God i Save Laikim Husat?
YUMI i laik bai ol narapela i ken laikim yumi, a? Tasol ol Kristen i gat bikpela laik long God yet i mas laikim ol. Song 84:11 i tok long God olsem: “Em i save marimari long yumi na givim biknem long yumi. Em i no save pasim wanpela gutpela samting long ol manmeri i save wokabaut stret.” Taim Maria i karim Jisas, ol ensel i amamas na mekim tok promis olsem “ol man God i save belgut long ol, ol i ken i stap bel isi!”—Luk 2:14, Baibel Moffatt.
Tasol God i save laikim husat? God i save skelim ol olsem ol man yet i save mekim? Nogat. Stori i kamap paslain em i kamapim klia dispela samting. Baibel i tok, ol Kristen “i mas bihainim ol pasin [God] yet i save mekim.” Olsem na yumi mas askim skin bilong yumi: Mi save laikim ol man God i save laikim, o mi save bihainim pasin bilong ol man bilong graun long skelim man? (Efesus 5:1) Bilong Jehova i ken laikim yumi na orait long yumi, yumi mas bihainim tingting bilong Jehova long ol samting.
Pasin Bilong God
Aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Na Pita i tokaut tu olsem: “Long wanpela tumbuna tasol [God] i bin mekim olgeta lain manmeri i kamap.” (Aposel 10:34, 35; 17:26) Em nau, maski man i gat wanem kain skin, God i save mekim wankain pasin long ol. Olsem na sapos Kristen i tingim wanpela man i bilong wanem hap na em i gat wanem kain skin na em i bilong wanem lain, na long dispela as Kristen i laikim em na litimapim nem bilong em, dispela i no stret. Kristen i mas bihainim Jisas, em i gutpela piksa bilong yumi. Ol birua i bin tokaut olsem em i save mekim wankain pasin long olgeta man, maski ol i gat nem o ol i no gat nem.—Matyu 22:16.
Wanpela tok ol man i save mekim, olsem “long skin tasol,” dispela i makim samting i no bikpela samting. Na kala bilong skin tu i olsem—em i no makim olsem man i gat gutpela pasin o nogat. Olsem na taim yumi laik tingim husat man bai yumi poroman wantaim em o kaikai wantaim em o sekanim em, yumi no ken tingim skin bilong em. Wanpela yangpela meri em Baibel i stori long em, em i tok: “Skin bilong mi i blak, tasol mi naispela tumas. . . . Tru, skin bilong mi i blak, tasol . . . san i kukim mi na skin i kamap olsem.” (Solomon 1:5, 6) Lain bilong man o kala bilong skin i no gutpela as na yumi belgut long wanpela man o nogat. Bikpela samting em olsem: Yumi mas laikim ol man i save aninit long God na bihainim stretpela pasin.
Na God i ting olsem wanem long ol man i gat planti mani kago samting? God i save laikim tumas Pikinini bilong em Krais Jisas, winim olgeta narapela man. Tasol taim Jisas i stap long graun, “em i no gat ples bilong slip.” (Matyu 8:20) Em i no gat graun o haus o gaden o sipsip samting, nogat. Tasol Jehova i givim bikpela namba long em, winim olgeta man na ensel; God wanpela tasol i winim em.—Filipai 2:9.
God i belgut long Jisas, long wanem, em i bin mekim planti gutpela wok. (Lukim 1 Timoti 6:17, 18.) Jisas i tokim ol disaipel bilong em: “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting, na ol stilman i save brukim banis na stilim.” (Matyu 6:19, 20) Olsem na yumi no ken laikim ol maniman tasol. Ol Kristen i no ken skelim man long ol samting bilong skin em i holim. Kristen i mas laikim na poromanim ol man i save mekim laik bilong God, maski ol i maniman o rabisman long skin. Baibel i tok: “Ol man i stap rabis long ai bilong ol man bilong graun, ol dispela man tasol God i makim pinis bilong i stap gutpela tru long pasin bilong bilip. . . . Em bai i putim ol i stap insait long kingdom.” (Jems 2:5) Sapos yu holim wankain tingting olsem bilong God, bai yu no inap bihainim pasin bilong ol man long laikim ol maniman tasol.
Na olsem wanem long bikpela skul? God i laik kirapim yumi long kisim save na gutpela tingting, na Jisas yet em i nambawan gutpela tisa, winim olgeta narapela man long graun. (Sindaun 4:7; Matyu 7:29; Jon 7:46) Tasol God i no tingim ol man i gat bikpela save bilong dispela graun na em i laikim ol, nogat. Pol i tokim yumi: “Planti bilong yupela i no bin i stap olsem saveman long ai bilong ol man bilong dispela graun. . . . Tasol ol man God i makim, em ol man i gat kranki tingting long ai bilong ol arapela man, na long dispela pasin God i semim tru ol saveman bilong dispela graun.”—1 Korin 1:26, 27.
God i save laikim ol man i gat save long mekim ‘gutpela tok ples,’ olsem tok i tru bilong Baibel. (Sefanaia 3:9) Long nau Jehova yet i wok long skulim lain bilong em, na dispela skul i wok long go kamap long olgeta hap. Olsem profet Aisaia i tok, ol manmeri bilong olgeta lain bai tok olsem: “Kam, yumi go long maunten Saion, em maunten bilong [Jehova]. Yumi go long haus bilong God bilong Israel, bilong em i ken skulim yumi long ol pasin em i laik yumi i mekim, na bai yumi ken wokabaut long rot em yet i makim.” Olsem na ol Kristen i no ken litimapim nem bilong ol man i gat bikpela save bilong graun. Ol bai poromanim ol man i kamapim long maus na long pasin na wok bilong ol olsem ‘Jehova yet i skulim ol.’ Olsem bai ol dispela Kristen i kisim dispela ‘bel isi’ God i save givim long man.—Aisaia 2:3; 54:13.
God Inap Laikim Yumi Tu
Tru tumas, pasin bilong God long skelim ol man, olsem em bai belgut long ol o nogat, em i narapela kain long pasin bilong ol man. Tasol sapos yumi laik bai God i orait long yumi, yumi mas bihainim pasin na tingting bilong em long skelim man, na no ken bihainim pasin bilong ol man, ol i tingim ol yet tasol na ol i bel nogut long ol man bilong ol narapela lain na skin.
God i save lukim bel bilong man, na em i save laikim ol man i mekim ol gutpela pasin olsem pasin sori, na gutpela pasin, na mekim gut long man, na ol i no les kwik long man. Yumi tu i mas laikim ol kain man olsem. (1 Samuel 16:7; Galesia 5:22, 23) Yumi no ken lukim skin bilong man o tingim lain o ples bilong em—yumi mas lukim bel bilong man, olsem ol gutpela pasin i kirap long bel bilong em. Yumi no ken poromanim ol man i gat planti samting bilong skin na givim baksait long ol narapela. Yumi mas kisim tingting bilong God long mani kago samting, na wok long “mekim planti gutpela pasin bilong helpim ol arapela manmeri. Oltaim [yumi] mas givim planti samting long ol manmeri i sot.” (1 Timoti 6:18) Sapos yumi laik bai God i ken belgut long yumi, yumi mas wok long kisim stretpela save long God na Krais Jisas, na yumi mas i gat bikpela save long mekim ‘gutpela tok ples,’ olsem tok i tru. (Jon 17:3, 17) Sapos yumi mekim olsem, bai yumi insait long dispela lain em God i save belgut long ol.