No Ken Tingting Nabaut Long Samting Bilong Graun, Wok Strong Long Kisim Samting Tru Bilong Kingdom
“Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.”—MATYU 6:33, Nupela Testamen bilong 1988.
1. Baibel i givim wanem toksave long yumi long bel bilong yumi? I gat wanem wanpela bikpela rot bilong bel long giamanim yumi?
“GUTPELA tingting bilong stiaim laip bilong yu, em i save kamap long [bel] bilong yu, olsem . . . na olgeta taim yu mas was gut tru long [bel] bilong yu.” (Sindaun 4:23) Bilong wanem King Solomon i mas mekim toksave olsem? Long wanem, “bel bilong olgeta man i save tingting oltaim long mekim pasin giaman.” (Jeremaia 17:9) Wanpela rot tru bilong bel i save giamanim yumi, em olsem: Bel i kirapim yumi long tingting nabaut long samting bilong graun. Sampela i save tingting nabaut long kisim sampela samting o mekim sampela samting, maski dispela i no inap kamap tru, na i olsem ol i driman nating long en. Tasol sapos ol i kirap na tingting nabaut long samting bilong graun, em nogut. Dispela kain tingting inap pulim bikpela hap taim, na em inap nogutim yumi tu. Olsem na yumi mas sakim dispela kain tingting. Sapos yumi nolaik tru long pasin nogut, olsem Jisas i bin mekim, bai yumi no larim bel i tingting nabaut long dispela kain samting.—Hibru 1:8, 9.
2. I gat wanem pasin bilong tingting nabaut em i nogut? Bilong wanem yumi mas sakim dispela kain tingting?
2 Ol samting bilong graun yumi no ken tingting nabaut long en em ol pasin bilong ol man bilong dispela graun i stap aninit long strong bilong Satan. Aposel Jon i stori long dispela na em i tok: “Olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.” (1 Jon 2:16; 5:19) Bilong wanem ol Kristen i no ken tingting nabaut long ol dispela pasin bilong graun? Long wanem, dispela kain tingting i save kirapim laik nogut long bel bilong man. Sapos man i tingting nabaut long mekim wanpela pasin i no stret, maski em i tingting nating tasol long en, i olsem em i mekim traim long tingting bilong em na bihain em bai mekim tru. Disaipel Jems i toksave olsem: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. . . . Na taim sin i kamap bikpela, em i save kamapim dai.”—Jems 1:14, 15.
Ol Piksa Bilong Skulim Yumi
3. Stori bilong husat i kamapim klia olsem pasin bilong tingting nabaut long samting bilong helpim yu yet tasol inap nogutim yu?
3 Orait, nau yumi ken tingim sampela ol i stap olsem piksa bilong skulim yumi, na bai yumi inap save bilong wanem yumi mas sakim pasin bilong tingting nabaut long samting bilong graun. Stori bilong Satan i kamapim klia ol samting nogut inap kamap sapos yumi tingting nabaut long samting bilong helpim yumi yet tasol. Satan i kirap long ting olsem em yet i gat biknem, na dispela tingting i kirapim em long mangalim bikpela namba bilong Jehova, em Nambawan Bikpela bilong heven na graun, na em i laik bai ol man i mas lotuim em. (Luk 4:5-8) Em i tingting nabaut long samting i no inap kamap tru, a? Tru tumas! I olsem em i driman nating. Dispela bai kamap klia long taim em i kalabus inap 1,000 yia, na dispela bai kamap klia moa yet long taim em i go daun long “bikpela hul i gat hatpela paia,” em namba 2 dai.—Kamapim Tok Hait 20:1-3, 10.
4. Satan i giamanim Iv olsem wanem?
4 Stori bilong Iv tu inap skulim yumi. Satan i wok long inapim laik bilong em long kisim bikpela namba na em i giamanim Iv—em i kirapim Iv long ting olsem sapos em i kaikai pikinini bilong diwai tambu bai em i no i dai, bai em i kamap olsem God long save wanem samting i gutpela, na wanem samting i nogut. Satan i kirapim Iv long tingting nabaut long samting bilong helpim em yet tasol, maski dispela i no inap kamap tru. Olsem na taim Jehova i skelim Iv wantaim man bilong em Adam long kot, Jehova i tok tupela i bin mekim pasin nogut. Long dispela as tupela yet i no inap i stap oltaim long Paradais, na sin i kalap long olgeta lain bilong tupela na ol tu i no inap kisim dispela gutpela sindaun.—Stat 3:1-19; Rom 5:12.
5. Wanem samting i mekim na sampela ensel i pundaun na mekim pasin nogut? Wanem samting i painim ol?
5 Na sampela ensel bilong God tu i stap olsem piksa bilong skulim yumi. (Stat 6:1-4) Ol i stap wantaim Jehova long heven na kisim planti blesing, tasol ol i no tingim dispela em inap long ol—ol i tingting nabaut long ol meri bilong graun na long amamas ol inap kisim sapos ol i mekim maritpasin wantaim ol. Dispela i kirapim ol long mekim dispela pasin i no stret. Olsem na nau ol dispela bikhet ensel i kalabus i stap long tudak bilong spirit, na ol i wet long bagarap olgeta long pinis bilong 1,000 yia bilong Krais i stap king.—2 Pita 2:4; Jut 6; Kamapim Tok Hait 20:10.
No Ken Tingting Nabaut Long Samting Bilong Graun
6, 7. Sapos yumi tingting nabaut long kisim planti mani samting, olsem wanem dispela inap nogutim yumi na giamanim yumi?
6 Orait, nau yumi ken skelim wanpela samting Satan i kirapim planti man long tingting nabaut long en na em inap nogutim ol tru. Long rot bilong ol nius na redio na televisen samting, Satan i save kirapim ol man long tingting nabaut long samting bilong graun. Planti taim pasin bilong laikim tumas mani kago i kirapim man long tingting nabaut olsem. Sapos yumi gat mani kago, i no gat rong long dispela. Sampela man i givim bel long God, olsem Abraham na Jop na King Devit, ol i maniman na ol i gat planti samting, tasol bel bilong ol i no skrap long kisim mani kago. Planti man i tingting nabaut, olsem driman, long kisim planti mani samting, na dispela i save kirapim ol long wok strong inap planti yia bambai ol i ken kisim planti samting. Dispela kain tingting i save kirapim ol long mekim olgeta kain pilai laki, olsem pilai long hosres na baim laki tiket samting. Tasol nogut bel bilong yumi i giamanim yumi na yumi ting sapos yumi kisim planti mani, dispela inap helpim yumi long i stap gutpela. Tingim dispela tok i tru: “Maski yu gat planti mani, em i no inap helpim yu long taim Bikpela i laik bekim ol rong bilong yu. Tasol sapos yu bihainim stretpela pasin, dispela bai i helpim yu na yu no ken i dai kwik.” (Sindaun 11:4) Tru tumas, mani kago i no inap helpim yumi long winim taim bilong “bikpela hevi tru.”—Matyu 24:21; Kamapim Tok Hait 7:9, 14.
7 Mani kago inap giamanim yumi. Olsem na Baibel i tok: “Ol maniman i ting, mani bilong ol i banisim ol, na bai ol i stap gut, olsem taun i gat strongpela banis.” (Sindaun 18:11) Tru, ol “i ting” mani inap lukautim ol, tasol dispela tingting i giamanim ol, long wanem, mani inap helpim ol liklik tasol long taim pe bilong ol samting i go antap, o ol bisnis i bagarap, o gavman i senis, o bikpela sik bilong i dai i painim ol. Krais Jisas i toksave olsem sapos yumi ting mani kago inap helpim yumi, yumi longlong. (Luk 12:13-21) Pol tu i givim toksave olsem long yumi, em i tok: “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”—1 Timoti 6:10.
8. Planti manmeri i save tingting nabaut long pasin pamuk samting o olsem wanem? Dispela inap nogutim ol olsem wanem?
8 Na olsem wanem long tingting nabaut long mekim pasin pamuk? Yumi gat sin na dispela i kirapim planti tru long tingting nabaut oltaim long pasin pamuk. Olsem na ol i laik tumas long harim olkain tok doti long pasin sem. Long sampela kantri ol inap harim dispela kain tok long rot bilong telefon. Long hap bilong Amerika, dispela wok long telefon i kamap wanpela bikpela wok bisnis i pulim bikpela mani. Orait, sapos yumi tok yumi Kristen i bihainim stretpela pasin, tasol oltaim yumi tingting long pasin pamuk, yumi man bilong giaman, a? Na sapos yumi tingting nabaut long dispela kain pasin, dispela inap kirapim yumi long mekim dispela pasin. Sampela Kristen i bin pundaun olsem na mekim pasin pamuk o bagarapim marit na kongrigesen i bin rausim ol. Sapos yumi tingim tok bilong Jisas long Matyu 5:27, 28, yumi ken save, olgeta man i tingting nabaut oltaim long pasin pamuk ol i gat asua long mekim dispela pasin, long wanem, i olsem ol i mekim pinis long bel bilong ol.
9. Baibel i givim wanem ol gutpela tok long yumi bilong helpim yumi long was gut na sakim pasin bilong tingting nabaut long ol pasin bilong graun?
9 Bel bilong yumi ol sinman i save tingting nabaut long ol samting bilong graun, olsem na bilong sakim dispela kain tingting, yumi mas tingim gut toksave bilong Pol: “I no gat wanpela samting God i bin wokim, em inap hait long pes bilong God. . . . Na God tasol bai i skelim olgeta pasin yumi mekim.” (Hibru 4:13) Long olgeta taim yumi mas laik long bihainim pasin olsem bilong Moses, em “Moses i mekim wankain pasin olsem man i bin lukim God, na em i stap strong tru.” (Hibru 11:27) Tru tumas, long olgeta taim yumi mas tokim skin bilong yumi olsem Jehova i nolaik tru long pasin bilong tingting nabaut long samting bilong graun, na dispela kain tingting i nogutim yumi tasol—i no helpim yumi liklik. Yumi mas wok strong long bihainim olgeta pasin em spirit bilong God i as bilong en, olsem pasin bilong bosim gut skin, long wanem, sapos yumi bihainim ol pasin bilong olpela bel, bai yumi bagarap.—Galesia 5:22, 23; 6:7, 8.
Ol Samting Tru Bilong Kingdom
10, 11. (a) I gat wanem samting na yumi ken save tru, i gat Man i bin wokim olgeta samting? (b) I gat wanem samting na yumi ken save tru, Baibel em i buk bilong God? (c) I gat wanem samting na yumi ken save, King bilong Kingdom bilong God em i stap tru?
10 Gutpela rot bilong sakim pasin bilong tingting nabaut long samting bilong graun, em olsem: Yumi mas givim bel long ol samting tru bilong Kingdom. Ol samting tru bilong Kingdom em God yet i kamapim, ol dispela samting i narapela kain tru long ol dispela kain tingting i save giamanim yumi. Olsem wanem long God yet? Em i samting tru? Tru tumas. Olgeta samting God i bin wokim i kamapim klia olsem God em i stap tru. (Rom 1:20) Yumi ken tingim sampela tok bilong wanpela buk (The Divine Plan of the Ages) em Sosaiti Was Taua i bin wokim 100 yia samting bipo, em dispela buk i tok: “Sapos man inap lukluk long antap long rot bilong glas bilong lukluk long ol sta o long ai bilong em yet, bai em i lukim ol planti planti samting i stap, em mak bilong en i stret olgeta, na i gutpela bilong lukim, na i save bihainim lo, na wok gut wantaim, na i kain kain, na sapos em i tok, . . . ol dispela samting i bin kamap nating, no gat Man i bin wokim, . . . orait em i longlong man, olsem Baibel i tok.”—Buk Song 14:1.
11 Baibel i lainim yumi long olgeta samting bilong Kingdom. Tasol tru Baibel em i Tok bilong God? Tru tumas. Ol samting i kamapim klia olsem Baibel em i buk bilong God em olsem: Ol tok bilong en i stret wantaim, na em i kamapim save i stret wantaim saiens, na em i gat bikpela strong bilong kirapim ol man long senisim pasin bilong ol, na ol tok profet bilong en i save kamap tru.a Orait, olsem wanem long King bilong dispela Kingdom, em Krais Jisas? Em i bin i stap tru? Ol tok bilong 4-pela Gutnius na bilong ol pas long Nupela Testamen, em spirit bilong God i as bilong en, dispela i kamapim klia tru olsem Krais Jisas i bin i stap tru. Na buk bilong lotu Juda, na tok bilong ol Juda na Rom i stap long taim bilong ol aposel na ol i bin raitim stori bilong bipo, dispela tu i kamapim klia olsem Jisas em i bin i stap tru.
12, 13. Wanem ol samting i kamapim klia olsem Kingdom bilong God em i samting tru?
12 Olsem wanem long Kingdom yet? Em i samting tru? Ol misin i holim nating nem Kristen ol i no tingim tumas Kingdom, olsem tok bilong wanpela man i gat biknem long lotu Presbitirian i kamapim, em i tok: “Insait long 30 yia i go pinis, mi no bin harim wanpela pasto i mekim ol tok bilong helpim lain bilong em long save, Kingdom em i samting tru.” Tasol as tok bilong Baibel i olsem: Long rot bilong dispela Kingdom bai God Jehova i mekim holi nem bilong em. God yet i mekim namba wan tok promis long Kingdom. Em i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Lain Israel i stap olsem piksa bilong dispela Kingdom, na ol i stap piksa olsem moa yet long taim bilong King Solomon. (Buk Song 72) Ol tok bilong Kingdom em bikpela tok Jisas i autim. (Matyu 4:17) Em i mekim planti tok piksa long Kingdom, olsem long Matyu sapta 13. Jisas i tok, yumi mas beten long Kingdom i kam, na yumi mas wok long painim Kingdom pastaim. (Matyu 6:9, 10, 33) Nupela Testamen i stori long Kingdom inap olsem 150 taim.
13 Kingdom em i wanpela gavman tru i gat strong na namba, na em bai inapim olgeta stretpela laik bilong ol man. I gat ol lo bilong en i stap long Baibel. Em i mekim pinis planti wok. I gat ol manmeri i stap aninit long en—em ol 4,000,000 samting Witnes Bilong Jehova. Long 211 kantri ol i autim gutpela tok bilong Kingdom bilong God na truim tok bilong Matyu 24:14. Long yia bilong wok bilong ol bilong 1991, ol i bin lusim 951,870,021 aua long autim tok bilong Kingdom. Dispela wok i kamapim tru kaikai—planti planti man i kisim save long ‘gutpela tok ples,’ em tok i tru bilong Baibel.—Sefanaia 3:9.
Wok Strong Long Kisim Ol Samting Tru Bilong Kingdom
14. Yumi ken mekim wanem na bai yumi bilip moa yet olsem Kingdom em i samting tru?
14 Tasol olsem wanem yumi ken wok strong long kisim ol samting tru bilong Kingdom? Yumi mas i gat strongpela bilip i stap olsem as bilong ol samting yumi wetim i kamap. Yumi mas bilip tru olsem nupela taim bai kamap olsem God i tok promis pinis. (2 Pita 3:13) Na yumi mas bilip tru long tok promis olsem God “bai i mekim drai wara i stap long ai bilong olgeta [manmeri]. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (Kamapim Tok Hait 21:4) Tasol olsem wanem yumi ken save, ol dispela samting bai kamap tru na i no olsem yumi driman nating tasol long en? Em i mas kamap tru long taim God i makim pinis, long wanem, God i no inap giaman. (Taitus 1:1, 2; Hibru 6:18) Yumi mas tingim gut ol dispela tok promis long bel. Na long tingting bilong yumi, yumi mas lukim olsem yumi stap long dispela nupela taim na kisim ol blesing bilong en. Dispela kain tingting i no olsem yumi driman long samting i no inap kamap tru. Nogat. Dispela i kamapim bilip bilong yumi, olsem yumi bilip tru long dispela samting. Olsem Pol i tok: “Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:1) Olsem na oltaim yumi mas wok long strongim bilip bilong yumi—yumi mas stadi long Baibel na long ol buk na nius Kristen i bilong helpim yumi long save long as bilong ol tok bilong Baibel; na yumi mas wok strong long autim tok bilong Kingdom long haus bilong ol man na long kain kain taim na ples.
15. Yumi gat wanem wok long wok Kristen bilong autim tok?
15 Na yumi mas wok gut wantaim ol samting tru bilong Kingdom, olsem na yumi mas mekim gutpela wok moa bilong autim tok. Bikpela wok i stap yet na yumi ken mekim gutpela moa olsem wanem? (Matyu 9:37, 38) Yumi inap lain. Maski yumi bin insait long wok autim tok inap hamas yia, yumi inap lain long mekim gutpela moa. Sapos yumi lain long mekim gutpela wok moa long Baibel, bai yumi inap helpim ol narapela long harim maus bilong King Krais Jisas. (Lukim Jon 10:16.) Dispela wok bai mekim na man inap lus olgeta o kisim laip i stap oltaim. Sapos yumi tingim dispela samting, bai yumi wok strong long autim tok planti taim long olgeta hap teritori bilong yumi, na bai planti taim ol manmeri long dispela hap i gat rot bilong kamapim bel bilong ol, olsem ol i “sipsip” o “meme.” (Matyu 25:31-46) Olsem na yumi mas raitim gut long notbuk ol haus i no gat man na ol man i laik harim tok bilong Kingdom.
Wok Strong Yet Long Kisim Kingdom
16. Husat ol i stap olsem gutpela piksa long pasin bilong wok strong long kisim ol samting tru bilong Kingdom? Olsem wanem ol i “mekim olkain pasin bilong pait” bilong kisim Kingdom?
16 Yumi mas taitim bun bambai yumi inap wok strong yet long kisim ol samting tru bilong Kingdom. Lain remnan, olsem hap lain bilong ol Kristen God i makim bilong heven, ol i wok strong yet na dispela i strongim yumi, a? Inap planti yia pinis ol i wok strong long kisim ol samting tru bilong Kingdom. Jisas i stori long dispela wok, olsem: “Stat long taim Jon Bilong Baptais i autim tok na i kam inap nau, ol strongpela man bilong pait i bin wok strong long kisim kingdom bilong heven, na ol i bin mekim olkain pasin bilong pait.” (Matyu 11:12) Dispela tok i no makim olsem ol birua i mekim pait na kisim Kingdom. Nogat. Dispela i makim wok em lain bilong kisim Kingdom i mekim bambai ol inap kisim. Wanpela saveman bilong Baibel i tok: “Dispela tok i makim olsem man i gat bikpela laik na em i taitim bun, olsem pait strong, bambai em inap kisim kingdom bilong Krais i wok long i kam klostu.” Lain remnan i bin mekim olsem. Na ol “arapela sipsip” tu i mas wok strong olsem bambai ol inap i stap long graun aninit long Kingdom bilong God.—Jon 10:16.
17. Ol man i wok strong long tingting nabaut long samting bilong graun, wanem samting bai painim ol?
17 Tru tumas, yumi stap long wanpela bikpela taim bilong rot i op. Ol manmeri i wok strong long tingting nabaut long samting bilong graun, i olsem ol i slip na driman nating, tasol i no longtaim na bai ol i kirap na lukim samting tru i kamap. Baibel i stori long samting tru bai painim ol dispela kain man olsem: “I olsem man i hangre na i driman long em i kaikai, tasol taim em i kirap, em i pilim hangre yet. Na i olsem man i dai tru long dring wara, em i driman long em i dring wara, tasol taim em i kirap, em i pilim nek bilong en i drai yet.” (Aisaia 29:8) Tru tumas, ol samting ol man bilong dispela graun i tingting nabaut long en, olsem driman long en, dispela i no inap helpim ol long i stap belgut na amamas.
18. Kingdom em i samting tru, olsem na yumi mas mekim wanem? Na wanem samting inap painim yumi?
18 Tasol Kingdom bilong Jehova em i samting tru. Kingdom i stap tru na i wok i stap, tasol klostu nau bai bagarap i painim ol samting nogut bilong dispela graun na bai i pinis olgeta. Olsem na yumi mas tingim gut tok bilong Pol, em i tok: “Nogut yumi slip, olsem ol arapela man. Mobeta ai bilong yumi i op i stap, na tingting bilong yumi i klia.” (1 Tesalonaika 5:6) Bel na tingting bilong yumi i mas pas long ol samting tru bilong Kingdom, na bai yumi inap kisim ol blesing bilong i stap oltaim. Yumi mas wok strong bambai King bilong dispela Kingdom i ken tokim yumi: “Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis.”—Matyu 25:34.
[Ol Futnot]
a Lukim buk (tok Inglis) The Bible—God’s Word or Man’s? em Sosaiti Wastaua bilong Nu Yok i wokim.
Bai Yu Bekim Wanem Tok?
◻ Yumi no ken tingting nabaut long wanem samting bilong graun? Bilong wanem yumi mas sakim dispela kain tingting?
◻ Stori bilong husat husat i kamapim klia olsem sapos yumi tingting nabaut yumi mekim pasin longlong?
◻ Olsem wanem yumi save i gat Man i bin wokim olgeta samting? na tru Baibel em i Tok bilong God? na Krais Jisas na Kingdom i stap tru?
◻ Yumi ken mekim wanem bilong strongim bilip long ol samting tru bilong Kingdom?
[Piksa long pes 15]
Planti man i laik tumas long kisim mani kago na dispela i kirapim ol long tingting nabaut long samting bilong graun
[Piksa long pes 16]
Autim tok bilong Kingdom em wanpela rot bilong wok strong long kisim ol samting tru bilong Kingdom
[Piksa long pes 17]
Yu wok strong long stadi long Baibel bambai yu inap wok strong long kisim ol samting tru bilong Kingdom?