Ol i Autim Dispela Gutnius Long Olgeta Hap
KINGDOM bilong God i kamap pinis! Dispela tok em i nambawan gutpela tok. Olsem na long 1989 winim 3,700,000 Witnes Bilong Jehova long olgeta hap bilong graun ol i bin wok strong long autim dispela “gutnius” Jisas i bin tok profet long en na ensel long driman bilong Jon em i bin autim. (Matyu 24:14; Kamapim Tok Hait 14:6) Olsem aposel Pol i tok: “Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.” (Rom 10:18) Ol i bin singautim ol manmeri i kam bambai ol i ken “pret long [God] na litimapim nem bilong em,” na sampela manmeri bilong klostu olgeta lain na kantri na tok ples na olgeta kain skin ol i amamas na ol i kam mekim olsem.—Kamapim Tok Hait 14:7.
No Gat Laip-Insurens Moa
Wanpela man bilong Englan, nem bilong em Ken, em i gat wok long baim laip-insurens i go long ol man, em wanpela kain insurens bilong helpim famili bilong man long liklik mani sapos man i dai. Taim Ken i go long haus bilong wanpela famili Witnes, ol i askim em: ‘Yu laik i stap long taim i no gat wok moa long baim laip-insurens?’ Wanem insait bilong dispela tok bilong ol? Ol i tok, Baibel i stori olsem taim Kingdom bilong God i bosim graun bai sik i no ken painim moa ol man na ol i no ken i dai.
Tasol ating kain gutpela taim olsem inap kamap? Em bai kamap tru, long wanem God yet i tok promis long kamapim. Baibel i tok: “God yet bai i stap wantaim ol [man], na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (Kamapim Tok Hait 21:3, 4) Wanem samting inap kamapim bikpela senis olsem? Kingdom bilong God bai kamapim. Tok bilong God, em Baibel, i tok klostu nau bai dispela Kingdom i “bagarapim ol arapela king [em ol gavman politik bilong nau] na [em] bai i stap oltaim.”—Daniel 2:44.
Taim ol Witnes Bilong Jehova i autim tok long ol man long olgeta hap bilong graun ol i save kamapim ol dispela kain tok bilong Baibel na planti handet milion manmeri i bin harim. Planti bilong ol, olsem Ken, ol i bilip, long wanem ol samting i bin kamap i makim olsem ol dispela gutpela samting Baibel i tok long en bai kamap tru. Nau ol i save, yumi ken bilip tru long ol dispela tok promis bilong God, na klostu nau bai God i truim ol dispela tok promis em i bin mekim.
Ol i Senisim Tru Tingting Bilong Ol
Ol Witnes Bilong Jehova i wok wantaim ensel long autim gutnius em bilong mekim olgeta manmeri i amamas. Ol manmeri i harim dispela gutnius na ol i bilip, ol i kisim save olsem: Ol man i laik pret long God na litimapim nem bilong em ol i mas bilipim ol tok promis bilong Baibel, tasol ol i mas mekim sampela samting moa tu. Dispela gutnius i kirapim ol long senisim tru tingting bilong ol na i helpim ol long planti hevi bilong ol.
Dispela samting i bin painim Rafeil wantaim meri bilong em. Tupela i stap long Ajentina na taim tupela i marit nupela, inap olsem 40 yia bipo, tupela i gat bikpela tingting long wok strong na bungim mani bilong helpim sindaun bilong ol long bihain. Tupela i wok strong, tasol 21 yia bihain, tupela i no gat planti samting; tupela i gat liklik haus tasol em oltaim ol i mas wok long stretim. Tupela i no pilim olsem ol i stap gutpela, winim long taim tupela i marit nupela.
Tasol bihain tupela i harim dispela gutnius ol Witnes Bilong Jehova i autim na tupela i kisim save long gutpela samting moa ol i ken wok long bungim, i winim mani kago, na bai ol inap i stap bel isi na i stap gutpela. Jisas i stori long dispela samting taim em i toktok wantaim ol manmeri long maunten, em i tok: “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting, na ol stilman i save brukim banis na stilim. Tasol yupela i mas bungim ol gutpela samting bilong yupela long heven. Long heven ol binatang na ros i no save bagarapim ol samting, na ol stilman i no save brukim banis na stilim.”—Matyu 6:19, 20.
I stret yumi mas kisim liklik mani bilong lukautim yumi; Baibel i no tambuim yumi long mekim olsem. Tasol Baibel i kirapim yumi long bihainim gutpela tingting bambai yumi no givim bel tumas long mani kago na ting olsem dispela samting tasol inap helpim yumi. (Saveman 7:12) Yumi mas wok long kisim ol samting bilong spirit. Olsem na yumi mas wok strong long stadi na lainim ol tok bilong Baibel bambai yumi ken save long laik bilong God, na yumi mas tingting long bihainim laik bilong God pastaim. (Matyu 6:33) Rafeil wantaim meri bilong em i kirap long bungim ol gutpela samting bilong spirit na nau ol i pilim olsem ol i gat planti samting na ol i stap gutpela. Tupela i no gat planti samting bilong skin, tasol tupela stap gutpela long ai bilong God na i stap olsem pren bilong Em. (Kamapim Tok Hait 3:17, l8) Tok bilong Kingdom bilong God em i gutpela tok tru long tupela.
Marit i Kamap Gutpela Gen
Gutnius bilong Kingdom i gat strong long kamapim gutpela wok. Olsem: Wanpela man i stap long Englan, nem bilong em Jon, em i no laik kisim save long ol tok bilong Baibel. Tasol meri pikinini bilong em i laik. Olsem na ol i kirap long i go long ol miting bilong ol Witnes Bilong Jehova. Tasol Jon i go dring wantaim ol poroman bilong em. Jon i mekim olsem na bihain em i kirap long dring planti tumas, na em i smok, na bihain em i mekim pasin pamuk. Bihain moa em i lusim meri bilong em na em i go sindaun wantaim narapela meri.
Tupela i kirap long mekim ol samting bambai ol i ken katim marit. Tasol meri bilong Jon i bin stadi na kisim save long gutnius bilong Kingdom na em i lain long bihainim pasin Kristen, olsem na em i save mekim yet gutpela pasin long Jon na Jon i kirap nogut long dispela samting. Em i no save long as bilong gutpela pasin meri bilong em i mekim. Tripela wik paslain long taim kot i laik katim marit bilong tupela, gutpela pasin Kristen bilong meri bilong Jon kamapim gutpela wok. Nau Jon i pilim tru rong bilong em na em i tok sori long meri bilong em. Tupela i tokim kot ol i no laik katim marit. Jon i kirap long kisim save long dispela gutnius. Em i stadi wantaim ol Witnes Bilong Jehova na kisim save long ol tok bilong Baibel. Nau em tu i wanpela Kristen, na em i save wok wantaim meri bilong em long autim gutnius bilong Kingdom long ol narapela man.
Long nau planti famili i bruk, tasol sapos ol i save long gutnius bilong Baibel, dispela inap helpim ol. Wanpela Witnes Bilong Jehova long Peru em i kalap long balus bilong i go long wanpela hap. Long balus em i sindaun klostu long wanpela bikpela man bilong ami. Tupela i kirap long toktok wantaim na ami i kamapim olgeta hevi bilong em long famili long dispela Witnes. Em i tok, meri bilong em i save kisim drak oltaim, na meri i laik lusim em na maritim wanpela yangpela man. Long gutpela pasin isi, Witnes i soim em olsem Baibel i givim gutpela tok na tingting long yumi long ol samting bilong famili. Witnes i tok, em yet i bin bihainim ol dispela tok na dispela i bin helpim em long ol hevi bilong em long famili.—Efesus 5:21–6:4.
Ami i tok tenkyu long Witnes long gutpela tok em i givim long em bilong mekim gut bel bilong em, na em i kisim sabskripsen bilong Wastaua na Kirap! bambai em i ken kisim sampela save moa long gutnius bilong Baibel. Na taim Witnes i lusim balus na wokabaut i go, tupela yangpela marit i hariap bihainim em i go na tupela i pasim em na i tok, ol i laik toktok wantaim em. Tupela i tok: “Mipela i bin sindaun long sia paslain long yu long balus na mipela i harim ol tok yu bin mekim long dispela man. Mipela tu i laik kisim sabskripsen bilong dispela tupela nius.” Tupela i laik kisim save long dispela gutnius em inap helpim man long i stap gutpela.
Senisim Pasin
Na dispela gutnius bilong Baibel i save kirapim ol man long senisim pasin bilong ol. I olsem aposel Pol i tok: “Tok bilong God em i gat laip, na em i wok strong i stap.” (Hibru 4:12) Dispela samting i bin kamap long wanpela yangpela man long Masedonia, long kantri Grik. Em i kirap nogut taim em i kisim save olsem Baibel i tok nem bilong God em Jehova. Em i tokim wanpela poroman bilong em long helpim em long bungim kwik ol Witnes Bilong Jehova. Tupela taim em i bung wantaim ol Witnes na ol i toktok wantaim inap 4-pela aua, 4-pela aua. Na bihain em i kirap long stadi long Baibel. Taim ol i mekim namba wan stadi wantaim em, ol i stadi i go inap long 2 klok long moningtaim!
Kirap long dispela namba wan stadi, dispela yangpela man i wok long stretim pasin bilong em bambai em i ken bihainim ol lo bilong Baibel. Em i go long ol miting bilong lotu wantaim ol Witnes Bilong Jehova, na em i kirap givim bel tru long Man bilong wokim em. Na Jehova i mekim gut long em. Taim em i kirap long stadi, long namba wan wik em i katim longpela gras bilong em. Long namba 2 wik, em i lusim pasin bilong i go long ol ples disko samting bilong painim ol manmeri i ken poromanim em long kisim amamas. Long namba 3 wik em i lusim pasin bilong smok—em i tromoi laspela sigaret bilong em. Em i stadi inap tupela mun pinis na nau em i kirap long wok wantaim ol Witnes long autim gutnius bilong Kingdom long ol man. Em i amamas tru long ol Witnes Bilong Jehova i bin bringim gutnius i kam long hap bilong em.
Gutnius long Kalabus
Kalabus tu i no inap pasim man long harim dispela gutnius. Long Spen, yangpela man Hose em i stap long kalabus. Em i kisim planti yia kalabus, long wanem em i bin holim gan na stilim mani, na em i bin mekim ol narapela bikpela rong. Tasol rot i op na ol Witnes Bilong Jehova i autim gutnius long em, na dispela gutpela tok bilong Baibel i kirapim em long senisim tru tingting na pasin bilong em. Jehova ‘i givim strong’ long em.—Filipai 4:13.
Hose i ting em i mas i stap kalabus i go inap long taim em i dai o dispela pasin bilong nau i pinis, long wanem em i bin mekim ol bikpela rong. Tasol em i kamap wanpela Kristen na em i baptais pinis. Meri bilong em i save sambai long em, na meri i wok long lainim liklik pikinini man bilong tupela long ol pasin Kristen. Hose i stap kalabus, tasol em i save autim gutnius long ol wankalabus bilong em. Em inap autim tok long ol man i hatwok long ol lain ausait long kalabus i autim tok long ol. Nau wanrum bilong em long haus kalabus em tu i wanpela Kristen i baptais pinis.
Em stori bilong sampela man i kamapim long ples klia gutpela samting i save kamap long wok ol Witnes Bilong Jehova i mekim bilong autim tok long olgeta hap. Tru tumas, dispela ensel ol man i no inap lukim, em i autim dispela gutnius, na ol Witnes Bilong Jehova i wok wantaim em na ol tu i “autim dispela gutnius . . . long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.”
Dispela gutnius em i nambawan gutpela tok, long wanem em i stori long dispela wanpela samting tasol em inap helpim ol man. Mipela laik kirapim yu long putim yau long dispela tok na bihainim. Olsem Ken na Jon long Englan, na Rafeil wantaim meri bilong em long Ajentina, na Hose long Spen, na planti tausen tausen manmeri moa, yumi tu yumi wok wantaim dispela ensel na tokim olgeta manmeri, olsem: “Yupela i mas pret long [God] na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.”—Kamapim Tok Hait 14:7.