Ripot Long Wok Bilong Kingdom
Jehova i Givim Gutpela Pe Long Manki i Stap Gut Long Em
OL YANGPELA i stap gut long Jehova ol i gutpela samting tru long ai bilong em. Dispela stori bilong wanpela manki i bin stap gut long Jehova i mas strongim ol narapela yangpela long i stap gut long Jehova taim ol i mekim wok bilong em.
Long Ajentina wanpela manki i gat 11-pela krismas na tumbuna mama bilong em i stadi wantaim em na liklik brata bilong em long buk Tok i Tru i Bringim Man Long Laip Oltaim. Kwiktaim papamama bilong tupela i kirap long birua long tupela, na ol i tambuim tupela long i go long ol miting long Haus Kingdom. Bilong go long ol miting, sampela taim tupela i kalap long windo long ples waswas na i go daun long simen ausait long haus, na kalapim banis long haus i stap klostu na go long Haus Kingdom. Tasol wanpela man i tokim mama bilong tupela olsem tupela i wok long i go long ol miting bilong ol Witnes Bilong Jehova. Mama i pretim tupela na tok long paitim tupela, olsem na liklik brata i pret long dispela na em i lusim stadi. Tasol bikpela brata i strong yet long stadi. Inap 5-pela yia em i hait na i go long ol miting, na papamama i no save long dispela.
Taim em i gat 16 krismas, em i laik mekim wanpela kos long hai-skul, tasol bilong mekim dispela kos, em i mas i go long wanpela skul i stap longwe long papamama, na bai i no gat wanpela samting inap pasim em long kamap strong long tok i tru. Papamama bilong em i orait long em i go, na inap 3-pela mun olgeta samting i wok long go gutpela. Bihain het-tisa long skul i tokim papamama olsem manki i no salut long plak na em i no mekim singsing bilong litimapim ples (nesenel entem). Het-tisa i singautim papamama na wanpela kuskus na wanpela loya na 10-pela profesa i kam bung na manki i sanap long ai bilong ol na tokaut gut long ol long i gat wanem as na em i no salut o mekim dispela singsing. (Kisim Bek 20:4, 5) Papamama i belhat tru. Mama bilong em i kisim wanpela gan na em i laik sutim tumbuna mama, long wanem, em i ting tumbuna i gat asua long dispela samting, tasol olgeta taim i gat ol narapela i stap wantaim tumbuna na mama i no gat rot long sutim em.
Bihain wanpela pren bilong famili i givim tingting long papamama long putim pikinini long wanpela haus sik bilong ol longlong man, na het-tisa i orait long dispela. Ol i ting ol dokta bai stretim tingting bilong em na bai em i lusim bilip bilong em. Sampela man i wok long dispela haus sik i kisim manki long ka i go long haus sik i stap longwe inap 100 kilomita, na ol i givim sut long em long planti marasin insulin na ol narapela marasin i go inap long em i hap i dai. Taim em i kirap em i olsem longlong; em i no save long wanpela man na i olsem hap tingting bilong em i lus. Ol dokta i mekim planti samting bilong painim sik long tingting bilong em, tasol nogat. Tasol ol i wok long givim ol marasin long em. Taim strong bilong marasin i pinis na em i kisim bek tingting, olgeta taim em i beten strong long Jehova i no ken lusim em na em i mas givim strong long em bilong helpim em long sanap strong. Jehova i lukautim em na bihain em i lusim haus sik.
Wanpela taim het-tisa bilong skul i askim manki olsem em i redi long lusim bilip bilong em o nogat. Taim em i tok nogat, dispela het-tisa i tokim papamama long kisim pikinini i go bek long haus sik, long wanem longlong bilong em i go bikpela, winim bilong bipo. Papamama i kisim em i go long wanpela haus pasindia na ol i tokim meri i lukautim dispela haus pasindia long was long em bambai em i no ken go long ol miting bilong ol Witnes Bilong Jehova. Taim papamama i lusim em na i go, manki i kirap nogut tru! Man na meri i papa bilong dispela haus pasindia ol i Witnes Bilong Jehova! Long dispela taim papamama i no kisim manki i go long dokta bilong stretim tingting, long wanem, ol i save ol dokta i giamanim ol. Taim ol i wok long mekim ol dispela samting, Sprim Kot long Ajentina i tok, taim ol pikinini bilong ol Witnes Bilong Jehova i no salut long plak, ol tisa i no ken rausim ol long skul.
Olsem wanem? Ol dispela traim i bin helpim dispela manki em i stap gut long Jehova? Yes, ol i bin helpim em. Em i tok: “Mi inap long autim gut tok long ol dokta, na ol profesa, na ol wanskul, na papamama, na ol wantok, na long olgeta man i stap long dispela biktaun. Papamama bilong mi i no bel nogut moa; bel bilong ol i stap isi na ol i no tingting nogut long ol Witnes olsem long bipo. Nau mi tingim taim mi liklik yet na mi pilim tru gutpela pasin na pasin isi bilong Jehova long lukautim man i stap gut long em. I olsem man bilong raitim tok long Buk Song 27:10 i tok, olsem: ‘Maski papa na mama i givim baksait long mi, Bikpela bai i lukautim mi.’ ”
Nau dispela manki i bikpela pinis na em i gat 23 krismas. Em i marit na em i stap strong long wok bilong Jehova. Tru tumas, Jehova i gat olgeta strong bilong helpim yumi long olgeta hevi bilong yumi.—Buk Song 55:22.