Ripot Long Wok Bilong Kingdom
‘Ol Man i Hangre Long Kisim Save Long God, Ol i Ken Amamas’
JISAS i tok: “Ol man i save, ol i stap rabis tru long ol samting bilong God, em ol i ken amamas.” (Matyu 5:3) Ol dispela kain man bai wok long kisim save i stap long Baibel, em Tok bilong God. Dispela save inap helpim ol long kisim laip i stap oltaim.—Matyu 4:4; Jon 17:3.
◻ Wanpela man long Afrika em i hangre long kisim save long God, olsem na em i wokabaut long lek inap 4-pela aua long kol na tudak bambai em inap kisim wanpela buk nem bilong en Baibel Stori Buk Bilong Mi. Taim em i kamkamap long liklik ples ol Witnes Bilong Jehova i autim tok long en, em i bel hevi tru, long wanem ol Witnes i tilim pinis olgeta buk bilong ol. Em i stap long dispela ples inap 3-pela de na wetim ol Witnes i kisim sampela buk moa, na taim em i kisim pinis wanpela buk bilong em yet, nau em i amamas tru, long wanem, dispela buk inap helpim em long kisim save long God.
Ol Witnes i stap long dispela ples inap wanpela mun olgeta, na ol i tilim 55 buk na 365 buklet na 145 magasin, na ol i kisim 5-pela sabskripsen. Taim ol i lusim dispela ples, bel bilong ol i pilim tru tok ol bikpela man na ol pikinini i mekim long tok ples bilong ol, olsem: “Jehova i mas i stap wantaim yupela!” Ol i wok long painim rot bambai ol inap i go lukim gen ol dispela man i laik harim tok.
Wanpela meri long dispela kantri em tu i hangre long kisim save long God. Em i lukautim mani bilong haus lotu, na em i bosim ol klap samting bilong misin long provins bilong em. Taim ol Witnes i kam toktok wantaim em, aiwara i kamap long ai bilong em na em i tok, lotu bilong em i no bihainim ol lo bilong Baibel em ol Kristen i mas bihainim. Ol Witnes i tokim em long kisim Baibel bilong em yet i kam, na ol i opim na helpim em long save husat ol i lotu tru long God. Em i go long tupela miting long Haus Kingdom, na bihain em i tok: “Ol samting mi lukim na harim i helpim mi long save, tok i tru i stap long yupela.” Em i laikim tru ol miting na em i amamas long pasin bilong ol manmeri i kam long miting. Em i save, ol dispela manmeri i lotu tru long God, na tok ol Witnes i bin mekim taim ol i kam lukim em long haus em i stret. Dispela meri i bin mekim ol samting bambai em inap lusim lotu bilong em na ol wok bilong lotu em i bin mekim, na olgeta man long hap bilong em i save long dispela samting na ol i laik harim tok.
◻ Wanpela katekis long Nu Kaledonia, em i hangre long kisim save long God. Em i lukim wanpela buk i stap long tebol long haus bilong mama bilong em, nem bilong dispela buk em Tok i Tru i Bringim Man Long Laip Oltaim, na em i kaunim sapta 2 na 3. Dispela buk i stori long tok bilong Kisim Bek 20:4, 5 na Jon 4:23, 24 na em i pilim tru ol tok dispela buk i kamapim. Em i tingim dispela tupela hap tok bilong Baibel na em i go lukim pris na askim em, bilong wanem Lotu Katolik i orait long mekim wok long ol piksa samting bilong lotu. Pris i no laik bekim askim bilong em. Dispela man i go long ol narapela lotu i tok ol i “Kristen,” tasol ol dispela lotu tu i no inap bekim gut ol askim bilong em. Bihain em i tingting long i go wantaim mama long wanpela miting bilong ol Witnes Bilong Jehova, em mama i laik save long tok i tru na em i bin kisim dispela buk. Taim dispela man i go long miting, em i lukim gutpela pasin bilong ol Witnes, em narapela i laikim tru narapela, na ol i lainim ol man long ol tok bilong Baibel tasol, na em i pilim tru.
Maski em i stap longwe, tasol em i save go long olgeta miting, na i no longtaim na em i tok em i laik kamap wanpela Witnes, na em i kisim baptais. Nau em i mekim wok olsem wokman bilong kongrigesen. Mama bilong em na tupela susa bilong em tu i kamap Witnes. Dispela yangpela man i autim tok long ol manmeri long as ples bilong em yet, na em i kirapim planti Baibel-stadi. Nau planti man long as ples ol i save go long ol miting long dispela hap. Dispela olgeta samting i kamap, long wanem yangpela man hia i lukim wanpela buk long tebol i stori long tok bilong Baibel, na em i wok long kisim save long tok bilong en, na givim bel long bihainim ol tok em i kisim save long en.
Long nau Jehova i wok long givim kaikai bilong spirit long ol manmeri, na bikpela lain ol i amamas long kisim dispela kaikai. Aisaia i tok profet long dispela samting, olsem: “Ol wokman bilong mi bai ol i gat planti kaikai na wara. Tasol yupela ol lain [bilong lotu giaman] i save givim baksait long mi, bai yupela i stap hangre na bai yupela i no gat wara bilong dring.” (Aisaia 65:13) Sapos yumi kisim ol kaikai bilong spirit Jehova i laik givim long yumi, bai yumi no hangre moa long kisim save long God, na bai yumi stap amamas.