I Gat Laip Bihain Long Taim Yumi Dai?
“SAPOS wanpela man i dai, em inap kisim laip gen?” (Jop 14:14, NW ) Jop i bin kamapim dispela askim 3,500 yia i go pinis. Inap planti tausen yia ol man i laik save long bekim bilong dispela askim. Na ol pipel bilong olgeta hap i bin tingim tingim dispela samting na ol i kamapim kain kain tingting long en.
Planti man ol i tok ol i Kristen ol i bilip long heven na hel. Ol Hindu i bilip olsem taim ol i dai ol i kamap nupela gen long narapela bodi. Emir Muawiyah, wanpela man i wok long wanpela senta bilong lotu Islam, i stori long bilip bilong ol Muslim long dispela samting na em i tok: “Mipela i bilip olsem bihain long i dai, i gat wanpela de yu mas kamap long ai bilong God, Ala, na em i ken skelim yu, na dispela bai wankain stret olsem wanpela kot.” Bilip Islam i tok Ala bai skelim ol samting olgeta wan wan man i bin mekim na Ala bai makim em long i go long paradais o long bikpaia.
Long Sri Lanka, ol Buda na ol Katolik ol i save larim ol dua na windo i stap op taim wanpela wanhaus i dai. Ol i laitim wanpela lam, na klostu long dua long ai bilong haus ol i putim bokis bilong daiman. Ol i putim bambai lek bilong daiman i stap klostu long dua. Ol i ting dispela bai mekim na tewel, o spirit bilong em i no hatwok long lusim haus.
Ronald M. Berndt bilong Yunivesiti bilong Westen Australia i tok ol Aborijini bilong Australia i bilip olsem “ol man i gat wanpela spirit samting i no inap dai.” Sampela lain bilong Afrika i bilip olsem bihain long indai ol man i save kamap olsem wanpela spirit, na ol man i gat namba ol i kamap olsem spirit ol man i givim biknem long ol na toktok wantaim ol olsem ol i lida bilong komiuniti.
Long sampela kantri, bilip bilong ol long ol daiman, em hap bilip bilong ol tumbuna na hap bilip bilong ol lotu i gat nem Kristen. Long hap bilong Wes Afrika, taim wanpela man i dai, planti Katolik na Talatala i save karamapim laplap long ol glas bilong lukluk, nogut wanpela man i lukluk long glas na lukim tewel bilong dispela daiman.
Ol manmeri i gat kain kain bekim bilong dispela askim, ‘Wanem samting i painim yumi taim yumi dai pinis?’ Tasol olgeta i gat wanpela tingting, em i olsem: Insait long man i gat wanpela samting i no save dai, na taim man i dai, dispela samting i stap laip yet. Sampela i bilip olsem dispela “samting” em i wanpela spirit, o tewel. Olsem: Long sampela hap bilong Afrika na Esia na long hap bilong Pasifik, olsem Polinisia, Melanisia, na Maikronisia, planti man i bilip olsem ol man i gat wanpela spirit, o tewel, i no save dai.
Olsem wanem? I gat wanpela spirit i stap insait long man i stap laip? Tru tru dispela spirit i save lusim bodi taim man i dai? Sapos olsem, orait wanem samting i save painim dispela spirit? I gat gutpela samting bai painim ol man i dai pinis? Yu mas tingim gut ol dispela askim. Maski yu bilong wanem hap o wanem lotu, bihain bai yu dai, olsem na gutpela sapos yu save long bekim bilong ol dispela askim. Mipela laik kirapim yu long skelim gut dispela samting.