Ol Sumatin i Winim Skul Gileat i Mas Lain Long Toktok Gut Wantaim Ol Man
LONG Sande, Mas 4, 1990, winim 4,100 manmeri i pulap long wanpela bikpela haus bung bilong ol Witnes Bilong Jehova long Jesi Siti. Ol i bung bilong amamas long ol sumatin i winim skul long Namba 88 Klas bilong Skul Gileat bilong Sosaiti Wastaua. I gat 24 sumatin ol i winim skul, na ol i bin kam long 6-pela kantri, na nau Sosaiti i laik salim ol i go long 13 kantri.
Ol tok bilong dispela bung i kirap long 10 klok long moningtaim. Ol i mekim wanpela singsing na bihain George Gangas, nau em i winim pinis 90 krismas na em i wanpela bilong Lain Bilong Bosim Ol Witnes, em i mekim beten na beten strong long Jehova. Bihain long dispela, siaman bilong bung, em C. W. Barber, em tu i bilong Lain Bilong Bosim Ol Witnes na em i bin go long Skul Gileat long Namba 26 Klas, em i stori liklik long ol bikpela senis i bin kamap klostu klostu hia long graun long dispela taim. Bilong pinisim tok bilong em, em i tok: “Long dispela taim, winim olgeta taim bipo, rot i op tru bilong autim tok long ol man long Jehova, em i Nambawan Bikpela, na long stretpela pasin bilong em.” Na bihain em i singautim narapela narapela brata i kam long pletfom na mekim ol tok bilong moningtaim.
Wanpela brata bilong Komiti Bilong Faktori long Bruklin, nem bilong em Vernon Wisegarver, em i mekim wanpela tok na as tok bilong en i olsem: “Mekim Gut Wok Bilong Yu.” Em i mekim tok piksa na em i stori long man bilong wokim samting long ain, em i wokim gut wanpela sen ain ol i pasim long anka bilong wanpela sip. Dispela strongpela sen i helpim olgeta man long sip na long taim bilong bikpela win na si ol i no bagarap. Em i tok ol sumatin i winim Skul Gileat i kain olsem dispela man. Em i tok, long Skul Gileat ol i bin lain gut long mekim wok na nau ol inap i go lainim ol man long Baibel na helpim ol long kisim ol gutpela pasin bilong God, na bai i olsem ol i helpim ol long wokim strongpela sen bambai ol i ken abrusim bagarap na i stap laip. Em i kirapim ol sumatin long wok yet long lain bambai ol inap mekim gut tru wok tisa bilong ol. Olsem bai ol i kamap olsem ol man i “mekim gutpela wok,” na bai ol inap kamap wokman bilong dispela King em i winim olgeta narapela king.
Bihain, wanpela brata bilong Lain Bilong Bosim Ol Witnes, em John Barr, em i mekim wanpela tok, nem bilong en: “Traim na Lukim na Bai Yu Save, Jehova i Gutpela Tru.” Tok bilong Buk Song 34:8 i as bilong dispela tok. Dispela ves i tok: “Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.” Brata Barr i tokim ol sumatin, olsem: “Traim olgeta samting long ples ol i salim yu i go mekim wok misineri long en. Traim olgeta. No ken pret long mekim. Na bai yu pilim gutpela pasin bilong Jehova, winim bilong bipo. Yu no ken traim sampela samting tasol. Yu no ken tok, ‘Mi no laikim dispela.’ Yu mas traim.”
Nau wanpela brata bilong wanpela Komiti long Bruklin, em Komiti Bilong Dipatmen i Lukautim Wok Autim Tok, nem bilong em Charles Woody, em i mekim wanpela tok, nem bilong en i olsem: “Kisim Stretpela Tingting long Yu Yet.” Em i tok: “Yumi save amamas long i stap klostu long ol man i gat stretpela tingting long ol yet, em ol i no save strong strong long ol narapela man i mas bihainim laik bilong ol tasol, na ol i save strongim ol narapela man na tokim ol, ‘Yu mekim gutpela wok,’ na maski ol i gat save, ol i no save hambak long dispela na daunim ol narapela man.” Na em i tok moa, olsem: “Yupela ol misineri, yupela i laik pulim ol man i kam long tok i tru; yupela i no laik pasim rot bilong ol. Olsem na yupela i mas bihainim pasin daun, na bai yupela inap helpim tru ol man long harim tok i tru.”
Bihain, wanpela brata bilong Lain Bilong Bosim Ol Witnes, em Lyman Swingle, em i mekim wanpela tok, nem bilong en: “Ol Sapta Bilong Bihain Bai Tokaut long Wanem Samting?” Bilong kirapim tok bilong em, em i mekim tok piksa olsem ol misineri i man bilong raitim buk na em i tok, “Nau yupela i laik raitim nupela sapta long buk bilong laip bilong yupela. Bai yupela raitim wanem kain tok long ol nupela sapta bilong laip bilong yupela kirap long nau na i go inap long taim bihain?” Em i tokim ol: “Olgeta samting yupela i mekim i mas litimapim nem bilong Jehova,” na em i tok moa, olsem: “Taim yupela skelim wanem samting yupela laik mekim, ol tok bilong Baibel i mas i stap olsem as bilong tingting bilong yupela. Yupela mas tingim tok bilong Sindaun 3:7 i tok: ‘Nogut yu ting, save bilong yu yet em i samting tru.’ Yu mas stap gut long wok bilong yu.” Na bilong pinisim tok bilong em, em i tok: “Mipela laik bai yupela inap raitim ol nupela sapta long buk bilong laip bilong yupela i go i go inap long olgeta taim bihain, na olsem bai yupela i stap oltaim.”
Nau wanpela tisa bilong dispela skul, em Jack Redford, em i givim tok long ol sumatin. Nem bilong tok bilong em i olsem: “Stap Olsem Ofa.” Bilong kirapim tok bilong em, em i tok: “Yupela i mekim wok misineri na i olsem yupela i mekim wok long laip bilong yupela olsem ofa. . . . Mipela i laikim yupela tumas, long wanem yupela i no tingting long helpim yupela yet; yupela i redi long lusim ol samting bilong yupela bilong helpim ol narapela man.” Em i kamapim tok bilong Filipai 2:17, em aposel Pol i tok em i givim em yet olsem ofa bilong wain. Insait bilong dispela tok i olsem em i taitim bun tru na givim olgeta strong bilong em olsem ofa. Na Brata Redford i tok: “Tasol olsem wanem ol misineri i olsem ol ofa bilong wain?” Orait nau em i kolim stori bilong tupela misineri i bin wok strong moa yet, winim mak ol i mas winim. Wanpela em i wanpela brata em i bin wokim 16,000 brik long han bilong em yet na sanapim namba wan Haus Kingdom long hap em i mekim wok misineri long en. Na wanpela em i wanpela sista i bin go wantaim man bilong em na mekim wok misineri long hap bilong bikbus, long ples i no gat ol samting bilong helpim sindaun bilong tupela. Ol sista bilong dispela hap i pilim tru gutpela pasin bilong dispela sista misineri, long wanem ol i save em i givim em yet olsem ofa. Tasol Brata Redford i tok, nogut misineri i wok strong tru na givim em yet olsem ofa, tasol em i no bihainim tok. Em i stori long King Sol na ol Amalek na em i tokim ol sumatin: “Yupela i no ken lusim tingting olsem pasin bilong bihainim tok i winim pasin bilong mekim ofa. Sapos yu sakim tok bilong Jehova, yu no ken ting olsem: ‘Mi mekim wok bilong Jehova, olsem na Jehova i no ken tingim dispela rong bilong mi.’ Nogat. Long olgeta taim yu mas bihainim tok bilong em na mekim olgeta samting em i tokim yu long mekim.”
Nau siaman i singautim narapela tisa bilong dispela skul i kam long pletfom, em Brata Ulysses Glass. Bilong kirapim tok bilong em, Brata Glass i tok: “Namba 88 Klas ol i lain bilong amamas. Ol narapela klas tu ol i bin amamas. Orait, olsem wanem na amamas bilong yupela i narapela kain na i win tru?” Em i tok, amamas “i no olsem wanpela mak yumi tingting long winim. Nogat. Em i prais yumi kisim taim yumi mekim ol stretpela wok. Long rot bilong ol wok yumi mekim bilong winim mak, yumi kisim dispela prais, olsem amamas.” Em i stori long wanpela man bilong raitim ol buk em i bin lukim wanpela tok i senisim tru tingting bilong em. Dispela tok i olsem: “Amamas em samting yu kisim taim yu wokabaut yet long rot, i no long taim yu kamap pinis long hap yu laik go long en.” Dispela man bilong raitim ol buk i tok, bipo em i save tingim ol samting em i laik mekim long bihain, na em i ting olsem taim em i mekim pinis dispela samting, bai em i amamas. Tasol nau em i senisim tru tingting bilong em na em i save painim amamas long ol samting em i mekim long olgeta de. Em i tok, “I no gat rot i go long amamas. Rot yet em i amamas.” Brata Glass i tok, dispela Namba 88 Klas i gat dispela kain amamas. Bilong pinisim tok bilong em, em i tokim ol sumatin: “Yupela i mas wokabaut yet long ol ples i gat wara. Maski wanem kain hevi i painim yupela, yupela i mas holim yet dispela amamas em i bilong ol man i save laikim tumas Jehova na ol i aninit long em.”
Nau Brata Karl Klein bilong Lain Bilong Bosim Ol Witnes em i mekim bikpela tok bilong moningtaim, nem bilong en: “Lain long Bihainim Pasin Kristen Bilong Toktok Gut Wantaim Ol Narapela.” Em i mekim tok long olgeta manmeri i kam bung na em i tok, Jehova yet em i nambawan Man bilong toktok gut wantaim ol narapela. Na Pikinini bilong em, em Tok bilong God, em i Nambawan Mausman bilong Jehova na em i bin toktok gut wantaim ol man na tokim ol long laik bilong God na long ol lo bilong Em. Taim Jisas i stap long graun, ol bikpela lain man i harim tok bilong em na ol i kirap nogut long pasin bilong em long lainim ol. Bipo ol i no bin harim wanpela man i mekim toktok olsem Jisas i mekim. Long Matyu 28:19, 20, Jisas i kirapim ol disaipel bilong em long toktok gut wantaim ol man na i go lainim ol long olgeta tok em i bin givim long ol, na bai ol dispela man tu i kamap disaipel bilong em.
Nau Brata Klein i givim tok long ol misineri yet na em i tok, ol i mas tingting strong long toktok gut wantaim 4-pela lain, olsem: Poroman marit bilong ol, na ol narapela long haus misineri, na brens-ofis long hap ol i go long en, na ol manmeri ol i bungim long taim ol i autim tok. Brata Klein i tokim ol misineri, “Taim yu no opim maus yet, yu kirap long givim save long man bilong haus. Em i lukim pasin bilong yu na klos samting bilong yu, na em i kisim sampela save long yu.” Bihain Brata Klein i stori long sampela samting i bin kamap na i strongim dispela tok bilong em, na las tru em i tok: “Bihainim pasin daun. No ken pasim rot bilong toktok gut wantaim ol man. Wok strong long lain long toktok gut wantaim ol man.”
Wanpela brata i kaunim sampela tok gude na tok amamas ol brata i bin salim long ol sumatin, na bihain siaman i givim setifiket long olgeta wan wan sumatin. Na bihain wanpela sumatin, em Paul Angerville bilong Guadelup, em i kaunim wanpela pas ol sumatin i bin raitim bilong kolim ol samting ol i tingting pinis long mekim na bilong tokaut long dispela long Lain Bilong Bosim Ol Witnes na ol brata sista bilong Betel long Bruklin.
Long belo bek, pastaim ol i mekim Stadi Wastaua, na bihain ol sumatin i wokim sampela liklik soim bilong makim sampela samting ol i bin mekim taim ol i skul, na taim ol i bung wantaim long rum bilong ol, na taim ol i bin autim tok insait long dispela 5-pela mun bilong Skul Gileat. Na las tru i gat wanpela gutpela pilai, nem bilong en: Mekim Pasin i Stret long Ai Bilong Jehova. Ol pablisa bilong Kongrigesen Lindhest, long Nu Jesi, ol i wokim dispela pilai. Bilong pinisim dispela bung long apinun, i gat singsing, na bihain presiden bilong Sosaiti i gat 96 krismas, em Fred Franz, em i mekim beten.
[Blok long pes 23]
OL SAMTING BILONG OL SUMATIN
Hamas kantri ol i kam long en: 6
Hamas kantri ol i go long en: 13
Hamas brata singel: 2
Hamas marit: 22
Hamas sumatin: 24
Krismas bilong ol, averes: 32.7
Hamas yia ol i bin baptais, averes: 14
Hamas yia ol i wok painia, averes: 9
[Piksa long pes 22]
Ol Misineri bilong Namba 88 Klas bilong Skul Gileat
Nem bilong ol brata sista i stap daunbilo. Namba 1 lain ol i sanap paslain, na namba 4 lain i sanap baksait tru. Taim yu kaunim nem bilong ol, lukim ol pes kirap long han kais na i go inap long han sut. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.