Lukaut Long Ol Profet Giaman!
TUPELA marit bilong Brasil i go slip, na i no longtaim na ol i harim pairap bilong sampela stilman i laik brukim haus. Tupela i pret nogut tru na kalap i go ausait long windo bilong haus na i go toksave long polis. Tasol bihain meri i pret tru, na em i no inap slip moa long dispela haus, na em i go i stap wantaim mama bilong em.
Sapos raskol i bin brukim haus bilong yu na kam insait na stilim samting bilong yu, o sapos ol raskol i mekim narapela samting na stilim samting bilong yu, bai yu pilim bikpela hevi i bin painim dispela meri. Dispela kain samting inap mekim pretim yu, na sori tru, nau long dispela taim kain hevi olsem i wok long painim planti manmeri tru. Tasol i gat wanpela kain pasin stil em inap nogutim moa yet ol man.
Em wanem kain pasin stil? Husat i mekim dispela kain pasin? Krais Jisas i helpim yumi long save long dispela samting taim em i stori long ol samting bai kamap long taim bilong yumi, em i tok: “Planti giaman profet bai i kirap na giamanim planti manmeri.” (Matyu 24:11) Ol profet giaman i mekim pasin olsem stilman. Ol i mekim olsem wanem? Ol i stilim wanem samting? Ol i mekim pasin stil long ol kain tok profet ol i mekim. Olsem na bilong save gut long dispela samting, pastaim yumi mas save, wok bilong tok profet olsem Baibel i makim, em wanem kain wok?
Wok Bilong Mekim Tok Profet Em Wanem Kain Wok?
Taim yu tingim man i mekim tok profet, ating yu tingim dispela man i save stori long ol samting bai kamap long bihain. Ol profet bilong God long bipo ol i bin mekim olsem, tasol dispela em i no namba wan wok bilong ol. Olsem: Profet Esekiel i driman, na God i tokim em long em i mas autim tok profet “long win.” Insait bilong dispela tok em olsem: Em i mas givim tok bilong God long ol man. (Esekiel 37:9, 10) Taim Jisas i kot long ai bilong ol pris, ol i mekim nogut long em na spet long em na paitim em, na ol i tokim em: “Yu man God i makim, yu mekim tok profet nau. Dispela man i paitim yu, em husat?” Ol i no laik bai Jisas i tokim ol long samting bai kamap bihain. Tasol ol i laik bai em i mekim wok long strong bilong God na kolim nem bilong ol man i bin paitim em.—Matyu 26:67, 68.
Long tok ples ol i bin raitim Baibel long en long pastaim, insait bilong dispela tok “mekim tok profet,” em olsem: kamapim tingting bilong God long wanpela samting, o olsem Baibel i tok, “autim tok bilong ol strongpela wok bilong God.” (Aposel 2:11) Ol profet giaman i no helpim ol manmeri long kisim tingting bilong God, na i olsem ol i stil.
Husat em ol profet giaman? Na ol i stilim wanem samting? Bilong save long bekim bilong dispela askim, yumi ken tingim ol samting i bin kamap long lain Israel long taim bilong Jeremaia.