“Yupela i Mas Was i Stap”
1 Taim Jisas i stori pinis long ol samting bai kamap bilong makim taim bilong las de bilong dispela graun, em i kirapim ol disaipel bilong em long “was i stap.” (Mk 13:33) Bilong wanem ol Kristen i mas was i stap? Long wanem, yumi stap long wanpela hap taim i nogut tru, winim olgeta narapela taim bipo. Yumi no ken slip long ol samting bilong spirit. Sapos yumi mekim olsem, yumi no inap pilim tru wok Jehova i bin givim long yumi bilong mekim long dispela taim bilong pinis. Em wanem wok?
2 Lain bilong Jehova i wok long autim tok bilong gutnius bilong Kingdom bilong em long olgeta hap bilong graun—em dispela Kingdom tasol inap pinisim hevi bilong ol man. Taim yumi wok gut wantaim oganaisesen bilong God, dispela i makim olsem yumi ol Kristen tru, na yumi save tingim dispela hap taim yumi stap long en, na yumi save olsem yumi gat wok bilong helpim ol narapela long harim dispela tok “i save givim laip i stap gut oltaim oltaim.” (Jo 6:68) Taim yumi givim bel tru long mekim dispela nambawan bikpela wok, yumi kamapim klia olsem yumi was i stap long ol samting bilong spirit.
3 Bel i Kirapim Yumi Long Autim Tok: Yumi stap olsem Witnes bilong Jehova, olsem na yumi mas i gat stretpela tingting long wok autim tok. Pasin bilong laikim tru God na ol narapela i save kirapim yumi long mekim wok autim tok. (1Ko 9:16, 17) Taim yumi mekim olsem, God bai kisim bek yumi na ol man i harim tok bilong yumi. (1 Ti 4:16) Yumi mas tingting strong long autim tok long olgeta taim long dispela nambawan gutpela gavman—em Kingdom Bilong God— na mekim i go inap dispela wok i pinis.
4 I gat wanpela bikpela samting i helpim yumi long pilim olsem taim i sot pinis bilong mekim wok autim tok—bikpela hevi tru bai kirap long taim yumi mekim yet wok autim tok. Yumi no save long wanem de na aua dispela hevi bai kirap, olsem na yumi mas was i stap long olgeta taim, na yumi mas beten na wetim Jehova i helpim yumi. (Ef 6:18) Wok autim tok i wok long i go bikpela. Tasol klostu nau long wanpela taim, dispela bikpela wok bilong autim tok bai pinis.
5 Yumi mas bihainim gut tok bilong Jisas long “was i stap.” Na yumi mas mekim olsem moa yet long dispela taim yumi stap long en, winim olgeta narapela taim bipo. Yumi mas tingim olsem taim i sot pinis. Long nau na long olgeta taim, tingting bilong yumi i mas klia long ol samting bilong spirit, na yumi mas was i stap, na mekim wok bilong Jehova. Em nau, “mobeta ai bilong yumi i op i stap, na tingting bilong yumi i klia.”—1 Te 5:6.