Askim

Daniel i bin i stap long wanem hap taim traim i painim ol tripela Hibru long traipela imis Nebukatnesar i bin wokim long ples stret bilong Dura?

Baibel i no stori long dispela samting, olsem na i no gat wanpela man long nau em inap makim wanem hap Daniel i bin i stap long en long taim bilong dispela traim.

Sampela man i tok olsem Nebukatnesar i givim bikpela namba moa long Daniel winim namba bilong Satrak, Mesak, na Abetnego, olsem na i no olsem Daniel i mas go long ples stret bilong Dura. Daniel 2:​49 i kamapim olsem inap sampela yia, Daniel i bin holim bikpela namba i winim namba bilong tripela pren bilong em. Tasol yumi no inap kamapim klia olsem dispela em i as na em i no bung wantaim ol narapela long pes bilong dispela imis.

Sampela narapela man em ol i traim long kamapim as na Daniel i no bin i stap long dispela taim, ol i tok olsem ating em i bin i go long narapela hap bilong mekim sampela wok, o em i bin sik long dispela taim. Tasol Baibel i no stori olsem. Tasol maski wanem samting i bin painim Daniel long dispela taim, yumi ken save olsem em i no bin opim rot bilong ol birua long sutim tok long em. Tru tru sapos em i bin mekim samting i no stret ating ol bikman bilong Babilon em ol i bin jeles long em, ol bai kamapim dispela samting bilong kotim em. (Daniel 3:⁠8) Paslain long dispela traim i kamap na bihain long en tu, Daniel i kamapim ples klia tru olsem em i man bilong holimpas bilip na stap gut long God maski wanem wanem traim i painim em. (Daniel 1:8; 5:​17; 6:​4, 10, 11) Olsem na maski Baibel i no tokaut long as na Daniel i no bin i stap long ples stret bilong Dura, yumi ken bilip tru olsem em bin sanap strong na stap gut long Jehova.​​—⁠Esekiel 14:14; Hibru 11:33.