Lukautim Ol Lapun—Wok na Gutpela Pe Bilong En
SINETSU i amamas long mekim wok Kristen bilong em. Famili bilong em, em meri bilong em wantaim mama bilong meri. Ol i wok wantaim wanpela liklik kongrigesen bilong ol Witnes Bilong Jehova na lainim ol man long Baibel. Bihain Sinetsu i kisim tok long mekim wok bilong raun lukim ol kongrigesen. I olsem long olgeta wik em wantaim meri bilong em i mas lusim narapela kongrigesen i go long narapela. Em i amamas long kisim dispela wok, tasol em i tingting: Husat bai lukautim Mama?
Planti famili i mas tingim kain samting olsem long bihain—olsem wanem ol inap lukautim gut lapun papamama bilong ol? Taim skin bilong papamama i stap gutpela yet na ol inap mekim wok, ating famili i no tingim tumas dispela samting. Tasol ol liklik samting inap kamapim klia olsem ol i wok long i go lapun. Olsem: Taim ol i laik putim tret i go insait long nil bilong samap, han bilong ol i save guria, o ol i lusim tingting long ol i bin putim we ol samting. Sampela taim, wantu tasol sik o bagarap i painim ol, na dispela i mekim na famili i save, em nau, ol i mas lukautim papamama.
Long sampela kantri, taim papamama i go lapun, sapos skin bilong ol i strong na ol i no sik tumas, ol i amamas long stap wantaim poroman marit bilong ol tasol. Tasol long planti hap, olsem Esia na Afrika, pasin bilong ol i olsem: Ol lapun i save stap wantaim namba wan pikinini man o ol narapela pikinini long wanpela haus. Na ol i bihainim moa yet dispela pasin sapos papa o mama i slip long bet tasol na ol i no inap wokabaut. Olsem: Long Japan, long olgeta lapun i winim 65 krismas na ol i no inap wokabaut tumas, inap 240,000 bilong ol em famili i save lukautim ol long haus.
Wok Bilong Yumi Olsem Baibel i Makim
Tru yumi stap long taim bilong ol man i “laikim ol yet tasol,” na no gat pasin sori i stap insait long famili, tasol olsem Baibel i makim, yumi gat wok bilong lukautim ol lapun. (2 Timoti 3:1-5) Tomiko i save lukautim lapun mama bilong em i gat sik Parkinson, na em i tokaut long wok em i ting em i mas mekim, olsem: “[Mama] i lukautim mi gut inap 20 yia. Nau mi laik mekim olsem long em.” King Solomon i tok: “Papa bilong yu i bin kamapim yu na yu mas harim tok bilong en. Na taim mama bilong yu i lapun pinis, yu no ken rabisim em.”—Sindaun 23:22.
Maski papa o mama i birua long pikinini i gat narapela lotu, pikinini i no ken kalapim dispela lo bilong Baibel. Aposel Pol i tok: “Sapos wanpela man i no lukautim ol wanblut tru bilong em yet . . . , orait dispela man i lusim pinis bilip bilong em, na em i man nogut tru.” (1 Timoti 5:8) Jisas i makim gutpela rot yumi ken bihainim—taim em i laik dai, em i stretim rot bambai narapela i ken lukautim mama bilong em.—Jon 19:26, 27.
Stretim Ol Hevi i Kamap
Taim tupela famili i sindaun gen wantaim, olgeta i mas senisim planti samting long sindaun bilong ol. Narapela i mas mekim pasin sori na pilim tru hevi bilong narapela, na no ken les kwik. Sapos namba wan pikinini man o narapela pikinini i kisim famili bilong em yet i go stap long haus bilong papamama, orait, i gat planti nupela samting i kamap. Ating papa i mas kisim nupela wok mani, na ol pikinini i mas go long nupela skul, na ol i mas lain long sindaun long nupela hap na save long ol man i stap klostu long ol. Na planti taim mama i mas mekim bikpela wok moa.
Bubu papamama ol tu bai hatwok long mekim ol dispela senis. Inap longtaim pinis ating tupela i amamas long tupela yet tasol i stap wantaim—ol i stap isi na i stap fri, tasol nau ol pikinini wantaim ol pren bilong ol bai mekim planti pairap samting. Inap longtaim pinis tupela lapun bubu yet ol i bin tingim ol samting ol i laik mekim na ating nau ol i no laik bai ol narapela i bosim ol. Planti papamama ol i save, taim ol i lapun pinis, famili bilong pikinini man bilong ol bai kam stap wantaim ol, olsem na ol i wokim narapela haus i stap klostu long haus bilong ol o ol i skruim sampela rum moa long haus bilong ol. Tasol ol dispela rum i no pas tru long haus na nau tupela famili i ken i stap narapela narapela.
Tasol sapos tupela lapun i mas i go sindaun wantaim pikinini bilong ol na haus i liklik, ating pikinini bilong ol i mas stretim sampela samting long haus bambai tupela lapun i gat ples slip bilong ol yet. Wanpela mama i stori long fopela pikinini meri bilong em ol i bel hevi taim ol man i karim bet na tebol samting i kam insait long rum slip bilong ol bambai bubu mama, em i gat 80 krismas, em i gat ples slip bilong em yet. Tasol taim olgeta i save long as bilong ol dispela senis na ol i tingim lo bilong Baibel i tok, man i givim bel long narapela “i no save tingting tumas long em yet,” orait, ol dispela hevi i wok long pinis.—1 Korin 13:5.
Lusim Pasin Bilong i Stap Fri
Ating bikpela hevi inap painim meri Kristen sapos man bilong em i no wanbilip bilong em na em i kisim famili i go stap wantaim papamama bilong em. Nau meri i gat bikpela wok long lukautim famili, na ating em i hatwok tru long mekim wok Kristen bilong em wantaim ol narapela wok em i mas mekim. Setsuko i tok: “Mama bilong man bilong mi, em tingting bilong em i no wok gut moa, na man i ting i no gutpela sapos mama i stap wanpis long haus, olsem na em i laik bai mi stap long haus long olgeta taim. Taim mi laik go long miting, em i kros na toktok planti. Pastaim mi tu mi pilim olsem i no stret sapos mi lusim em i stap wanpis. Tasol bihain mi save, i gat rot bilong stretim ol dispela hevi.”
Hisako i gat wankain hevi, na em i tok: “Taim mipela i go stap wantaim famili bilong man bilong mi, em i pret long ol wanblut bilong em na em i laik bai mi senisim lotu bilong mi na lusim wok Kristen bilong mi. Na ol wanblut i sindaun klostu long mipela ol i save kam lukim mipela long ol Sande, na mi hatwok long go long ol miting. Na tu, ol pikinini i laik pilai wantaim ol kasen bilong ol—ol i no laik go long ol miting. Mi save, mipela i no stap strong long ol samting bilong spirit olsem bipo. Na mi save mi mas sanap strong na tokim man bilong mi, lotu bilong mi em i bikpela samting long mi—em i no samting bilong senisim olsem laplap samting. Bihain, mipela i stretim dispela hevi.”
Bilong helpim ol na bai ol i no pas olgeta long wok, sampela i save baim wanpela meri i kam mekim wok long haus inap wanpela o tupela de long olgeta wik. Na sampela i save askim ol pikinini bilong ol, o ol wanblut, o ol pren long kongrigesen long helpim ol, na long dispela rot ol i gat hap taim bilong mekim wok Kristen na sampela samting bilong ol yet. Na taim man bilong ol i stap long haus, em tu i bin helpim ol.—Saveman 4:9.
Helpim Lapun Long Mekim Sampela Wok
I gat wok tu bilong helpim ol lapun long mekim sampela wok. Sampela lapun ol i amamas long helpim pikinini long kukim kaikai na mekim ol narapela wok long haus. Ol i amamas sapos pikinini i askim ol long was long ol bubu pikinini, na ol i stap bel isi sapos ol inap lukautim wanpela liklik gaden, o mekim sampela liklik wok ol i save amamas long mekim.
Tasol sampela ol i laik slip planti aua long san na ol i laik bai ol narapela i mekim ol samting bilong helpim ol. Tasol em bikpela samting long famili i mas helpim ol long mekim sampela wok bambai ol inap i stap amamas na stap longpela taim, na tingting bilong ol i ken wok gut. Hideko i pilim pinis dispela samting. Maski mama bilong em i stap long wilsia, em i bin kisim em i go long ol miting na dispela i kirapim tingting bilong mama na tingting i wok gut. Ol narapela i tok amamas long em na toktok wantaim em. Ol i mekim olsem i go na bihain em i orait long wanpela lapun meri i stadi wantaim em long Baibel. Tupela marit i save lukautim mama i gat sik Alzheimer na ol i kisim em i go wantaim ol long miting Kristen bilong ol. Ol i tok: “Em i save les na em i no laik mekim wanpela samting, tasol taim em i stap long miting, em i amamas. Ol narapela i save mekim gut long em, olsem na em i gat bikpela laik long i kam. Mipela i save ol miting i helpim gut em.”
Sinetsu, em mipela i stori pinis long em, em i stretim rot bilong lukautim tambu mama bilong em. Em i painim wanpela haus klostu long hap em i mekim wok olsem wasman bilong raun. Long olgeta wik, taim em i gat malolo em wantaim meri bilong em i save go stap wantaim mama. Meri bilong em, Kiyoko, i tok: “Mama i pilim olsem em i helpim tru wok bilong mipela. Em i amamas taim man bilong mi i askim em long kukim sampela kaikai em i laikim tumas.”
Helpim Ol Lapun Em Tingting Bilong Ol i No Wok Gut Moa
Sampela papamama, taim ol i wok long go lapun, tingting bilong ol i no wok gut moa olsem bipo, olsem na pikinini i mas lukautim gut ol. Ol i save lusim tingting long de, na taim, na ol tok promis ol i bin mekim. Ating ol i no katim gras bilong ol na wasim klos bilong ol. Na ating ol i lusim tingting long pasin bilong bilas gut na waswas. Planti ol i no save ol i stap we, na sampela i no inap slip long nait. Sampela i save kolim wankain tok planti taim na ol i kros sapos narapela i kamapim popaia bilong ol. Tingting bilong ol i giamanim na paulim ol. Ating ol i tok strong olsem narapela i bin stilim sampela samting bilong ol o ol stilman i wok long brukim haus bilong ol. Bubu mama bilong wanpela famili i gat 4-pela pikinini meri, em i wok long sutim tok long ol olsem ol i mekim pasin pamuk samting. Ol i tok: “Mipela i save, tok bilong em i kranki, tasol mipela i no tingim dispela samting tumas, na mipela i save senisim tok na stori long narapela samting.”—Sindaun 17:27.
Helpim Ol Long i Stap Bel Isi
Pasin bilong i go lapun i gat hevi bilong en, olsem bikpela sik, na no inap wokabaut gut, na tingting planti. Planti ol i ting i stap bilong ol i no gat as bilong en. Ating ol i pilim olsem ol i putim bikpela hevi long ol narapela na ol i tokaut olsem i gutpela sapos ol i dai. Ol i mas save ol narapela i laikim ol, na litimapim nem bilong ol, na ol i laik insait long sampela wok bilong famili. (Wok Pris 19:32) Hisako i tok: “Olgeta taim mipela i save pulim Mama i kam insait long ol toktok bilong mipela na kamapim stori bilong em yet.” Narapela famili i save askim bubu papa long lukautim teks bilong de na bai em i ken pilim olsem em i no stap nating tasol.
Yumi mas wok long holim stretpela tingting long ol lapun. Ol lapun i stap long bet tasol, ol i kros sapos ol i ting narapela i daunim ol. Kimiko i stap wantaim tambu mama bilong em i no inap wokabaut samting, na em i tok: “Tingting bilong Mama i wok gut, na taim mi no givim bel long lukautim em o mi mekim tok olsem mi daunim em, em i save.” Hideko tu i bin wok long stretim tingting bilong em yet. Em i tok: “Pastaim mi bel hevi taim mi lukautim tambu mama bilong mi. Mi bin mekim wok painia na nau mi bel hevi, long wanem, mi no inap autim tok long olgeta de olsem bipo. Tasol bihain mi save, mi mas stretim tingting bilong mi. Tru wok bilong go long ol haus na autim tok em i bikpela samting, tasol wok bilong lukautim tambu mama bilong mi, em tu em i lo bilong God mi mas bihainim. (1 Timoti 5:8) Mi save, sapos mi laik i stap amamas, mi mas wok long laikim moa yet ol narapela na pilim hevi bilong ol. Taim mi no givim bel long mekim ol samting na mi mekim tasol olsem wanpela wok mi mas mekim, bel bilong mi i gat tok. Wanpela taim, bagarap i painim mi yet na mi kisim pen, na dispela i mekim na mi tingim tambu mama na pen em i save kisim. Bihain long dispela, mi no hatwok olsem bipo long mekim gut long em na pilim hevi bilong em.”
Tingim Man i Gat Wok Long Lukautim Ol Narapela
Bikpela samting i olsem: Ol man i gat wok long lukautim ol lapun, yumi mas tokim ol yumi pilim tru bikpela wok ol i mekim. (Lukim Sindaun 31:28.) Planti meri i mekim yet wok bilong ol, maski ol narapela i tok tenkyu long ol o nogat. Tasol taim yumi tingim ol bikpela wok ol i mekim, i stret yumi tok tenkyu long ol. Ating ol i mas lusim bikpela hap taim moa long klinim haus samting, na wasim klos, na kukim kaikai. Ol i mas kisim ol lapun i go long haus sik o long dokta, na tu, ol i mas givim kaikai long ol na wasim ol. Wanpela meri, longtaim em i lukautim tambu mama bilong em, em i tok: “Mi save, man bilong mi i hatwok long tokaut olsem em i pilim tru ol samting mi mekim, tasol long ol narapela rot em i kamapim bel bilong em.” Sotpela tok, olsem tenkyu, dispela i mekim na yumi amamas long yumi bin mekim ol dispela wok.—Sindaun 25:11.
I Gat Gutpela Pe Tu Bilong En
Planti famili i bin lukautim lapun papamama bilong ol inap planti yia pinis ol i tok, dispela i bin helpim ol long kisim sampela gutpela pasin Kristen olsem: karim hevi, na daunim sampela laik bilong skin, na laikim ol narapela na no ken tingim ol yet tasol, na wok strong, na pasin daun, na mekim gutpela pasin sori long narapela. Na dispela i bin helpim planti famili long pas gut moa wantaim. Na tu, ol i gat planti taim bilong toktok wantaim papamama na save gut long ol. Hisako i stori long tambu mama bilong em olsem: “Mi amamas long harim stori bilong em—kain kain samting i bin painim em, na em i bin karim planti hevi. Nau mi save gut long em na long sampela pasin bilong em bipo mi no bin save long en.”
Kimiko i bin lukautim papamama na bubu mama bilong man bilong em, em bubu mama i stap long bet tasol. Kimiko i tok: “Taim mi no kirap stadi yet long Baibel, mi laik katim marit bilong mi na lusim dispela hevi. Tasol bihain, mi kaunim Jems 1:27 i tok yumi mas lukautim ‘ol meri, man bilong ol i dai pinis, na yumi mas helpim ol long karim ol hevi bilong ol.’ Mi amamas long mi bin givim bel long mekim olsem, long wanem, famili i no gat rot nau bilong toktok planti long bilip bilong mi. Na bel bilong mi i no gat tok.” Narapela man i tok: “Mi yet mi bin lukim ol samting nogut em sin bilong Adam i bin kamapim, na nau mi save moa yet olsem i mas i gat wanpela Man bilong baim bek yumi.”
Olsem wanem? Liklik taim bai narapela long famili bilong yu i kam sindaun wantaim yu? O bai yu go sindaun wantaim lapun papamama long haus bilong ol? Ating yu pret liklik, a? Bai yu gat bikpela wok na yu mas senisim sampela samting long sindaun bilong yu. Tasol sapos yu mekim olsem, ating bai yu kisim gutpela pe.
[Piksa long pes 24]
Ol lapun i mas save ol narapela i laikim ol na litimapim nem bilong ol