Was i Stap Long “Taim Bilong Las De”
“Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap.”—MAK 13:33.
1. Ol bikpela samting i wok long kamap nau long “taim bilong las de” i mas kirapim yumi long mekim wanem?
OL BIKPELA samting i wok long kamap nau “long taim bilong las de” na ol Kristen i mas mekim wanem? (Daniel 12:4) Ol inap save tru long ol samting ol i mas mekim. Krais Jisas i bin mekim tok profet na kolim ol samting i mas kamap olsem mak, na ol dispela samting i wok long kamap nau long taim bilong yumi. Jisas i kolim planti samting i mas kamap na i makim hap taim i kirap long yia 1914 em i narapela kain. Jisas i save long tok profet bilong Daniel long “taim bilong las de,” olsem na Jisas i mekim dispela bikpela tok profet na bihain em i kirapim ol disaipel bilong em long “was i stap.”—Luk 21:36.
2. Bilong wanem i bikpela samting long yumi mas was i stap long nau?
2 Bilong wanem ol i mas was i stap? Long wanem bikpela bagarap tru i laik painim ol man. Kain bikpela bagarap olsem i no bin kamap long bipo. Olsem na sapos ol Kristen i slip long dispela taim, olsem ol i no tingim gut ol samting bilong God, orait bagarap inap painim ol. Sapos yumi ting ol samting bai stap olsem tasol, o yumi tingting planti long ol samting bilong skin na yumi larim dispela i daunim yumi, orait bagarap inap painim yumi. Long Luk 21:34, 35, Krais Jisas i givim toksave long yumi olsem: “Tasol yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus, long wanem, dispela de bai i kamap long olgeta manmeri i stap long olgeta hap bilong graun.”
3, 4. (a) Wanem insait bilong tok bilong Jisas olsem de bilong belhat bilong God bai kamap long ol manmeri wantu tasol “olsem umben i save holimpas abus”? (b) God i no putim umben bilong holimpas ol manmeri, tasol olsem wanem dispela de bai kamap wantu tasol long ol manmeri long taim ol i no tingim?
3 I gat gutpela as na Jisas i tok, de bilong Jehova ‘bai i kamap long yumi wantu tasol, olsem umben i save holimpas abus.’ Ol man i save putim umben olsem bikpela bilum bilong kisim pik samting. Pik i no save na em i ran i go insait long umben na pulim i go na umben i holimpas em. Dispela samting i kamap wantu tasol. Jisas i tok, long kain pasin olsem de bilong belhat bilong God bai kamap long ol manmeri i no tingim gut ol samting bilong spirit na ol i no mekim wok na i olsem ol i slip. “Taim Bikpela i laik bekim ol rong,” dispela taim bai kamap long ol wantu tasol long taim ol i no tingim, na bai ol i kirap nogut.—Sindaun 11:4.
4 Olsem wanem? God Jehova i putim umben bilong holimpas ol man? Nogat. Em i no wetim wanpela taim bilong ol i no was gut na bai em inap holimpas ol na bagarapim ol. Tasol dispela de bai i kamap long ol manmeri wantu tasol long taim ol i no tingim, long wanem, ol i no save tingim Kingdom bilong God. Ol i save mekim ol samting ol yet i laik mekim, na ol i no tingim as bilong ol samting i kamap long graun long nau. Tru, ol i no tingim, tasol Jehova i no ken senisim taim em i makim pinis bilong kamapim laik bilong em. Em i makim pinis taim bilong bekim rong na em i no ken surikim dispela taim. Tasol em i mekim pasin marimari na em i toksave long ol manmeri pastaim.—Mak 13:10.
5, 6. (a) Man bilong wokim yumi i mekim wanem pasin sori bilong helpim ol manmeri long abrusim bagarap? Tasol olsem wanem long planti man? (b) Nau bai yumi stori long wanem samting bilong helpim yumi long was i stap?
5 Bikpela Man bilong wokim yumi em i mekim gutpela pasin sori na toksave pastaim, long wanem, em i laik helpim ol man i stap hia long graun, em olsem ples em i putim lek antap long en. (Aisaia 66:1) Em i laikim tru ol manmeri i stap long dispela ples, olsem na long rot bilong ol mausman bilong em long graun na ol man em i salim ol i go autim tok bilong em, em i toksave long ol manmeri long ol samting i laik kamap. (2 Korin 5:20) Ol dispela wokboi bilong God i wok strong long toksave long ol manmeri, tasol ol dispela samting bai kamap long ol manmeri wantu tasol, olsem “umben i save holimpas abus.” Ol dispela samting bai kamap long wanpela taim ol i no tingim. Bilong wanem i olsem? Long wanem, planti manmeri ol i no was i stap—i olsem ol i slip. Ol i no tingim ol samting God i laik mekim. (1 Tesalonaika 5:6) Sampela tasol i bihainim dispela toksave, na ol bai abrusim bagarap na i stap long nupela taim God bai kamapim.—Matyu 7:13, 14.
6 Orait, olsem wanem yumi ken was i stap nau long taim bilong las de, na bai God i kisim bek yumi? God i putim ol samting bilong helpim yumi. Nau yumi ken stori long 7-pela samting yumi ken mekim.
Wok Strong Long Sakim Ol Samting i Laik Pulim Nabaut Tingting
7. Jisas i givim wanem toksave long yumi long samting inap pulim nabaut tingting bilong yumi?
7 Namba wan samting yumi ken mekim em olsem: Yumi ken wok strong long sakim ol samting i laik pulim nabaut tingting bilong yumi. Long Matyu 24:42, 44, Jisas i tok: “Olsem na yupela i mas was gut. Yupela i no save wanem de Bikpela bilong yupela bai i kam. Olsem na yupela tu i mas redi. Pikinini Bilong Man bai i kam long wanpela taim yupela i no ting em bai i kam.” Dispela tok bilong Jisas i makim olsem long dispela taim bilong planti hevi bai i gat planti samting i laik pulim nabaut tingting bilong yumi, na dispela inap mekim na bai yumi bagarap. Long taim bilong Noa i gat planti samting i pulim tingting bilong ol man. Dispela samting i mekim na ol i ‘no tingim’ ol samting God i laik mekim, na Bikpela Tait i kamap na i pinisim ol olgeta. Olsem na Jisas i mekim toksave olsem: “Wankain pasin tasol bai i kamap long taim Pikinini Bilong Man i kamap.”—Matyu 24:37-39.
8, 9. (a) Olsem wanem ol wok bilong olgeta de inap paulim yumi na pundaunim yumi? (b) Pol na Jisas i givim wanem toksave long yumi?
8 Yumi mas tingim tu toksave bilong Jisas long Luk 21:34, 35. Em i stori long ol samting ol manmeri i save mekim long olgeta taim, olsem kaikai, na dring, na tingting planti long kisim ol samting bilong helpim skin bilong ol. Olgeta man i save mekim ol dispela samting, ol disaipel bilong Jisas tu. (Lukim Mak 6:31.) No gat rong long ol dispela samting yet, tasol yumi mas was gut, nogut yumi larim ol dispela samting i pulim nabaut tingting bilong yumi, o yumi tingting tumas long ol dispela samting. Olsem bai yumi slek long ol samting bilong spirit na i olsem yumi slip, na bagarap inap painim yumi.
9 Olsem na yumi no ken les long mekim ol samting bambai God i ken orait long yumi—dispela em nambawan bikpela samting. Yumi no ken tingting tumas long kaikai na dring na ol samting bilong skin; yumi mas tingting long kisim ol dispela samting inap tasol long helpim yumi long i stap laip. (Filipai 3:8) Nogut yumi tingting tumas long ol dispela samting na yumi no tingim ol samting bilong Kingdom. Olsem Rom 14:17 i tok: “Kingdom bilong God i no pas long kaikai na dring. Nogat. Pasin tru bilong kingdom bilong God em i stretpela pasin na bel isi na pasin bilong amamas Holi Spirit i save kamapim.” Yu mas tingim tok bilong Jisas, em i tok: “Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.” (Matyu 6:33) Na long Luk 9:62, Jisas i tok: “Man i holim stia, tasol oltaim em i lukluk i go long baksait, em i no inap long mekim wok bilong kingdom bilong God.”
10. Sapos yumi no lukluk stret i go long mak yumi laik winim, dispela inap nogutim yumi olsem wanem?
10 Man i holim stia, olsem bilong samting bilong brukim graun na wokim baret long gaden, sapos oltaim em i lukluk i go long baksait, bai baret i krungut nabaut. Em i no tingim gut wok em i mekim, olsem na em inap lusim rot o bai em i no lukim samting i laik pasim rot bilong em, na bai em i no inap i go moa. Na i wankain long yumi—taim yumi kirap pinis long mekim wok, yumi mas wokabaut stret i go. Nogut yumi olsem meri bilong Lot—em i lukluk i go long baksait na em i bagarap. Oltaim yumi mas lukluk stret i go long mak yumi laik winim. Bilong mekim olsem, yumi mas wok strong long sakim ol samting i laik pulim nabaut tingting bilong yumi.—Stat 19:17, 26; Luk 17:32.
Wok Strong Long Beten
11. Jisas i toksave olsem yumi no ken larim ol samting bilong olgeta de i pulim nabaut tingting bilong yumi, na bihain em i tok wanem?
11 Tasol i gat sampela samting moa yumi ken mekim na bai yumi no slip. Namba 2 samting yumi ken mekim em bikpela samting, em olsem: Wok strong long beten. Jisas i givim toksave olsem yumi no ken larim wok bilong olgeta de i pulim nabaut tingting bilong yumi, na bihain em i tok strong olsem: “Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.”—Luk 21:36.
12. Yumi mas beten olsem wanem? Na dispela bai helpim yumi olsem wanem?
12 Olsem na yumi mas wok strong long beten—oltaim yumi mas beten askim God long helpim yumi long was i stap, long wanem, bagarap inap painim yumi. Olsem na long olgeta taim yumi mas i go klostu long God long rot bilong beten na beten strong long em. Long Rom 12:12 Pol i kirapim yumi long “beten long olgeta taim.” Na long Efesus 6:18, Baibel i tok: “Yupela i mas strong long mekim ol kain kain beten na askim God long helpim yupela. Oltaim yupela i mas was gut. Yupela i no ken malolo.” Yumi no ken mekim nating ol beten olsem i samting nating tasol. Nogat. Bagarap inap painim yumi, olsem na yumi mas beten strong tru na askim God long helpim yumi. (Lukim Hibru 5:7.) Dispela bai helpim yumi long i stap gut long Jehova. Yumi mas “beten oltaim,” no gat narapela samting inap helpim gut yumi olsem dispela pasin. Sapos yumi beten olsem, bai Jehova i helpim yumi long was i stap long olgeta taim. Em bikpela samting tru long yumi mas wok strong long beten!
Pas Gut Long Oganaisesen Bilong God na Wok Bilong En
13. Yumi mas bung wantaim wanem lain na bai yumi inap was i stap?
13 Yumi laik abrusim olgeta dispela samting i laik kamap long graun. Yumi laik bai Pikinini Bilong Man i ken orait long yumi na yumi ken sanap long ai bilong em. Olsem na i gat narapela samting yumi ken mekim, em namba 3 samting, olsem: Pas gut long oganaisesen Jehova i bosim na no ken tru lusim. Yumi mas bung oltaim wantaim dispela oganaisesen na insait long ol wok bilong en. Long dispela rot bai yumi kamapim long ples klia olsem yumi Kristen i was i stap.
14, 15. (a) Yumi mas insait long wanem wok na dispela bai helpim yumi long was i stap? (b) Husat i makim taim bilong pinis bilong wok autim tok? Yumi mas ting olsem wanem long dispela wok? (c) Taim “bikpela hevi tru” i pinis na yumi tingting bek long wok bilong autim tok bilong Kingdom yumi bin mekim, bai yumi save long wanem samting?
14 Na namba 4 samting yumi ken mekim bilong helpim yumi long was i stap, em olsem: Stap namel long ol manmeri i givim toksave long ol man olsem las de i klostu. Yumi mas autim “dispela gutnius bilong kingdom” inap tru long laik bilong God pastaim na bihain tasol bai las de i kamap. (Matyu 24:14) I no wok bilong ol Witnes Bilong Jehova long makim taim bilong pinis bilong wok bilong autim tok. Nogat. Dispela em wok bilong God Jehova. Em yet i makim. (Mak 13:32, 33) Tasol yumi tingting pinis olsem yumi bai wok strong i go inap long hamas mun o yia moa God i makim bilong autim tok long nambawan gutpela gavman em inap helpim tru ol man, em Kingdom bilong God. Bai yumi wok i go yet na taim bilong “bikpela hevi tru” i kamap. (Matyu 24:21) Inap long olgeta taim bihain, ol manmeri God i kisim bek ol bai ol inap tingting bek long ol tok Krais Jisas i bin mekim na bai ol i save, em i no profet giaman. (Kamapim Tok Hait 19:11) Bai ol i save, bikpela wok tru bilong autim tok i bin kamap, na ol man i insait long en i no bin ting wok bai kamap bikpela tru olsem.
15 Olsem na long bikpela de bilong dispela wok i kamap inap pinis long laik bilong God yet, ating long dispela taim bai planti manmeri moa yet i insait long dispela wok, winim olgeta taim bipo. Bai yumi amamas tru yumi bin insait long en! Aposel Pita i tok, God Jehova “i no laik bai wanpela man i lus. Em i laik bai olgeta man i mas tanim bel.” (2 Pita 3:9) Olsem na spirit bilong God I Gat Olgeta Strong i wok strong moa long nau, na ol Witnes bilong Jehova i laik wok i go yet long dispela wok em spirit bilong God i kirapim ol long mekim. Em nau, yu mas pas gut long oganaisesen bilong Jehova, na wok strong insait long wok bilong en, em wok bilong autim tok long ol man. Dispela bai helpim yu na bai yu no slip—bai yu was i stap.
Skelim Yu Yet
16. Bilong wanem yumi mas skelim ol wok bilong yumi yet na save yumi stap olsem wanem long ai bilong God?
16 I gat namba 5 samting yumi ken mekim bambai yumi ken was i stap. Yumi olgeta wan wan i mas skelim wok bilong yumi yet. I stret yumi mas mekim olsem long nau, winim olgeta narapela taim, long wanem, yumi mas kamapim long ples klia olsem yumi mekim wok bilong husat. Long Galesia 6:4, Pol i tok: “Olgeta man i mas skelim wok bilong ol yet.” Yumi mas skelim wok bilong yumi yet wantaim tok bilong Pol long 1 Tesalonaika 5:6-8: “Olsem na nogut yumi slip, olsem ol arapela man. Mobeta ai bilong yumi i op i stap, na tingting bilong yumi i klia. Yumi save, ol man bilong slip, ol i save slip long nait. Na ol man bilong spak, ol i save spak long nait. Tasol yumi ol lain bilong san, yumi mas tingting klia. Yumi mas kisim pasin bilong bilip long God na pasin bilong laikim tru ol arapela, na pasim dispela pasin olsem siot kapa. Na pasin bilong wetim God i kisim bek yumi, em yumi mas putim olsem hat kapa, na yumi mas sanap strong na was gut.”
17. Taim yumi skelim yumi yet, yumi mas tingim wanem ol askim?
17 Olsem wanem long yumi? Taim yumi skelim pasin bilong yumi yet wantaim tok bilong Baibel, ol wok yumi mekim i kamapim klia olsem yumi no slip—yumi wetim God i kisim bek yumi na yumi pasim dispela olsem hat kapa? Yumi klia olgeta long ol pasin na tingting bilong dispela graun? Yumi laik tru long bihainim ol pasin bilong nupela taim God bai kamapim? Ai bilong yumi i op na yumi tingim gut ol samting i laik painim dispela graun? Sapos olsem, orait de bilong Jehova i no ken kamap long yumi olsem stilman i save kam.—1 Tesalonaika 5:4.
18. I gat wanem sampela askim moa yumi mas givim long yumi yet? Dispela bai helpim yumi olsem wanem?
18 Tasol taim yumi skelim ol wok bilong yumi yet, olsem wanem sapos yumi lukim olsem yumi wok long kisim gutpela sindaun na ol gutpela samting bilong skin na ol amamas? Olsem wanem sapos yumi lukim olsem yumi no tingim gut ol samting bilong spirit—ai bilong yumi i hevi na yumi laik slip? Olsem wanem? Yumi stap olsem yumi driman—yumi giamanim bel bilong yumi na laik kisim samting bilong dispela graun i no inap helpim tru yumi? Sapos olsem, orait kwiktaim yumi mas lusim slip na kirap!—1 Korin 15:34.
Tingim Ol Tok Profet i Kamap Tru
19. Wanem sampela tok profet em yumi bin lukim ol i kamap tru?
19 Nau yumi ken stori long namba 6 samting em inap helpim yumi long was i stap: Tingim ol planti tok profet i bin kamap tru nau long taim bilong las de. Taim bilong ol man bilong ol arapela lain i pinis long yia 1914 na nau 77 yia i go pinis. Insait long ol dispela planti yia, yumi bin lukim narapela narapela tok profet i kamap tru. Olsem: Lotu i tru i kamap strong gen; lain remnan wantaim lain poroman bilong ol i lusim kalabus na i stap long paradais bilong spirit; ol i autim gutpela tok bilong Kingdom long olgeta hap; ‘bikpela lain’ i kamap. (Aisaia 2:2, 3; sapta 35; Sekaraia 8:23; Matyu 24:14; Kamapim Tok Hait 7:9) Bikpela wok i bin kamap, em i litimapim tru nem bilong Jehova na kamapim klia olsem Jehova em i Nambawan Bikpela; na lain i liklik tru i bin kamap planti moa, em Jehova yet i mekim dispela samting i kamap hariap long taim em i makim pinis. (Aisaia 60:22; Esekiel 38:23) Na ol samting aposel Jon i lukim olsem driman na em i stori long en long Kamapim Tok Hait, dispela tu i wok long kamap na bikpela samting bilong en bai kamap klostu nau.
20. Olgeta Witnes Bilong Jehova i bilip tru long wanem samting? Olsem na ol i stap olsem wanem samting?
20 Olsem na long nau, winim olgeta taim bipo, ol Witnes Bilong Jehova i bilip tru olsem tingting bilong ol i stret, em tingting bilong ol long as bilong ol samting i bin kamap bihain long 1914. Ol i bilip tru olsem na long dispela as ol i stap olsem ol tul long han bilong God Antap Tru. Em i givim wok long dispela lain bilong autim tok bilong em long dispela bikpela taim nau. (Rom 10:15, 18) Tru tumas, ol tok bilong Jehova long taim bilong las de i bin kamap tru. (Aisaia 55:11) Na dispela samting i mas kirapim yumi long wok i go yet inap long taim God i truim olgeta tok promis bilong em long rot bilong Krais Jisas.
Taim Bilong Kisim Bek Yumi i Klostu Nau, Winim Long Taim Yumi Bilip Nupela
21. I gat wanem namba 7 samting bilong helpim yumi long was i stap long ol samting bilong God?
21 Na namba 7 samting bilong helpim yumi long was i stap, em olsem: Oltaim yumi mas tingim taim bilong kisim bek yumi i klostu nau, winim long taim yumi bilip nupela. Na bikpela samting moa em olsem: Taim bilong kamapim klia olsem Jehova em i Nambawan Bikpela na taim bilong mekim nem bilong em i kamap holi, dispela taim i klostu moa long nau. Aposel Pol i tok: “Yupela i save pinis long dispela taim nau yumi stap long en. Nau em i taim bilong yupela i lusim slip na kirap. Yupela i save, long taim yumi kamap manmeri bilong bilip long Krais, orait taim bilong God i laik kisim bek yumi, em i bin i stap longwe yet. Tasol nau dispela taim em i kamap klostu liklik. Nait i laik pinis, na klostu tulait i laik kamap.”—Rom 13:11, 12.
22. Taim bilong kisim bek yumi i klostu nau na dispela i mas kirapim yumi long mekim wanem?
22 Taim bilong kisim bek yumi i kam klostu moa long nau, olsem na yumi no ken slip! Ai bilong yumi i mas op na yumi mas was i stap. Yumi no ken larim wanpela samting bilong yumi yet o bilong dispela graun i pulim tingting bilong yumi, na bai yumi tingting tumas long dispela samting na yumi no tingim gut ol samting Jehova i mekim bilong helpim lain bilong em nau long taim bilong pinis. (Daniel 12:3) Yumi mas wok strong moa long nau bambai i no gat wanpela samting inap pulim yumi, nogut yumi lusim rot Baibel i makim bilong yumi mas wokabaut long en. (Matyu 13:22) Olgeta samting i kamapim long ples klia olsem las de bilong dispela graun i klostu. Liklik taim tasol na bai pasin bilong dispela graun i pinis olgeta na bai nupela taim i kamap i gat stretpela pasin tasol i stap long en.—2 Pita 3:13.
23. Jehova bai helpim yumi long mekim wanem? Na wanem gutpela samting bai kamap?
23 Olsem na yumi no ken slip. Long nau, winim olgeta narapela taim, yumi mas was i stap—yumi mas tingim gut dispela taim yumi stap long en. Yumi mas save, Jehova yet i no ken slip—em i tingim dispela taim. Oltaim em i redi i stap bilong helpim yumi bambai yumi inap was i stap nau long taim bilong las de. Nait i laik pinis. Klostu tulait i laik kamap. Olsem na yumi mas was i stap! Liklik taim tasol na bai gutpela de i kamap, winim olgeta narapela de—long dispela de bai Kingdom bilong Krais i kamapim olgeta laik bilong Jehova long graun!—Kamapim Tok Hait 21:4, 5.
Bai Yu Bekim Wanem Tok?
◻ Olsem wanem de bilong belhat bilong God bai kamap long ol man “wantu tasol, olsem umben i save holimpas abus”?
◻ Bilong wanem yumi mas sakim ol samting i laik pulim nabaut tingting bilong yumi? Yumi ken mekim olsem wanem?
◻ Yumi mas beten olsem wanem bambai yumi inap was i stap?
◻ Em bikpela samting long yumi mas bung wantaim wanem lain?
◻ Bilong wanem yumi mas skelim wok bilong yumi yet, yumi stap olsem wanem long ai bilong God?
◻ Ol tok profet i gat wanem wok long helpim yumi long was i stap?