Yu Inap i Stap Hamas Yia?

YUMI save, i gat ol hevi i save painim yumi. Tasol planti manmeri i amamas long ol i stap laip. Yumi no laik i dai kwik, olsem long taim yumi pikinini yet; yumi laik i stap longtaim. Tasol i dai i save painim yumi. Olsem wanem? I gat rot bilong abrusim?

Yu ting yumi inap surikim taim bilong i dai? Yu ting yumi inap skruim hap taim moa long laip bilong yumi?

Skruim Sampela Yia Moa?

Long 1990 wanpela nius i tokaut olsem nau ol inap skruim sampela yia moa long laip bilong ol man, na bai ol man i stap ‘inap 110 yia.’ Ating ol i tingim tok bilong Moses long Baibel, em i tok yumi save stap inap 70 o 80 yia tasol. Moses i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol . . . mipela i save hatwok na painim hevi tasol. Dispela olgeta yia i pinis kwiktaim, na mipela tu i go pinis.” (Song 90:10) Baibel i tok yumi save stap 70 o 80 yia. Tasol long nau yumi ken ting long i stap hamas yia?

Wanpela ripot bilong Wol Helt Oganaisesen long 1992 i tok, ol man long olgeta hap i save stap inap 65 yia (averes). Ol i ting, insait long 5-pela yia ol inap skruim 20 mun moa long dispela. Long wanem ol i ting, “bai ol inap helpim planti pikinini na ol i no ken i dai taim ol i bebi yet.” Tasol wanpela nius (Time) i tok, sapos ol dokta inap wokim mirakel na bai i no gat wanpela man i dai taim em i no winim yet 50 krismas, dispela bai skruim “3-pela yia na hap tasol” long ol yia (averes) bilong ol man long Amerika.

Bilong Wanem Yumi Stap Sotpela Taim Tasol?

Wanpela dokta (Jan Vijg bilong Institute of Experimental Gerontology long Holan) em i tok, yumi inap kisim sampela sik long papamama, na olsem tasol yumi kisim sampela jin (gene) long papamama, em ol i mekim na skin bilong yumi i go lapun. Sampela saveman i ting, taim yumi wok long i go lapun, sapos yumi inap senisim “ol jin i bosim ol narapela jin” na putim nupela, bai yumi inap i stap longtaim moa. Tasol sampela i tok, dispela ‘wanpela samting tasol’ i no inap pinisim pasin bilong i go lapun.

Ol saveman bilong saiens i tok, “i olsem i gat lo long ol liklik hap skin long bodi bilong ol man i makim hamas yia ol i ken i stap na ol i no inap winim dispela mak.” (Nius Time) Na ol man i ting yumi “bilong i stap laip” ol i tok, “samting i no stret i save kamap.” Olsem na yumi save stap inap 65, o 70, o 80 yia samting na laip bilong yumi i “pinis kwiktaim,” olsem Baibel i tok.

Tasol aposel Kristen Pol i tok, ‘dai, em laspela birua, em bai pinis.’ (1 Korin 15:26) Dai bai pinis olsem wanem? Sapos em i pinis bihain, tasol wanpela famili bilong yumi i dai long nau, olsem wanem yumi ken karim dispela hevi?