Askim
Jisas i tok strong olsem: “Yupela i mas taitim bun tru, bilong i go insait long liklik dua. Mi tokim yupela, planti man bai i laik i go insait, tasol bai ol i no inap.” (Luk 13:24) Wanem insait bilong dispela tok bilong em na em i makim wanem samting long nau?
Yumi inap kisim gut dispela gutpela ves taim yumi skelim ol narapela tok i stap klostu long en. Sikspela mun samting paslain long taim Jisas i dai, em i stap long Jerusalem long bikpela de bilong tingim taim ol i bin dediketim gen haus bilong God. Em i tok em i wasman bilong ol sipsip bilong God, tasol em i tokaut olsem bikpela hap lain bilong ol Juda i no insait long dispela lain sipsip, long wanem, ol i no laik harim tok bilong em. Taim Jisas i tok em wantaim Papa i “wanpela,” ol Juda i harim dispela tok na ol i kisim ol ston bilong tromoi long em na kilim em i dai. Em i abrusim ol i go na em i brukim wara Jordan na kamap long Perea.—Jon 10:1-40.
Long dispela hap wanpela man i askim em: “Bikpela, ating God bai i kisim bek wan wan man tasol, a?” (Luk 13:23) Em wanpela gutpela askim tru dispela man i bin mekim, long wanem, ol Juda bilong dispela taim bipo ol i bilip olsem wan wan man tasol inap long kisim laip. Ol i kamapim pinis tingting bilong ol, na yumi inap save, ol i ting ol dispela wan wan man em ol yet. Olsem ol samting i kamap bihain i soim yumi, ol i popaia stret!
Inap 2-pela yia samting, Jisas i bin stap namel long ol—em i wok long skulim ol, na wokim ol mirakel, na em i givim rot long ol bambai ol inap kam insait long lain bilong kisim Kingdom bilong heven. Orait, wanem samting i kamap long dispela wok? Ol yet, na ol hetman bilong ol, ol i hambak olsem ol i bin kamap long lain bilong Abraham na ol i gat Lo bilong God. (Matyu 23:2; Jon 8:31-44) Tasol ol i no bin harim na bihainim maus bilong Gutpela Wasman bilong sipsip. I olsem i gat wanpela dua i op long ol, na ol inap kisim nambawan prais, olsem ol inap insait long Kingdom sapos ol i go insait long dispela dua, tasol ol i no laik i go insait. Liklik lain Juda tasol, em klostu olgeta i bilong ol lain nating i no gat nem, ol i harim tok i tru em Jisas i autim na ol i kam insait long lain bilong em na ol i no lusim em.—Luk 22:28-30; Jon 7:47-49.
Long de Pentikos bilong yia 33 C.E., dispela lain i bin kamap bihain, em dispela lain God i makim ol long spirit holi. (Aposel 2:1-38) Ol i no insait long dispela lain bilong mekim pasin nogut olsem Jisas i toktok long en, em ol bai krai nogut na kaikaim tit bilong ol, long wanem, rot i bin op long ol tasol ol i no go insait long en.—Luk 13:27, 28.
Olsem na long taim bilong ol aposel dispela tok “planti” em i makim bikpela hap lain bilong ol Juda na ol hetman bilong lotu. Ol dispela lain i tok ol i laik bai God i orait long ol, tasol ol i bihainim ol lo na pasin ol yet i makim, na bilong God, nogat. Dispela liklik lain, olsem “wan wan man tasol,” em ol i gat gutpela bel na ol i gat laik long insait long Kingdom, God i makim ol long spirit holi na ol i insait long kongrigesen Kristen.
Orait nau yumi ken tingim samting dispela tok bilong Jisas i makim long taim bilong yumi. Planti planti manmeri i save go long ol lotu i holim nating nem Kristen, ol pris pasto bilong ol i bin skulim ol olsem ol bai go long heven. Tasol ol stretpela tok bilong Baibel i no as bilong dispela bilip. Olsem lain Juda long bipo i bin mekim, olsem tasol ol dispela lain i mekim ol samting long laik bilong ol yet na ol i laik bai God i orait long ol.
Long taim bilong yumi i gat sampela—tasol i no planti tumas—long pasin daun ol i harim na givim bel long tok bilong Kingdom na ol i dediketim ol yet long Jehova, na ol i mekim ol samting bambai God i ken orait long ol. Ol mekim olsem na ol i kamap “manmeri bilong kingdom.” (Matyu 13:38) Ol dispela “manmeri” God i makim ol long spirit holi, em i kirap singautim ol long Pentikos bilong yia 33 C.E. Inap longtaim pinis ol Witnes Bilong Jehova i bilip olsem ol samting God i mekim long lain bilong em i makim olsem em i bin singautim pinis ol manmeri bilong i go long heven. Olsem na ol man i lainim tok i tru bilong Baibel i no longtaim i go pinis, ol i kisim save olsem nau singaut i go long ol man i tingting long kisim laip i stap oltaim long Paradais long graun. Namba bilong ol dispela lain i go bikpela tru na i winim namba bilong ol liklik lain Kristen God i bin makim ol, em ol i gat tingting long go long heven. Tok bilong Luk 13:24 i no makim ol lain em ol i no bilong i go long heven, tasol tok bilong en i gutpela bilong helpim ol.
Taim Jisas i kirapim yumi long taitim bun tru, em i no tok olsem em o Papa bilong em i putim ol samting long rot bilong yumi bilong pasim yumi, nogat. Tasol olsem yumi lukim long Luk 13:24, ol lo bilong God em i laik bai yumi mas bihainim, ol dispela lo yet bai mekim na ol man i no givim bel tru long God ol i no inap i go insait long liklik dua. Dispela tok “yupela i mas taitim bun tru,” i makim olsem i gat hatwok tru, olsem man i sotwin long mekim. Olsem na yumi ken askim yumi yet olsem, ‘Mi taitim bun tru?’ Yumi ken kolim Luk 13:24 olsem: ‘Mi mas taitim bun tru bilong go insait long liklik dua, long wanem, planti man bai i laik go insait, tasol bai ol i no inap. Orait olsem wanem? Mi wok long taitim bun tru? Mi olsem wanpela man bilong ran long resis long taim bipo na em i taitim bun tru bambai em i ken winim prais? Dispela kain man bilong pilai spot em i no save givim hap bel tasol o mekim nating tasol, nogat. Orait olsem wanem long mi? Mi givim hap bel tasol?’
Tok bilong Jisas i makim olsem sampela bai traim long i go insait long liklik dua long taim i stret long ol yet, na ol i laik wok isi tasol. Kain tingting olsem inap kisim ol wan wan Witnes. Sampela inap ting olsem, ‘Mi save long sampela gutpela Kristen em ol i bin taitim bun tru inap planti yia, na ol i bin daunim planti laik bilong ol yet long mekim dispela wok, tasol i kam inap long taim ol i dai, pinis bilong pasin nogut bilong dispela graun i no bin kamap. Olsem na ating mi ken wok isi isi, na mi mas tingim sindaun bilong mi olsem ol narapela man i save mekim.’
Em i no hatwok long ting olsem, tasol yu ting em i pasin bilong gutpela tingting? Yu ting ol aposel i bin ting olsem? Nogat tru. Ol i givim bel olgeta long lotu tru i go inap long ol i dai. Pol em inap tok olsem: “Mipela i save autim gutnius bilong Krais . . . Olsem na long olgeta bikpela strong Krais i save givim mi, mi save hatwok tru long mekim dispela wok.” Bihain em i tok: “God bilong i stap oltaim, em i man bilong kisim bek olgeta manmeri, na em i kisim bek tru yumi manmeri i bilip long em. Yumi bilip tru long em na yumi wetim em i mekim gut tru long yumi, olsem na olgeta taim yumi save mekim hatwok tru.”—Kolosi 1:28, 29; 1 Timoti 4:10.
Yumi save olsem Pol i mekim samting i stret taim em i taitim bun tru. Yumi olgeta wan wan bai stap belgut tru sapos yumi inap mekim wankain tok olsem Pol i bin mekim: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God.” (2 Timoti 4:7) Long dispela tok bilong Jisas i stap long Luk 13:24, yumi wan wan i ken askim olsem, ‘Mi save givim bel tru na wok strong? Long olgeta taim mi save kamapim long ples klia olsem mi pilim tru na bihainim tok bilong Jisas olsem: “Yupela i mas taitim bun tru, bilong i go insait long liklik dua”?’