Yupela Ol Elda—Stretim Ol Long Pasin Isi
BEL bilong Kristen tru i olsem wanpela gaden i karim gutpela kaikai. Long bel bilong em ol gutpela pasin i stap, olsem laikim tru ol man, amamas, bel isi, i no belhat kwik, helpim ol man, mekim gutpela pasin long ol, wokabaut stret oltaim, stap isi, daunim laik bilong olpela bel. Ol dispela gutpela pasin i olsem gutpela kaikai em spirit holi i kamapim na God Jehova i save givim long ol wokman bilong em i dediket pinis long em. (Galesia 5:22, 23) Tasol sapos man i laik lukautim gut dispela “gaden,” olsem bel bilong em, na bai Jehova i amamas long dispela “gaden,” em i mas wok strong oltaim long klinim dispela “gaden” na kamautim ol gras nogut, olsem sin yumi kisim long namba wan tumbuna.—Rom 5:5, 12.
Sampela taim sampela samting nogut, olsem gras nogut, i save kamap insait long bel bilong Kristen. Ating inap planti yia pinis em i bin mekim wok bilong God na i stap strong long ol samting bilong spirit, tasol wanpela hevi i kamap. Ating as bilong dispela, em Kristen i bin poroman wantaim ol man bilong dispela graun, o em i bin mekim samting na em i no skelim gut pastaim. Orait, ol elda i ken mekim wanem bilong helpim em long ol samting bilong spirit?
Gutpela Tok Bilong Aposel
Bilong helpim wanpela Kristen i bin mekim rong, ol elda i mas bihainim tok bilong aposel Pol, olsem: “Sapos yupela i save olsem wanpela bilong yupela i bin mekim sin, orait yupela . . . i mas mekim pasin isi long dispela man na helpim em long stretim pasin bilong em. Tasol yupela i mas lukaut gut long yupela yet. Nogut Satan i traim yupela na yupela tu i pundaun long sin.” (Galesia 6:1) Taim wanpela Kristen i no tingting gut na em i mekim rong, ol elda i mas kirap kwik long helpim em, no ken lusim taim.
Dispela tok “stretim” long tok Grik i olsem ka·tar·tiʹzo, na em i makim tu wok bilong stretim umben i bruk. (Matyu 4:21) Na dispela tok i makim tu olsem stretim wanpela bun i bruk. Taim dokta i laik stretim bun i bruk, em i save was gut na mekim isi isi, nogut em i givim bikpela pen tumas long dispela man. Na i olsem tu taim l elda i mas helpim wanpela brata o sista long stretim pasin bilong em—ol i mas tingting gut na mekim tok isi na pasin sori.
Taim ol elda i laik helpim man o meri long stretim pasin bilong em na ol i mekim long pasin isi, ol i kamapim long ples klia olsem ol yet i save bihainim ol pasin bilong spirit. Yumi save, sapos Jisas i gat wok long stretim man, em bai mekim long pasin isi, long wanem, em yet i gat pasin isi. (Matyu 11:29) Ol elda i mas mekim dispela kain pasin long wanpela wokman bilong Jehova em i bin popaia na mekim rong, long wanem, ol tu inap popaia na mekim rong, maski bel bilong ol i gat laik long mekim pasin i stret.
Ol dispela elda i mas mekim pasin sori na “karim hevi” bilong ol wanbilip. Na tru tumas, ol elda i gat bikpela laik long helpim brata o sista long sakim Satan na sakim ol traim na ol laik nogut bilong bel, na sakim ol samting nogut em sin i laik kirapim yumi long mekim. Dispela gutpela wok bilong ol wasman Kristen em wanpela rot bilong ol long “inapim tru lo bilong Krais.”—Galesia 6:2.
Ol elda em ol inapim tru ol mak bilong spirit ol elda i mas winim, ol i gat pasin daun, long wanem, ol i save, “sapos wanpela man i ting em i gat nem, tasol em i no gat nem, orait dispela man i giamanim em yet.” (Galesia 6:3) Maski ol elda i wok strong tru long mekim ol samting i stret tasol na i save helpim gut ol man, sampela taim ol bai popaia long bihainim stret pasin sori bilong Pikinini bilong God, em Krais Jisas. Tasol maski sampela taim ol i no inap winim dispela mak, ol i mas wok strong yet long winim.
Ol elda i save, i no stret sapos ol i mekim pasin antap na ol i daunim dispela wanbilip na mekim olsem em i man nogut na ol yet i stretpela man! Jisas i no inap mekim pasin olsem. Em yet i bin i dai bilong kisim bek ol pren bilong em na ol birua bilong em tu! Ol elda i laik mekim wankain pasin sori taim ol i wok long helpim ol brata sista long stretim pasin bilong ol na bai ol i ken bihainim moa yet ol stretpela lo bilong Papa bilong ol long heven na i stap gut long em. Orait, ol elda i ken mekim wanem ol samting bilong helpim ol long stretim bek ol wanbilip bilong ol i bin mekim rong?
Sampela Samting Ol i Ken Mekim
Beten askim Jehova long soim rot long yupela, na mekim tok isi na pasin isi. Jisas i gat pasin isi, na em i bin beten strong long Papa bilong em long soim rot long em, na oltaim em i mekim ol samting Papa bilong em i laikim. (Matyu 21:5; Jon 8:29) Ol elda tu i mas mekim olsem taim ol i laik helpim wanpela i bin mekim rong na bai em i ken stretim pasin bilong em. Elda em i nambatu wasman, na em i mas i gat pasin isi na wok long mekim gut bel bilong man na mekim ol tok bilong strongim em—i no bilong sutim strongpela tok long em olsem man i stap long kot. Taim ol elda i toktok wantaim dispela Kristen, ol i mas mekim ol samting bambai bel bilong em i ken i stap isi na em i ken kamapim gut tingting bilong em. Olsem na taim ol i bung wantaim em na ol i laik kirapim tok, ol i mas beten pastaim, na dispela bai helpim ol. Taim ol i givim tok long em long pasin isi, bel bilong em bai pilim tru—em bai save ol elda i laik mekim ol samting God i laikim, olsem Jisas i laik mekim. Na taim tok i pinis ol i ken beten, na ating em bai pilim olsem em i mas bihainim tok ol i bin givim long em long pasin sori na pasin isi.
Beten pinis, orait givim gutpela tok long em. Kamapim ol gutpela pasin bilong em, olsem em i save mekim gut long ol man, o em i save mekim ol samting em i tok long mekim, o em i givim bel long mekim wok. Na stori tu long em i bin i stap gut long wok bilong Jehova inap planti yia pinis. Sapos ol elda i kamapim ol dispela samting, dispela brata o sista bai save, ol i bihainim pasin bilong Krais na ol i tingim em na ol i laik helpim em. Taim Jisas i laik givim tok long kongrigesen bilong Taiataira, pastaim em i givim gutpela tok long ol, olsem: “Mi save, yu laikim tru ol manmeri, na yu bilip long mi, na yu save mekim olkain wok bilong helpim ol arapela. Mi save, yu sanap strong long olgeta hevi i kamap long yu. Mi save, ol pasin yu bin mekim bipo, ol i gutpela, na nau ol pasin bilong yu i kamap gutpela moa yet.” (KTH 2:19) Taim kongrigesen i harim dispela tok, ol i save Jisas i tingim ol gutpela wok ol i mekim. Tru, i gat sampela pasin bilong kongrigesen i no gutpela—ol i larim pasin olsem bilong Jesebel i stap insait long kongrigesen—tasol ol narapela pasin bilong kongrigesen i gutpela na ol i givim bel long mekim wok bilong God. Jisas i laik bai ol i save, em i lukim pinis ol dispela gutpela pasin na wok bilong ol na em i save tingim ol. (KTH 2:20) Ol elda tu, sapos ol i save long ol gutpela pasin na wok bilong Kristen, ol i mas kamapim long em bilong strongim bel bilong em.
Taim Kristen i popaia long ol samting bilong spirit, nogut ol elda i ting ol i mas bung na mekim kot na i no gat narapela rot. Ol elda i mas lukautim lain bilong God na bai oganaisesen bilong em i ken i stap klin. Tasol long sampela kain popaia em Kristen i mekim na ol elda i mas givim strongpela tok long em bilong stretim em, ating wanpela o tupela elda i ken mekim, na i no gat wok long kamapim komiti bilong harim kot. Planti Kristen, taim ol i popaia na mekim rong samting, i no olsem ol i man nogut na long laik bilong ol yet ol i mekim, nogat. Sin i stap long skin bilong ol, na dispela i mekim na ol i pundaun. Ol elda i mas mekim pasin isi long ol sipsip na tingim dispela tok, olsem: “Sapos wanpela man i no bin sori long ol arapela man, orait taim God i skelim em long kot, God bai i no sori liklik long em. Tasol man i save sori long ol arapela man, em bai i winim kot.” (Jems 2:13; Aposel 20:28-30) Olsem na sapos Kristen i pilim tru rong bilong em, ol elda i no gat wok long mekim planti strongpela tok long dispela samting; ol i mas givim tok long em long pasin isi na bihainim pasin sori na marimari bilong God bilong yumi, Jehova.—Efesus 4:32.
Tingim gut wanem samting i bin kirapim em long mekim rong. Ol elda i mas putim gut yau taim dispela wanbilip i kamapim bel bilong em long ol. Ol i ken tingim pasin bilong God, ‘em i no givim baksait long man i pilim hevi long sin na i daunim em yet,’ na ol elda tu i no ken mekim olsem. (Song 51:17) Ating poroman marit bilong em i no bin mekim gut long em, o em i gat sampela bel hevi i stap longtaim na dispela i pinisim hap strong bilong em o i paulim tingting bilong em na em i no bin skelim gut samting em i laik mekim, i stret o nogat. Ol elda i gat pasin sori ol bai tingim ol dispela samting. Tru, Pol i bin tokim ol brata, “Mipela i laik kirapim yupela long stretim pasin bilong ol man i save [bikhet],” tasol Pol i tok tu long “strongim bel bilong ol man i save pret na long helpim ol man i no strong. Na [ol] i mas isi isi long olgeta man.” (1 Tesalonaika 5:14) Tru, ol elda i no laik daunim ol stretpela lo bilong God, tasol ol i mas tingim gut samting i bin kirapim man long mekim dispela popaia, na ol i mas isi long em, olsem God i save mekim.—Song 103:10-14; 130:3.
No ken wok long daunim em na bagarapim bel bilong em. Yumi no laik bai brata bilong yumi i ting em i nogut pinis na i no inap mekim wanpela gutpela samting. Yumi mas tokim em olsem em i gat sampela gutpela pasin Kristen na em i givim bel tru long God. Dispela tok bai strongim bel bilong em na kirapim em long stretim dispela popaia em i bin mekim. Pol i bin givim gutpela tok long ol brata sista long Korin, em i tok, oltaim em i save ‘litimapim nem bilong ol long ai bilong ol arapela,’ long wanem, ‘bel bilong ol i kirap long mekim wok bilong helpim ol arapela,’ na ol i “redi long givim ol samting.” Ating dispela tok bilong Pol i kirapim ol Korin long mekim moa yet dispela gutpela pasin.—2 Korin 9:1-3.
Tokim em, em i mas bilip olsem Jehova inap helpim em long stretim pasin bilong em. Wok strong long helpim em bambai em i ken save, sapos em i bilip long Jehova na bihainim tok bilong Em long Baibel, dispela bai helpim em long stretim pasin bilong em. Olsem na ol tok bilong yumi i mas i gat as bilong en long Baibel na ol buk i kamapim ol tok bilong Baibel. Ol elda i laik mekim tupela wok: (1) helpim dispela brata o sista long pilim tingting bilong Jehova long dispela samting em i bin mekim; (2) kamapim klia olsem i gat sampela tingting o tok bilong Jehova em i no bin bihainim.
Mekim sampela askim i sutim dispela rong em i bin mekim, tasol mekim long pasin isi. Ating dispela bai mekim na bel bilong em bai pilim tru rong bilong em. Long maus bilong profet Malakai, Jehova i bin givim askim long lain bilong em na bai ol i pilim tru rong ol i bin mekim. Jehova i askim ol: “Yupela i save stilim ol samting bilong mi. Na yupela i ting dispela em i gutpela pasin, a?” (Malakai 3:8) Ol Israel i no bin givim hap kaikai bilong gaden long God olsem Lo i tok, na i olsem ol i stilim ol samting bilong God. Bilong stretim dispela rong, ol i mas inapim tru ol wok ol i mas mekim bilong lotuim Jehova, na ol i mas bilip olsem Jehova bai mekim gut tru long ol sapos ol i mekim olsem. Ol elda tu, taim ol i givim ol askim long man, ol i ken kamapim tu olsem yumi mas bilip long Jehova na bihainim tok bilong em, na em bai strongim yumi long mekim ol samting i stret. (Malakai 3:10) Sapos ol elda i putim dispela tingting i go daun long bel bilong brata, dispela inap helpim em long stretim pasin bilong em.—Hibru 12:13.
Kamapim klia olsem sapos em i bihainim ol dispela tok, dispela bai helpim em. Ol elda i mas tok klia long ol samting bai painim em sapos em i bihainim yet pasin i no stret, na ol i mas tokim em, sapos em i stretim pasin bilong em, dispela bai helpim em. Kongrigesen bilong Laodisia i slek long ol samting bilong spirit, na Jisas i givim strongpela tok long ol long ol samting bai painim ol sapos ol i no lusim dispela pasin. Tasol bihain Jisas i tokim ol, sapos ol i tanim bel na lusim dispela pasin na ol i kamap strongpela disaipel, ol bai kisim ol gutpela wok tru—wanpela wok, em ol bai stap king wantaim em long heven.—KTH 3:14-21.
Ol i mas save, em i bihainim ol dispela tok o nogat. Taim gutpela dokta i wok long stretim wanpela bun i bruk, sampela taim em i save lukim gut, olsem bun i wok long kamap gutpela o nogat. Olsem tasol ol elda i mas save, brata i bihainim tok ol i bin givim long em o nogat. Ol i ken tingting: Ol i mas wok yet long helpim em? Ol i mas givim dispela tok gen long em, tasol senisim liklik? Planti taim Jisas i mas givim tok long ol disaipel long mekim pasin daun. Inap longtaim liklik em i wok long givim tok long ol na em i mekim ol tok piksa bilong helpim ol long stretim tingting bilong ol. (Matyu 20:20-28; Mak 9:33-37; Luk 22:24-27; Jon 13:5-17) Ol elda tu, sapos sampela sampela taim ol i givim sampela tok moa bilong Baibel long brata o sista bilong helpim em long kamap strong gen long ol samting bilong spirit, dispela inap helpim em long stretim pasin bilong em.
Sapos em i wok long kamap gutpela liklik, tokim em, yu amamas long dispela. Sapos em i wok strong long bihainim tok bilong Baibel, tokim em, yu amamas long dispela samting. Dispela bai strongim bel bilong em na ating em bai wok strong moa long bihainim ol tok yupela i givim long em. Long namba wan pas Pol i salim long ol Korin, em i mas givim strongpela tok long ol. Orait, bihain Taitus i toksave long Pol olsem ol Korin i givim bel tru long bihainim tok bilong dispela pas bilong Pol, olsem na Pol i salim pas na em i tokim ol: “Nau mi amamas, tasol mi no amamas long bel hevi bilong yupela. Nogat. Mi amamas, long wanem, dispela bel hevi na sem i bin mekim yupela i tanim bel.”—2 Korin 7:9.
Samting Bilong Amamas Long En
Tru tumas, Pol i amamas tru taim em i harim olsem tok bilong em i bin helpim ol Korin. Long nau tu, ol elda i amamas tru taim wanpela wanbilip i pilim tru ol gutpela tok ol i bin givim long em na em i stretim pasin bilong em. Ol elda i kisim bikpela amamas taim ol inap helpim wanpela Kristen long tanim bel na rausim ol laik nogut i stap long bel bilong em, na bai ol gutpela pasin em spirit i kamapim i ken kamap gen long bel; i olsem em i rausim ol gras nogut long gaden na bai ol gutpela kaikai i ken kamap long en.
Taim ol elda i helpim wanpela Kristen na em i stretim pasin bilong em, i olsem ol i bin kisim em bek long rot bilong bagarap. (Lukim Jems 5:19, 20.) Olsem na em i mas pilim tru gutpela wok ol elda i bin mekim bilong helpim em na em i mas tenkyu long Jehova. Na em i ken tok tenkyu long ol elda tu long gutpela pasin sori na marimari ol i bin mekim long em. Na taim em i kamap strong gen, olgeta i ken amamas long ol elda i bin stretim em bek long pasin isi.