Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w92 8/15 p. 30
  • Yu Tingim?

No gat vidio bilong dispela seksen.

Sori, popaia kamap long lodim vidio.

  • Yu Tingim?
  • Wastaua i Tokaut Long Kingdom Bilong Jehova—1992
  • Wankain Infomesen
  • No Ken Tingting Nabaut Long Samting Bilong Graun, Wok Strong Long Kisim Samting Tru Bilong Kingdom
    Wastaua i Tokaut Long Kingdom Bilong Jehova—1992
  • Olsem Wanem Yu Insait Long Tok Piksa Bilong Umben na Pis?
    Wastaua i Tokaut Long Kingdom Bilong Jehova—1992
  • “Ol Man Ol i Givim,” Em Presen Bilong Jehova
    Wastaua i Tokaut Long Kingdom Bilong Jehova—1992
  • Husat Bai Abrusim Bagarap Long Taim Bilong “Bikpela Hevi Tru”?
    Wastaua i Tokaut Long Kingdom Bilong Jehova—1992
Lukim Moa
Wastaua i Tokaut Long Kingdom Bilong Jehova—1992
w92 8/15 p. 30

Yu Tingim?

Olsem wanem? Yu bin amamas long kaunim tok bilong ol nupela Wastaua? Yu inap bekim ol dispela askim hia?

▫ Baibel i stori long ol wokman bilong haus bilong God [Netinim], na ol tumbuna pikinini bilong ol wokman bilong Solomon ol i bin kisim sampela bikpela wok, na ating dispela i makim wanem samting long nau?

Long nau, lain Israel bilong spirit i stap yet long graun ol i wok long i go liklik, tasol lain arapela sipsip i wok long i go bikpela. Sampela bilong ol dispela arapela sipsip, ol i kain olsem ol Netinim na ol tumbuna bilong ol wokman bilong Solomon, na nau lain remnan i givim bikpela wok long ol. (Aisaia 61:⁠5)​—⁠4/15, pes 16, 17.

▫ Wanem insait bilong dispela tok bilong Sefanaia, olsem: “Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap”? (Sefanaia 2:​2, 3)

Sapos man i laik abrusim bagarap long taim bilong ‘bikpela hevi tru’ em i no ken ting olsem man i bilip pinis, em i no inap lus. Nogat. (Matyu 24:​13, 21) Bilong abrusim bagarap, i gat 3-pela samting man i mas wok oltaim long mekim: Em i mas kam long Jehova, na daunim em yet, na mekim pasin i stret.​—⁠5/1, pes 15, 16.

▫ Long taim bilong pinis, Maikel i “kamap” bilong mekim wanem samting? (Daniel 12:​1, 4)

Kirap long taim Em i bin kamap King long 1914, em i bin “kamap” bilong mekim wok bilong helpim lain bilong Jehova. Na klostu nau bai em i “kamap” bilong mekim narapela kain wok​—⁠em wok Jehova i givim long em bilong pinisim olgeta pasin nogut i stap long graun na kisim bek ol manmeri bilong God.​—⁠5/1, pes 17.

▫ Olsem wanem man inap i stap amamas tru?

Em i mas i stap pren bilong Jehova, na Jehova i mas orait long em, na mekim gut long em, na nau em inap i stap amamas tru. (Sindaun 10:22) Man i laik i stap amamas tru, em i mas bihainim tok bilong Jehova na amamas long bihainim tok bilong em. (Luk 11:28)​—⁠5/15, pes 16, 19.

▫ Ating wanpela man i mas bilip pastaim na nau Jisas inap oraitim sik bilong em o olsem wanem?

Planti man i kam long Jisas bilong em i oraitim sik bilong ol, ol i bilip long Jisas na ol i kam. (Matyu 8:13) Tasol ol i no gat wok long tokaut long bilip bilong ol na nau Jisas inap wokim mirakel na oraitim sik bilong ol. Wanpela taim Jisas i oraitim wanpela lek nogut i no save liklik long em. (Jon 5:​5-13) Na Jisas i oraitim bek yau bilong wokboi bilong hetpris, maski em i stap wantaim ol birua bilong Jisas. (Luk 22:​50, 51) Jisas i mekim ol dispela mirakel long strong bilong spirit holi bilong God​—⁠em i no tingim bilip bilong man i gat sik.​—⁠6/1, pes 3.

▫ Long tok piksa bilong Jisas long Matyu 13:​47-50, dispela “umben” i makim wanem samting?

Dispela umben i makim ol manmeri i tok ol i lain bilong God, em ol i gat wok long kisim “pis.” Sampela em ol lain i holim nating nem Kristen, na sampela em ol Kristen tru God i bin makim ol long spirit holi na ol i bin kisim ‘ol gutpela pis’ i kam inap long nau na ol ensel i bosim dispela wok bilong ol, olsem Matyu 13:49 i tok.​—⁠6/15, pes 20.

▫ Wanem sampela lo ol jas bilong Israel i mas bihainim?

Ol i mas mekim stretpela kot, maski man i gat kot em maniman o rabisman; ol i mas skelim olgeta man long wankain pasin tasol; ol i no ken kisim gris mani. (Wok Pris 19:15; Lo 16:19)​—⁠7/1, pes 13.

▫ Ol elda i laik mekim wanem long rot bilong harim kot?

Ol i laik save long samting tru i bin kamap, na ol i mas mekim olsem long pasin sori. Ol i kisim pinis dispela save, orait nau bai ol i mekim ol samting ol i mas mekim bilong lukautim kongrigesen, na holimpas ol lo bilong Jehova insait long kongrigesen, na bai i no gat samting i pasim rot bilong spirit holi bilong God. Ol i laik kisim bek dispela man i bin mekim rong, long wanem, bagarap inap painim em. (Lukim Luk 15:​8-10.)​—⁠7/1, pes 18, 19.

▫ Pasin bilong tingting nabaut long pasin pamuk, bilong wanem dispela inap nogutim man?

Sapos yumi tingim tok bilong Jisas long Matyu 5:​27, 28, yumi ken save, olgeta man i tingting nabaut oltaim long pasin pamuk ol i gat asua long mekim dispela pasin, long wanem, i olsem ol i mekim pinis long bel bilong ol. Na sapos ol i tingting nabaut long dispela kain pasin, dispela inap kirapim ol long mekim dispela pasin.​—⁠7/15, pes 15.

▫ Jehova bai helpim yumi olsem wanem long kisim stretpela tingting long ol hevi bilong yumi na helpim yumi long karim ol dispela hevi?

Ating sampela wanbilip i kamapim sampela tok bilong Baibel, o taim yumi mekim stadi long Baibel, dispela i helpim yumi. Ating bai God i mekim ol samting na bai yumi kisim stretpela tingting long ol samting yumi mas mekim. Ol ensel tu i gat wok long soim rot long yumi, o ating long rot bilong spirit holi Jehova bai helpim yumi. (Hibru 1:14)​—⁠7/15, pes 21.

▫ Olsem wanem? Long Bung bilong Naisia long yia 325 ol i bin kamapim o tokaut long tok bilong God Triwan?

Nogat. Ol i tok, Pikinini em i “bilong wanpela bodi wantaim Papa.” Dispela bung na ol Tisa Kristen paslain long dispela taim i no bin kamapim dispela tingting bilong God Triwan, olsem Papa na Pikinini na spirit holi, tripela wantaim i bin stap oltaim na i gat wankain strong na namba na save. Nogat.​—⁠8/1, pes 20.

▫ Long taim bilong Jop em wanpela tasol i bin i stap gut long Jehova, o olsem wanem? (Jop 1:⁠8)

Nogat. Buk bilong Jop yet i kamapim klia olsem God i orait long Elihu. Na long dispela taim, planti Israel i stap long Isip, na i no gat as na yumi ken ting olgeta i bin lusim God na God i no orait long ol.​—⁠8/1, pes 31.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim