Yu Save Laikim Wanem Kain Man?

“MAN I LAIKIM WANPELA MERI. Meri i mas i gat retpela skin, na i no patpela, na em i winim pinis bikpela skul. Papamama i mas i gat mani na haus na graun samting, na ol i bilong wankain lain olsem mipela.”

OL DISPELA kain toksave i kamap planti taim long ol nius bilong India. Na long ol narapela hap tu bai yu inap lukim wankain toksave. Long India ol papamama i save putim ol dispela kain toksave taim ol i laik painim wanpela meri bilong pikinini man bilong ol. Taim sampela papamama i raitim pas long ol bilong toksave olsem ol i gat wanpela pikinini meri, ol i save salim piksa bilong meri tu, olsem em i pasim gutpela retpela klos bilong ol India na em i putim planti gutpela bilas gol long skin bilong em. Orait, sapos papamama bilong man i orait long wanpela meri, ol bai kirap stretim tok wantaim papamama bilong meri long dispela marit.

Samting Ol i Save Laikim

Long India ol i save laikim ol meri em skin bilong ol i olsem retpela, long wanem, ol i bilip olsem ol lain Hindu i gat blakpela skin ol i bilong ol pipia lain i no gat nem liklik. Wanpela stori nating i bin kamap long televisen long India, olsem: I gat tupela yangpela meri i stap, wanpela i gat retpela skin, na wanpela em skin i blakpela liklik. Meri i gat retpela skin em i no gutpela meri​—⁠em i gat hatpela pasin, tasol meri i gat blakpela skin em i gat pasin isi na em i save mekim gut long ol man. Orait, wanpela senis i kamap: Retskin meri i kisim blakpela skin, olsem strafe bilong em, na blakskin meri i kisim retpela skin, olsem gutpela pe bilong em. Dispela stori i makim olsem ol man i save laikim retpela skin.

Pasin bilong bel nogut long ol man bilong narapela skin i stap long planti hap. Sapos wanpela man Esia i go long hap bilong ol waitskin, ating em bai tok, ol i mekim nogut long em, long wanem, em i gat narapela kain skin na ai. Em i pilim olsem ol i bel nogut long em. Tasol taim em i go bek long ples, ating em yet bai kirap mekim wankain pasin long ol narapela lain i stap long ples bilong em. Long nau tu, ol man i save tingim skin na ples na lain bilong man na ol i skelim em long dispela.

Bipo King Solomon i tok, mani i save stiaim tingting bilong planti man. (Saveman 10:19) Dispela tok i stret tru! Sapos man i gat planti mani, em bai i gat nem long ai bilong ol man, na ol bai laikim em. Maski em i bin wok strong na em i kamap maniman, o em i bin mekim pasin giaman long bisnis na em i kamap maniman, planti man i no tingim dispela. Ol i litimapim nem bilong dispela kain man na bai em i ken laikim ol.

Na sapos man i bin winim bikpela skul, ol narapela i save litimapim nem bilong em. Taim nupela pikinini i kamap, papamama i save bungim mani bilong baim skul bilong em bihain. Taim em i gat 2-pela o 3-pela krismas, papamama i tingting long putim em long pilai-skul, na i olsem em i stap pinis long rot bilong kisim bikpela save na namba long skul yunivesiti. Sampela i ting, taim ol i winim pinis bikpela skul olsem yunivesiti samting, ol man i mas laikim ol na litimapim nem bilong ol.

Em nau, kala bilong skin, na bikpela skul, na mani, na lain bilong man​—⁠em ol samting ol man i save skelim narapela man long en​—⁠ol bai laikim em na mekim gut long em o nogat. Orait, yu save laikim wanem kain man? Yu ting man o meri i gat bikpela mani o em i gat retpela skin o em i bin skul gut em i winim ol narapela man? Sapos olsem, orait yu mas skelim gut dispela tingting bilong yu, i gat wanem as na yu ting olsem.

Dispela Tingting i Stret?

Wanpela buk (Hindu World) i stori long ol lain long India i no gat nem liklik na ol narapela lain bilong ples i daunim ol, na buk i tok, ‘Sapos wanpela man bilong dispela lain i kilim i dai wanpela Bramin (em bilong wanpela lain i gat nem) bai ol i givim bikpela pen tru long em na kilim em i dai, olsem strafe bilong em, na ol bai kisim olgeta samting bilong em. Tasol sapos wanpela bilong lain Bramin i kilim i dai wanpela bilong dispela lain i no gat nem, em i no ken kisim bikpela strafe​—⁠em bai baim kot tasol.’ Tru, buk i stori long taim bipo, tasol dispela pasin bilong birua long ol narapela lain bilong ples em i stap yet, na dispela i kirapim ol bikpela pait na planti manmeri ol i dai. Na pasin bilong birua long ol narapela lain o skin i no kamap long India tasol​—⁠em i kamap tu long Saut Afrika na Amerika na long ol narapela hap. As bilong en, em sampela lain i ting ol i winim ol narapela lain. Tasol dispela i no bin kamapim gutpela samting na helpim ol man long i stap isi wantaim.

Na olsem wanem long ol maniman? Tru planti ol i bin wok strong na mekim stretpela pasin long bisnis na ol i kamap maniman. Tasol planti maniman i insait long ol bikpela lain olsem raskol, em ol i mekim hait ol wok nogut, na ol i wok bisnis long ol drak nogut, na sampela i wok hait long baim ol samting bilong pait i go long ol narapela lain; ol i kisim bikpela mani tru long ol dispela rot. Tru, sampela i givim hap mani long ol lain i save helpim ol rabisman samting, tasol pasin nogut ol i bin mekim bilong kamap maniman i bin givim bikpela pen na hevi long planti man na bagarapim ol. Na sampela man i gat bisnis long wokim ol samting, ol i mekim pasin giaman na i no wokim gut, tasol ol i haitim dispela long gavman, olsem na sampela man i bin baim ol dispela samting na ol i kisim bagarap long en. Olsem na maski man i gat bikpela mani, dispela i no as na yumi ken litimapim nem bilong em.

Na olsem wanem long man i winim bikpela skul? Sapos em i gat bikpela nem na namba, yu ting dispela i makim olsem em i stretpela man? Yu ting yumi mas laikim kain man olsem? Tru, planti man i bin kisim bikpela save na ol i mekim gutpela wok long en bilong helpim ol man, na yumi ken litimapim nem bilong ol. Tasol ol samting i bin kamap bipo i kamapim klia olsem planti saveman i gat namba ol i bin mekim nogut long ol man nating na ol i mas wok strong tru na kisim liklik pe tasol, na ol i stap rabis. Na yumi ken tingim ol pasin nogut i kamap long planti skul yunivesiti samting​—⁠ol i save kisim drak, na planti ol i gat sik bilong pamuk, na planti sumatin i skul bambai ol i ken kisim wok mani i gat bikpela pe, na kisim namba na biknem. Olsem na maski man i winim bikpela skul na em i gat namba, dispela i no makim olsem em i stretpela man.

Em nau, kala bilong skin, na bikpela skul, na mani, na lain bilong man, na ol kain samting olsem, yumi no ken skelim man long dispela ol samting na yumi tok em i gutpela man o nogat. Ol Kristen i no ken tingim ol dispela samting na ol i litimapim nem bilong em na bai em i mekim gut long ol, nogat. Orait, yumi mas tingim wanem samting bilong man na yumi inap litimapim nem bilong em?