Wok Ol Misin i Mekim Long Afrika
LONG 1867, Sals Lavisri, em wanpela Katolik bilong Frans, em i kamap asbisop bilong Aljirs na em i kam long Afrika. Em i tok, ‘God i makim kantri Frans bilong mekim kantri Aljiria i kamap wanpela strongpela kantri Kristen.’
Tasol Lavisri i no tingting long Aljiria tasol. Nogat. Em i gat bikpela tingting long mekim ‘olgeta man bilong Sentral na Not Afrika wantaim i kamap Kristen,’ olsem na em i salim ol misineri i go brukim ples wesan nating bilong inapim dispela wok.
Long hap wes na saut na is bilong Afrika, ol misineri Talatala i wok i stap. Ol i kisim planti bikpela hevi, olsem: Oltaim sik malaria i kisim ol na dispela i mekim na skin i guria na tuhat, na ai i raun na tingting i paul. Kwiktaim ol sik bilong ples hat i pinisim strong bilong ol na planti ol i dai bihain liklik long ol i kamap long Afrika. Tasol planti narapela ol i wok long i kam. Wanpela man, nem bilong em Adlai Stevenson, em i tok: ‘I gat planti samting i kirapim ol man i raun long Afrika long tingim ol misineri ol i no man bilong pret. Ol i bin kisim sik yelo fiva, na pekpek blut, na ol liklik snek i pulap long bel bilong ol. Mi lukim ol matmat bilong i stap long olgeta hap bilong Afrika.’
Samting Ol Misineri i Kamapim
Taim ol misineri i go kamap long planti hap long Afrika, ol i kisim save olsem klostu olgeta lain ol i no save long rit rait. Long wanpela buk (Christianity in Africa as Seen by Africans), Ram Desai i tok, ‘i gat 800 samting tok ples i stap, tasol taim ol misineri i no kam yet, i gat 4-pela tasol ol i bin raitim.’ Olsem na ol misineri i tingim na wokim rot bilong raitim ol dispela tok ples em bipo ol i no bin raitim. Bihain, ol i wokim ol buk bilong rit rait na kirapim wok bilong lainim ol man long kaunim buk. Bilong inapim dispela wok, ol i wokim ol haus skul long olgeta hap bilong Afrika.
Ol misineri i wokim ol haus sik tu. Ram Desai i tok: ‘No gat narapela lain long Afrika i bin helpim ol man long ol samting bilong skin olsem ol misineri i bin mekim.’ Ol Afrika i amamas long ol haus sik na ol marasin samting ol inap kisim, na ol i laikim tu ol samting bilong skin i kam long hap bilong Yurop. Sampela misineri ol i kamapim ol liklik tred-stua, long wanem, ol i ting olsem long dispela rot ol inap helpim man long tanim bel na kamap Kristen. Olsem: Wanpela misin (Basel Misin) bilong Swiselan, ol i kamapim wanpela bisnis long kakao long Gana. Ol i kisim save olsem diwai kakao i kamap gutpela long dispela hap, olsem na long nau Gana i save kamapim planti kakao tru, winim planti ol narapela kantri.
Wanpela bikpela wok tru ol misineri i mekim em ol i tanim Baibel long ol tok ples bilong Afrika. Tasol ol man i autim tok bilong Baibel ol i mas mekim narapela bikpela wok tu. Aposel Pol i kamapim klia dispela samting, taim em i kamapim askim olsem: “Yupela i save skulim ol arapela manmeri, tasol bilong wanem yupela i no save skulim yupela yet? Yupela i save tok, ol man i no ken stil, tasol ating yupela yet i save stil?” Baibel i mekim strongpela toksave olsem ol man i skulim narapela long ol bilip Kristen, ol yet i mas bihainim ol gutpela lo i stap long Baibel, em Tok bilong God.—Rom 2:21, 24.
Olsem wanem long ol samting ol misin i mekim long Afrika? Wok ol i mekim i bin litimapim nem bilong God, em As bilong Baibel, o dispela i paulim ol bilip Kristen tru.