Pas Gut Long Oganaisesen Bilong God

EM STORI BILONG ROY A. RYAN

I gat wanpela liklik ples long Misuri, long Amerika, nem bilong en Sanhil. Dispela liklik ples i stap long rot bung long wanpela liklik maunten i gat graun wesan. Em liklik ples tru​—⁠i gat 8-pela o 9-pela haus bilong ol man, na wanpela haus lotu Metodis, na wanpela woksop bilong wokim ol samting long ain, olsem su bilong hos samting. Mama i karim mi long dispela liklik ples long Oktoba 25, 1900.

PAPA em i man bilong wokim ol samting long ain. Papamama i save go long lotu wan wan taim tasol, tasol mama i kirap salim mi i go long Sande-Skul long haus lotu Metodis. Mi no laikim dispela nem Metodis. Mi ting ol man i mas holim nem Kristen tasol. Tasol mi laik tru long kisim save long ol tok i tru bilong Baibel na long kisim laip i stap oltaim.

Taim mi gat 16 krismas, mi go wok long rot bilong ol tren long taun Santa Fe. Wanpela man bilong ol Intenesenel Baibel Stiuden (em nem bilong ol Witnes Bilong Jehova long dispela taim bipo), nem bilong em Jim, em i kam wok wantaim mipela, na planti taim mitupela i save wok wantaim. Jim i save stori long Baibel na mi save harim. Tok bilong em i gutpela long yau bilong mi, olsem na mi tokim em mi laik dinau wanpela buk bilong em na bai mi inap kaunim.

Jim i givim wanpela buk tok Inglis long mi, nem bilong en Studies in the Scriptures, volyum 1, em C. T. Russell bilong ol Intenesenel Baibel Stiuden i wokim. Taim mi bekim dispela buk long Jim, mi tokim em long kisim sampela volyum moa na i kam givim long mi. I no longtaim na Jim i lusim dispela wok, na bihain mi bungim em gen long rot long taun Ratles. Em i sanap long rot na ol man i wok long givim nem bilong ol long em bilong kisim wanpela buk i gat ol piksa long en i stori long God i bin wokim ol samting (Scenario of the Photo-Drama of Creation). Bihain em i singautim mi i go bung wantaim sampela manmeri ol i save miting long haus bilong em. Long olgeta Sande mi save wokabaut long lek inap 5 kilomita bilong i go long miting long Ratles.

Long 1919 ol i kirap wokim wanpela nupela nius (tok Inglis) nem bilong en The Golden Age (nau yumi kolim Kirap!) na mi laik kirap long autim tok. Mi wantaim narapela nupela man long lain bilong ol Baibel Stiuden mitupela i pasim tok long i go long haus bilong ol man na tilim dispela nupela nius. Tasol mitupela i pret long i go long haus bilong ol man long hap bilong mipela, olsem na mitupela i kalap long tren na i go long narapela taun klostu. Mitupela i go kamap long moningtaim na mipela i bruk i go long ol haus long narapela narapela rot na tilim dispela nius long ol man i go inap long apinun, maski mipela i no bin lain long mekim dispela wok. Tupela man i tokim mi ol i laik kisim sabskripsen, wanpela em i wanpela man mi wok wantaim em long wokim rot bilong tren.

Long Oktoba 10, 1920 mi kisim baptais long wanpela liklik raunwara long Ratles. Papamama i birua long mi​—⁠tupela i no laik bai mi insait long lain bilong ol Intenesenel Baibel Stiuden. As bilong dispela em pasin birua ol pris pasto i bin mekim long ol Baibel Stiuden long taim bilong bikpela pait long 1914-1918. Tasol bihain papa i kirap long i go long sampela miting bilong ol Baibel Stiuden, na em i save kaunim nius The Golden Age. Klostu long taim mama i dai, mama i no birua moa long save mipela ol Baibel Stiuden i kisim long ol tok bilong Baibel. Tasol no gat wanpela long famili bilong mi i pilim tru tok i tru na i kamap wanpela Baibel Stiuden. Nogat.

Taim Bilong Traim

Long dispela taim bipo, mi wantaim 3-pela moa, em mipela tasol i save go oltaim long ol miting long Ratles. Bihain 3-pela hia i lusim lain bilong Jehova. Wanpela em i hap man bilong mekim ol pablik-tok na em i save mekim ol pablik-tok long dispela hap. Tasol bihain em i hambak long dispela save bilong em na em i no laik i go long haus bilong ol man na autim tok, olsem ol Kristen bilong pastaim i bin mekim.​—⁠Aposel 5⁠:42; 20⁠:⁠20.

Taim 3-pela hia i lusim lain bilong ol Intenesenel Baibel Stiuden, mi kisim tingting wankain olsem bilong aposel Pita taim Jisas i tokim ol man ol i mas ‘kaikai bodi bilong Jisas na dring blut bilong em’ na planti ol i pundaun na i no laik bihainim em moa. Long dispela taim Jisas i askim ol aposel: ‘Ating yu tu i laik lusim mi na i go?’ Na Pita i bekim tok olsem: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.”​—⁠Jon 6⁠:​67, 68.

Pita i no klia olgeta long as bilong dispela tok bilong Jisas, em i tok ol i mas ‘kaikai bodi bilong em na dring blut bilong em,’ tasol Pita i save, tok bilong Jisas tasol inap givim laip i stap oltaim. Na mi tu mi gat wankain tingting long lain o oganaisesen bilong Jehova. Mi save, tok i tru i stap long dispela lain, maski sampela taim mi no kisim gut as bilong sampela tok bilong ol buk na nius ol i wokim. Taim mi no save gut long as bilong wanpela tok, mi no save sakim na tok pait long en. Mi save wet tasol, na bihain ol i kamapim klia dispela tok o ol i stretim tingting, na mi save amamas mi bin wet tasol i stap.​—⁠Sindaun 4⁠:⁠18.

Stretim Rot Bilong Mekim Wok Painia

Long Julai 1924, mi go long wanpela kibung intenesenel long Kolambas, Ohaio. Nius The Golden Age i stori long dispela kibung na i tok, em i “nambawan gutpela kibung bilong ol Baibel Stiuden.” Ol i orait long wanpela strongpela tokaut (“Indictment”) long dispela kibung. Ol tok mi harim long dispela kibung na gutpela pasin i stap long dispela kibung i strongim mi na mi laik kirap mekim wok painia.

Kibung i pinis na mi go bek long ples na mi lusim wok bilong mi long wokim rot bilong tren. Mi na narapela Baibel Stiuden mitupela i kirap long wok wantaim long mekim wok painia. Tasol wanpela yia bihain sik i painim papamama na skin bilong tupela i no strong moa na mi mas i go helpim tupela. Mi lusim wok painia na mi kisim gen wanpela wok mani. Mi wok long wanpela kampani i save putim ol paip ain. Tasol ol wanwok bilong mi i no gutpela man na ol i laik paulim mi, olsem na mi lusim dispela wok na mi kirapim liklik wok bisnis bilong mi yet​—⁠mi lukautim ol binen na maketim hani.

Paslain long mun Oktoba samting long yia 1933, papa na mama i dai. Nau mi no gat wok moa long lukautim tupela. Olsem na long kirap bilong yia 1934 mi givim ol binen long wanpela man bilong lukautim, na mi wokim liklik haus i gat wil na bai mi ken slip long en, na mi kirap gen mekim wok painia. Pastaim mi wok wantaim wanpela lapun Witnes long hap bilong taun Kwinsi, long Ilinoi. Bihain mi go bek long Misuri, na mi wok wantaim wanpela lain painia.

Long 1935, long dispela hap bilong Amerika (Midwest) i no gat ren. Bikpela san tasol i stap na i bagarapim wok gaden bilong ol man long dispela hap na mipela i hatwok long autim tok long ol. Ol i no gat mani, olsem na ol man i laik harim tok ol i save givim sampela kaikai long mipela o narapela samting olsem senis bilong ol buk na nius mipela i lusim long ol.

Mi Mekim Wok Painia Long Hap Bilong Saut

Long taim bilong kol, mipela i go long Akenso, long ples i hat liklik. Long dispela hap mipela inap tilim planti moa buk na nius na ol man i givim planti kaikai long tin long mipela, inap tru long mipela. Ol i save givim ol narapela samting tu em mipela inap baim i go long ol man na kisim liklik wansiling, olsem sospen samting, na olpela bras, na olpela redieta bilong ka na olpela bateri. Mipela baim ol dispela samting i go long ol man na mani mipela kisim i helpim mipela long baim bensin bilong ka bilong mi (Model A Ford), em mipela i mekim wok long en bilong autim tok.

Mipela mekim wok painia long distrik Niuton, na Sersi, na Karol long ples maunten (Ozark Plateau). Planti samting i painim mipela taim mipela i autim tok long ol man bilong ples maunten long hap bilong Akenso, na sapos mipela raitim stori bilong olgeta dispela samting, ating em bai inap wanpela buk olgeta. I no gat ol gutpela rot long dispela taim bipo, o i no gat rot, olsem na mipela save wokabaut long lek na autim tok. Sampela painia long lain bilong mipela ol i save sindaun long hos na i go lukim ol man i stap antap tru long ol maunten.

Mipela harim tok long wanpela man, nem bilong em Sam, em i laik save long Jehova. Mipela i wok long painim em na mipela i bungim em long haus bilong em antap tru long wanpela maunten. Em i amamas tru long lukim mipela na em i laik bai mipela i slip long haus bilong em long nait. Meri bilong Sam i no laik harim tok i tru, tasol pikinini man bilong Sam i gat 16 krismas, em Reks, em i laik tru long harim. Taim mipela i laik lusim ol na i go, Sam i tok mipela i mas i go bek lukim ol gen. Olsem na tupela wik bihain mipela i go bek lukim ol.

Taim mipela laik lusim ol na i go long dispela namba 2 taim, meri bilong Sam i tokim mipela long kam bek lukim ol gen. Em i tok, mipela i helpim Reks long bihainim gutpela pasin. Em i tok, “Reks em i man bilong tok swea, tasol nau yutupela i kam lukim mipela, na em i no save tok swea tumas olsem em i bin mekim bipo.” Sampela yia bihain mi bungim Reks gen​—⁠taim em i go long Skul Gileat long Saut Lansing, long Nu Yok. Ol dispela kain gutpela samting i bin kamap long wok bilong mi i mekim na mi stap belgut na amamas.

Mi Wok Long Betel

Taim mi raitim pepa bilong kamap wanpela painia, mi raitim pepa tu bilong i go mekim wok long Betel, em nambawan ofis o hetkota bilong ol Witnes Bilong Jehova long Nu Yok. Long kirap bilong yia 1935 mi kisim pas i tok, ol i orait long mi wok long Betel na mi mas i go kirap mekim wok long gaden bilong Sosaiti Wastaua, ol i kolim Kingdom Fam, long Saut Lansing, Nu Yok. Wantu mi kirap stretim tok wantaim narapela painia na em i kisim haus bilong mi i gat wil.

Mi draiv long ka bilong mi i go kamap long Nu Yok long 10⁠:30 long moningtaim long Me 3, 1935. Belo pinis na long 1 klok samting mi kirap mekim wok. Ol i givim wok long mi long brukim paiawut. Long de bihain ol i tokim mi long i go long haus bilong ol bulmakau na wok long kisim susu long ol bulmakau. Mi wok long dispela hap inap sampela yia​—⁠sampela taim mi kisim susu long ol bulmakau long moningtaim na long apinun, na long san mi wok wantaim ol lain long gaden na long kisim kaikai long gaden. Mi lukautim ol binen tu na mi kisim hani bilong lain i wok long Betel. Long 1953 ol i salim mi i go wok long hap bilong wokim sis.

Mi pilim tru gutpela pasin bilong wanpela brata, nem bilong em Walter John Thorn, em mipela i save kolim em “papa.” Em i man bilong pasin daun, na em i stap gut long Jehova na bihainim gut tok bilong Em. Em i wanpela bilong ol 21 brata ol i makim long 1894 bilong mekim wanpela nupela wok i kain olsem wok sekit bilong nau, em ol i save raun lukim ol kongrigesen bilong strongim ol. Inap planti yia Brata Thorn i mekim dispela wok na bihain em i kam wok long Kingdom Fam. Em i lukautim ol kakaruk. Planti taim mi harim em i tok: “Taim mi kirap long tingting tumas olsem mi yet mi bikman, nau mi save lusim ol narapela man i go long kona bilong wanpela rum na mi tokim skin bilong mi yet olsem: ‘Yu olsem wanpela liklik hap das nating. Yu gat wanem samting yu ken hambak long en?’ ”

Narapela man bilong pasin daun i stap olsem gutpela piksa na mi laik bihainim pasin bilong em, em John Booth, nau em i wanpela long Lain Bilong Bosim Ol Witnes. Ol brata i save kolim wanpela tok bilong em, olsem: “Yu mekim wok we, em i no bikpela samting; yu mekim wok bilong husat, em bikpela samting.” Dispela tok i stret tru! Wok bilong Jehova em nambawan gutpela wok yumi inap mekim!

Wanpela gutpela samting tru i bin kamap long taim mi wok long Betel, em olsem: Ol i opim Skul Gileat, em skul bilong ol misineri, long Kingdom Fam, long 1943. Mipela i amamas tru long bung wantaim ol painia bilong ol narapela narapela hap, em ol i kam long dispela skul. Long dispela taim bipo, olgeta klas bilong Skul Gileat ol inap olsem 100 sumatin, olsem na long olgeta 6-pela 6-pela mun i gat nupela klas na 100 nupela painia i kam skul long Kingdom Fam. Taim ol i wokim bung bilong winim skul, planti tausen brata sista i save kam long dispela bung long dispela hap bilong ol gaden o fam long distrik Nu Yok.

Mi Kisim Nupela Wok

Taim ol i rausim Skul Gileat long Kingdom Fam na putim long Bruklin, bikpela haus slip na haus skul long Saut Lansing ol i baim i go long ol man, na ol i putim ol bulmakau i go long ol Wastaua Fam long Walkil, Nu Yok. Olsem na long 1969, ol i salim mi tu i go long Walkil na mi wok i go long wokim ol sis inap 1983 na nau mi kisim nupela wok. Mi save wok wantaim ol brata i save stretim ples na wokim ol gaden bilas.

Sampela yia bipo ol brata i givim askim long mi na ol i tok, ‘Yu ting olsem wanem long dispela nupela wok yu kisim long taim yu bin mekim olpela wok inap 30 yia pinis?’ Mi tok: “No gat samting, long wanem, mi no save laikim tumas wok bilong wokim sis.” Bikpela samting em olsem: Maski wanem wok bilong Jehova yumi mekim, sapos yumi gat stretpela tingting na yumi larim em yet i soim rot long yumi, yumi inap amamas long mekim dispela wok. Olsem na tru, mi no laikim tumas wok bilong wokim sis, tasol mi amamas long mekim dispela wok bilong mi, long wanem em i helpim lain bilong Betel. Sapos yumi stap gut long wok bilong gutpela God bilong yumi, em Jehova, na maski wanem wok ol i givim long yumi, yumi no bel nogut na toktok planti, orait bai yumi inap amamas long mekim wok bilong yumi.

Nau mi go lapun na mi pilim olsem mi stap gutpela hia long Betel. Ol i save lukautim mi gut na maski mi winim 90 krismas pinis, mi inap mekim yet ol wok ol i givim long mi. Inap planti yia pinis mi kisim wanpela gutpela wok hia long ol Wastaua Fam, em olsem: Sampela taim mi stap siaman bilong lotu bilong moningtaim. Taim rot i op, mi save givim liklik tok long ol brata sista i kam wok nupela long Betel. Mi laik strongim ol long kisim olgeta wok ol brata i laik givim long ol na lain long i stap belgut na amamas long mekim dispela wok.

Mi wok planti yia long Betel na sampela taim mi bin raun i go long narapela hap​—⁠mi go long India na Nepal na long ol kantri long Isten Esia na long Yurop. Mi laik givim liklik tok long ol brata sista long lain bilong Jehova ol i stap long narapela narapela kongrigesen, dispela tok em olsem: Stap belgut na amamas long ples yu stap long en, na wok long kamap strong long spirit olsem wanpela diwai ol i bin planim long dispela ples.

Laik bilong mi yet na mi stap singel, long wanem, dispela i bin helpim mi long mekim wok bilong God na i no gat planti samting bilong pulim nabaut tingting bilong mi. Sapos yumi stap gut long wok bilong God, God i tok promis long givim laip i stap oltaim long yumi. Planti ol i wet long kisim laip i stap oltaim long paradais long graun. Mipela sampela i wet long kisim laip i stap oltaim long heven, na bai mipela lukautim gut wanem wanem wok God i laik givim long mipela.

Sampela i tingim i stap bilong mi na ol i tok, ‘Em i bin i stap longtaim na em i kisim planti blesing.’ Tru, mi kisim planti blesing, tasol mi laik i stap longtaim moa. Sapos yumi pas gut long oganaisesen bilong Jehova na long ol tok i tru bilong em, bai yumi inap i stap longtaim moa​—⁠inap oltaim oltaim.a

[Ol Futnot]

[Piksa bilong Roy A. Ryan long pes 24]

[Piksa long pes 26]

Em Brata Ryan taim em i yangpela liklik