Mi Lusim Bukenval na Mi Kisim Save Long Tok i Tru
MI GO bikpela long biktaun Grenobel long Frans, namel long yia 1930 na 1939. Tisa bilong lainim mi long tok Jeman em wanpela Frans, tasol em i givim bel tumas long bihainim ol Natsi, em ol lain bilong Hitler long Jemani. Long skul em i strong long tok olsem bihain bai mipela “i mekim wok” long tok Jeman. Tasol planti tisa, em ol i bin insait long Namba Wan Pait, ol i save tingting planti long gavman Natsi i wok long kamap strong long Jemani. Na mi tu mi tingting planti, long wanem, ol samting i wok long kamap i makim klia olsem bikpela pait i laik kamap.
Long yia 1940, long kirap bilong Namba 2 Pait, wanpela smolpapa bilong mi, mi laikim em tumas, em i bagarap long pait i kamap long wara Som. Mi bel nogut tru, tasol krismas bilong mi i no inap long mi ken insait long ami bilong Frans. Tasol mi save gut long wokim ol piksa bilong sanapim haus samting, olsem na 3-pela yia bihain, taim ol ami bilong Jemani i bosim Frans, rot i op bilong mi ken mekim wok long dispela save bilong helpim ol Frans i wok hait long sakim ol Jeman (French Resistance). Mi lain gut long pasin bilong sainim nem bilong ol man—i olsem ol yet i bin sainim, na tu, mi inap wokim ol mak samting bilong gavman bilong Jemani. Mi amamas tru mi inap “pait” olsem long ol birua i stap long as ples bilong mi, olsem na long dispela taim mi no tingting tumas long tingting Komyunis bilong ol wanwok bilong mi.
Ol i Holim Mi
Long Novemba 11, 1943, lain long hap bilong mi ol i wok long sakim ol Jeman, ol i singautim ol man i kam mats bilong tingim de Namba Wan Pait i pinis. Tasol ol gat bilong Frans i pasim rot bilong bris i go long ples bilong tingim ol man i bin i dai long dispela pait, na ol i tok, gutpela sapos mipela i go bek long haus. Tasol mipela i no mekim olsem—mipela i tingting pinis long mats i go long narapela ples i stap namel long taun, em i gat wanpela pos ston i stap olsem mak bilong tingim ol man i bin i dai long pait. Tasol mipela i lusim tingting olsem dispela samting i stap klostu long ol ofis bilong wanpela lain polis bilong ol Natsi.
Kwiktaim ol soldia i gat gan ol i raunim mipela. Ol i subim mipela i go pas long wanpela banis na sanap long lain. Taim ol soldia i subim mipela i go, nau ol i lukim sampela han-gan i stap long graun. No gat wanpela i laik tokaut olsem gan i bilong em, olsem na ol soldia i holim mipela. Tasol ol meri, na ol yangpela man i no winim yet 17 krismas, ol i lusim ol i go fri. Mi gat 18 krismas, olsem na ol i kalabusim mi wantaim 450 narapela. Sampela de bihain ol i salim mipela i go long wanpela banis kalabus klostu long biktaun Kopyen long hap bilong not long Frans.
Long Rot i Go Long Jemani
Long Janueri 17, 1944, sampela soldia bilong Jemani i kam long kalabus. Long han kais bilong hat ain bilong ol i gat mak bilong ol Natsi, na long han sut i gat ol leta olsem SS (Schutzstaffel). Em namba wan taim ol soldia bilong dispela lain i mekim samting long mi, tasol i no laspela taim. Ol i bungim mi wantaim planti handet narapela kalabusman na subim mipela olgeta i wokabaut i go long ples bilong kisim tren long Kopyen. Ol i kikim mipela i go insait long ol hap bilong tren. Long hap mi stap long en i gat 125 kalabusman, na long ol narapela hap bilong tren tu ol kalabusman i pas pas. Inap 3-pela san na tupela nait mipela i no dring o kaikai liklik. Olsem na kwiktaim, insait long tupela o 3-pela aua samting, ol kalabusman i no strong tumas ol i pundaun na ol narapela i krungutim ol. Tupela de bihain mipela i kamap pinis long Bukenval klostu long biktaun Vaima, em i stap insait tru long kantri Jemani.
Ol i wasim mi long strongpela marasin na sevim gras long het bilong mi, na bihain ol i raitim nem bilong mi long buk na givim namba 41,101 long mi, na ol i tok mi wanpela “Paitman bilong lain Komyunis.” Wanpela taim sik i kamap na ol i putim mipela sampela i stap longwe long ol narapela, na long dispela taim mi bungim wanpela pris Dominiken, nem bilong em Michel Riquet, em bihain long pait em i kisim nem long ol tok em i mekim long wanpela bikpela haus lotu, ol i kolim Notre Dam, long biktaun Paris. Mi wantaim sampela wanlain bilong mi i askim dispela pris, i gat wanem as na God i larim ol pasin nogut i stap. Em i tok: “Man i mas karim bikpela pen pastaim bambai em inap i go long heven.”
I Stap Bilong Mipela
Mipela ol kalabus i stap long 61 haus, na mipela olgeta i mas kirap long moningtaim tru olsem 4:30 samting na waswas. Mipela i rausim siot na lusim haus i go ausait, na planti taim wara i kamap ais pinis na mipela mas brukim ais pastaim bambai mipela inap waswas. Maski mipela i sik o nogat, mipela olgeta i mas mekim dispela samting. Nau em taim bilong tilim kaikai long mipela—long olgeta de mipela i kisim liklik hap bret (200 o 300 gram tasol) i no gat swit, na liklik hap bata wantaim samting olsem jem. Long 5:30 long moningtaim, ol i bungim mipela olgeta wantaim bilong kolim nem o namba bilong mipela na mipela i mas bekim tok olsem, ‘Mi stap.’ Taim sampela long haus i dai long nait na long moningtaim mipela mas karim ol i go ausait, bel bilong mipela i bagarap stret! Ol i kukim skin bilong ol long paia na taim smel nogut bilong smok i kisim nus bilong mipela, mipela i tingim ol dispela man i bin stap wankalabus bilong mipela. Mipela i nolaik tru long dispela pasin, na mipela bel hevi, na bel nogut long ol birua, long wanem, mipela i save dispela samting inap painim mipela tu.
Ol i givim wok long mipela. Wok bilong mi i olsem: Mi mas brukim graun na wokim nating ol baret. Mipela i wokim pinis baret i go daun inap tupela mita, na nau ol i tok, mipela i mas pulapim graun gen long en. Wok i kirap long 6 klok long moningtaim, na long belo mipela i malolo liklik inap 30 minit, na bihain mipela i wok gen i go inap 7 klok apinun. Nau mipela i mas bung gen bilong ol i kolim ol nem o namba bilong mipela, na mipela i les long sanap longtaim. Sampela taim ol i pasim mipela i sanap i stap i go inap long biknait—ol i save mekim olsem long taim planti Jeman i bagarap long pait long hap bilong Rasia.
Narapela Lain
Sapos man i traim ranawe long banis kalabus, ol man inap luksave kwik long em, long wanem, long kalabus ol i katim nabaut gras bilong mipela. Hap gras i stap long namel o long sait bilong het ol i katim sot tru o ol i sevim het long dispela hap. Tasol ol i no mekim olsem long sampela kalabusman. Ol i husat? Hetman bilong haus bilong mipela i toksave olsem: “Ol i Baibel Stiuden (Bibelforscher).” Mi kirap nogut na mi tok: “Olsem wanem na ol Baibel Stiuden i stap long banis kalabus?” Man hia i toksave olsem: “Ol i kalabus, long wanem, ol i lotuim Jehova.” Jehova! Em namba wan taim mi harim nem bilong God.
Bihain liklik mi kisim save moa long ol Baibel Stiuden. Planti ol i bilong Jemani. Sampela bilong ol i bin i stap long ol banis kalabus kirap long 1935 samting, long wanem, ol i no bihainim tok bilong Hitler. Ol inap i go fri sapos ol i lusim bilip bilong ol, tasol ol i no mekim olsem. Ol soldia bilong Hitler ol i kolim SS, ol i givim wok long ol Baibel Stiuden bilong sevim ol na katim gras bilong ol, na tu, ol i givim bikpela wok long ol long ofis samting, long wanem, ol i save ol Baibel Stiuden ol i man bilong stretpela pasin. Tasol samting mipela i kirap nogut long en, em bel isi bilong ol—ol i no save bel nogut o bikhet o tingting long bekim nogut long ol birua. Mi no save olsem wanem ol inap i stap isi olsem. Na sori tru, long dispela taim mi no save gut long tok Jeman bambai mi inap toktok wantaim ol.
Tren Bilong i Dai
Taim ol ami bilong Amerika na Inglan samting i kam klostu, ol Jeman i salim ol kalabusman i go long ol banis kalabus i stap insait tru long kantri Jemani, tasol planti kalabusman tumas i pas pas insait long ol dispela banis kalabus. Long Epril 6, 1945, long moningtaim, lain SS i kisim 5,000 bilong mipela na subim mipela long wokabaut inap 9-pela kilomita long rot i go long Vaima. Ol i no sori liklik long ol man i no inap wokabaut hariap; ol i sutim ol long gan long nek. Taim mipela i kamap pinis long ples bilong kisim tren long Vaima, mipela i kalap long ol hap bilong tren bilong putim kago na i no gat rup, na tren i lusim ples i go. Inap 20 de tren i raun i go long ol narapela narapela ples bilong tren na i brukim kantri Jemani i go kamap long Sekoslovakia.
Wanpela moningtaim ol i kisim hap bilong tren mipela i stap long en na putim i stap long wanpela han rot bilong tren. Ol soldia i redim ol masin-gan na opim ol dua bilong hap em olgeta kalabusman bilong Rasia i stap long en na ol i kilim ol i dai. I gat wanem as na ol i mekim olsem? Olsem: Twelpela kalabusman i bin kilim i dai sampela gat long nait na ranawe i go. Inap long nau, mi inap tingim blut bilong ol, em isi isi i ron i go daun long graun.
Bihain liklik, tren i go kamap long Dakau, na tupela de bihain ami bilong Amerika i lusim mipela i go fri. Tren i bin raun inap 20 de, tasol insait long dispela planti de mipela i gat liklik kaikai tasol, olsem sampela poteto i no tan na liklik hap wara. Pastaim mipela inap olsem 5,000, tasol taim mipela i kamap pinis long Dakau inap olsem 800 tasol i stap laip yet. Insait long sampela de bihain, planti moa ol i dai. Na olsem wanem long mi? Planti de long tren mi bin sindaun antap long skin bilong wanpela man i dai pinis.
Nupela Samting Mi Mekim
Taim mi kamap fri gen, mi gat laik long helpim lain Komyunis bilong Frans, long wanem, long Bukenval mi bin bung wantaim planti memba bilong dispela lain, em sampela i gat namba. Long Grenobel mi kamap helpim bilong kuskus bilong wanpela hap lain bilong ol, na ol i kirapim mi long i go long biktaun Paris long wanpela skul bilong lainim ol man long kamap bikman bilong lain bilong ol.
Tasol i no longtaim na mi no amamas moa long dispela lain. Long Novemba 11, 1945, ol i singautim mipela long mats wantaim sampela moa long Paris. Man i lukautim lain bilong mipela i holim hap mani bilong baim rum slip bilong mipela, tasol i olsem em i no laik mekim wok long dispela mani bilong helpim mipela. Olsem na mipela mas kirapim em long bihainim stretpela pasin na pasin pren, em ol i tok dispela kain pasin i save mekim mipela i pas gut wantaim. Na tu, mi kisim save olsem ol planti bikman bilong dispela lain, em mi save long ol, ol i no save long rot bilong stretim ol hevi bilong dispela graun. Na tu, planti ol i no bilip olsem God i stap, tasol mi bilip long God.
Bihain mi go i stap long biktaun Lion na mi mekim yet wok bilong mi long wokim ol piksa bilong sanapim haus samting. Long 1954, tupela Witnes Bilong Jehova i kam long haus bilong mi na mi kisim sabskripsen bilong Kirap! Tupela de bihain, wanpela man wantaim wanpela bilong dispela tupela meri Witnes i kam lukim mi. Kwiktaim mi wantaim meri bilong mi i save, mitupela wantaim i laik save long ol samting bilong God.
Ol i save kam toktok wantaim mi, na bihain mi tingim ol Baibel Stiuden (Bibelforscher) mi bin bungim long Bukenval, em ol i bin i stap gut long bilip bilong ol, na nau mi save, ol dispela Baibel Stiuden na ol Witnes Bilong Jehova i wanpela lain tasol. Mitupela meri bilong mi i stadi long Baibel, na mitupela i dediket long Jehova, na kisim baptais long Epril 1955.
Mi inap tingim yet ol samting nogut i bin painim mi, i olsem i bin kamap asde tasol, tasol mi no bel hevi long en. Ol dispela samting i bin strongim mi na helpim mi long save olsem ol gavman bilong dispela graun i no inap helpim yumi tru. Ol samting i painim wanpela man inap helpim ol narapela liklik tasol, tasol mi bai amamas sapos ol samting i bin painim mi inap helpim ol yangpela bilong nau long save olsem ol samting bilong dispela graun i giaman tasol, na bai dispela i kirapim ol long kisim save long ol gutpela stretpela lo bilong lotu Kristen tru, em Jisas i lainim ol man long en.
Long nau planti man i karim pen na hevi long olgeta de. Ol Baibel Stiuden long ol banis kalabus ol i bin wetim gutpela taim i kamap, na bai pasin sori na stretpela pasin i stap, tasol pasin pait na pasin bilong givim bel tumas long bihainim wanpela tingting bilong ol man bilong graun i pinis. Nau mi tu mi wetim dispela samting i kamap. Mi givim bel long mekim wok elda long wanpela kongrigesen Kristen, na mi wok wantaim meri bilong mi na ol pikinini bilong mi na ol bubu long mekim wok bilong God na Krais. (Buk Song 112:7, 8)—Em stori bilong René Séglat.
[Ol Piksa long pes 28]
Antap: Bung bilong kolim nem o namba
Han Kais: Dua bilong go insait long Bukenval. Rait i tok: “Olgeta wan wan i mas kisim pe stret bilong em”
[Ol Piksa long pes 29]
Antap: Ples long Bukenval bilong kukim ol man i dai pinis
Han Kais: Sikstin kalabusman i slip long olgeta wan wan lain bet