Yu Tingim?

Olsem wanem? Ol tok bilong ol nupela Wastaua i bin givim gutpela save long yu? Gutpela sapos yu lukim ol askim hia na skelim save yu bin kisim:

▫ Wanem wanpela bikpela as na Jisas i bin oraitim sik bilong ol man?

Ol mirakel Jisas i wokim i olsem piksa bilong strongim bel bilong bikpela lain long nau bambai ol i ken save, ol manmeri i abrusim bagarap long Armagedon, sik bilong ol bai pinis bihain liklik long Armagedon. (Aisaia 33:24; 35:​5, 6)​—⁠12/15, pes 12.

▫ Bilong wanem yumi mas kisim tok long olgeta taim bilong kirapim yumi long “beten long olgeta taim”? (Rom 12:12)

I gat planti samting i givim hevi long tingting bilong yumi na i gat planti wok yumi mas mekim, na dispela inap pasim yumi na bai yumi lusim tingting long beten. Na i gat ol hevi i save painim yumi na ol inap daunim yumi, na bai yumi no amamas moa long wetim Kingdom na yumi lusim pasin bilong beten. Olsem na yumi mas kisim ol tok bilong kirapim tingting bilong yumi na strongim yumi long beten na long dispela rot yumi inap go klostu moa long Jehova.​—⁠12/15, pes 14.

▫ Wanem samting i kamapim long ples klia olsem ol man i no inap lusim tingting long traipela tait wara i bin kamap long taim bilong Noa?

Planti lain, winim 250 long olgeta hap, i gat 500 samting stori bilong Bikpela Tait. Sampela as tok bilong olgeta dispela stori i wankain tasol.​—⁠1/15, pes 5.

▫ Ol profet giaman long nau i wankain olsem wanem long ol profet giaman long taim bilong Jeremaia?

Ol profet giaman long nau i tok, ol i mekim wok bilong God, tasol ol i stilim, olsem paulim, tok bilong God, long wanem, tok ol i autim i paulim tingting bilong ol man na ol i no bihainim tok bilong God long Baibel. Ol i paulim moa yet ol man long tok bilong Kingdom. (Jeremaia 23:30)​—⁠2/1, pes 4.

▫ Taim man i kisim baptais long nem bilong spirit holi, dispela i makim wanem samting?

Dispela i makim olsem em bai wok gut wantaim spirit holi, olsem em i no ken mekim wanpela samting em inap pasim wok bilong spirit holi namel long lain bilong Jehova. Olsem na dispela man mas wok gut wantaim lain ‘gutpela wokboi’ na ol elda insait long kongrigesen. (Hibru 13:​7, 17; 1 Pita 5:​1-4)​—⁠2/1, pes 18.

▫ Man i lotuim piksa, olsem wanem dispela i nogutim em yet?

Baibel i tokaut klia olsem God Jehova i nolaik tru long ol piksa bilong lotu na ol god giaman, na ol dispela piksa samting i no inap helpim ol man long go klostu long God na lotu tru long em. (Lo 7:25; Buk Song 115:​4-8) Satan “em i bin pasim tingting bilong ol dispela man” bambai lait bilong tok i tru i “no inap i go insait long bel bilong ol.” (2 Korin 4:⁠4) Olsem na taim man i givim biknem long piksa bilong lotu, i olsem em i mekim wok bilong ol spirit nogut. (1 Korin 10:​19, 20)​—⁠2/15, pes 6-7.

▫ Ol man long taim bilong Baibel, bilong wanem ol i ting sipsip i gutpela samting bilong helpim ol?

Ol sipsip i gat bikpela gras na ol man inap mekim wok long en bilong wokim klos bilong famili o bilong maketim. Ol i save wokim wanpela kain biugel long kom bilong sipsip man na ol i save winim bilong makim kirap bilong namba 50 yia, na bilong givim toksave long ol Israel, na bilong stiaim ol long taim bilong pait. Sipsip i wanpela animal i klin long ai bilong God na ol Israel i ken kaikai, olsem na sapos ol i gat lain sipsip, ol i no ken sot long kaikai, na tu long olgeta taim ol man inap kisim susu long sipsip na ol i ken dring dispela susu o wokim sis long en.​—⁠3/1, pes 24-5.

▫ Ol man i laikim tumas God, taim ol i beten long Kingdom i mas i kam, ol i laik bai wanem samting tru i ken kamap? (Matyu 6:10)

Ol i laik bai Kingdom bilong God i kam kirap mekim wok bilong en long bagarapim ol gavman bilong graun, em ol i no bin truim tok promis bilong ol long kamapim gutaim tru. (Daniel 2:44)​—⁠3/15, pes 6.

▫ Husat ol i bin raitim sampela tok bilong helpim bilip Kristen, na ol i bin lainim ol man long God Triwan o nogat?

Klostu long yia 150 (C.E.) na i go inap yia 200 samting i gat sampela bikman bilong lotu i bin raitim ol tok bilong helpim bilip Kristen olsem ol i save long en. Ol tok bilong ol i bilong sakim ol tingting i birua long bilip Kristen em planti lain bilong Rom i bin holim long dispela taim. No gat wanpela i bin lainim ol man long God Triwan.​—⁠4/1, pes 24-29.

▫ Sekaraia, em papa bilong Jon Bilong Baptais, i bin kamap mauspas, tasol tok bilong Luk 1:62 i makim olsem em i bin kamap yaupas tu o olsem wanem?

Gebriel i tok, Sekaraia bai kamap mauspas; em i no tok Sekaraia bai kamap yaupas. (Luk 1:​18-20) Luk 1:64 i tok: “Wantu tasol maus bilong Sekaraia i no pas moa, na em inap toktok gen.” No gat liklik tok olsem yau bilong em i pas na nau i op gen. Nogat. Tok bilong Luk 1:62 olsem ol i “mekim toktok long han” taim ol i toktok wantaim Sekaraia, ating dispela tok i makim tasol olsem ol i mekim wok long han bilong makim olsem ol i laik bai Sekaraia i kamapim tingting bilong em.​—⁠4/1, pes 31.