Tok Profet Em i Wanem Samting?

Bekim bilong Baibel

Tok profet em tok bilong God na em i kamapim tu ol samting i stap hait. Baibel i tok : “Holi spirit i kirapim ol [profet] long autim ol tok God yet i bin givim long ol.” (2 Pita 1:​20, 21) So wanpela profet em man o meri husat i kisim tok bilong God na autim long ol narapela.​—Aposel 3:​18.

Hau na ol profet i kisim ol tok i kam long God?

God i yusim kain kain rot long kamapim tingting bilong em long ol profet bilong em:

• Raitim. Wanpela taim God i yusim dispela rot taim em i givim Tenpela Lo long Moses we em i raitim ol tok bilong en.​—Kisim Bek 31:18.

• Kamapim tok long rot bilong ol ensel. Olsem, God i yusim wanpela ensel long givim tok long Moses we em bai autim long Fero long Isip. (Kisim Bek 3:2-4, 10) Taim em i bikpela samting long kamapim stret tok, God i stiaim ol ensel long kolim ol tok bilong em, em i mekim olsem taim em i tokim Moses: “Raitim ol dispela tok, long wanem, long rot bilong ol dispela tok mi wokim kontrak wantaim yu na ol Israel.”​—Kisim Bek 34:27.a

• Ol visen. Sampela taim dispela i save kamap long taim profet i no slip na tingting i wok yet i stap. (Aisaia 1:1; Habakuk 1:1) Sampela visen i olsem samting i kamap tru na man i kisim visen i insait long en. (Luk 9:​28-​36; Revelesen 1:​10-​17) Na long ol narapela taim, man i kisim visen long taim em i slip indai na nogat tingting. (Aposel 10:10, 11; 22:17-​21) Na tu, God i givim tok bilong em long ol profet long taim ol i slip long rot bilong driman.​—Daniel 7:1; Aposel 16:​9, 10.

• Stiaim tingting. God i stiaim tingting bilong ol profet long kamapim tok bilong em. Baibel i kamapim klia dispela taim em i tok: “God em i as bilong olgeta tok i stap long Rait Holi.” Ol inap tanim tu dispela hap tok “God em i as bilong olgeta tok” olsem “win bilong maus bilong God.” (2 Timoti 3:​16; King Jems Pisin Baibel) God i yusim holi spirit, o strong bilong Em, long winim “win” em ol tingting bilong em i go long ol wokman bilong em. Ol dispela tok i bilong God, tasol pasin na wei bilong raitim tok i bilong ol profet.​—2 Samuel 23:​1, 2.

Olgeta taim ol tok profet i save tokaut long ol samting bai kamap long bihain?

Nogat, ol tok profet bilong Baibel i no tokaut tasol long ol samting bai kamap bihain. Taim tok i kam long God i stori long ol samting bai kamap bihain, em i no save kolim stret. Olsem, ol profet bilong God i givim tok lukaut planti taim long lain Israel long pasin nogut bilong ol. Ol dispela tok lukaut i stori long ol blesing ol bai kisim long bihain sapos ol i bihainim dispela tok lukaut, na tu bagarap ol inap kisim sapos ol i sakim. (Jeremaia 25:​4-6) Samting lain Israel i mekim bai bringim blesing o kamapim bagarap long bihain.​—Lo 30:19, 20.

Eksampel bilong ol tok profet bilong Baibel we i no tokaut long ol samting bai kamap bihain

• Wanpela taim lain Israel i askim God long helpim ol, na em i salim wanpela profet long eksplenim olsem, God i no helpim ol bikos ol i no bihainim ol lo bilong em.​—Hetman 6:​6-​10.

• Taim Jisas i toktok wantaim wanpela meri Samaria, em i kamapim ol samting long laip bilong dispela meri Samaria long bipo, em inap mekim olsem wantaim helpim bilong holi spirit. Dispela meri i luksave olsem em i wanpela profet maski em i no tokaut long ol samting bai kamap bihain.​—Jon 4:​17-​19.

• Long kot bilong Jisas, ol birua bilong em i karamapim pes bilong em, paitim em, na tok: “Sapos yu wanpela profet, orait tokim mipela! Husat i paitim yu?” Ol i no mekim dispela tok long Jisas bai tokaut long samting bai kamap bihain, tasol ol i laik olsem long strong bilong holi spirit em i ken kolim nem bilong man i paitim em.​—Luk 22:63, 64.