Man i Dai Em Inap i Stap Laip Gen o Nogat?

PLANTI handet yia bipo, Jop i bin tok: “Ol manmeri i dai pinis, ating ol i no inap kisim laip gen.” (Jop 14⁠:14) Tasol long bipo yet na i kam inap long nau ol man bilong olgeta lain i gat askim long dispela samting. Ol i laik save, man i dai pinis em inap i stap laip gen o nogat. Na ol i bin kamapim kain kain tingting long dispela samting.

Ol Grik bilong bipo i bilip olsem ol man i gat tewel. Ol i save stori olsem: Wanpela man bilong ples bilong ol spirit em i gat kanu na em i save kisim tewel bilong ol man i dai pinis i brukim wara Stiks na i go putim ol long dispela ples spirit. Ol jas long dispela ples i save skelim ol tewel na tok ol i bilong kisim pen long wanpela haus kalabus, em banis bilong en i antap tru, o ol i bilong i go na i stap amamas long gaden Elisia. Na sampela narapela lain bilong bipo ol i ting olsem tewel bilong ol man i dai pinis i save kamap olsem sta samting long skai. Na sampela i ting tewel i save lait na mun i pulim i go i stap long en, na long olgeta mun, taim mun i kamap bikpela, ol tewel i lusim mun na i go i stap long san.

Long nau tu ol man i gat kain kain bilip long ol samting i save painim man bihain long taim em i dai. Ol lain bilong lotu Hindu na lotu Buda i bilip olsem man i gat tewel na tewel i save stap laip, maski skin i dai pinis. Ol i ting tewel i save kamap nupela gen long narapela narapela skin. Ol Muslim tu i bilip olsem man i gat tewel na tewel i no save dai, maski skin i dai. Ol i save lainim ol man olsem long laspela kot bai tewel i go i stap long paradais o long bikpaia (hel). Planti Talatala i bilip olsem taim man i dai, tewel i save go long heven na i stap gutpela, o i go long bikpaia na i karim pen. Ol Katolik i save stori long tupela ples moa tewel i go long en, em klinpaia (pegatorio) na Limbo.

Long sampela kantri ol man i skruim tok bilong ol misin wantaim tok bilong ol tumbuna na ol i gat kain kain bilip long tewel bilong man i dai pinis. Olsem: Long hap bilong Wes Afrika taim wanpela man i dai, planti Katolik na Talatala i save karamapim laplap long olgeta glas bilong lukluk, nogut wanpela man i lukim tewel bilong dispela man i dai pinis. Inap 40 de bihain, ol famili na pren bilong em i bung wantaim na wokim bikpela kaikai bilong amamas long tewel bilong em i go antap long heven. Na bihain, olsem long taim bilong Krismas o Nuyia samting, ol wanblut i save go long ples matmat na kapsaitim bia o wain samting long matmat bilong em. Ol i save toktok long man i dai pinis na askim em long helpim ol na stori long sampela samting i bin painim famili bilong em.

Ol lotu bilong dispela graun i no gat wankain tingting long ol samting i save painim man i dai pinis. Tasol olgeta i wanbel long tok olsem yumi gat tewel na taim yumi dai, tewel i no save dai. Dispela tingting i as bilong ol kain kain bilip bilong ol long man i dai pinis em inap i stap laip gen.

Tasol i gat sampela askim long dispela bilip olsem: Wanem as bilong dispela tingting olsem ol man i gat tewel? Baibel i as bilong en o nogat? Sapos Baibel i as bilong en, orait olsem wanem na ol lotu haiden tu i save bilip olsem ol man i gat tewel? Yumi mas tingim gut ol dispela askim. Maski yu bilong wanem lotu, bihain bai yu dai, olsem na gutpela sapos yu save long bekim bilong ol dispela askim. Mipela laik kirapim yu long skelim gut ol dispela askim, maski yu gat wanem tingting long en long nau.