Jehova i Lukautim Mipela Taim i Gat Tambu—Namba 2 Hap
LONG taim bilong Namba 2 Pait mi stap long ami bilong Hitler long Jemani, na long hap ain bilong pasim let bilong yunifom bilong mi i gat rait olsem: “God i Stap Wantaim Mipela.” Mi ting dispela samting tu i kamapim klia wok nogut bilong ol misin, em ol i save insait long ol pait na kapsaitim blut bilong ol man. Mi nolaik tru long dispela samting. Olsem na bihain mi les olgeta long ol misin na mi no bilip moa long God, na mi ting olgeta samting i bin kamap nating tasol long rot bilong evolusen. Long dispela taim mi bungim tupela Witnes Bilong Jehova long Limbak-Oberfrona, long Is Jemani, na tupela i toktok wantaim mi.
Mi tokim dispela tupela Witnes i kam long haus bilong mi: “Yupela i no ken ting mi bai kamap Kristen.” Tasol ol tok bilong tupela i kirapim mi long bilip olsem tru God em i stap. Mi laik kisim save, olsem na mi baim wanpela Baibel, na bihain mi orait long tupela i lainim mi long ol tok bilong en. Em long kirap bilong yia 1953 taim gavman Komyunis long Is Jemani i tambuim wok bilong ol Witnes klostu 3-pela yia pinis.
Wastaua bilong Ogas 15, 1953, i stori long hevi bilong ol Witnes Bilong Jehova long dispela taim na i tok: “Long olgeta taim ol man i lukstil long ol na tok long mekim nogut long ol. Maski ol i mas was gut taim ol i laik i go lukim wanpela brata, nogut wanpela man i bihainim ol i go, na maski ol i mas was gut, nogut polis i lukim ol i holim sampela buk o nius bilong Sosaiti Wastaua na ol i gat kot long ‘tilim buk samting i kirapim ol man long bikhet’ na ol i mas kalabus inap tupela o tripela yia, na maski planti handet strongpela brata, em ol i go pas long wok, ol i stap long kalabus, tasol ol wokboi bilong Jehova long Is Jemani i wok yet long autim tok.”
Long 1955 mi wantaim meri bilong mi Rejina i go long wanpela kibung intenesenel bilong ol Witnes Bilong Jehova long Nurembek, long Wes Jemani. Na long 1956 mitupela wantaim i kisim baptais long Wes Belin. Long dispela taim i no gat banis i brukim Belin long tupela hap. Ol i bin sanapim dispela banis long yia 1961, na long dispela taim ol lain bilong Is Jemani i no inap i go moa long hap bilong Wes Jemani. Tasol taim mi no kisim baptais yet, traim i bin painim mi, bai mi stap gut long God Jehova o nogat.
Kisim Wok
Mipela bin kirap long bung wantaim kongrigesen bilong ol Witnes Bilong Jehova i stap long Limbak-Oberfrona, na kongrigesen i sot long man bilong i go long Wes Belin na kisim ol buk na nius bilong Baibel i kam long kongrigesen. Mitupela meri bilong mi i gat liklik wok bisnis na tupela liklik pikinini, tasol mitupela i save tingim wok bilong Jehova i nambawan bikpela samting. Mipela i stretim olpela ka bilong mipela bambai mipela inap haitim 60 buk long en. Bagarap inap painim man i mekim dispela wok bilong kisim i kam ol buk i tambu, tasol dispela wok i lainim mi long bilip tru long Jehova na wetim em i helpim mi.
Bilong i go long ka na brukim boda namel long Is Belin na Wes Belin em hatwok, na nau mi tingting bek long dispela samting mipela bin mekim na mi save ting, ‘Olsem wanem mipela inap mekim?’ Taim mipela i kamap pinis long hap i fri, mipela i save kisim ol buk na haitim long ka na redi long brukim boda i go bek long Is Jemani.
Wanpela taim, mipela haitim ol buk pinis long ka na nau wanpela man mipela i no save long em i lusim wanpela haus i gat planti haus insait long en na em i singaut strong olsem: “Eh! Yupela!” Mi tingting planti, nogut em i bin lukim samting mipela mekim. Nau em i tok: “Bihain yu mas mekim dispela long narapela hap. Ol polis bilong Is Jemani i save kam long ka i gat redio na sindaun i stap long kona long hap na was i stap, na nogut ol i holim yupela.” Tingting bilong mi i stap isi gen. Mipela brukim boda i go bek, na i no gat hevi, olsem na mipela 4-pela insait long ka, mipela i singsing i go inap long mipela i kamap pinis long haus.
Redi Long i Stap Mipela Yet
Long 1950 i go inap 1959, ol brata long Is Jemani i save kisim ol buk samting na ol tok bilong stiaim tingting bilong ol i kam long hap bilong Wes. Tasol kirap long 1960 mipela i stretim rot bambai olgeta wan wan Witnes long Is Jemani i ken save gut long ol Witnes i stap long hap bilong em na em inap bung wantaim ol. Na long Jun 1961 ol i mekim namba wan Skul Bilong Wok Kingdom, em skul bilong ol elda, long Belin. Mi go long dispela skul bilong 4-pela wik. Na 6-pela wik bihain, wantu tasol ol man i sanapim banis long Belin i brukim Is na Wes Jemani. Gavman i tambuim pinis wok bilong mipela na mipela i mas wok hait, na nau ol brata long narapela hap i no inap helpim mipela.
Sampela i tingting planti na ol i ting nau wok bilong ol Witnes Bilong Jehova long Is Jemani bai pinis. Tasol nogat. Inap wanpela yia bipo, mipela i bin stretim rot bilong bosim wok, na nau mipela inap wok gut wantaim na i stap strong long spirit. Na tu gutpela skul ol elda i bin kisim long namba wan Skul Bilong Wok Kingdom em inapim ol long skulim ol narapela elda. Olsem na Jehova i bin redim mipela bambai mipela inap i stap mipela yet tasol na mekim wok. Na long rot bilong ol kibung distrik bilong 1949 em i bin redim mipela long tambu em gavman i putim long wok bilong mipela long 1950.
Mipela i no inap i go moa long hap bilong Wes, olsem na mipela yet i mas kirap mekim ol samting bambai oganaisesen bilong mipela i ken wok yet long Is Jemani. Mipela salim pas long ol brata long Wes Belin na askim ol long i kam bungim mipela long wanpela haiwe long hap bilong Is em ol man bilong hap bilong Wes inap raun i kam long en. Mipela i kamap long hap rot mipela makim pinis bilong bungim ol na mipela pasim ka na giaman olsem ensin i bagarap na mipela i wokim. Sampela minit bihain ol brata i kam. Ol i kisim ol buk na nius bilong Baibel i kam. Na gutpela tru ol i kisim notbuk bilong mi i kam, em mi i bin raitim ol tok bilong skul bilong ol elda long en, na ol i kisim Baibel bilong mi tu i kam. Mi no bin karim dispela tupela samting i kam bek wantaim mi bambai ol lain long hap bilong Is i no ken save long mi. Mi amamas tru long kisim gen! Mi no save long bikpela wok dispela tupela samting bai mekim bilong helpim mi inap sampela yia bihain.
Skul i Stap Hait
Sampela de bihain ol i tok mipela mas putim ol Skul Bilong Wok Kingdom long narapela narapela hap bilong Is Jemani. I gat 4-pela tisa, na mi wanpela tisa. Tasol mi pilim olsem bai mipela i no inap givim skul long olgeta elda, long wanem, tambu i stap. Mipela laik haitim dispela wok mipela mekim, olsem na mi stretim rot bilong wokim dispela skul olsem mipela i holide na wokim kem.
Olgeta wan wan klas i gat 4-pela sumatin na mi tisa, na i gat namba 6 brata bilong kukim kaikai bilong mipela. Ol meri pikinini tu i stap. Olsem na mipela i bikpela lain liklik, inap olsem 15-20 man meri pikinini. Mipela i no inap wokim kem long ples ol narapela famili i save wokim kem long en na holide, olsem na mi wantaim meri pikinini mipela i raun painim gutpela ples bilong wokim kem.
Wanpela taim mipela i brukim wanpela liklik ples na mipela i lukim wanpela liklik rot i go kamap long sampela diwai i stap longwe liklik long bikrot. Mipela i ting em gutpela ples bilong wokim kem, olsem na mi go lukim nambawan kaunsil bilong dispela ples na mi tokim em: “Mipela i wok long painim ples bilong wokim kem na holide wantaim sampela famili moa inap tupela wik. Mipela laik i stap longwe long ol man bambai ol pikinini i ken pilai. Olsem wanem? Mipela ken wokim kem long ples bilong ol diwai long hap?” Em i orait long dispela, na mipela stretim rot bilong i kam.
Mipela sanapim ol haus sel i raunim haus bilong mi i gat wil bambai ol man i no inap lukim. Mipela i save bung insait long dispela haus long olgeta de bilong wokim skul, na mipela i save stadi strong inap 8-pela aua long olgeta 14 de bilong skul. Insait long hap ol haus sel i banisim, mipela i putim ol sia na tebol i stap, nogut wantu tasol sampela man ausait i kam lukim mipela. Na sampela i bin kam! Taim ol i kam, mipela i amamas long ol meri pikinini i sambai na helpim mipela.
Mipela i save skul, na ol meri pikinini i was i stap ausait. Wanpela taim ol i lukim nambawan kaunsil, em kuskus bilong Pati Komyunis long dispela hap, em i bihainim liklik rot i kam long mipela. Brata i was i stap em i lukim kaunsil i kam na em i kirapim samting bilong paua bilong toksave long mipela insait long haus i gat wil. Wantu tasol mipela i lusim haus i go sindaun nabaut long ol tebol ausait, olsem mipela i stretim tok pinis long mekim, na mipela i kirap long pilai kas. Mipela i putim wanpela botol i gat strongpela dring long en bambai ol man i ting, tru mipela i holide tasol. Kaunsil i kam toktok gut wantaim mipela na bihain em i go bek, na em i no save liklik long samting tru mipela i mekim.
Mipela i putim ol Skul Bilong Wok Kingdom long ol narapela narapela hap bilong kantri kirap long Mas samting long 1962 i go inap long Oktoba samting long 1965. Ol elda i kisim gutpela skul. Ol i lain tu long ol samting ol i mas mekim bilong karim hevi i painim mipela long Is Jemani long dispela taim, na dispela i redim ol bilong lukautim gut wok bilong autim tok. Bilong i go long dispela skul, ol elda i mekim bikpela ofa—ol i mas lusim taim bilong holide bilong ol, na ol inap i go kalabus.
Skul i Helpim Ol
Polis samting i wok long was long ol samting mipela i mekim, na klostu long pinis bilong 1965, taim planti elda i skul pinis, ol dispela lain i kirap mekim wanpela samting ol i ting bai pinisim oganaisesen bilong mipela. Ol i holim 15 Witnes ol i ting ol i man bilong i go pas long wok bilong mipela. Ol i redi gut na wantu tasol ol i holim ol dispela brata long narapela narapela hap bilong kantri. Long dispela taim tu planti ol i ting olsem wok bilong ol Witnes bai pinis nau. Tasol Jehova i helpim mipela, na mipela i stretim rot bambai mipela inap karim dispela hevi na wok i go yet.
Samting i bin helpim tru mipela, em olsem: Planti elda i bin skul long Skul Bilong Wok Kingdom, na ol i bin skul wantaim, olsem na ol i pas gut wantaim—narapela i save gut long narapela na bilip long em. Long dispela rot oganaisesen i stap strong. Em bikpela samting long mipela i bin bihainim gut ol tok bilong oganaisesen!—Aisaia 48:17.
Long ol mun i kamap bihain, ol man inap lukim olsem dispela wok nogut bilong ol polis samting i no pasim wok bilong mipela. Liklik taim bihain mipela inap kirap gen long mekim ol Skul Bilong Wok Kingdom. Ol polis na lain bilong gavman i lukim olsem mipela i no lusim wok, olsem na ol i save ol i mas kirap mekim ol narapela samting bilong pasim wok bilong mipela. Jehova i win tru!
Wok Strong Long Autim Tok
Long dispela taim inap olsem 5-pela tasol i save bung long olgeta wan wan Buk-Stadi bilong kongrigesen. Mipela save kisim ol buk na nius bilong Baibel long rot bilong Buk-Stadi, na ol i bosim wok bilong autim tok tu long rot bilong Buk-Stadi. Kirap long taim mipela i nupela long wok bilong Jehova, Jehova i bin mekim gut tru long mitupela Rejina—mipela i gat planti Baibel-stadi.
Mipela i go long ol haus bilong autim tok, tasol mipela bihainim narapela kain pasin liklik long mekim, bambai ol man i no ken save mipela i mekim dispela wok na polis i no ken holim mipela. Mipela i save go long wanpela haus, na lusim sampela haus, na i go paitim dua long narapela haus gen. Mitupela Rejina i go long wanpela haus na meri bilong haus i singautim mipela i go insait. Mipela i toktok wantaim em long sampela tok bilong Baibel na nau pikinini man bilong em i kam insait long rum. Em i kirap stret na sutim askim long mipela, olsem:
“Yupela i lukim pinis God bilong yupela o nogat? Mi laik bai yupela i ken save, mi bilip tasol long ol samting mi inap lukim. Olgeta narapela samting em pipia nating tasol.”
Mi bekim tok olsem: “Mi no inap bilip olsem. Mi laik askim yu, Yu bin lukim kru insait long het bilong yu o nogat? Olgeta samting yu mekim i kamapim klia olsem yu gat kru.”
Mitupela Rejina i stori long sampela samting moa yumi no inap lukim, tasol yumi bilip tru olsem dispela samting i stap, olsem paua. Yangpela man hia i putim gut yau na mipela kirap long stadi Baibel wantaim em na mama bilong em. Tupela wantaim i kamap Witnes. Inap olsem 14 manmeri mitupela i bin stadi wantaim ol, ol i bin kamap Witnes. Inap 7-pela em mipela bin bungim ol long taim mipela i go long ol haus na autim tok, na 7-pela em mipela bin bungim ol long taim mipela i autim tok long kain kain taim na ples.
Taim mipela kirapim stadi wantaim wanpela man o meri na em i save stadi gut long olgeta taim, orait nau mipela i save em i no giaman na mipela singautim em i kam long ol miting bilong mipela. Bikpela tingting bilong mipela em olsem: Nogut dispela Baibel-stadi i kamapim ol brata long ol birua. Olsem na sampela taim mipela i wetim man o meri i stadi inap wanpela yia samting pastaim na nau mipela singautim em i kam long ol miting. Sampela taim mipela wet longtaim moa. Mi tingim wanpela man em i gat namba na em i stap pren bilong ol bikpela man bilong Pati Komyunis. Em i stadi inap 9-pela yia pastaim na mipela i orait long em i kam long ol miting! Nau dispela man i stap brata Kristen bilong yumi.
Polis i Bihainim Yet Mipela
Bihain long 1965 polis i no holim planti brata wantaim olsem pastaim ol i bin mekim, tasol ol i no lusim mipela. Ol i wok yet long lukluk long olgeta samting mipela i mekim. Long dispela taim mi kisim wok insait long oganaisesen bilong mipela long bosim wok, olsem na polis i save holim mi. Planti taim ol i kisim mi long ka i go na givim ol askim long mi. Ol i save tokim mi: “Nau bai yu no inap i stap fri moa. Bai yu go kalabus.” Tasol bihain gen ol i larim mi i go.
Long 1972 tupela bikpela man i kam lukim mi na tok ol i mekim i litimapim nem bilong oganaisesen bilong mipela. Ol i bin wok long harim ol tok mipela i mekim long Stadi Wastaua. Tupela i tok: “Mipela i nolaik tru long tok bilong dispela Wastaua.” Ol i tingting planti, nogut ol man i kaunim dispela tok na bai ol i no bilip moa long tingting Komyunis. Tupela i tok: “Long wanem Wastaua i no wanpela nius nating. Nogat. Ol i save wokim inap olsem 5 o 6 milion, na ol manmeri long ol kantri i stap rabis ol i save kaunim.” Long bel bilong mi, mi tingting olsem: “Tok bilong yupela i stret!”
Long 1972 tambu long wok bilong mipela i stap 22 yia pinis. Jehova i bin sori long mipela na givim gutpela tingting long mipela bilong soim rot long mipela, na mipela i bin bihainim gut ol tok bilong em. Tasol dispela tambu i stap 18 yia moa na gavman long Is Jemani i pinisim. Nau mipela i stap fri bilong lotuim God bilong mipela, em Jehova, na mipela i tenkyu tru long em!—Em stori bilong Helmut Martin.