Askim

◼ Matyu 7:​13, 14 na Luk 13:24 i makim olsem long taim bilong kirap bek bai bikpela lain manmeri i sakim lotu i tru o nogat?

Nogat. Ol dispela ves i toktok long kisim laip long Kingdom bilong heven.

Dispela tok bilong Jisas long Matyu 7:​13, 14 i hap bilong ol tok em i mekim long maunten. Em i tok: “Yupela i mas i go insait long liklik dua. Dua i go long ples bilong lus,em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.”

Bikpela hap tok Jisas i mekim long dispela taim i stori long kingdom bilong heven. Em i kirapim toktok olsem: “Ol man i save, ol i stap rabis tru long ol samting bilong God, em ol i ken amamas. Ol dispela man bai i kisim ol gutpela samting bilong kingdom bilong heven.” Em i tok, ol man bel bilong ol i klin, bai ol i “lukim God,” na “kingdom bilong heven” em i bilong ol man i kisim hevi long wanem ol i bihainim stretpela pasin. (Matyu 5:​3, 8, 10) Bihain Jisas i toktok long tupela rot, em bikpela rot i go long ples bilong lus, na liklik rot i go long laip. Na em i tok, “Yupela no ken ting , olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”​—⁠Matyu 7:​13, 14, 21.

Insait bilong tok bilong Luk 13:24 i wankain, na yumi ken save long dispela taim yumi skelim ol ves i stap klostu. Jisas i mekim tupela tok piksa long “kingdom bilong God.” Bihain, wanpela man i tokim em olsem, “Bikpela, ating God bai i kisim bek wan wan man tasol, a?” Jisas i tok: Yupela i mas taitim bun tru, bilong i go insait long liklik dua. Mi tokim yupela, planti man bai i laik i go insait, tasol bai ol i no inap.” Dispela ol “planti man” em ol man i kam singaut na tokim ol long opim dua taim dua i pas pinis. Ol i “man bilong mekim pasin nogut;” na God i no orait long ol i stap wantaim “Abraham na Aisak na Jekop na olgeta profet . . . insait long kingdom bilong God.” Dispela ol “planti man” i ting ol bai i stap “namba wan” long “kingdom bilong God,” tasol nogat, ol bai stap “las tru,” olsem ol bai no ken i stap insait long kingdom bilong God.​—⁠Luk 13:​18-30.

Ol tok bilong Jisas long ol ves klostu long ves 24 i stori long rot bilong i go insait long Kingdom bilong God long heven. Long dispela taim bipo ol bikpela bos bilong lotu Juda i bin holim wok bilong God inap longtaim, na ol i gat ol tok bilong God ol man i raitim pinis. Olsem na ol i ting ol i gat planti samting bilong spirit, na ol i stap stret long ai bilong God. Na ol i ting ol man nating i no stap olsem. Ol i tingim ol dispela man i olsem man bilong sin na ol i no gat nem. (Jon 9:​24-34) Tasol Jisas i tok, ol man bilong kisim takis na ol pamukmeri, em ol i bilip na tanim bel, God bai orait long ol.​—⁠Skelim Matyu 21:​23-32; Luk 16:​14-31.

Na ol man nating i kamap disaipel bilong Jisas, ol inap kamap pikinini spirit bilong God taim rot i op long de Pentikos long yia 33. (Hibru 10:​19, 20) Planti manmeri i harim tok bilong Jisas, tasol wan wan tasol i bilip long em na God i makim ol bilong i go long heven. Tasol yumi ken tok, liklik lain bilong go long heven ol i olsem Jekop i stap wantaim Jehova (Bikpela Abraham) na Pikinini bilong em (Aisak i piksa bilong em). Em gutpela prais tru ol man bai taitim bun bilong kisim. Tasol bikpela lain manmeri i harim tok bilong Jisas ol i no mekim olsem.

Olsem na ol dispela tok bilong Jisas (em i tok God bai kisim bek wan wan i bihainim liklik rot i go long laip) ol dispela tok i bilong kirapim ol man long mekim ol samting bambai God i ken orait long ol. Long dispela taim bipo, God i bin wok long singautim ol man bilong kisim laip long heven. Long dispela taim bipo, planti man i harim tok i tru na ol i kisim save long samting ol i mas mekim, tasol wan wan tasol i bihainim na stap gut long God.​—⁠Matyu 22:14; 24:13; Jon 6:​60-66.

Long nau, yumi gat Baibel olgeta, na planti samting God i tok bai kamap long las taim i kamap pinis. tasol wan wan man tasol i bihainim tok bilong Krais na stap gut long wok bilong Jehova. Dispela i truim tok piksa Jisas i mekim long kain kain graun. Em i tok, sampela man bai harim “gutnius bilong kingdom,” tasol Satan bai tekewe kwiktaim dispela tok long bel bilong ol. Na sampela bai amamas long kisim tok, tasol taim ol man i givim hevi long ol, bai bilip bilong ol i bagarap. Na sampela bai ol i no karim kaikai, long wanem ol i “tingting planti long ol samting bilong graun, na [ol] i wari long bungim planti mani.”​—⁠Matyu 13:​18-23.

Tasol kain samting olsem i no ken kamap taim planti milion milion manmeri i kirap bek long De Bilong Kot. Long dispela taim bai Satan i no inap tekewe tok i tru long bel bilong ol, long wanem em i stap kalabus, na bai i no gat ol man bilong givim hevi long ol o mekim nogut long ol. Na bai i no gat ol samting bilong dispela graun bilong mekim ol i tingting planti. Bai ol i lain long tok i tru namel long ol manmeri i bihainim stretpela pasin, na bai ol i lukim ol mirakel God i wokim, olsem em i kirapim bek ol man i dai pinis na oraitim sik bilong ol lain man. Tasol maski i gat ol gutpela samting olsem i stap, bai sampela i sakim lotu i tru. (Lukim Jon 11:​45-53.) Tasol i gat gutpela as na yumi ken ting olsem planti manmeri bai kisim gut tok na bihainim, na bai God i kisim bek ol.