Traipela Tait Wara Bilong Bipo

INAP olsem 4,300 yia bipo wanpela traipela tait wara i bin kamap long graun na i bagarapim planti samting. Dispela tait i pinisim klostu olgeta samting i gat laip. Em traipela tait na ol man i no inap lusim tingting long en. Ol manmeri i bin stori long dispela tait long ol nupela lain i kamap, mekim mekim olsem inap long nau.

Inap olsem 850 yia bihain long taim dispela Tait i bin kamap na karamapim olgeta hap bilong graun, wanpela man bilong lain Hibru, em Moses, em i raitim stori bilong en, na dispela stori i stap long hap bilong Baibel ol i kolim long Stat sapta 6 i go 8.

Stori Bilong Baibel Long Dispela Traipela Tait

Stat i stori long ol samting i bin kamap, na ol dispela tok i olsem stori bilong wanpela man i bin lukim ol dispela samting i kamap. Stat i stori olsem: “Long yia Noa i gat 600 krismas, na long de namba 17 bilong namba 2 mun bilong dispela yia, graun i op na bikpela wara i stap aninit long graun i sut i kam antap. Na olgeta dua long skai i op na wara i kapsait i kam daun. Tait i wok long kamap yet inap long 40 de, na wara i kamap antap moa na i litimapim sip. Na sip i lusim graun. Na wara i kam antap moa moa yet na i karamapim olgeta bikpela maunten.”​—⁠Stat 7⁠:​11, 17, 19.

Baibel i stori long ol samting dispela Tait i mekim long ol samting i gat laip na i tok: “Na olgeta samting i gat laip long graun, ol i dai, em ol pisin na ol animal bilong ples na ol bikpela na liklik animal bilong bus na olgeta manmeri.” Tasol Noa wantaim 7-pela moa ol i no bagarap, na sampela animal na pisin samting tu ol i no bagarap. (Stat 7⁠:​21, 23) Olgeta dispela man na animal i no bagarap em ol i stap insait long wanpela sip em longpela inap 130-133 mita, na braitpela inap 22 mita, na i go antap inap 13 mita. Wok bilong dispela sip em bilong trip antap long wara na wara i no ken i go insait, olsem na i no gat kil, na poret i no sap, na i no gat sel o pul samting na bai sip i wokabaut, na i no gat stia bilong en. Dispela sip bilong Noa i olsem wanpela traipela bokis i trip tasol antap long wara.

Tait i kamap na 5-pela mun bihain, sip i sindaun long wanpela maunten long ples maunten bilong Ararat, long hap bilong is long kantri nau yumi kolim Turki. Wanpela yia bihain long taim Tait i kirap, Noa wantaim lain bilong em i lusim sip na sanap gen long graun i drai, na ol i kirap long mekim gen ol wok bilong ol bilong olgeta de. (Stat 8⁠:​14-19) Bihain ol man i kamap planti liklik na ol i kirap long wokim taun Babel na taua bilong en i gat nem nogut. Ol i wokim klostu long Wara Yufretis. Bihain God i paulim tok ples bilong ol na isi isi ol i go nabaut na i go sindaun long olgeta hap bilong graun. (Stat 11⁠:​1-9) Tasol olsem wanem long dispela sip?

Ol i Wok Long Painim Sip Bilong Noa

Bihain long yia 1800 planti man i bin go long ples maunten bilong Ararat na ol i wok long painim dispela sip bilong Noa. Tupela maunten long dispela hap i antap tru​—⁠narapela i antap inap 5,165 mita na narapela i antap inap 3,914 mita. Long olgeta taim ais i save karamapim het bilong dispela maunten i antap moa. Bihain long Tait, senis i kamap na i gat taim bilong kol, olsem na kwiktaim ais i bin karamapim sip. Sampela man i bin wok long painim dispela sip ol i bilip tru olsem em i stap yet long dispela hap, insait tru long bikpela ais. Ol i tok, wan wan taim ais i bin tanim i kamap wara na sampela hap bilong sip i kamap ples klia.

Wanpela buk (In Search of Noah’s Ark) i kamapim tok bilong wanpela man bilong Aminia (em George Hagopian), em i tok em i bin go antap long Maunten Ararat na long 1902 na 1904 em i bin lukim dispela sip. Em i tok, long namba wan taim em i lukim em i bin go sanap antap long en. Em i tok: “Mi sanap stret i stap na lukluk i go long olgeta hap bilong sip. Em longpela. Em i go antap inap olsem 12 mita.” Em i stori long ol samting em i lukim long namba 2 taim na em i tok: “Mi no lukim wanpela hap i raunpela. Dispela sip i no olsem ol narapela sip mi bin lukim. Em i kain olsem wanpela sip em as bilong en i stret na i no gat kil.”

Namel long 1952 na 1969, wanpela man, nem bilong em Fernand Navarra, em i bin i go 4-pela taim bilong painim dispela sip. Long namba 3 taim em i go long Maunten Ararat, em i go insait long wanpela hap bilong ais i bruk na daunbilo tru em i lukim wanpela hap plang i blakpela na i pas insait long ais. Em i tok: “Dispela plang i mas longpela na ating em i pas yet long ol narapela bun bilong sip. Mi inap katim liklik hap tasol na mi brukim na kisim i kam, em longpela inap 1 mita hap.”

Sampela saveman i skelim dispela hap plang em i kisim na wanpela, em Profesa Richard Bliss, i tok: “Dispela hap plang Navarra i kisim em bilong wanpela traipela bun bilong sip na kolta i pulap long en. I gat ol hul samting long en bilong joinim long ol narapela plang. Na i gat ol mak long en i kamapim klia olsem ol i bin katim long akis na wokim kona kona.” Ol i ting dispela hap plang i olpela tru, olsem bilong 4 tausen o 5 tausen yia bipo.

Ol i bin wok strong long painim dispela sip long Maunten Ararat, tasol stori bilong Baibel i kamapim klia olsem ol man i bin wokim dispela sip bambai ol inap abrusim bagarap long wanpela traipela tait wara bilong bipo i bagarapim planti samting. Yumi inap save dispela stori i tru, long wanem, kain stori olsem i stap long stori bilong ol tumbuna bilong planti lain bilong bus long olgeta hap bilong graun. Orait, long stori i kamap bihain long dispela yu ken lukim ol samting ol dispela stori bilong ol tumbuna i tokaut long en.

[Piksa long pes 4, 5]