Ripot Long Wok Bilong Kingdom
Autim Tok Long Famili na Wanskul i Kamapim Gutpela Kaikai
OL KRISTEN i gat wok long mekim gutpela pasin long ol narapela man—na bikpela samting em ol i mas autim gutpela tok bilong Kingdom bilong God long ol. Sindaun 3:27 i tok: “Sapos wanpela man i sot long samting na em i askim yu long givim em, yu no ken tok, ‘Nogat.’ Sapos yu inap, yu mas givim em.” Wanpela yangpela Witnes long Ajentina, taim em i stap long namba 3 yia bilong em long haiskul, em i laik autim gutpela tok bilong Kingdom long wanpela pren bilong em long skul. Em i mekim olsem na dispela i kamapim planti gutpela kaikai.
Wanpela taim dispela yangpela Witnes i tokim pren bilong em olsem i no olgeta lotu i gutpela. Yangpela man hia i tok, em i no save mekim wanpela pasin nogut, na Witnes i tok: “Na tu yu no mekim wanpela wok bilong God.” Dispela i kirapim tingting bilong em. Bihain Witnes i stori long em olsem yumi stap long taim bilong las de, na bilong God i ken orait long yumi, yumi mas kisim stretpela save long Baibel na bihainim ol dispela tok. Pren bilong Witnes i wanbel long dispela tok. Tasol olsem wanem? Famili bilong em bai orait long em long stadi long Baibel? Bilong helpim pren bilong em long tingim gut ol dispela samting, Witnes i tokim em long kaunim buk Yu Inap i Stap Oltaim Long Paradais Long Graun.
Bihain dispela pren i lusim skul. Witnes i no harim sampela tok moa long em i go inap olsem wanpela yia. Orait nau em i telefon long Witnes, na Witnes i kirap nogut—pren bilong em i tok, nau em i save pinis ol samting i kamap em i truim ol tok profet bilong Baibel. Wantu Witnes i stretim rot bilong stadi wantaim em long Baibel.
Taim em i go long haus bilong dispela pren wanskul bilong bipo, em i kisim save olsem papamama bilong em ol i tingting planti—pikinini bilong ol i laik insait long wanem samting? Liklik brata bilong dispela pren em i ting brata bilong em i mekim pasin longlong. Olsem na papamama i askim em long sindaun wantaim Witnes na bikbrata bilong em long dispela stadi. Stadi i pinis, orait nau aiwara i kamap long ai bilong em, na em i tokaut long papamama olsem bikbrata bilong em i no longlong. Orait nau mama i tok, “Pastaim mi gat wanpela hevi tasol, nau mi gat tupela!”
Olsem na long stadi bihain, mama yet em i sindaun wantaim ol long stadi, na nau em i save, tupela manki hia ol i no longlong. Bihain dispela meri wantaim man bilong em ol i kirap na stadi. I no longtaim na famili olgeta ol i kirap na kam long ol miting bilong kongrigesen long Haus Kingdom. Bihain moa, tupela lapun bubu ol i kirap long stadi long Baibel na kam long ol miting. Bihain, namba wan yangpela man i kisim baptais. Em i maritim wanpela meri na tupela i givim bel long mekim wok pablisa.
Long rot bilong autim tok long skul, dispela yangpela Witnes i bin helpim tupela wanskul moa, wantaim mama na susa bilong wanpela, na ol i kirap na stadi long Baibel. Dispela yangpela Witnes i no bin surik long mekim gutpela pasin long ol wanskul bilong em, na long dispela rot em i bin helpim 11-pela olgeta long kisim save long tok i tru bilong Baibel. Em nau, gutpela samting tru i bin kamap! Tru tumas, “Ol manmeri i putim Bikpela i stap God bilong ol, ol tu i ken amamas.”—Song 144:15.