Askim

◼ Papamama Kristen inap mekim wanem sapos pikinini i mas i go long wanpela skul i tok ol pikinini i mas lain long samting bilong lotu?

Papamama Kristen i no laik bai pikinini bilong ol i lain long ol samting bilong lotu giaman. Tasol long sampela taim, ating pikinini i mas insait long wanpela klas bilong lain long ol narapela narapela lotu, tasol long kain taim olsem, pikinini i no ken insait long ol pasin bilong mekim lotu giaman.

Pren bilong God, em Abraham, em i makim gutpela pasin bilong lainim pikinini long samting bilong lotu. Pikinini bilong em i go bikpela long ples Kenan, na ol manmeri bilong dispela hap ol i bihainim lotu giaman na ol i mekim ol kain kain pasin nogut bilong lotu. (Lukim Kisim Bek 34⁠:​11-15; Wok Pris 18⁠:​21-30; Lo 7⁠:​1-5, 25, 26; 18⁠:​9-14.) Tasol Abraham i lainim gut famili bilong em long lotuim God tru. God i save Abraham bai “tokim ol pikinini na ol lain tumbuna bilong en long ol i mas bihainim tok bilong [em], Bikpela, na ol i mas bihainim gutpela na stretpela pasin tasol.”​—⁠Stat 18⁠:⁠19.

Taim Jisas i stap yangpela yet, long rot bilong famili na kongrigesen em i bin kisim save long lotu i tru. Olsem na em “i kamap bikpela, na save bilong en i kamap gutpela tru. Na God i laikim em tru na ol man tu i laikim em.”​—⁠Luk 2⁠:⁠52.

Long planti hap bilong graun, ol yangpela Kristen i save go long skul bilong gavman. Sampela tok bilong ol dispela skul i no stret wantaim tok bilong Baibel na save ol man i bin kisim pinis. Olsem: Inap planti yia pinis ol yangpela Kristen i bin lain long ol samting bilong saiens long skul. Olsem na ol i bin kisim save long tingting bilong sampela man, em ol i ting yumi ol man i kamap long graun long rot bilong ol animal, olsem evolusen samting.

Tasol dispela samting ol yangpela Kristen i bin kisim save long en i no bin pulim ol long bilip olsem yumi kamap long rot bilong evolusen. Nogat. Bilong wanem i olsem? Long wanem, taim ol i stap long haus na long ol miting Kristen, ol i kisim stretpela save long tok bilong God long Baibel, na ol i bin lainim pinis tingting bilong ol na ol inap “skelim wanem ol pasin i gutpela na wanem ol pasin i nogut.” (Hibru 5⁠:14) Planti papamama i bin stadi wantaim pikinini bilong ol long ol gutpela tok bilong strongim bilip bilong ol em i stap long buk (tok Inglis) Life​—⁠How Did It Get Here? By Evolution or by Creation?a Olsem na taim ol tisa i stori long tok bilong evolusen, ol dispela yangpela Kristen i no bilipim dispela tok. Tasol taim ol i bekim tok long klas, na taim tisa i traim save bilong ol, tok ol i mekim i makim olsem ol i bin harim tok bilong tisa na ol i bin kisim save. Na sampela i bin kamapim sampela tok bilong Baibel bilong helpim tisa na ol narapela sumatin long save long tingting bilong Man i bin wokim yumi olgeta, olsem i stap long Baibel.​—⁠1 Pita 3⁠:⁠15.

Tasol olsem wanem sapos klas i stori long bikpela lotu long hap bilong ol, o ol narapela lotu?

Ating bai tisa i no stori nating long dispela lotu. Long wanem, ating tisa yet i bilong dispela lotu, na em i laik pulim tingting bilong ol yangpela long i go bihainim dispela lotu. Olsem na ol Witnes Bilong Jehova i no laik bai pikinini bilong ol i insait long kain klas olsem bilong lainim pikinini long lotu. Long dispela hap taim em klas i skul long lotu, pikinini inap mekim ol narapela wok bilong skul em i no pinisim yet, o em i ken i go long laibreri bilong skul na stadi.

Tasol long sampela hap, pikinini Witnes i no inap mekim olsem. Ating skul o gavman i putim lo na i tok pikinini i mas i go long klas bilong lotu na winim dispela klas bambai ol i ken orait long em i pinis skul. Sapos kain samting olsem i kamap, olgeta wan wan famili i mas tingim wanem wanem samting ol bai mekim.

Hevi i bin painim sampela wokboi bilong God long bipo, long wanem ol i mas i stap na harim harim ol kain kain tok bilong lotu o lukim ol pasin bilong lotu ol man i mekim, tasol ol i stap gut long God tru. Ating dispela hevi i bin painim Moses. Em i go bikpela olsem tumbuna pikinini bilong Fero bilong Isip, na em i “skul long olgeta gutpela save bilong ol Isip.” (Aposel 7⁠:​20-22) Ating em i bin lain tu long sampela ol bilip na pasin bilong lotu bilong ol Isip. Tasol famili bilong em na ating ol narapela Hibru tu ol i bin lainim em gut, na dispela i bin strongim em long bihainim lotu i tru.​—⁠Kisim Bek 2⁠:​6-15; Hibru 11⁠:​23-26.

Tingim pasin bilong tripela yangpela Hibru, em ol poroman bilong Daniel. Sampela man i bin lainim ol long ol bikpela save bilong Babilon, na ol i kamap wokboi bilong gavman. (Daniel 1⁠:​6, 7) Taim ol i stap long Babilon, ol i no inap bihainim laik bilong ol yet. Long wanpela taim, King Nebukatnesar i tokim ol ol i mas bung wantaim ol narapela bikpela man bilong gavman long ples stret ol i kolim Dura, long wanem em i bin sanapim wanpela traipela piksa gol long dispela hap na em i laik bai olgeta man i mas lotu long dispela traipela piksa. Dispela tripela Hibru i mekim wanem? Yumi save ol i no laik i stap long dispela hap, tasol ol i mas bihainim tok.b Tasol ol i stap gut long bilip bilong ol na long Nambawan Bikpela God. Bel bilong ol i no gat tok long ol i stap long dispela hap, tasol ol i save ol i no ken tru insait long ol samting ol man i mekim bilong lotu long dispela traipela piksa.​—⁠Daniel 3⁠:​1-18.

Taim lo i tok ol sumatin i mas i go long klas bilong lain long samting bilong lotu na bihain skul bai traim save bilong ol long dispela samting, pikinini bilong ol Kristen tru i ken i go long kain klas olsem, olsem tripela Hibru i bin bihainim tok bilong Nebukatnesar. Tasol yangpela Kristen i mas tingim lo bilong God i namba wan. Na sapos tisa i stori long wanpela tok o pasin bilong lotu, na yangpela Kristen i save dispela tok o pasin i no stret wantaim tok bilong Baibel, em i no ken stretim tingting bilong tisa long dispela samting, olsem dispela tripela yangpela Hibru i no bin pasim ol narapela man long brukim skru long traipela piksa gol. Tasol ol yangpela Kristen i no ken insait long sampela pasin bilong lotu o beten o singsing o kain samting olsem bilong lotu.

Long ol narapela taim, ol dispela yangpela i mas wok strong tru long kisim stretpela save ‘em inap givim gutpela tingting long ol na bai ol i bilip long Krais Jisas na bai ol i save long rot bilong God i kisim bek ol.’ (2 Timoti 3⁠:15) Papamama i mas toktok gut wantaim pikinini bilong ol, na bai ol i save long ol samting pikinini bilong ol i wok long kisim save long en long skul. Dispela bai helpim papamama long save long ol samting ol i mas stretim tingting bilong pikinini long en na lainim ol moa yet long en na bai pikinini bilong ol i save gut long tok bilong Baibel long dispela samting; olsem bai ol tok giaman bilong lotu long skul i no ken paulim tingting bilong ol.

[Ol Futnot]