Taim Yu Beten, God i Save Harim?
BIKMAN bilong kampani em yet i ken skelim—em bai givim wanpela wok long narapela man o em yet bai mekim—laik bilong em. Na i wankain tasol long King bilong heven na graun—em yet i ken skelim—em i laik insait tru long wanpela wok samting o nogat. Baibel i lainim yumi olsem em laik bilong God yet na em i save harim ol beten bilong yumi, olsem na Baibel i tok, yumi mas beten long God.—Buk Song 66:19; 69:13.
Em laik bilong God yet long yumi mas beten long em, olsem na yumi save, em i save tingim ol beten bilong ol wokboi bilong em long graun. Em i no pasim ol long kam klostu long em long rot bilong beten na kamapim olgeta tingting na hevi bilong ol. Em i strongim ol long mekim olsem. Em i laik bai ol i “mas beten oltaim.” Em i tok: “Olgeta hevi yu karim, em yu mas putim long han bilong Bikpela.”—1 Tesalonaika 5:17; Rom 12:12; Buk Song 55:22; 1 Pita 5:7.
Sapos God i no laik harim beten bilong ol wokboi bilong em, em i no ken opim dispela rot bilong ol i ken i go klostu long em, na em i no ken tok, ol i mas beten long em long olgeta taim. Laik bilong God yet na em i kamapim pasin bilong beten olsem rot bilong lain bilong em i ken go klostu long em. Dispela em wanpela as na yumi ken bilip olsem em i save harim ol beten. Tru tumas, em i save tingim ol beten bilong olgeta wan wan wokboi bilong em.
Na narapela samting yumi ken tingim, em olsem: Baibel i tok klia olsem God i save harim ol beten. Aposel Jon i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em.” (1 Jon 5:14) King Devit i stori long God Jehova na em i tok: “Yu save harim beten bilong mipela.” Devit yet i bilip olsem, na em i tok: “[God] i harim prea bilong mi.”—Buk Song 55:17; 65:2.
Olsem na tru, pasin bilong beten i save helpim man i mekim beten, tasol Baibel i makim olsem taim stretpela man i beten, bikpela samting moa i kamap—wanpela Man i harim dispela beten. Dispela Man em God yet.—Jems 5:16-18.
Ol Beten God i Bin Harim
I gat planti stori long Baibel long ol man em God i bin harim beten bilong ol na helpim ol. Ol samting i bin painim ol dispela man i kamapim klia olsem, tru pasin bilong beten i helpim man long stretim tingting na mekim isi bel bilong em, na i helpim em long mekim sampela wok i stret long beten bilong em na stretim hevi bilong em. Tasol pasin bilong beten i no helpim man long dispela rot tasol. Pasin bilong beten i helpim man moa yet, long wanem God i save harim beten na helpim man.
Olsem: Taim King Devit i harim tok olsem Apsalom i painim rot bilong rausim em long wok king bambai Apsalom yet i ken kamap king bilong Israel, Devit i beten olsem: “Bikpela, plis yu ken paulim tok bilong Ahitofel [man i givim tingting long Apsalom] bai i kamap kranki olgeta.” Samting Devit i beten askim God long mekim i no liklik samting, long wanem, ol man i tingim ol tok Ahitofel i autim “i olsem tok God yet i bin autim.” Tasol Apsalom i no bihainim tingting Ahitofel i givim long em long rot bilong rausim King Devit. Bilong wanem Apsalom i sakim? “Long wanem, Bikpela i tingting pinis long bagarapim Apsalom. I tru, tok bilong Ahitofel i gutpela, tasol Bikpela i no larim ol i bihainim dispela tok.” Dispela i kamapim long ples klia olsem God i bin harim beten bilong Devit.—2 Samuel 15:31; 16:23; 17:14.
Na i wankain tu long Hesekia. Bikpela sik i bin painim Hesekia na em i bilong i dai, tasol em i beten askim God long helpim em, na em i kamap orait gen. Olsem wanem? Beten i bin mekim isi bel na tingting bilong Hesekia na dispela tasol i helpim em na skin bilong em i kamap orait gen? Nogat tru! Jehova i tokim Hesekia long maus bilong profet Aisaia olsem: “Mi harim pinis beten bilong [yu] na mi lukim [yu] i krai moa yet. Olsem na bai mi mekim [yu] i kamap orait gen.”—2 King 20:1-6.
Daniel i beten na God i helpim em. Ating God i helpim em bihain long taim Daniel i ting God bai mekim, tasol ensel bilong God i strongim em na ensel i tok olsem: “God i bin harim beten bilong yu.” God i harim ol beten bilong ol narapela tu, olsem bilong Hana, na ol disaipel bilong Jisas, na kepten Kornilius, na em i helpim ol long ol narapela kain rot, em ol man yet i no gat strong bilong mekim. Olsem na Baibel i lainim yumi olsem God i save amamas long ol beten i stret wantaim laik bilong em, na em i harim na helpim ol man i mekim ol dispela beten.—Daniel 10:2-14; 1 Samuel 1:1-20; Aposel 4:24-31; 10:1-7.
Tasol God i save harim beten bilong ol wokboi i stap gut long em na helpim ol olsem wanem long nau?
God i Helpim Ol Man i Beten
Ol dispela manmeri i bin beten long God na God i harim beten bilong ol, em God i bin mekim ol narapela kain wok, olsem mirakel, bilong helpim ol. Tasol yu mas save, long taim bilong Baibel tu taim God i harim beten bilong man na helpim em, planti taim ol samting God i mekim i no kamap long ples klia na bai man i lukim na em i ken save God i harim beten bilong em. Long wanem, God i bin helpim ol wokboi bilong em long rot bilong strongim bel bilong ol na givim sampela save na tingting long ol bambai ol inap bihainim stretpela rot. God i bin harim beten bilong ol Kristen na helpim ol tu long rot bilong ol samting bilong spirit; em i no bin mekim planti narapela kain wok o mirakel long ai bilong ol man bilong helpim ol.—Kolosi 1:9.
Olsem na yu no ken bel hevi sapos sampela taim God i helpim yu long narapela rot na i no long rot yu bin tingim o laikim. Olsem: Taim traim i painim yu, ating bai God i no tekewe dispela hevi; bai em i givim “bikpela strong” long yu bilong karim hevi na sanap strong. (2 Korin 4:7; 2 Timoti 4:17) Yumi no ken ting dispela bikpela strong bilong God i samting nating na i no inap helpim yumi. Nogat. Na yumi no ken ting olsem Jehova i no bin harim beten bilong yumi.
Tingim Pikinini bilong God yet, em Krais Jisas. Em i tingting planti long ol man bai kilim em i dai olsem wanpela man i bin tok bilas long God, olsem na em i beten na em i tok: “Papa, sapos yu laik, yu ken tekewe dispela kap long mi.” Olsem wanem? God i harim beten bilong em na amamas long en? Hibru 5:7 i tok, God i bin harim beten bilong em. Tasol em i mas dai long pos pen, olsem na God i no tekewe dispela hevi long Pikinini bilong em. Nogat. Em i salim wanpela “ensel bilong heven i kam long em na i strongim em.”—Luk 22:42, 43.
Dispela samting Jehova i mekim bilong helpim Jisas, yu ting em wanpela mirakel? Tru yumi ol man bai ting em wanpela mirakel! Tasol long ai bilong God Jehova, em as bilong dispela strong, i no wanpela mirakel. Na pastaim tru Jisas i bin i stap long heven na em i save long ol taim bipo Jehova i bin salim sampela ensel i kam long ol man, olsem na Jisas i no kirap nogut long lukim wanpela ensel i kam olsem yumi bai kirap nogut sapos wanpela ensel i kam helpim yumi. Tasol dispela ensel, em Jisas i mas save long em long heven taim em i no kamap man yet long graun, em i strongim Jisas bambai em inap karim bikpela hevi na traim i laik painim em.
Jehova i save harim beten bilong ol wokboi i stap gut long em long nau—planti taim em i givim strong long ol bambai ol inap karim hevi na sanap strong. Em i mekim olsem long kain kain rot. Ating em bai kirapim sampela wanlotu, em yumi save gut long ol, long givim sampela tok long yumi bilong strongim yumi. Olsem wanem? Bai yumi sakim dispela tok, long wanem, yumi ting ol wanlotu i no bin karim hevi na traim wankain olsem i painim yumi, olsem na ol i no inap helpim yumi? Yumi no laik mekim olsem, a? Jisas inap kisim kain tingting olsem na sakim dispela ensel i kam long em. Tasol em i no mekim olsem; em i amamas long God i harim beten bilong em na helpim em long dispela rot, olsem na em inap i stap gut long God na inapim laik bilong Em. Yumi tu yumi mas amamas long strong God i givim long yumi taim em i harim beten bilong yumi na helpim yumi. Tingim tu, sapos yumi karim hevi na sanap strong longtaim, bihain bai yumi inap kisim planti blesing.—Saveman 11:6; Jems 5:11.
Mas Bilip Olsem God Bai Harim
Sapos God i no helpim yu hariap, no ken les na ting God i no harim beten bilong yu. Sampela beten bilong yumi, olsem beten bilong askim God long helpim yumi long wanpela hevi bilong yumi yet, o beten bilong askim God long yumi ken kisim sampela wok moa long wok bilong em, ating kain beten olsem em yumi mas wetim taim God i save i gutpela na i stret bilong helpim yumi na nau bai em i helpim yumi. (Luk 18:7, 8; 1 Pita 5:6) Sapos yu beten askim God long wanpela samting em bel bilong yu i tingting planti tru long en, orait yu mas wok long beten oltaim na bai God i save, yu laik tru bai em i helpim yu. Jekop i bin mekim olsem. Em i pait longtaim wantaim wanpela ensel na em i tok: “Yu givim blesing long mi pastaim, na bai mi larim yu i go.” (Stat 32:24-32) Yumi tu yumi mas bilip olsem sapos yumi wok strong long askim, long taim stret bai yumi kisim blesing.—Luk 11:9.
Na bilong pinisim dispela tok, wanpela samting moa yu ken tingim em olsem: Sapos King bilong heven na graun i harim beten bilong yu, dispela em i wanpela gutpela samting tru. Olsem na taim God i givim tok long yu long rot bilong Baibel, yu save harim gut ol dispela tok long ol samting em i laik bai yu mekim? Sapos yumi wok strong long beten na yumi kamap pren tru bilong Man bilong wokim yumi, bai yumi gat bikpela laik moa long harim gut olgeta tok em i givim long yumi.
[Piksa long pes 6]
God i save harim ol beten. Olsem wanem? Yumi save harim tok bilong em long Baibel?