Kisim Pasin Isi!
“God em i makim yupela pinis, na yupela i stap ol lain manmeri bilong en, na em i save laikim yupela tru. Olsem na yupela i mas kisim olkain pasin olsem: Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.”—KOLOSI 3:12.
1-3. Long Kolosi 3:12-14 aposel Pol i tok wanem long pasin isi na ol narapela pasin i olsem pasin bilong God?
JEHOVA i save givim ol gutpela pasin long lain bilong em olsem “klos” ol i mas pasim. Olgeta man i laik bai Jehova i belgut long ol, ol i mas pasim dispela “klos,” olsem bihainim ol dispela gutpela pasin. Na pasin isi i mas i stap olsem ol strongpela tret long laplap ol i bin wokim dispela “klos” long en. Dispela pasin i save mekim gut bel bilong yumi, long wanem, em i save mekim i dai kros. Na dispela pasin i save lukautim yumi bambai kros i no ken kamap.
2 Aposel Pol i tokim ol arapela Kristen em God i bin makim ol, olsem: “God em i makim yupela pinis, na yupela i stap ol lain manmeri bilong en, na em i save laikim yupela tru. Olsem na yupela i mas kisim olkain pasin olsem: Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.” (Kolosi 3:12) Hap tok Grik ol i tanim olsem “yupela i mas kisim” i makim olsem ol i mas kisim hariap. Ol manmeri God i makim ol pinis na em i save laikim ol tru, ol i mas kirap kwik na kisim ol gutpela pasin olsem pasin isi.
3 Na Pol i tok moa olsem: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim.” (Kolosi 3:13, 14) Pasin bilong sori, na pasin isi, na ol narapela pasin i olsem pasin bilong God, ol dispela pasin i helpim ol Witnes Bilong Jehova long “sindaun gut wantaim na i stap wanbel.”—Buk Song 133:1-3.
Ol Wasman i Mas Bihainim Pasin Isi
4. Ol Kristen tru i save pasim “klos” ol i wokim long wanem olkain pasin?
4 Ol Kristen tru i save wok strong long ‘kilim i dai olgeta pasin bilong graun i stap long bel bilong ol, olsem pasin pamuk, na pasin doti, na pasin bilong bel i kirap, na pasin bilong mangal.’ Ol i wok long lusim olpela “klos” i gat pasin bilong kros, na belhat, na bel nogut, na tok nogut long ol arapela, na mekim toktok i doti. (Kolosi 3:5-11) Ol i save rausim “pasin bilong olpela man” na ol i wok long kamap ‘nupela man.’ I olsem ol i kisim nupela “klos” i stret. (Efesus 4:22-24) Dispela nupela “klos” ol i kisim, olsem pasin sori, na pasin daun, na pasin isi, na no ken belhat kwik long man i rongim ol, dispela i helpim ol long stretim ol kros na hevi na bihainim ol pasin bilong God.—Matyu 5:9; 18:33; Luk 6:36; Filipai 4:2, 3.
5. I gat wanem kain pasin bilong bosim kongrigesen na ol man i amamas long i stap insait long en?
5 Ol man i gat biknem na bikpela wok long dispela graun, planti ol i save mekim hatpela pasin—ol i no save sori long ol man o mekim pasin isi long ol. Na sampela taim ol i mekim nogut long man. (Sindaun 29:22) Tasol insait long lain bilong Jehova narapela kain pasin tru i stap! Ol man i bosim wok bilong kongrigesen Kristen ol i no mekim pasin olsem sampela man bilong bosim wanpela wok bisnis, em ol i bosim gut bisnis, tasol ol i mekim hatpela pasin na ol man i wok insait long dispela bisnis ol i no amamas. Ol manmeri insait long kongrigesen ol i amamas. Wanpela as bilong dispela i olsem: Ol Kristen i save bihainim gutpela tingting na mekim pasin isi long ol man, na ol tisa long kongrigesen i save mekim moa yet. Ol dispela tisa o elda long kongrigesen ol i gat “gutpela tingting na save,” olsem na ol i save mekim pasin isi taim ol i skulim ol man, na ol gutpela tok na tingting ol i autim i save mekim ol man i amamas.—Jems 3:13.
6. Bilong wanem ol elda Kristen i mas bihainim pasin isi?
6 Lain bilong God i gat wanpela pasin i olsem nambawan pasin bilong ol, em pasin isi, olsem na ol man i holim wok wasman insait long kongrigesen ol i mas i gat pasin isi. Ol i mas isi long ol man, na pilim gut tingting bilong ol. (1 Timoti 3:1-3) Ol wokboi bilong Jehova i olsem ol sipsip i stap isi; ol i no olsem ol meme i bikhet nabaut, o ol donki i no laik bihainim tok, o ol weldok i save bagarapim ol sipsip. (Buk Song 32:9; Luk 10:3) Ol i kain olsem sipsip, olsem na ol wasman i mas mekim pasin isi long ol na lukautim ol gut. (Aposel 20:28, 29) Tru tumas, God i laik bai ol elda i mas mekim pasin isi long ol sipsip bilong em, na ol i mas mekim gutpela pasin long ol, na laikim ol tru, na no ken les kwik long ol.—Esekiel 34:17-24.
7. Ol elda i mas mekim wanem kain pasin taim ol i skulim ol man o helpim man i gat sik bilong spirit?
7 Ol elda i “wokman bilong Bikpela,” olsem na ol i mas “mekim gutpela pasin long olgeta man. Sapos ol man i bikhet long [elda], em i mas daunim belhat na painim ol gutpela rot bilong skulim ol manmeri long ol pasin God i laikim. Em i mas wok isi na stretim tingting bilong ol man bilong sakim tok. Sapos em i mekim olsem, orait God bai i helpim ol na ating ol bai i tanim bel na kisim gutpela save long tok tru.” (2 Timoti 2:24, 25) Ol wasman Kristen i mas sori long ol man i gat sik long spirit na mekim pasin isi taim ol i wok long helpim ol, long wanem, ol dispela sipsip ol i bilong God. Ol elda i no ken mekim pasin long ol sipsip olsem man i wok mani tasol na em i no tingting tru long ol sipsip. Nogat. Ol i mas mekim pasin isi long ol sipsip, olsem Gutpela Wasman Krais Jisas i bin mekim.—Jon 10:11-13.
8. Moses em i man bilong pasin daun na pasin isi, tasol wanem samting i bin painim em? Bilong wanem dispela samting i painim em?
8 Ating sampela taim elda bai hatwok long bihainim pasin isi. “I no gat wanpela man long dispela graun i save daunim em yet inap olsem Moses.” (Namba 12:3) Tasol taim ol Israel i sot long wara long hap bilong Kades, ol i kros na toktok planti long Moses na sutim asua i go long em, long wanem, em i bin kisim ol long Isip na bringim ol i kam long dispela ples drai. Moses i bin i stap isi na karim olgeta hevi ol i putim long em, tasol nau em i no tingting gut na em i kirap tasol na mekim tok, na em i mekim hatpela tok. Em wantaim Aron i sanap long ai bilong ol Israel na litimapim nem bilong tupela yet. Moses i tok: “Harim. Yupela ol manmeri bilong sakim tok. Ating mipela i mas kisim wara bilong yupela long dispela ston, a?” Orait, Moses i paitim ston tupela taim long stik bilong em, na God i mekim na “bikpela wara” i kamap bilong ol manmeri na ol animal i ken dring. Jehova i kros long Moses tupela Aron, long wanem, tupela i no bin litimapim nem bilong em, olsem na em i no larim Moses i bringim ol Israel i go insait long Graun Bilong Promis.—Namba 20:1-13; Lo 32:50-52; Buk Song 106:32, 33.
9. Wanem samting inap traim pasin isi bilong elda?
9 Traim inap painim pasin isi bilong elda Kristen tu long kain kain rot. Olsem: Pol i tokim wasman Timoti em i mas lukaut, nogut wanpela man i kirap “laikim tumas pasin bilong em yet na em i bikhet,” na em i “gat laik nogut bilong tok resis na tok pait nabaut long ol liklik samting nating.” Pol i tok moa olsem: “Dispela kain tok i save mekim ol man i bel nogut long ol arapela man na ol i tok pait na ol i tok bilas na ol i tingting nogut long ol arapela na oltaim ol i tok kros nabaut. Tingting bilong ol man i save mekim dispela kain pasin em i paul olgeta, na ol i no save liklik long tok i tru.” Timoti i no ken mekim hatpela pasin long ol dispela man, tasol em i mas “givim baksait long ol dispela kain pasin nogut na abrusim olgeta,” na em i mas “wok long kisim stretpela pasin na pasin tru bilong God na pasin bilong bilip tru na pasin bilong laikim tru ol arapela na pasin bilong sanap strong na karim olgeta hevi na pasin bilong isi long ol manmeri.”—1 Timoti 6:4, 5, 11.
10. Taitus i bin kirapim ol kongrigesen long tingim wanem samting?
10 Ol elda i mas mekim pasin isi, tasol ol i mas strong long bihainim pasin i stret. Taitus i bin mekim olsem. Em i bin kirapim ol manmeri i bung wantaim ol kongrigesen long ailan Krit long tingim gutpela pasin ol i mas bihainim. Em i tokim ol, ol i “no ken tok nogut long wanpela man, na ol i no ken tok pait. Oltaim ol i mas stap isi tasol na mekim gutpela pasin long olgeta manmeri.” (Taitus 3:1, 2) Bilong helpim ol Kristen long save bilong wanem ol i mas mekim gutpela pasin isi long olgeta manmeri, Taitus i mas kirapim ol long tingim gutpela pasin na pasin sori God Jehova i bin mekim. God i no tingim sampela stretpela pasin ol bilipman i bin mekim na em i kisim bek ol. Nogat. Long sori bilong em yet em i kisim bek ol long rot bilong Krais Jisas. Dispela pasin isi bilong Jehova i givim rot long yumi tu bambai em inap kisim bek yumi. Ol elda long nau i mas bihainim pasin bilong Taitus na kirapim tingting bilong ol kongrigesen long ol i mas aninit long God, na ol i mas isi long ol man olsem God i save mekim.—Taitus 3:3-7; 2 Pita 3:9, 15.
Man i Gat Gutpela Tingting na Em i Laik Stretim Man, Em i Save Bihainim Pasin Isi
11. Man i laik stretim narapela man em i mas mekim long wanem kain pasin, olsem Galesia 6:1, 2 i tok?
11 Tasol olsem wanem sapos wanpela man olsem sipsip em i mekim rong? Pol i tok: “Ol brata, sapos yupela i save olsem wanpela bilong yupela i bin mekim sin, orait yupela man i bihainim Holi Spirit, yupela i mas mekim pasin isi long dispela man na helpim em long stretim pasin bilong em. Tasol yupela i mas lukaut gut long yupela yet. Nogut Satan i traim yupela na yupela tu i pundaun long sin. Yupela i mas helpim ol arapela long karim hevi bilong ol. Long dispela pasin bai yupela inapim tru lo bilong Krais.” (Galesia 6:1, 2) Sapos yu laik stretim man na yu givim tok long em long gutpela pasin isi, dispela inap kirapim em long harim tok bilong yu. Na sapos ol elda i laik givim sampela tok long wanpela man i belhat, ol i mas bosim gut bel na no ken kros. Ol i mas save, “sapos yu mekim tok isi na yu no kros kwik, orait yu inap tanim bel bilong ol man i no laik harim tok bilong yu.” (Sindaun 25:15) Maski wanpela man i gat strongpela pasin, sapos yu mekim tok isi long em, dispela inap kirapim em long harim tok bilong yu.
12. Olsem wanem pasin isi inap helpim man i laik stretim narapela man?
12 Jehova em i Tisa bilong pasin isi. Em i save wok isi insait long kongrigesen na lainim gut ol man. Ol elda i mas bihainim dispela pasin bilong em, na ol i mas bihainim moa yet long taim ol i laik helpim wanpela man i bin mekim rong, na bai em i kamap strong gen long spirit. Disaipel Jems i raitim tok olsem: “Ating wanpela man namel long yupela em i gat gutpela tingting na save? Sapos kain man olsem i stap, orait wokabaut bilong en i mas kamap gutpela. Em i no ken bikhet na apim nem bilong em yet. Em i mas bihainim gut pasin bilong gutpela tingting na save, na ol man bai i lukim gutpela pasin em i mekim.” Sapos man i laikim na pilim tru “gutpela tingting na save i kam long God,” na em i gat pasin daun na i save em i no inap mekim gut olgeta samting, orait dispela man bai mekim pasin isi long ol narapela man. Pasin isi na pasin daun i save helpim man i laik stretim narapela man na bai em i no mekim sampela tok kranki o sampela tok i bagarapim bel bilong dispela man. Na bai i no hatwok long dispela man i harim tok bilong em na bihainim.—Jems 3:13, 17.
13. Sapos man i gat pasin isi em “gutpela tingting na save” i as bilong en, taim em i laik stretim man em bai mekim long wanem kain pasin?
13 Man i laik stretim narapela man, sapos em i gat pasin isi em “gutpela tingting na save” i as bilong en, dispela bai helpim em long tingting gut na bai em i no kirap nating na mekim sampela tok i sutim bel bilong man, o mekim hatpela tok. Tasol nogut dispela man i pren bilong elda o elda i laik bai dispela man i laikim em, na dispela i kirapim em long mekim ol tok bilong amamasim em, na em i no kamapim ol tok bilong Baibel na autim stret long dispela man long pasin isi. (Sindaun 24:24-26; 28:23) Kasen-brata bilong Amnon i givim sampela tok long Amnon i amamasim bel bilong em, tasol bagarap i painim Amnon long dispela—ol i kilim em i dai. (2 Samuel 13:1-19, 28, 29) Olsem na ol elda long nau i mas was gut, nogut ol i laik mekim bel bilong wanpela man i stap isi na ol i mekim sampela tok i daunim strong bilong ol lo bilong Baibel. Sapos ol i mekim olsem, bagarap inap painim man long dispela. Ol elda i mas bihainim pasin bilong Pol, em i no surik long “autim olgeta tingting bilong God” long ol man. (Aposel 20:26, 27; 2 Timoti 4:1-4) Strongpela Kristen i laik stretim man em i save aninit long God, na long pasin isi em gutpela tingting i as bilong en em i givim stretpela tok long dispela man.
14. Sapos man yet i mas skelim ol samting em i laik mekim, bilong wanem elda i mas was gut na no ken tokim em long ol samting em i mas mekim?
14 Pasin isi wantaim gutpela tingting na save i kam long God bai helpim elda na bai em i no putim strongpela lo tumas long man. Na sapos man yet i mas skelim wanem samting em i mas mekim, orait elda i mas save, i no stret elda i tokim em long ol samting em i mas mekim. Sapos elda i mekim olsem, em i no bihainim gutpela tingting. Sapos elda i tokim wanpela man long rot em i mas bihainim na samting nogut i painim man long dispela, orait bai elda i gat asua. Elda i ken tokim man long ol tok bilong Baibel long dispela samting, tasol sapos i no gat lo bilong Baibel long en, orait man i mas bihainim tingting na maus bilong bel bilong em yet na skelim wanem samting em i ken mekim na wanem samting em i no ken mekim. I olsem Pol i tok: “Olgeta man wan wan [i mas] karim hevi bilong pasin ol yet i mekim.” (Galesia 6:5; Rom 14:12) Tasol sapos wanpela man i askim elda long helpim em long save wanem rot i stret em i mas bihainim, orait elda i ken givim sampela askim long em bilong kirapim tingting bilong em na helpim em long skelim gut ol tok bilong Baibel na bai em yet i ken tingim wanem rot em inap bihainim.
15. Sapos elda i no save long bekim bilong wanpela askim, em i mas mekim wanem?
15 Sapos wanpela man i kam givim askim long elda na elda i no save long bekim bilong dispela askim, nogut em i kamapim nating sampela tok bilong haitim dispela. Sapos em i gat gutpela tingting bai em i bihainim pasin daun na em i no ken kolim nating sampela tok, nogut em i bekim kranki na bihain dispela man i kisim hevi long dispela. Baibel i tok, i gat “taim bilong pasim maus na taim bilong toktok.” (Saveman 3:7; lukim Sindaun 21:23.) Taim elda i save long bekim bilong askim, o em i bin lukim sampela buk na kisim save pinis long stretpela bekim bilong en, orait long dispela taim tasol em i ken “toktok.” Tasol sapos man i askim nabaut long samting Baibel i no tok long en, gutpela sapos elda i no mekim sampela tok.—Sindaun 12:8; 17:27; 1 Timoti 1:3-7; 2 Timoti 2:14.
Gutpela Sapos Yu Kisim Tingting Long Planti Arapela Man
16, 17. Bilong wanem i stret ol elda i askim ol narapela elda long givim tingting long ol?
16 Sapos ol elda i beten na stadi, dispela bai helpim ol long bekim ol askim na stretim ol hevi i hatwok long stretim. Tasol ol i mas save, “sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela.” (Sindaun 15:22) Sapos elda i toktok wantaim ol narapela elda bai ol inap givim sampela gutpela tingting long em. (Sindaun 13:20) Sampela elda i gat save pinis long planti samting na ol i gat planti save long Baibel, na sampela i no gat planti save olsem. Olsem na sapos elda i no gat planti save, tasol em i gat gutpela tingting na pasin daun, dispela bai kirapim em long askim ol narapela elda i gat planti save long givim sampela tingting long em. Gutpela sapos em i mekim olsem taim em i wok long stretim bikpela hevi.
17 Taim ol i makim sampela elda bilong stretim wanpela bikpela hevi, ol dispela elda i ken askim ol narapela elda long givim sampela tingting long ol, tasol ol i no ken tokim ol narapela elda long samting i no samting bilong ol. Moses i kisim wok olsem jas bilong harim kot bilong ol Israel. Bilong helpim em long mekim dispela wok, em i makim “ol gutpela saveman . . . i save stap aninit long God, em ol man yumi inap bilip long ol na i no inap ol man i givim mani long ol bilong pulim ol long mekim pasin i no stret.” Ol dispela man i hetman o elda bilong lain Israel, tasol ol i no gat planti save olsem Moses. Olsem na “ol bikpela trabel” ol i bringim long Moses bilong stretim, na ol yet i “stretim ol liklik trabel long kot.” (Kisim Bek 18:13-27) Long nau tu, sapos ol elda i wok long stretim wanpela bikpela hevi na ol i sot long tingting, ol i ken askim sampela elda i gat planti save long givim sampela tingting long ol, tasol bihain ol yet i mas pasim tok long samting ol bai mekim.
18. Taim ol elda i harim kot, wanem samting tru inap helpim ol long skelim stret ol samting ol i mas mekim?
18 Buk lo bilong ol tumbuna bilong lain Israel (Mishnah) i tok, long ol kot bilong ples, sapos i gat bikpela rong bilong stretim, ol i save makim planti man liklik bilong harim kot, tasol sapos i gat liklik rong tasol bilong stretim, ol i makim tupela o tripela tasol bilong harim kot. Tru, sapos yumi kisim tingting long planti narapela man, dispela inap helpim wok long kamap gutpela. Tasol yumi no ken ting olsem tingting bilong planti man tasol em i stret. Sampela taim tingting bilong planti man i no stret. (Kisim Bek 23:2) Samting tru bilong helpim ol elda long skelim stret ol samting ol i mas mekim, em olsem: Ol tok bilong Baibel na spirit bilong God. Ol Kristen i gat gutpela tingting na pasin daun, olsem pasin isi, ol bai larim tok na spirit bilong God i stiaim tingting bilong ol.
Autim Tok Long Pasin Isi
19. Olsem wanem pasin isi i helpim lain bilong Jehova long autim tok long ol man?
19 Pasin isi i helpim ol wokboi bilong Jehova long autim tok long ol kain kain man. (1 Korin 9:22, 23) Taim Jisas i skulim ol man em i mekim pasin isi long ol, olsem na ol man nating i no pret long em, olsem ol i pret long ol bikman bilong lotu i gat hatpela pasin. (Matyu 9:36) Pasin isi bilong Jisas i pulim “ol sipsip” i go long em; i no pulim ol man nogut olsem “meme” i go long em. (Matyu 25:31-46; Jon 3:16-21) Tru, Jisas i bin mekim ol strongpela tok taim em i toktok wantaim ol man bilong giaman ol i olsem meme. Tasol taim ol Witnes Bilong Jehova i autim tok long strafe bilong God i mas painim ol man nogut, ol i mas mekim long pasin isi, long wanem, ol i no save long tingting i stap long bel bilong man na ol i no gat namba olsem Jisas. (Matyu 23:13-36) ‘Ol man i gat gutpela bel inap long ol i kisim laip i stap oltaim,’ taim ol i harim ol man i autim tok bilong Kingdom long pasin isi, ol “i bilip,” olsem ol manmeri kain olsem sipsip i bin mekim taim ol i harim tok bilong Jisas.—Aposel 13:48.
20. Taim yumi lainim man long Baibel, sapos yumi mekim long pasin isi, dispela bai helpim em olsem wanem?
20 Taim yumi wok long autim tok na lainim ol man, sapos yumi mekim long pasin isi na yumi kamapim ol tok i stret, na ol lo bilong Baibel, na ol tok i tru, bai wok bilong yumi i kamap gutpela. Pita i tok: “Long bel bilong yupela, yupela i mas putim Krais wanpela em i stap Bikpela bilong yupela. Na sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol. Tasol yupela i mas bekim tok bilong ol long tok isi na long gutpela pasin.” (1 Pita 3:15, 16) Taim yumi lainim man, sapos yumi mekim pasin isi, bai em inap putim tingting i go long ol tok em i lainim na kisim gut. Nogut yumi mekim hatpela tok o tok resis o tok pait wantaim em. Dispela kain pasin bai pulim nabaut tingting bilong em na inap pundaunim em. Sapos ol wokman bilong God i mekim tok isi na pasin isi taim ol i lainim man, ol dispela wokman i ken mekim tok wankain olsem bilong Pol, em i tok: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun.” (2 Korin 6:3) Sapos yumi mekim ol tok isi na pasin isi, yumi inap kirapim ol birua tu long harim tok.
Olgeta i Mas Bihainim Pasin Isi
21, 22. Olsem wanem pasin isi i helpim olgeta manmeri long lain bilong Jehova?
21 Pasin isi bilong Kristen i no olsem wanpela “klos” yumi pasim long ai bilong ol man ausait bambai ol i litimapim nem bilong yumi. Nogat. Dispela pasin i bikpela samting bilong helpim ol manmeri insait long lain bilong Jehova long i stap gut wantaim. (Kolosi 3:12-14; 1 Pita 4:8) Taim ol elda na wokman bilong kongrigesen i bihainim pasin isi na wok gut wantaim, dispela i strongim kongrigesen long ol samting bilong spirit. Em bikpela samting long olgeta manmeri long lain bilong Jehova i mas bihainim pasin isi na ol narapela gutpela pasin bilong Em, long wanem, “i gat wankain lo” bilong olgeta.—Kisim Bek 12:49; Wok Pris 24:22.
22 Pasin isi i helpim lain bilong God long i stap amamas na i stap wanbel wantaim. Olsem na dispela pasin wantaim ol narapela gutpela pasin i mas i stap olsem hap bilong dispela “klos” olgeta Kristen i mas pasim long olgeta taim, olsem long taim ol i stap long haus, o long kongrigesen, o long narapela hap. Tru tumas, olgeta wokboi bilong Jehova i mas bihainim dispela gutpela pasin, em pasin isi.
Bai Yu Bekim Wanem Tok?
◻ Bilong wanem ol elda Kristen i mas bihainim pasin isi?
◻ Man i gat gutpela tingting na em i laik stretim narapela man, pasin isi i stiaim em long mekim wanem?
◻ Sapos yu askim planti man long givim tingting long yu, dispela inap helpim yu olsem wanem?
◻ Taim yumi autim tok, bilong wanem i gutpela yumi bihainim pasin isi?
[Piksa long pes 17]
Lain bilong Jehova i kain olsem sipsip, na ol wasman i mas mekim pasin isi long ol
[Kredit Lain]
Garo Nalbandian
[Piksa long pes 19]
Pasin isi i helpim lain bilong Jehova long autim tok long ol man i gat kain kain pasin