Rot Namba 1
Kisim Gutpela Tok Bilong Helpim Yu
Bilong wanem yu mas mekim olsem? Namba wan taim papamama i holim nupela bebi bilong ol, ating ol i kisim kain kain tingting. Brett, em wanpela papa i stap long Briten, em i tok: “Bel bilong mi i amamas tru, tasol mi pilim tu olsem mi gat wanpela bikpela wok, na mi pilim olsem mi no redi long mekim.” Monica, em wanpela mama i stap long Ajentina, em i tok: “Mi tingting planti, mi inap lukautim gut liklik pikinini meri bilong mi long ol samting em i mas kisim o nogat. Mi tingting, ‘Mi inap skulim em long kamap wanpela meri i bikpela pinis long tingting?’ ”
Olsem wanem? Yu inap pilim amamas bilong ol dispela papamama na ol samting ol i tingting planti long en? Tru tumas, wok bilong mekim bikpela long pikinini i gat bikpela hatwok, tasol dispela wok i mekim bel bilong papamama i amamas; na dispela wok i mekim ol i tingting planti, tasol ol i amamas taim wok i kamap gutpela. Olsem wanpela papa i tok, “yu gat wanpela sans tasol bilong mekim bikpela long pikinini taim em i stap pikinini yet, long wanem, em i no inap stap olsem long olgeta taim.” Samting papamama i mekim long ol pikinini, em inap helpim helt bilong ol pikinini na givim amamas long ol o em inap nogutim ol. Olsem na ating yu pilim olsem yu mas kisim sampela gutpela tok long olsem wanem yu ken kamap gutpela papa na mama, na yu inap bilip tru long dispela tok.
Hatwok bilong en: Planti man i save kamapim olkain tok long gutpela rot bilong mekim bikpela long pikinini. Long bipo, ol nupela papamama i save lukim pasin papamama bilong ol yet i bin mekim o bihainim tok lotu i lainim ol long en na dispela i bin stiaim ol. Tasol long planti kantri long nau, planti famili i no save pas gut wantaim olsem bipo. Olsem na planti papamama i save go long ol lain saveman i gat wok long givim tok long ol papamama. Sampela tok bilong ol i gat ol gutpela stiatok long en. Tasol sampela tok bilong ol i save pait wantaim, na i no longtaim na ating ol manmeri bai ting em i no gutpela moa long bihainim.
Wanem samting inap helpim yu? Kisim tingting bilong dispela Man em i gat save moa long rot bilong mekim bikpela long ol pikinini—em Man Bilong Wokim yumi, God Jehova. (Aposel 17:26-28) Tok bilong em, em Baibel, i gat ol tok inap helpim yu long kamap gutpela papa o mama na stori bilong sampela ol i stap olsem gutpela piksa. God i promis olsem: “Bai mi skulim yu na lainim yu.”—Song 32:8.
God i save givim wanem ol tok long papamama em inap helpim ol long mekim bikpela long ol pikinini na ol i stap amamas?
[Rait long pes 3]
“Yu mas bilip strong long Bikpela. Yu no ken ting save bilong yu yet inap helpim yu.”—Sindaun 3:5