Dispela Kaikai Em Bikpela Samting Yu Mas Tingim?

AI BILONG mun i bikpela na gutpela lait bilong en i holim graun. Long wanpela rum long Jerusalem, 12-pela man i sindaun long tebol. Elevenpela man i putim gut yau long tok bilong Tisa bilong ol. Em i laik kirapim wanpela nupela bung na dispela em i bikpela samting tru. Olsem na ol i putim gut yau long tok bilong em. Baibel i tok:

“Jisas [Krais] i kisim wanpela bret, na i tenkyu long God na i brukim, na i givim long ol disaipel. Na em i tok, ‘Yupela kisim na kaikai. Dispela em i bodi bilong mi.’ Na em i kisim wanpela kap wain, na i tenkyu long God, na i givim long ol, na i tok, ‘Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong tekewe sin bilong planti manmeri. Mi tokim yupela, mi no ken dring wain moa inap long taim mi dringim nupela wain wantaim yupela insait long kingdom bilong Papa bilong mi.’ Orait ol i singim wanpela song, na ol i lusim taun na i go long maunten Oliv.”​—⁠Matyu 26:​26-30.

Dispela samting i kamap taim san i go daun pinis long namba 14 de bilong mun Nisan bilong ol Juda long yia 33. Jisas wantaim ol aposel i mekim pinis Pasova bilong tingim taim God i bin kisim bek ol Israel long kalabus bilong Isip planti handet yia paslain long Krais. Krais i rausim pinis Judas Iskariot, em i redi long kamapim Jisas long ol birua. Olsem na 11-pela aposel tasol i stap wantaim Jisas.

Dispela kaikai ol i mekim, em i no kaikai bilong Pasova. Em i wanpela nupela samting, na bihain ol i kolim Kaikai Bilong Bikpela. Jisas i tokim lain bilong em long dispela kaikai, olsem: “Yupela i mas mekim olsem bilong tingim mi.” (Luk 22:​19, 20; 1 Korin 11:​24-26) Bilong wanem Jisas i tok olsem? Na olsem wanem dispela bung em i bin kirapim long bipo tru em i wanpela samting yu mas tingim?