapim nating pikinini, na ol sik bilong pamuk samting i go bikpela long olgeta hap bilong graun, olsem na yumi save, ol manmeri i sot tru long gutpela stretpela tok bilong soim rot long ol. Ol papamama i laik save long gutpela rot bilong helpim pikinini bilong ol nau long dispela taim bilong ol man i longlong nabaut. Ol yangpela i sot long gutpela save bilong stretim tingting bilong ol na helpim ol long sakim ol samting i laik pulim ol. Olgeta manmeri i sot long ol gutpela tok bilong helpim ol bambai ol i ken save long ol stretpela lo na pasin ol i mas bihainim, long wanem long nau planti manmeri i orait long ol pasin nogut, olsem pasin bilong giaman na paulim mani na pamuk na pait na bagarapim man.
Orait, husat inap helpim ol na givim gutpela save na tingting long ol? Nambawan gutpela save na tingting long pasin yumi mas bihainim i stap long Baibel, em Tok Bilong God. Wanpela man bilong raitim sampela tok long Buk Song long bipo, em i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Buk Song 119:105) Ol manmeri i save kaunim ol tok bilong Baibel na ol i bihainim, ol i save abrusim planti samting em inap pundaunim ol long nau. Em wanpela as na ol Witnes Bilong Jehova i save lusim planti handet milion aua long olgeta yia long i go lukim ol manmeri i stap klostu long ol na toktok wantaim ol long ol tok bilong Baibel. Tasol planti man i no laik harim, na sampela i kros long ol. Bilong wanem i olsem?
Ol i Pasim Tingting—Bilong Wanem?
Planti man i no laik bai narapela man i givim sampela tingting long ol, na planti ol i no laik tru bai narapela man i givim sampela tingting bilong lotu long ol. Sampela manmeri i no laik harim tok ol pris o pasto bilong ol i givim long ol. Wanpela pasto long Inglan i bel hevi na em i tok: “Olgeta i gat tingting bilong ol yet na ol i ting, tingting bilong ol i gutpela wankain olsem bilong pris o pasto.” Olsem na taim wanpela man ol i no save long em em i kam long haus bilong ol na em i laik toktok wantaim ol long ol tok bilong Baibel, ol i no laik harim.
Tru, long nau planti man i no bilip tumas, planti ol i givim bel yet long lotu bilong ol. Olsem wanpela bikpela buk i tok, “lotu em i samting i pas tru insait long bel bilong planti” Ol dispela kain man ol i pilim olsem i no gat wok long ol i mas toktok wantaim wanpela man bilong narapela lotu long ol tok bilong Baibel, maski ol dispela tok inap helpim ol long save long rot bilong stretim ol hevi bilong ol.
Na sampela ol i no laik toktok long ol tok bilong Baibel, long wanem ol i lukim planti lotu i save giaman na mekim pasin i no stret. Taim ol i harim sampela bikpela man bilong lotu i orait long ol manmeri i mekim pasin pamuk o pasin sem, ol i bel nogut long dispela. Na taim ol i lukim ol evanselis long televisen ol i mangalim mani, ol i les long dispela pasin. O ating ol i lukim wanpela pris o pasto i mekim wok long namba bilong em bilong helpim wanpela lain politik long pait politik. Long ai bilong ol i olsem lotu i kamapim planti hevi—i no stretim ol hevi.
Ol dispela pasin nogut ol dispela man i gat tok long en, em ol misin i save bihainim tru. Na ol misin i lainim ol man long planti tok giaman. I olsem ol i givim “mani giaman” long ol man. Tasol sapos wanpela man i no laik harim gutpela tok bilong Baibel, long wanem i gat planti tok giaman bilong lotu i stap, em i no bihainim gutpela tingting, a? I olsem em i no laik kisim gutpela mani, long wanem i gat planti mani giaman i stap!
Na olsem yumi stori pinis, long sampela taim yumi olgeta yumi sot long save na narapela man i mas givim tingting long yumi, long wanem i gat planti samting yumi mas tingim na planti samting inap bagarapim yumi long nau na i hatwok long save wanem rot i gutpela na yumi mas bihainim. Olsem wanem? I gat rot bilong skelim ol tok na tingting ol man i laik givim long yumi na bai yumi ken save dispela tok o tingting i gutpela na em inap soim gutpela rot long yumi o nogat? Olsem wanem? I no gat wok long yumi toktok wantaim man bilong narapela lotu long ol tok bilong Baibel? Na sapos yumi mekim toktok wantaim man bilong narapela lotu long ol tok bilong Baibel, ating yumi gat rong? Olsem wanem? I gat rot na bai yumi no pasim tingting, yumi redi long harim gutpela tok narapela man i givim long yumi, tasol yumi no larim ol tok giaman i paulim tingting bilong yumi? Baibel i tok wanem long dispela samting?