Gutaim Tru Ol i Ting Long Kamapim i Giaman Tasol

OL MAN i ting nau bai gutaim i kamap long dispela graun. Dispela tingting i wok long kamap bikpela long nau. Wanpela meri i save raitim tok long nius (The Toronto Star), em Carol Goar, em i tok: “Kirap long Afganistan i go long Angola, ol gavman i wok long stretim tok bilong kamapim gutaim. Dispela samting i wok long kamap bikpela. I gat pait long planti hap na sampela mun bipo i olsem ol dispela pait i no inap pinis, tasol nau ol dispela pait i wok long pinis. Na wok bilong Yunaitet Nesen i kamap strong gen.” Dispela meri i tok: “Dispela i mekim na nau ol man long olgeta hap bilong graun i bilip olsem gutaim bai kamap.” Wanpela man i save raitim tok long nius (USA Today) i mekim wankain tok olsem: “Gutaim na bel isi i wok long kamap long olgeta hap bilong graun.”

Wanpela nius bilong Yunaitet Nesen (UN Chronicle) i stori long wanpela gutpela samting i wok long kamap, em i tok: “Rasia na Amerika i wok long toktok long i stap wanbel wantaim.” Ol i bin rausim ami bilong ol long sampela kantri, na bikpela senis i kamap long ol kantri bilong Isten Yurop. Na ol i toktok long mekim lain ami bilong ol i go liklik, na no ken wokim planti samting bilong pait​—⁠dispela ol samting i kirapim ol man long bilip olsem Rasia na Amerika bai lusim pasin bilong resis long bungim planti samting bilong pait. Dispela em i gutpela samting tru long wanem nau ol kantri i save lusim bikpela mani winim 850 tausen milion kina long olgeta yia long samting bilong pait.

Tasol olsem wanem? Gutaim ol man i ting long kamapim em inap kamap tru? Tru, ol gavman i pasim tok long ol i no ken wokim planti samting moa bilong pait, tasol i no olsem ol bai pinisim olgeta samting bilong pait. Sapos ol i laik pinisim olgeta bom nogut bilong nuklia ol i mas wanbel long mekim. Tasol sori tumas, inap planti yia nau ol bikpela gavman bilong graun i kros kros i stap. Baibel i tok profet long dispela taim nau na i tok, taim ol man i kros, “i no gat rot bilong pinisim kros bilong ol.”​—⁠2 Timoti 3:⁠3.

Na tu, planti man i ting olsem maski ol gavman i pinisim olgeta bom nogut bilong nuklia, dispela i no inap kamapim gutaim. Planti kantri i hipim ol bom nogut bilong nuklia, tasol maski ol i rausim ol dispela samting, ol i gat planti narapela samting bilong pait em inap kilim i dai ol man, olsem yumi lukim pinis long Namba Wan na Namba 2 Pait Bilong Olgeta Hap. Na maski ol i pinisim ol bom nuklia, save bilong wokim ol dispela samting i stap yet, na sapos pait i laik kamap, ol inap kirap gen long wokim ol dispela samting nogut bilong pait. Sampela man i gat tingting wankain olsem bilong wanpela saveman bilong politik, em Richard Ned Lebow, em i tok: “Gutpela sapos i gat sampela bom nuklia i stap, olsem bai ol man i pret na was gut, nogut narapela bikpela pait i kamap.”

Tasol sapos sampela bom nuklia i stap yet na ol man i tok, ol i kamapim pinis gutaim, ol i giaman tasol, long wanem ol dispela bom inap bagarapim olgeta man meri pikinini long graun. Na sapos ol narapela hevi i stap yet na wok yet long bagarapim sindaun na bel isi bilong ol man, orait gutaim ol man i ting long kamapim i giaman tasol. Sekreteri-jeneral bilong Yunaitet Nesen, em Javier Pérez de Cuéllar, em i tok: “Long nau planti milion manmeri ol i no gat haus o ol i stap long ol liklik rabis haus nogut. Dispela hevi i wok long i go bikpela moa yet.” Dispela nius bilong Yunaitet Nesen (UN Chronicle) i tok moa olsem ol gavman bilong dispela graun i no bin kamapim planti wok bisnis samting bilong helpim ol man, olsem na dispela i givim hevi long planti man na ol i stap rabis tru o ol i stap nogut olgeta wankain olsem long taim bilong pait. Na olsem wanem long ol hevi i kamap long ol 12 milion samting manmeri ol i bin ranawe lusim kantri bilong ol long wanem gavman i mekim nogut long ol? Sapos ol gavman i no wokim planti samting moa bilong pait o ol i lusim olgeta samting bilong pait, yu ting dispela bai helpim ol dispela ranaweman long i stap gutpela na i stap bel isi?

Tru tumas, gutaim ol man i ting long kamapim i giaman tasol​—⁠i olsem ol man i no inap lukluk longwe, na tingting bilong ol i pas, na save bilong ol i sot. Olsem wanem? I gat wanpela gutpela rot bilong kamapim gutaim? I gat. Wastaua bilong mun i go pinis i stori long Baibel i tok gutaim bai kamap tru.a I no longtaim na Krais Jisas, em King bilong Kingdom bilong God, bai kamapim gutaim tru, i winim tru gutaim ol man i ting long kamapim. Taim dispela gutaim tru i kamap, wanem kain pasin bai kamap? Tok i kamap bihain long dispela bai stori long dispela samting.

[Futnot]